Frontier Myanmar
Q: ဆရာကို ဘာကြောင့် ဖမ်းတယ်လို့ ထင်လဲ။
A: ဒေါ်စု နဲ့ ဝန်ကြီး အချို့ကို ပစ်မှတ်ထား တိုက်ခိုက်နိုင်မယ့် လမ်းကြောင်းရှာတာပေါ့ဗျာ၊ ဒေါ်စု ဟာ နိုင်ငံခြားသား တွေရဲ့ ဩဇာ အကြီးအကျယ် လွှမ်းမိုး ခံနေရတယ် ဆိုတာ သက်သေပြချင်နေကြတာကိုး။
ဒုတိယ အကြောင်းက ပြုပြင်ပြောင်းလဲရေးဗျ၊ ကျွန်တော်လုပ်နေတဲ့ ဘဏ်လုပ်ငန်း ကဏ္ဍတွေက သူတို့ စစ်တပ်ရဲ့ အဖွဲ့အစည်း အချို့ ကို အတော်လေး ထိခိုက်စရာ ရှိလာနေတယ်၊ သူတို့ ရဲ့ ငွေကြေး ပိုင်းတွေမှာ တရားမဝင် လုပ်ထားတာ တွေ ရှိနေတော့ နီးကပ်လာနေတာကို ပြန်တွန်းထုတ်ချင်တဲ့ သဘောပေါ့ဗျာ။
နောက်ထပ် တကြောင်းက ကျွန်တော်က ကိုဗစ်ကြောင့် လေယာဉ်လိုင်းတွေ ပိတ်ထားတာ တွေ ရှိနေတော့ ရန်ကုန်မှာပဲ ရှိနေလို့ သူတို့ အတွက် လွယ်သွားလို့ပဲ၊ အခြားလူတွေကိုလည်း ဖမ်းချင်မှာပဲ၊ နိုင်ငံခြားသားတွေ ကို မက်ဆေ့ခ်ျ ပေးချင်လို့ ကျွန်တော်ကို ဖမ်းလိုက်တာမျိုးပဲ။
Q: သူတို့စိတ်ထဲမှာ တကယ်ပဲ ဒေါ်အောင်ဆန်းစုကြည် အပေါ် နိုင်ငံခြားသား ဩဇာလွှမ်းနေမှာကို ယုံမှားသံသယ လွန်ကဲနေတာလား၊ ဒါမှမဟုတ် နိုင်ငံရေး ပြိုင်ဖက်တယောက်ကို ရှင်းထုတ်ပစ်ချင်တာ မျိုးလား။
A: နှစ်ခု စလုံးပဲဗျ။ သူတို့နဲ့ ပတ်သက်ပြီး အတော်လေး ကို သိသာထင်ရှားလာခဲ့တာက စစ်ကောင်စီဟာ ခေတ်သစ် စီးပွားရေး အပေါ် နားမလည်ကြဘူး ဆိုတာပဲ၊ သူတို့ စိတ်ထဲမှ ထီးထီးကြီး နေလိုက်ရင် ဖြစ်တာပဲလို့ တကယ်ကို ထင်နေကြတာဗျာ၊ အဲ့လို လုပ်လို့က ဆင်းရဲတွင်းထဲ အမြန်ဆုံး တန်းရောက်သွားမယ့် နည်းလေဗျာ၊ သူတို့မှာ ဘယ်လို တသီးတခြား နေသွားရမလဲ ဆိုတာတော့ သိတယ်ဗျ၊ အခြား အာရှ ကျားတွေ စီးပွားရေး ဖွံ့ဖြိုးအောင် လုပ်နေကြတာတွေက မြန်မာနဲ့ မဆိုင်ဘူး၊ အပိုအလုပ်တွေလို့ ယူဆထားကြတာကိုး။ အဲ့လို လိုက်လုပ်ရင် သူတို့ လုပ်ငန်းတွေ ထိခိုက်လာဖို့ ရှိနေတော့ စီးပွားရေး ကို တင်းတင်းကျပ်ကျပ် ထိန်းချုပ်တဲ့ နည်းမျိုးနဲ့ပဲ သွားဖိုရှိ တော့တယ်၊ မြန်မာကို နံရံ လေးဖက်လေးတန် ကာမှ ပဲ ဖြစ်တော့မယ်၊ နောက်ပြီး သူတို့ရဲ့ အတ္တနဲ့ အကောင်းမမြင်နိုင်တဲ့ စိတ် ကလည်း အတိုင်းအတာ တခုထိ ရှိနေတယ်။
