မြန် မာ စစ်အာဏာသိမ်း အဖွဲ့မှ မကြာမီက အကျဉ်းသားများ ပြန်လွှတ်ပေးခဲ့သည်ကို ကြည့်ပြီး ဖိအားများ လျော့သွား‌၍ မဖြစ်ဟု ယခင် သမ္မတ ရောနယ် ရီဂင်၏ အထူး လက်ထောက် နှင့် ယခု Cato Institute ၏ အထက်တန်း သုတေသီ Doug Bandow မှ အမေရိကန် အစိုးရ၏ အမျိုးသား လုံခြုံရေး ကောင်စီ အပေါ် ဩဇာတက္ကိမ ရှိသော Foreign Policy Magazine တွင် ရေးသားထားသည်။

အကြမ်းဖက် စစ်တပ်၏ ဖမ်းဆီးခံထားရသော နိုင်ငံခြားသားများ အပါအဝင် အကျဉ်းသား ၆,၀၀၀ နီးပါးကို ပြန်လွှတ်ပေးရသည်အထိ ဖြစ်လာခြင်းသည် နိုင်ငံတကာ ဖိအားများကြောင့်ပင် ဖြစ်သည်။ ထိုသို့လွှတ်ပေးခဲ့မှု အပေါ် ကြိုဆိုရမည် ဖြစ်သော်လည်း လှည့်စား မခံရအောင် အာဏာသိမ်း အဖွဲ့၏ အတွင်း လှိုက်စားနေသည့် သဘောသဘာဝ နှင့် မော်စကို နှင့် ဘီဂျင်းမှ ကျောထောက်နောက်ခံ ပေးထားမှု ကို မြင်အောင်ကြည့်တတ်မှ ဖြစ်ပေမည်။

စစ်တပ်သည် ရုရှားလက်နက်များ၊ တရုတ်၏ ထောက်ခံမှု များ နှင့် ရက်စက်ကြမ်းကြုပ်မှုများကို ယခုတိုင် ကျုးလွန်နေဆဲပင် ဖြစ်သည်။ ထို့အနေအထားများကြောင့် မြန်မာ တော်လှန်ရေး အင်အားစုများကို အနောက်အုပ်စု အနေဖြင့် ထောက်ခံမှု ပေး‌နေခြင်းကို မည်သို့မျှ လျော့ချသွား၍ မဖြစ်ပေ။

ဇူလိုင်လ အတွင်း စစ်အာဏာသိမ်း အဖွဲ့သည် ဒီမိုကရေစီ အရေး တိုက်ပွဲဝင်နေသူ လေးဦးကို ကွပ်မျက်ပစ်ခဲ့သည်။ ပြည်သူများအကြား အကြောက်တရား စိမ့်ဝင်လာအောင် တရားဥပဒေကို ခုတုံးလုပ်၍ သတ်ဖြတ်ပစ်ခဲ့ခြင်းပင်။ 

ယခုအခါ စစ်တပ်၏ အာဏာသိမ်းမှု နှစ်နှစ်ပြည့်ရန် အချိန်နီးကပ်လာနေသည်နှင့် အမျှ စစ်တပ် အတွင်း ခံပြင်းမှုများ နှင့် အတူ စိတ်ပျက်လက်ပျက် ဖြစ်မှုများ ကြီးထွားလာနေပြီ ဖြစ်သည်။ ပြင်းထန်လှသော လူထု၏ ခုခံ တွန်းလှန်လာမှုများကြောင့် နိုင်ငံတဝှမ်း ထိန်းချုပ်နိုင်ခဲ့မှုများ တဖြေးဖြေး နှင့် လုံးပါး ပါးလာနေပြီ ဖြစ်သည်။

အမေရိကန် နှင့် အနောက်တိုင်းအစိုးရများသည်မြန်မာပြည်သူတို့၏ ဒုက္ခသုက္ခများကို အမြဲလို စိုးရိမ်ပူပန် မှု ရှိခဲ့သော်လည်း သူတို့တွင်လည်း သူတို့ကိစ္စ နှင့် သူတို့ အလုပ်ရှုပ်နေတတ်ကြသည်၊ သို့သော် ယခုလို တရုတ် နှင့် ရုရှားတို့ နင်ပဲငဆ ပါဝင် ပတ်သက်လာနေသည့် အချိန်မျိုးတွင် အလုပ်များသည် ဆိုကာမျက်နှာလွှဲ ခဲပစ် မလုပ်သင့်တော့ပေ။

