ဇာဘုရင် လက်အောက် ဒီဇင်ဘာ အိမ်ထောင်ရှင် အမျိုးသမီးများ တော်လှန်ရေး (၄)
ကက်ယာ မင်းသမီးသည် တောပုန်းဓါးမြ များ ရန်မှ လွတ်ကင်းခဲ့သော်လည်း ဆိုက်ဘေးရီယား၏ အအေးဒဏ်မှ ရှောင်ရှားနိုင်စွမ်း မရှိပဲ အဖျားဝင်လာခဲ့သည်။ သူမ ၏ ရထားလုံးလည်း ပျက်စီးသွားခဲ့ပြီး၊ လမ်းတွင် တွေ့သော လယ်သမား တဦး၏ ခနော်နီ ခနော်နဲ့ လှည်း ကလေး ဖြင့် ခရီးဆက်ခဲ့ရသည်။
သူမသည် ခင်ပွန်းရှိရာ ယာကူစကာ မြို့သို့ ၁၈၂၆ ခုနှစ်၊ စက်တင်ဘာလ တွင် ရောက်ရှိလာခဲ့သည်၊ သူမအဖို့ ဒုက္ခခံလာရကျိုး နပ်သည်ဟု ဆိုရမည် ဖြစ်သည်။ ခင်ပွန်းဖြစ်သူ အဖို့ သူမအား တွေ့လိုက်ရ၍ စိတ်ဓါတ်ခွန်အား များ ပြန်လည် တက်ကြွလာခဲ့သည်ကို တွေ့လိုက်ရ၍ ဖြစ်သည်။ ဒီဇင်ဘာလ အတွင်း ဒီဇင်ဘာ သူပုန်ကြီး များ၏ အိမ်ထောင်ရှင်မ အမျိုးသမီး တဦး ထပ်ရောက်လာ၍ အခြေအနေများ အနည်းငယ် တိုးတက်လာခဲ့သည်။
ထပ်ရောက်လာသူ သည် အသက် ၂၁ သာ ရှိသေးသည့် မာရီယာ ဗိုကွန်စကာရာ ဆိုသူ ဖြစ်သည်။ (ပုံတွင် ရှု) သူမသည် ဒီဇင်ဘာ ပုန်ကန်မှုကြီး ဖြစ်ပွားပြီး တလ အကြာ ဇန်နဝါရီလထဲတွင် သားဦးကလေး မွေးဖွားခဲ့ပြီးလည်း ဖြစ်ပေသည်။
သူမ၏ ဖခင်သည် နပိုလီယံ စစ်ပွဲ အတွင်းက ထင်ရှား ကျော်ကြားခဲ့သော သူရဲကောင်း ဗိုလ်ချုပ်ကြီး နီကိုလိုင် ယာရက်စကီး ဖြစ်သဖြင့် မင်းပေါက်စိုးပေါက် အနွယ်တော်များလည်း ဖြစ်သည်။
ယာရက်စကီးသည် လစ်ဘရယ် အတွေးအခေါ် သမားတဦး ဖြစ်ပြီး ညဏ်အလင်းပွင် ကာလ အတွင်း ထွက်ပေါ်လာသော ဆင်ခြင်တုံတရား နှင့် ယှဉ်သည့် အသိလိမ္မာတရားများကို သဘောကျ လက်ခံထားသူလည်း ဖြစ်သည်။ သူ့အိမ်တော်သို့လည်း စိန့်ပီတာစဘတ်ရှိ ထိတ်တန်း လစ်ဘရယ် တွေးခေါ်ပညာရှင်များ အား ဖိတ်ကြား၍ ဧည့်ခံကျွေးမွေးလေ့ ရှိသည်။ ထိုသို့ ဝင်ထွက်သွားလာသူများထဲတွင် ကဗျာစာဆိုကြီး အလက်ဇန်ဒါး ပွတ်ရှ်ကင့် လည်း ပါဝင်သည်၊ သူသည် မာရီယာ ဗိုကွန်စကာယာ၏ အလှတွင် ယစ်မူးခဲ့သည်။ သို့သော်လည်း မာရီယာသည် ဗိုလ်ချုပ်တဦး ဖြစ်သူ ဆာဂျေ ဗိုကွန်စကီး နှင့် လက်ဆက်ခဲ့သည်။