Q: ဆရာ့ကို စစ်လားဆေးလား လုပ်ကြတဲ့ လူတွေက ဘာတွေ သိချင်နေကြတာလဲ၊ ခင်ဗျားဆီက သူတို့ အကျိုးရှိရာ ရှိကြောင်း တခုခု မယ်မယ်ရရ ထွက်လာမယ်လို့ မျှော်လင့်နေကြတာမျိုး ရှိလား။
A: သူတို့ကတော့ဗျာ၊ ကျွန်တော်လို့ နိုင်ငံခြားသား တယောက်က နောက်ကွယ်ကနေ ကြိုးဆွဲနေတယ် ဆိုတာ ပေါ်လွင်စေချင်တာဗျ၊ ကျွန်တော်က ကြိုးဆွဲဆရာ၊ စပိုင် အကြီးစားကြီးပေါ့ဗျာ၊ ဒါမှလည်း နောက်ကျရင် မြန်မာကို ဖေါက်ပြန်တဲ့ နိုင်ငံခြားသားတွေ ရန်က ကာကွယ်ရမယ် လို့ ပြောလို့ရမှာကိုး၊
ပြဿနာက မေးသာမေးနေရတဲ့ ဘာကိုမှ နားမလည်ကြတဲ့ လူတွေ ဖြစ်နေတာပဲ၊ မှတ်မိသေးတယ်၊ ကျွန်တော်ကို နိုင်ငံတကာ ငွေကြေးရံပုံငွေ အဖွဲ့ IMF နဲ့ ဆက်သွယ် တယ်ဆိုပြီး စွပ်စွဲလာတယ်၊ အဲ့တာကလည်း အမှန်ပဲ၊ ကျွန်တော်တို့ အတူ လက်တွဲလုပ်ခဲ့ကြတာကိုး၊ ခက်တာက IMF ဆိုတာ ဘာမှန်းမသိကြဘူး၊ သူတို့က IMF ဆိုတာ ဂျော့ခ်ျ ဆိုရိုး ပဲ ဆိုပြီး မေးနေတာကိုး၊ ကျွန်တော်က မဟုတ်ဘူး ဆိုပြီး ရှင်းပြရတယ်၊ ရှင်းပြလေ၊ သူတို့အတွက် ပိုရှုပ်လေ ဖြစ်လာပြီး ကျွန်တော်က သူတို့ လိုက်မမှီနိုင်အောင် ပြောနေတဲ့ လူတတ်ကြီး၊ မြန်မာအရေး ဝင်ပါနေတဲ့ လူရှုပ် နိုင်ငံခြားသားတွေကြောင့် လို့ ထင်ကုန်ကြရော။
Q: ဆရာ ပြောတာကို သူတို့ ကျေနပ်ကြရဲ့လား၊ ဘာပဲဖြစ်ဖြစ် တရားခွင်က လည်း အလိမ်အညာပဲ ဆိုတာ သိထားကြတော့ ပြောချင်တာ ပြောဆိုပြီး ထား တာလား
