ဇာဘုရင် လက်အောက် ဒီဇင်ဘာ အိမ်ထောင်ရှင် အမျိုးသမီးများ တော်လှန်ရေး (၂)
ဇာဘုရင် နီကိုလပ်စ်သည် နောက်ပိုင်း နှစ်ပေါင်း သုံးဆယ်ကြာ အုပ်ချုပ်ခဲ့သည့် ကာလ အတွင်း ဥရောပ ၏ ပုလိပ်သားကြီး သဖွယ် ပြုမူလာခဲ့သည်။
တော်လှန်ရေး များ နှင့် တော်လှန် ပုန်ကန်လိုသည့် အတွေးအခေါ် များကို လုံးဝဥသုံ ဖိနှိပ်သွားမည်ဟု ပိုင်းဖြတ်ထားသူပီပီ သူ၏ အာဏာကို ကျားကန် နိုင်ရန် အမျိုးသားရေး ဝါဒ ကို ဇောင်းပေးလာပြီး၊ တတိယ ဌာန ဟု အမည်ပေးထားသည့် လျို့ဝှက် ပုလိပ် အဖွဲ့ကို ဖွဲ့စည်းပြီး တော်လှန်ရေး အတွေးအခေါ်များကို ချေဖျက်ရန် ပြုလုပ်လာခဲ့သည်။
ပထမဦးဆုံး အနေဖြင့် နီကိုလပ်စ်သည် ဒီဇင်ဘာ လှုပ်ရှားမှု နှင့် ပတ်သက်၍ တခွန်းတပါဒမျှ မဟနိုင်ရန် ပိတ်ပင်ခဲ့သည်။ ဒီဇင်ဘာ သူပုန် ခေါင်းဆောင် များထဲမှ ငါးဦးသည် လည်း ကြိုးစင်တွင် အသက်ပျောက်ခဲ့ရသည်။ အတန်အသင့် အပြစ်ရှိသူများကို မူ ရာထူး ချ အရေးယူခဲ့သည်။ သို့သော် ပြစ်ဒဏ်သင့်သူ ၁၂၁ ဦး အနက် ၉၀ ခန့်သည် ဆယ်နှစ်နီးပါးမျှ အလုပ်ကြမ်း များ ခိုင်းစေခံခဲ့ရသည်။ ၁၈၂၆ ခုနှစ် နွေရာသီ အရောက်တွင် အားလုံးသည် ဆိုက်ဘေးရီးယားသို့ နယ်နှင်ဒဏ် ပေးခံခဲ့ရပြီး ဂုဏ်သိက္ခာမဲ့စွာ ညိုးညိုးနွမ်းနွမ်း နေထိုင်ခဲ့ကြရသည်။
ထိုအကြောင်းနှင့် စပ်လျှင်းပြီး လေ့လာသူတဦးမှ "ဖိနပ်ချုပ်သမား ဖြစ်ချင်ခဲ့ကြသော ရုရှား အရှင်သခင်များ" ဟု ဒီဇင်ဘာ သူပုန်များဟု ကင်ပွန်းတပ်ခဲ့သည်။
သို့သော်လည်း ဒီဇင်ဘာ ပုန်ကန်မှုကြီးသည် ကာလ ရှည်ကြာစွာ ဖြစ်ပေါ်ခဲ့သော ရုရှား တော််လှန်ရေး သမိုင်းတွင် မေ့ပျောက်၍ မရသော အဖြစ်အပျက်ကြီး အဖြစ်သာမက နှောင်းလူများ အတွက် စိတ်အားတက်ဖွယ်၊ အတုယူဖွယ် အဖြစ် သမိုင်းတွင် ကျန်ရစ်ခဲ့ပေသည်။
ဒီဇင်ဘာ သူပုန်ထမှုကြီးအား ကျန်ရစ်ခဲ့သော ဇနီးသည်များက ဆက်လက်ဦးဆောင်လာခဲ့မှုကြောင့် ခင်ပွန်းများ၏ အရေးတော်ပုံကြီး သည် ရုရှားတို့၏ ရာဇဝင်တွင် မှတ်တမ်းတင်နိုင်ခဲ့ခြင်းလည်း ဖြစ်ပေသည်။
အမျိုးသမီး ဆယ်တစ်ရောက်သည် ၎င်းတို့၏ ခင်ပွန်းများ၊ ချစ်သူများ၊ အကို မောင်ဖွား များ နှင့် အတူ ဆိုက်ဘေးရီးယား သို့ လိုက်ပါလာခဲ့ကြသည်။ သူတို့အားလုံးသည် ခြေမွေးမီးမလောင် လက်မွေး မီးမလောင် ချမ်းချမ်းသာသာ နေထိုင်ခဲ့ကြရသည့် မိသားစု အသိုက်အဝန်းကို အပြီးအပိုင် စွန့်လွှတ်ခဲ့ကြသူများလည်း ဖြစ်သည်။
