၂၀၂၁ ဖေဖေါ်ဝါရီ ၆ ရက်နေ့ မနက်ခင်းတွင် ဟိုတယ် ဝန်ထမ်းတဦး၏ ကျောထဲ စိမ့်သွားစေလောက်သည့် သတိပေး စကား ကို ရှောင်တန်နဲလ် ကြားခဲ့ရသည်။
၎င်းက မနေ့ညတွင် ဟိုတယ်၏ လုံခြုံရေး ကင်မရာ များအား စစ်တပ်မှ ဝင်ရောက် ထိန်းသိမ်းထားပြီး ရှောင်တန်နဲလ် တည်းခိုရာ အခန်းသို့ရွှေ့ပြောင်း တပ်ဆင်ထားပြီး ဖြစ်ကြောင်း ပြောလာခဲ့ခြင်းပင် ဖြစ်သည်။
ရှောင်တန်နဲလ်သည် ဟိုတယ်မှ ထွက်ခွာရန် ဧည့်ကြိုကောင်တာ တွင် ငွေပေးချေနေခိုက် သူ့ထံ ဦးတည် လာနေသော လက်နက်ကိုင် ရဲ အယောက် ၂၀ မှ ၃၀ ခန့်အထိ တွေ့လိုက်ရချိန်တွင် ဘာမှ မတတ်နိုင်ခဲ့တော့ပေ။
အသက် ၅၈ နှစ်ရှိ စီးပွားရေး ပညာရှင် ရှောင်တန်နဲလ်သည် နိုင်ငံတော် အတိုင်ပင်ခံ အတွက် စီးပွားရေး အကြံပေး အဖြစ် ဆောင်ရွက်ပေးနေသူ ဖြစ်သောကြောင့် စစ်ကောင်စီသည် သူအား သူလျှိုဟု စွပ်စွဲကာ ဖမ်းဆီးလိုက်ခြင်းလည်း ဖြစ်သည်။
အကျဉ်းထောင်ထဲ တွင် ဆိုးရွားလှသော အခြေအနေများကို ရက်ပေါင်း ၆၅၀ ခန့် ကြံ့ကြံ့ခံ ရင်ဆိုင်ခဲ့ရပြီး နောက် “အခြားနိုင်ငံများ နှင့် ရင်းနှီးသော ဆက်ဆံရေးကို ထိန်းသိမ်းနိုင်ရန် အတွက် လူသားချင်း စာနာထောက်ထား စိတ်ဖြင့် ပြန်လွှတ်ပေးခဲ့သည်” ဟူသော စစ်ကောင်စီ၏ အပြောဖြင့် လွတ်မြောက်လာခဲ့ရသည်။
ရှောင်သည် ဖမ်းဆီးခံရပြီး နှစ်လတွင် တိုက်ပိတ်ခံခဲ့ရသည်။ ပြတင်းပေါက် မရှိ၊ အိပ်ဖို့ ကုတင်မရှိ၊ အခန်း အလယ် တွင် မူလီစုပ်ထားသော သံကုလားထိုင် တလုံးသာ ရှိသော အခန်းတွင် နေခဲ့ရပြီး စစ်ဆေးမေးမြန်းသည့် အခါတိုင်း သူ၏ လက်နှင့် ခြေကျင်းဝတ်များကို သံကြိုးနှင့် တုပ်နှောင်ခြင်း ခံခဲ့ရသည်။
ရှောင်သည် အခန်းကျဉ်းလေးထဲတွင် ခြေလှမ်းများကို ရေတွက်ရင်း ခေါက်တုံ့ခေါက်ပြန် လျှောက်ကာ နည်းလမ်း ပေါင်းစုံကို စဉ်းစားနေမိခဲ့သည်။ ထိုအထဲတွင် အမေရိကန် သမ္မတ များ၏ အမည်၊ ဩစတေးလျှ ဝန်ကြီးချုပ် များ၏ အမည်များကိုပါ စဉ်းစားရေရွတ်ရင်း အကြောက်တရားကို ဖြေဖျောက်၍ ရလိုရငြား ဦးနှောက်ကို အလုပ် ပေးထားခဲ့ရသည်။ သူ့အနေဖြင့် မည်သည့် အမှားမျှ လုပ်ခဲ့ခြင်း မရှိမှန်း သိနေသော်လည်းကြောက်စိတ်များက အချိန်တိုင်းလိုလို စိမ့်ဝင်လာခဲ့ရသည်ဟု ဩစတေးလျှ ရုပ်သံ ABC နှင့် တွေ့ဆုံခန်းတွင် ပြောပြခဲ့သည်။