A: နောက်ကဟာက ပိုပြီး ဖြစ်နိုင်တယ် ဘရားသား၊ မေးနေတာတွေကလည်း မဖြစ်လို့သာ လုပ်နေကြရသလိုမျိုး၊ သူတို့ လိုချင်တာ ထွက်မလာလည်း လုပ်ကြံ ဖန်တီးကြမှာပဲ၊ ကျွန်တော်ကို ရုံးတင်တဲ့ စွဲချက်ကလည်း နိုင်ငံတော် လျို့ဝှက်ချက် ဥပဒေ ဆိုတာကြီးနဲ့လေ၊ ကျွန်တော်က နိုင်ငံခြားသားလေ၊ မြန်မာ အစိုးရ ဝန်ထမ်းလည်း မဟုတ်ဆိုတော့ ဒီဥပဒေနဲ့ က ဘယ်လို အကျုံးဝင်မှလည်း၊ ဒါလည်း မရဘူး၊ မရရအောင် စွဲချက်တင်တော့တာပဲ၊ နောက်ဆုံး ကျွန်တော်က သတင်းအချက်အလက်တွေ ပို့ခဲ့လားဆိုတော့လည်း တရားရုံးမှာ တရားလို ဖက်က သက်သေမပြနိုင်ဘူး၊ ကျွန်တော် မပို့ခဲ့ပါဘူးလို့ သူတို့ ဝန်ခံရတော့တာပဲ၊ အားလုံးက လံကြုတ်တွေ ချည်းပဲကိုး။
Q: ယူဆနေကြတာကတော့ စစ်တပ်ရဲ့ ဘဏ္ဍာရေး ပိုင်းကို ဆရာက ထဲထဲဝင်ဝင် သိထားလို့ သူတို့ကို ထိထိရောက်ရောက် ဒဏ်ခတ်နိုင်အောင် ပစ်မှတ်ထားနိုင် ခဲ့တာလို့ ဆိုတယ်၊ ကျွန်တော် မေးတဲ့ အထဲမှာ အမှန် တွေပါလား။
A: နဲနဲလေးတော့ ပါတယ်ဗျ။ ကျွန်တော်ကို အန္တရာယ် ကောင်လို့ ယူဆထားကြတယ်၊ နောက်ဆုံးတော့လည်း လွှတ်ပေးရတာပဲ၊ သူတို့က ကျွန်တော်ဆီက ထွက်လာတဲ့ သတင်း အချက်အလက်တွေကို တဖက်က အသုံးချစရာ မကျန်တဲ့ အချိန်ကို တမင် အကြာကြီး ထားပြီး စောင့်နေကြတာကိုး၊ အဲ့တာလည်း သေချာပေါက် အကြောင်းတခုပဲ၊ ကျွန်တော်လည်း အကျယ် မပြောချင်ဘူး။
Q: အမျိုးသား ဒီမိုကရေစီ အဖွဲ့ချုပ် လုပ်လာနေတဲ့ ပြုပြင်ပြောင်းလဲရေး အချို့ကို မနှစ်မြို့တာ အပါအဝင် စီးပွားရေး အရ စိုးရိမ်ကြောင့်ကြ လာတာတွေက အာဏာသိမ်းရတဲ့ အကြောင်းတွေထဲ မှာ ကော ပါလား။
A: ကျွန်တော် အနေနဲ့ကတော့ ဒုတိယ လှုံ့ဆော်ခဲ့တဲ့ အချက် လို့ ပြောပါရစေ၊ ပထမဆုံး အကြောင်းက နိုင်ငံရေး အာဏာ ကို အစိမ်းသက်သက် လိုချင်မှုပဲဗျ၊ စီးပွားရေး အကြောင်းက ဒီလောက် အဓိက မကျလှဘူး၊ ဘယ်လိုပဲ ဖြစ်ဖြစ် ပြုပြင်ပြောင်းလဲရေး တွေက သူတို့ကို ထိခိုက်စ ပြုလာနေပြီ၊ NLD သွားနေတဲ့ စီးပွား ရေး မှာ ပွင့်လင်းမြင်သာပြီး အချင်းချင်း ယှဉ်ပြိုင်ရမယ်ဆိုတဲ့ လမ်းကြောင်းကို စစ်တပ်နဲ့ ဆက်နွယ်နေတဲ့ လုပ်ငန်းတွေ၊ စစ်တပ်လက်အောက်က လုပ်ငန်းတွေနဲ့ လူနည်းစု ကြီးပွားရေး လိုလားသူတွေက မမြင်ချင် မတွေ့ချင်ကြဘူး၊