ထိုအမျိုးသမီးများ အားလုံးသည် နောင်တွင် ရုရှား၏ နိုင်ငံရေး နှင့် လူမှုရေး ဖြစ်စဉ်ကြီးတွင် စံနမူနာ ပြုလောက်စရာ အာဇာနည် အမျိုးသမီးများ ဖြစ်လာခဲ့၍ သမိုင်းက မသိကျိုးကျွန် ပြုမနေနိုင် တော့ ပဲ ဒီဇင်ဘာ အိမ်ထောင်ရှင် အမျိုးသမီးများ အဖွဲ့ဟု မှတ်တမ်းတင်ပေးခဲ့သည်။ ၎င်းတို့၏ စွန်လွှတ် အနစ်နာခံခဲ့မှုများအား ရုရှား ကဗျာစာဆိုများ က တခမ်းတနား ရေးဖွဲ့စပ်ဆိုခဲ့ကြပြီး၊ နောက်ပိုင်း ပေါ်ပေါက်လာမည့် ရုရှား တော်လှန်ရေးသမား များ အတွက်လည်း လိုက်နာရမည့် ကျင့်ဝတ်များ အတွက် စံနမူနာ ပြ ဖြစ်လာခဲ့သည်။
ထို့အတွက် ရုရှား သမိုင်းတွင် ဦးဦးဖျားဖျား ပေါ်ပေါက်လာခဲ့သည့် တော်လှန်ရေးကြီး၏ နောက်ပိုင်း သက်ရောက်မှုများကို အတွေးအခေါ် သဘောတရားထက် ၎င်းတို့၏ တမူထူးခြားသော ပင်ကို အရည်အသွေးများကို ဦးစားပေး လေ့လာဆန်းစစ် သွားမည် ဖြစ်သည်။ အဘယ်ကြောင့် ဆိုသော် ဒီဇင်ဘာ သူပုန်ကြီးများ နှင့် ၎င်းတို့ကို အားကျခဲ့ကြသည့် တော်လှန်ရေး မျိုးဆက်များ ၏ ရင်ထဲ အသဲထဲတွင် နိုင်ငံရေး နှင့် လူမှုရေး ကဏ္ဍ များအား မှောက်လှန်ပစ်မှ ဖြစ်မည်ဟူသော တော်လှန်ရေး သဘောတရားများ အရှိန်တညီးညီး တောက်လောက်ခဲ့ကြခြင်း မရှိသောကြောင့် ဖြစ်သည်။
သူတို့အားလုံးသည် တော်လှန်ရေး အသွင်သဏ္ဍန်ထက် တော်လှန်ရင်း သေရသည်က မြတ်သည်ဟူသော စရိုက်ကို ပုံဖေါ်ခဲ့ကြသည်။
ရုရှား သူကောင်းမျိုးနွယ်ဝင် အိမ်ထောင်ရှင် အမျိုးသမီးများသည် ဇာဘုရင်တပ်များ ဥရောပ အနောက်ပိုင်းသို့ စစ်ချီရာတွင် အတူ လိုက်ပါသွားလေ့ မရှိကြပဲ အိမ်တွင် ကျန်ရစ်ခဲ့သူများသာ ဖြစ်သည်။ သူတို့အားလုံးသည် ကျောင်းသင် ပညာရေးမျိုး မရှိကြပဲ အိမ်တွင်ပင် ပြည်ပမှ ဆရာများကို ကြေးကြီးပေးငှားကာ သင်ယူလေ့ရှိသည်။
ထိုအထဲတွင် သူတို့အားလုံး၏ စိတ်တွင် သံမှိုစွဲသလို ထင်ကျန်နေသည်က ရုရှား အော်သိုဒေါ့ ဘုရားကျောင်းများ၏ ဓမ္မတရားများ ဖြစ်သော နှိမ့်ချဆက်ဆံတတ်ခြင်း နှင့် စွန့်လွှတ် အနစ်နာခံလိုစိတ်များပင် ဖြစ်သည်။
ထို့သို့ အခြေခံ စိတ်ထားများ ရှိနေ၍လည်း လက်ရှိ ဘဝကို အလွယ်တကူ စွန့်လွှတ်ကာ လူနေ၍ မဖြစ်လောက်အောင် ပြင်းထန် ဆိုးရွားလှသည့် ဆိုက်ဘေးရီးယား သို့ နယ်နှင်ခံခဲ့ရသည့် ခင်ပွန်း၊ မောင်ဘွား ချစ်သူများ နောက်သို့ ကောက်ကောက်ပါအောင် လိုက်လာနိုင်ခဲ့ကြခြင်းလည်း ဖြစ်သည်။