ဗိုကွန်စကီးတို့ ဇနီးမောင်နှံ ပြန်လည် ပေါင်းဆုံနိုင်ခဲ့ခြင်းသည် ဒီဇင်ဘာ သူပုန်ကြီးများ ၏ အိမ်ထောင်ရှင် အမျိုးသမီးများ အကြားတွင် လွန်စွာ အရေးပါသည့် ဝိသေသ လက္ခဏာတရပ် ဖြစ်လာခဲ့ရသည်။ မာရီယာသည် ခြေကျင်းဝတ်တွင် သံကြိုးတန်းလန်း နှင့် ခင်ပွန်းဖြစ်သူကို တွေ့မြင်လိုက်ချိန်တွင် ဝမ်းသာအားရ ပွေ့ဖက်ခြင်းမျိုး မလုပ်သေးပဲ မြေကြီးပေါ် ဒူးထောက်၍ ခင်ပွန်း၏ သံခြေကျင်းများကို အမြတ်တနိုး ငုံ့နမ်းခဲ့ရှာသည်။
ထိုဖြစ်စဉ်သည် ရုရှားတို့၏ ကိုးကွယ် ယုံကြည်မှု ပိုင်းအရ ဆိုလျှင် သာမန် ဟု မည်သို့မျှ သဘောထား၍ မရပေ။ မာရီယာသည် သူမ၏ ခင်ပွန်းအား ယေရှူ့သခင်ကဲ့သို့ သတ်မှတ်ကာ သူ၏ သာဝက တဦး အဖြစ် အသိအမှတ် ပြုရန် တောင်းဆိုလိုက်ခြင်းပင် ဖြစ်သည်။
သူမ၏ မှတ်တမ်းထဲတွင်လည်း မာရီယာသည် သူနှင့် ခင်ပွန်း ဖြစ်သူတို့အား အရေးတော်ပုံကြီး၏ အာဇာနည် များ အဖြစ် သတ်မှတ် သုံးနှုန်းလာခဲ့သည်။ "မိမိတို့၏ အနစ်နာခံမှုသည် စင်ကြယ် မြင့်မြတ်ကြောင်း၊ မိမိတို့သည် ဘုရားသခင် နှင့် အရာ အားလုံးကို စွန့်လွှတ်ခဲ့ကြသူများ" ဖြစ်ကြောင်း ရေးသားခဲ့သည်။
ဤသို့ဖြင့် စနစ်တကျ စီစဉ် ထားခြင်းမရှိပဲ ဖြစ်သလို စခဲ့သည့် တော်လှန်ရေးသည် အားလုံး အတွက် အထွတ်အမြတ် ထားရမည့် အရေးတော်ပုံကြီး ဖြစ်လာခဲ့သည်။
မိမိတို့ အိုးအိမ် စည်းစိမ် ခံစားခွင့်များကို စွန့်လွှတ်ခဲ့ခြင်းများသည် ဒီဇင်ဘာ အိမ်ထောင်ရှင် အမျိုးသမီး များ အတွက် ရှေ့လျောက် တွေ့ကြုံရမည့် ဒုက္ခသုက္ခများ၏ အစပျိုး မျှသာ ရှိပေသေးသည်။
မာရီယာ အဖို့က နှလုံးသည်းပွတ် ပူဆွေးစရာ သတင်းဆိုးကြီးက ဆိုက်ဘေးရီယားသို့ ရောက်ပြီး တနှစ် အကြာတွင် ဆိုင်းမဆင့် ဗုံမဆင့် ဆိုက်ရောက်လာခဲ့သည်။ ဤသည်က သူမ၏ သားလေးသည် စိန့်ပီတာ စဘတ် မြို့တော်တွင် ကွယ်လွန်သွားပြီ ဆိုသည့် သတင်းပင် ဖြစ်သည်။
သူမ၏ စိတ်ဒဏ်ရာကို ခင်ပွန်းဖြစ်သူ မရိပ်စားမိအောင် တတ်နိုင်သမျှ ဖုံးကွယ်ရန် ကြိုးစားသည့် အနေနှင့် ဘဝတူ ဒီဇင်ဘာ တော်လှန်ရေး အိမ်ထောင်ရှင်များ နှင့် ပို၍ စည်းလုံးလာခဲ့သည်။