နောက်ပိုင်းတွင် သူ့စိတ်ကိုသူ ပြန်လည် ထိန်းလာနိုင်ခဲ့ပြီး ပြင်ပမှ သူ့အား လွတ်မြောက်အောင် ပံ့ပိုး ပေးနေသည် ကို သိလာခဲ့သည်။ သူ့အဖို့ လက်ရှိ အခြေအနေကို ကျော်ဖြတ်နိုင်ရန် ကြံ့ကြံ့ခံ နေနိုင်မှ ဖြစ်မည်ကို လည်း သဘောပေါက် လာခဲ့မိသည်။
သူ့ကို မကြာခင် ပြန်လွှတ်ပေးနိုင်သည်ဟု အကောင်းဖက်မှ ရှုမြင်လာမိသည်။
မူလက သူ ကဲ့သို့ အတော်အသင့် လူသိများသူ နိုင်ငံခြားသား တဦးအား အဆင်ပြေပြေ နေရသည့် နေရာတခုတွင် ထားမည်ဟု မျှော်လင်ခဲ့မိသည်။ သို့သော် သူ့အား အခြား အကျဉ်းသားများကဲ့သို့ပင် တန်းတူ ထား ဆက်ဆံခြင်း ခံခဲ့ရသည်။
သူ့အဖို့ ပြင်ပကမ္ဘာနှင့် ထိတွေ့ဆက်ဆံ ခဲ့ရသည်များက စစ်ဆေးမေးမြန်းရန် ရောက်လာကြသူများ နှင့်သာ ဖြစ်သည်။ ၎င်းတို့ သည် အချိန်မတော် ညကြီးသန်းကောင်မှ ရောက်လာတတ်ကြပြီး ပထမပိုင်းတွင် သူ့အား စိတ်ဓါတ်များ ပြိုလဲကျဆင်းစေမည့် ခြိမ်းခြောက်သည့် လေသံမျိုးဖြင့် မေးခွန်းများ မေးလာခဲ့သည်။ သူတို့ မေးသော မေးခွန်းများမှာ ပြန်ဖြေစရာပင် မလိုသည့် အရည်မရ အဖတ်မရ အမေးများသာ ဖြစ်သည်။
နောက်ပိုင်းတွင် အနည်းငယ် ပြန်လည် ပြင်ဆင်လာပြီး ထောင်ချောက်ဆင်သည့် အမေးများ၊ ဒေါ်အောင်ဆန်း စုကြည် အကြောင်း၊ အခြား တစုံတဦး အကြောင်း များ မေးလာကြသည်။
သူ့ ကို အင်းစိန်ထောင်သို့ ရွှေ့ပြောင်းပေးခဲ့သည့် အခါတွင် တော့ ကြွက်များ၊ ပိုးဟတ်များ၊ ကင်းမြီးကောက် ကြီးများ နှင့် စတင် မိတ်ဖွဲ့လာခဲ့ရသည်။ သူ ကဲ့သို့ အေးအေးဆေးဆေး နေတတ်သော ခန္ဒာကိုယ် ခပ်သေးသေး ဩစတေးလျှ ပါမောက္ခ တဦးမှာ အဘယ်ကြောင့် အရှေ့တောင်အာရှရှိ အဆိုးဝါးဆုံး ဟု သတင်းကြီးနေသည့် ထောင်ထဲတွင် ရောက်နေရပါလိမ့် ဟူ၍ တွေးနေမိပြန်သည်။
သူ့အတွက် ခန္ဓာကိုယ် ပိုင်း အရ မည်သို့မျှ မသင့်တော်သည့် နေရာမျိုးလည်း ဖြစ်သည်။ အကောင်းဖက်က ရှုမြင်စရာ ရှိလာရသည်မှာ အခြား နိုင်ငံရေး အကျဉ်းသားများ နှင့် အတူ ရှိလာခဲ့ခြင်းပင်ဖြစ်သည်။ လူငယ် နိုင်ငံရေး အကျဉ်းသား တဦး က "ရှောင် ခင်ဗျား စိတ်ချလက်ချနေလို့ရပြီ၊ ကျွန်တော်တို့ ရှိနေတယ်" ဟု ပြောလာခဲ့သည့် အချိန်ကို သူ့ဘဝ တွင် မည်သို့မျှ မေ့နိုင်တော့မည် မဟုတ်ပေ။