ပြီးခဲ့သည့် အာဆီယံ ထိပ်သီး အစည်းအဝေးတွင် မြန်မာ အရေးသည် ထိပ်ဆုံးမှ ပါလာခဲ့သည်။ သို့သော်လည်း မျှော််လင့်ထားသည့် အတိုင်း တိုးတက်မှု မဆိုသလောက်သာ ထွက်ပေါ်ခဲ့သည်။

တရုတ်သည် အခြား အာဆီယံ နိုင်ငံများနှင့် ပေါ်ပေါက်လျက် ရှိသော နယ်မြေ အငြင်းပွားမှုများတွင် မြန်မာအား ကမ္ဘောဒီယား နှင့် အတူ လက်တွဲပြီး ရပ်တည်ပေးမည်ဟု မျှော်လင့်ထားခဲ့သည်။

စက်တင်ဘာ ၇ ရက်နေ့တွင် အာဏာသိမ်း ခေါင်းဆောင် မင်းအောင်လှိုင်သည် ဗလာဒီဗော့စတော့သို့ ရောက်လာပြီး ပူတင် နှင့် တွေ့ဆုံခွင့် ရသွားခဲ့သည်။ "မြန်မာသည် အရှေ့တောင်အာရှတွင် ကျွနုပ်တို့၏ ကာလကြာမြင့်စွာကတည်းက ယုံကြည်အားထားရသော နိုင်ငံ ဖြစ်သည်" ဟု ပူတင်က ထုတ်ပြောလာခဲ့သည်။

မော်စကိုသည် မြန်မာအား သံတမန်ရေးအရ ထောက်ခံမှု ပေးနေယုံသာမက ရေနံကိုပင် ဈေးသက်သက်သာသာ နှင့် ထုတ်ရောင်းပေးလာခဲ့သည်။ထို့အပြင် နျုကလီယား ပူးပေါင်းဆောင်ရွက်ရေး အတွက်ပင် လှုပ်ရှားလာခဲ့သည်။

စစ်တပ် အတွက် ပို၍ အရေးတကြီး ဖြစ်လာနေသည်က လက်နက်များ ရရှိနိုင်ရေးပင် ဖြစ်သည်။ ထိုအကြောင်းနှင့် ပတ်သက်၍ စင်္ကာပူရှိ ISEAS မှ Ian Storey မှ "မြန်မာသည် လေကြောင်းမှ ထိန်းချုပ်ထားနိုင်ရန် ရုရှားထံမှ တိုက်လေယာဉ် များ၊ ရဟတ်

ယာဉ် များ၊ အပိုပစ္စည်းများ တိုး၍ ဝယ်ယူ တင်သွင်းရန် လိုလားနေကြသည်၊ ရုရှားဖက်ကလည်း ၎င်းတို့ အခြားတဖက်တွင် ရောင်းအား ကျဆင်းလိုက်လာနေသည်ကို ထေမိရန် မြန်မာအား လက်နက်ရောင်းချနိုင်ရေး မြှင့်တင်နိုင်ရန် အာရုံစိုက်လာကြသည်။ ရုရှားတို့၏ ထိုကဲ့သို့သော လုပ်ရပ်များသည် အကြမ်းဖက်မှုများ၊ လူများ အစုလိုက် အပြုံလိုက် သေကြေရမည့် အရေးများ မလွှဲမသွေ ဖြစ်ပေါ်လာဖို့သာ ရှိနေသည်။

ပြည်သူများသည် နေစဉ်နှင့် အမျှ စစ်တပ်၏ လက်ချက်ဖြင့် ‌သေဆုံးနေကြရပြီ ဖြစ်၍ မြန်မာသည် သားသတ်ရုံကြီး အလား ဖြစ်လာနေသည်ဟု တော်လှန်ရေး တပ်ဖွဲ့ဝင် ဆရာဝန် ဂူးဂူးက အယ်ဂျာဇီရား သတင်းဌာနအား ပြောပြခဲ့သည်။

စစ်တပ်သည် စာသင်ကျောင်းများပါ မချန် လေကြောင်းမှ တိုက်ခိုက်လာခဲ့သဖြင့် ခုခံ တွန်းလှန်စစ်သည် အရှိန်မြင့်သည်ထက် မြင့်တက်လာနေသဖြင့် တရုတ် နှင့် ရုရှား လက်နက်များဖြင့် ပဋိပက္ခသည် ပို၍သာ ပြင်းထန်လာဖို့ ရှိနေသည်။ လူထုကလည်း ပုံစံ အမျိုးမျိုး ဖြင့် အကြမ်းမဖက် တက်ကြွစွာ ဆန့်ကျင်လာနေပြန်၍ ယခင်ကကဲ့သို့ အလွယ်တကူ နှိမ်နှင်း၍ မရ ဖြစ်လာနေသည်။ အထူးသဖြင့် လွတ်လပ်မှု အသီးအပွင့်များ ခံစားခဲ့ရဖူးသည့် လူငယ်များသည် စစ်အာဏာရှင် စနစ်အား မည်သို့မျှ ဒူးထောက် အညံ့ခံလိုစိတ် မရှိကြတော့ပေ။