အကယ်၍ NLD အစိုးရသာ ဒုတိယ သက်တမ်း အုပ်ချုပ်ခွင့် ရခဲ့ရင်ဗျာ၊ တကယ့်ကို အရှိန်အဟုန်နဲ့ တိုးတက်လာမှာ အမှန်ပဲ၊ ခင်ဗျားက ကရိုနီတယောက် ဖြစ်တယ်ဆိုပါစို့၊ ဈေးကွက်ကိုလည်း အုပ်စိုးထားနိုင်တဲ့ လက်ရှိ အနေအထားနဲ့ အထာကျနေတဲ့ လူ၊ ဒီအချိန်မှာ သူ့လုပ်ငန်းတွေကို အပြိုင်အဆိုင် ဖြစ်လာအောင် ဥပဒေ ပြဋ္ဌာန်းပြီး လုပ်ပေးတာမျိုး ဖြစ်လာရင်၊ ပိုပြီး လိုက်လျောပေးရမယ်၊ဒါဟာ သူ့အတွက် စိန်ခေါ်မှု ဖြစ်လာတာပဲ။
Q: အာဏာ မသိမ်းမီ ရက်ပိုင်းတွေက NLD အစိုးရ အဖွဲ့ဝင် အချို့က စစ်တပ် အာဏာသိမ်းမယ့် အန္တရာယ် ရှိနေတဲ့ အလားအလာ အပေါ် ဖေါ့ပြီး ပြောဆိုခဲ့တာမျိုးတွေ ရှိနေတယ်၊ ဒါကလည်း လူထု အကြား အထိတ်တလန့်တွေ ဖြစ်လာမှာ စိုးလို့နေမှာ၊ တကယ် သိမ်းပြီလည်း ဆိုရော ဖြစ်လာခဲ့ရင် ဆိုပြီး ကြိုတင် ပြင်ဆင်ထားတာမျိုး မရှိဘူး၊ NLD ဖက်က အဲ့လို ဖြစ်လာမယ်လို့ မထင်ခဲ့တာလား။
A: ကျွန်တော် ဒီကိစ္စကို အရိုးသားဆုံး နဲ့ ပွင့်ပွင့်လင်းလင်းပဲ ပြောပါရစေ၊ ကျွန်တော် တကယ်ပဲ ဖြစ်လာမယ်လို့ မထင်ခဲ့မိဘူး၊ အားလုံးလည်း အသိပဲ ကျွန်တော် အနေနဲ့ အစိုးရ နဲ့ ထိတွေ့ ဆက်ဆံနေရတာ ဆိုတော့ သူတို့ဖက်က ဖြစ်လာမယ်လို့ ထင်နေရင် ကျွန်တော် မသိပဲ နေမှာ မဟုတ်ဘူး၊ ကျွန်တော်လည်း ကိုဗစ် ကြောင့် ပြည်ပ အကြာကြီး သွားနေခဲ့ပြီးမှ မြန်မာပြည်ကို ပြန်ရောက်လာမှာ မဟုတ်ဘူး၊ ကျွန်တော် အနေနဲ့ စစ်တပ် နဲ့ အစိုးရ အကြား ဘာတွေ ပြောကြဆိုကြလဲဆိုတာ တော့ သိခွင့်မရှိဘူး၊ ဒါပေမယ့် သူတို့ အကြားမှာ စိုးရိမ်မကင်း အထိတ်တလန့် ဖြစ်နေတာမျိုး ရှိခဲ့တာကိုတော့ မှတ်မိတယ်၊ ပြဿနာ တခုခုတော့ တက်နေပြီဆိုတာမျိုးတော့ ရှိနေတယ်၊ အာဏာသိမ်းတဲ့အထိ ဆိုတာကိုတော့ ကျွန်တော်ကိုယ်တိုင်လည်း တအံ့တဩ ဖြစ်သွားမိတယ်၊ ကျွန်တော်တင် မကဘူး ကျွန်တော် ပတ်ဝန်းကျင်ကလူတွေပါ အံ့ဩကုန်ကြတယ်။