ရှောင်သည် ဇနီး ဖြစ်သူထံ မှ အထုတ်များကို လက်ခံရရှိလာခဲ့သည်။ ဇနီး သည် Macquarie University မှ ပညာရှင် တဦး ဖြစ်ပြီး သူ့အတွက် ဆစ်ဒနီ တွင် သစ်သီးကိတ်များ၊ ဂျုံနှင့် လုပ်ထားသော မုန့်များ ဖုတ်ကာ လေ အလုံပိတ်ပြီး ကင်ဘာရာ သို့ ပေးပို့ခဲ့သည်။ ထိုမှတဆင့် သံတမန် ချောစာအိတ်တွင် ထည့်ကာ ရန်ကုန်သို့ အရောက် ပို့ပေးခဲ့ကြသည်။ မုန့်တခုတလေမျှ ပျက်စီးသွားခဲ့ခြင်း မရှိဟု ရှောင်က ပြောသည်။
မုန့်နှင့်အတူ သူ့အတွက် စာအုပ်များလည်း ပါလာခဲ့သည်။ စာအုပ်သာ မဖတ်ရက သူ့အတွက် မည်သည့်နည်းနှင့်မျှ ဆက်လက် ရှင်သန်နိုင်လိမ့်မည် မဟုတ်ကြောင်း ရှောင်က ဆိုသည်။ ပထမဆုံး ဖတ်ခွင့်ရခဲ့သည်က အမေရိကန် ၏ ပထမဆုံး ဘဏ္ဍာရေး ဝန်ကြီး ဖြစ်ခဲ့သူ အလက်ဇန်ဒါး ဟမ်မီလ်တန်၏ အထုပ္ပတ္တိ စာအုပ် ဖြစ်သည်။ နောက်ပိုင်းတွင် သူလည်း စာအုပ်တအုပ် ရေးရန် ခေါင်းထဲတွင် တေးမှတ်လာပြီး စာအုပ်၏ နေရာလွတ် များတွင် ခဲတံ တချောင်း ဖြင့် ရသလောက် ချရေးဖြစ်ခဲ့သည်။
သူ့အဖို့ ဇနီးသည် ဟာဗူး ၏ အားပေး ကူညီမှုများ ရရှိခဲ့ပြီး သူ၏လွတ်မြောက်ရေး အတွက် အခြေအနေ ပေးလျှင် ပေးသလို မရပ်မနား ကြိုးပမ်းပေးခဲ့သည်။ ဩစတေးလျှ၊ အမေရိကား၊ ဗီယက်နမ်၊ စင်္ကာပူ အစရှိသည့် နိုင်ငံများ တွင် သူမအတွက် ကူညီမည့် လူများ ရှိလာခဲ့သည်။ ထိုအထဲတွင် ချားလ် ဘုရင်ပင် ပါခဲ့သည်ဟု ဆိုသည်။
အသက် ၂၈ နှစ်မှ ဩစတေးလျှ သို့ ခြေချခဲ့ဖူးသည့် ဇနီးသည်သည် ဩစတေးလျှ ထိပ်တန်း အစိုးရ အဖွဲ့ဝင်များ နှင့် လက်ပွန်းတတီး ဆက်ဆံလာနိုင်ခဲ့သည်။
သူ့အတွက် စိုးရိမ်ပူပန်နေခဲ့ရသည့် ဇနီးသည် အတွက် သူ့စိတ်တွင် အပြစ်မကင်းသလို ခံစားခဲ့ရပြန်သည်။ သူ့ကို လက်ထပ်ခဲ့စဉ်က သူမသည် ထိုသို့ ဖြစ်လာမည်ကို လားလားမျှ တွေးခဲ့ဖူးမည် မဟုတ်ဟုလည်း စိတ်ထဲ၌ စဉ်းစားနေမိသည်။
"မြန်မာ ထောင်ထဲ တွင် ရှိနေသည်" ဆိုရုံမျှနှင့်ပင် မည်သို့မျှ အကောင်းဖက်က မျှော်လင့်၍ မရမှန်း လူတိုင်းလိုလို သိပြီးလည်း ဖြစ်သည်။ ပထမဆုံး အကြိမ် ဆက်သွယ်ခွင့်ရခဲ့စဉ် သူတို့ နှစ်ဦး တယောက်အကြောင်း တယောက် တွေးနေမည့် အချိန်ကို နှစ်ဦးသဘောတူ သတ်မှတ်ခဲ့ကြသည်။ နေ့စဉ် မြန်မာ အချိန် မနက် ငါးနာရီခွဲ၊ ဩစတေးလျှ အချိန် မနက် ဆယ်နာရီ ဖြစ်သည်။ ထိုအချိန်တွင် သူလည်း ငါ့အကြောင်း တွေးနေပြီ ဆိုသည့် အသိဖြင့် မမြင်ရ၊ မကြားရသော်လည်း စိတ်ချင်း ဆက်သွယ်နေမိ၍ ဖြေသာခဲ့ရသည်။
အယ်ဘန်နိစ် အစိုးရတက်လာပြီးနောက်တွင် သူ၏ လွတ်မြောက်ရေး အတွက် ကြိုးပမ်းမှုများ အရှိန်ရလာခဲ့မှန်း သတိထားမိလာသည်။
နောက်ပိုင်းတွင် ရှောင်၏ ကျန်းမာရေး အခြေအနေ သိသိသာသာ ဆိုးဝါးလာသည့်အတွက် ရုံးထုတ် စစ်ဆေးစဉ် ကာလ အတွင်း နေပြည်တော် ရှိ ထောင်သို့ ရွှေ့ပေးခဲ့သည်။
သူရောက်နေသည့် အကျဉ်းထောင်တွင် ဒေါ်အောင်ဆန်းစုကြည်လည်း ရှိနေ၍ ပထမဆုံး အကြိမ် စကား ပြောဖြစ်ခဲ့သည်။
ဒေါ်အောင်ဆန်းစုကြည်က ကျွန်မတို့ ပြဿနာတွေထဲ ဆရာကို ဆွဲသွင်းမိသလို ဖြစ်ခဲ့ရတဲ့ အတွက် "ဟာ" အတွက်ရော၊ ဆရာ့အဖေအတွက် ပါ၊ မိသားစု အားလုံး အတွက် ကျွန်မ စိတ်မကောင်း ဖြစ်မိပါတယ် ဟု တောင်းပန်စကား ဆိုလာခဲ့သည်။
နောက်ပိုင်းတွင် သူ့အား နိုင်ငံတော် လျှို့ဝှက်ချက် ဖေါက်ဖျက်မှုနှင့် ထောင် သုံးနှစ် ချခဲ့သည်။
သူ့ ကို လွှတ်ပေးတောမည်ဟု ပြောလာသော ထောင်ဝန်ထမ်း၏ စကားကို ကြားရစဉ်က လာနောက် နေသည် ဟုပင် ထင်ခဲ့မိသည်။ ချက်ချင်းပင် သူ၏ ပစ္စည်းများ သိမ်းခိုင်းသည်။ သူ့ တွင် ရှိ စာအုပ် အများစုကို အခြား အကျဉ်းသားများ ဖတ်နိုင်ရန် အကျဉ်းထောင် စာကြည့်တိုက်သို့ ပေးခဲ့ပြီး ထောင်မှ လေဆိပ်သို့ ကားဖြင့် ခေါ်လာ ခဲ့ကြသည်။ လေဆိပ်တွင် ဩစတေးလျှ အရာရှိများ က သူ့အား လေယာဉ်ပေါ် တင်ပေးလိုက်ပြီး ဇနီး သည် မဲလ်ဘုန်း လေဆိပ်တွင် အသင့် စောင့်ဆိုင်းနေပြီ ဖြစ်သည်။
သူတို့ နှစ်ဦးလည်း ရုပ်ရှင်ထဲကလို တဦးနှင့် တဦး အချိန်အတန်ကြာအောင် ပွေ့ဖက်မိခဲ့ကြသည်ဟု ရှောင်က ပြောပြခဲ့သည်။
မြန်မာပြည်မှ ထွက်ခွာနီးတွင် လူဝင်မှု ဖက်မှ အရာရှိတဦးက "ကျေးဇူးပြုပြီး မြန်မာတွေကို မမုန်းလိုက်ပါနဲ့နော်" ဟု သူ့အား ပြောလာသည်။ ကျွန်တော်က မြန်မာတွေကို ဘယ်တော့မှ မမုန်းပါဘူးဟု ပြန်ပြောခဲ့ရကြောင်းလည်း ဆိုသည်။
မြန်မာ လူမျိုး တွေထဲမှာ ၉၉ ရာနှုန်းက အရမ်းကို အံ့ဩဖို့ ကောင်းလောက်အောင် ဖေါ်ရွေပြီး ခင်မင်စရာ ကောင်းတဲ့ လူတွေ ချည်းပါပဲ ဟု ရှောင်က ABC သို့ ပြောပြခဲ့သည်။
ပြည်သူတို့၏ ခုခံ တွန်းလှန်စစ် မုချအောင်ရမည်!!!