ဒီမိုကရေစီ အရေး တိုက်ပွဲဝင်နေသူများဖက်မှ အောင်ပွဲခံနေပြီဟု အလွန်အကျွံ မျှော်လင့်၍ မရသေး‌သော်လည်း စစ်တပ်ဖက်က အကောင်းဖက်မှ ရှုမြင်နိုင်စရာ ကုန်ခမ်းသည်ထက် ကုန်ခမ်းလာနေပြီ ဖြစ်သည်။ 

၎င်းတို့အဖို့ အာဏာကို ဆက်လက် ဆုပ်ကိုင်ထားနိုင်ဖို့အတွက် အကြမ်းဖက် လုပ်ရပ်များနှင့် ပြည်သူ တရပ်လုံးကို ရန်သူ အဖြစ် သဘောထားဖို့သာ ကျန်ပေတော့သည်။ ပြည်သူများဖက်ကလည်း ၎င်းတို့ အပေါ် ထိုသို့သာ သဘောထားကြတော့မည် ဖြစ်သည်။ 

အနောက်အုပ်စု နှင့် အာရှ ဒီမိုကရေစီ နိုင်ငံများ အနေဖြင့် မြန်မာပြည်သူများ၏ အကျိုး အတွက် သော်၎င်း၊ လက်ရှိ ပဋိပက္ခအပေါ် တရုတ် နှင့် ရုရှားတို့ အမြတ်ထုတ်လာမည့် အရေးကို ဟန့်တားနိုင်ရန် အတွက်သော်၎င်း၊ စစ်တပ်အား ဒီထက် မက ပြစ်ဒဏ်ခတ်နိုင်မည့် နည်းလမ်းများကို ရှာဖွေကြရတော့မည် ဖြစ်သည်။

ပထမဆုံး အနေဖြင့် အမျိုးသား ညီညွတ်ရေး အစိုးရအား သံတမန်ရေး အရ အသိအမှတ် ပြုသင့်ပြီး သိမ်းထားသည့် ဒေါ်လာ တစ် ဘီလီယံကို ပြန်ထုတ်ပေးရပေမည်။ ဒုတိယ အနေဖြင့် စစ်တပ်သည် နိုင်ငံ တဝက်ခန့်သာ ထိန်းချုပ်နိုင်တော့၍ ကျန်ဒေသများရှိ ၎င်းတို့ လက်ချက်ကြောင့် ဒုက္ခရောက်နေသူများကို လူသားချင်း စာနာ ထောက်ထားသည့် အကူအညီများ ‌တိုက်ရိုက်ပေးသင့်သည်။

ဩစတေးလျှ၊ အိန္ဒိယ၊ ဂျပန်၊ စင်္ကာပူတို့သည်လည်း စစ်အာဏာသိမ်း အဖွဲ့ကို ဘဏ္ဍာရေး နှင့် သံတမန်ရေး ဖိအားများ ပေးရာတွင် ပူးပေါင်း ပါဝင်သင့်သည်။

အမေရိကန် နှင့် ဥရောပ နိုင်ငံများ သည်လည်း မြန်မာ ရေနံ နှင့် သဘာဝဓါတ်ငွေ့ လုပ်ငန်းကို ပစ်မှတ်ထား ပိတ်ဆို့ဒဏ်ခတ်ရမည် ဖြစ်သည်။ မဟာမိတ် နိုင်ငံများ အနေဖြင့် NUG နှင့် ညှိနှိုင်းကာ စစ်အာဏာသိမ်း အဖွဲ့ အားပျော့သွားနိုင်မည့် နေရာများကို ရှာကြံ လုပ်ဆောင် သွားရမည် ဖြစ်သည်၊ ဤနေရာတွင် ပြည်သူများ ပို၍ အကျပ်အတည်း တွေ့ကောင်း တွေ့လာနိုင်သည်။

မြန်မာပြည်သူများက ၎င်းတို့အား ပါးစပ်နှင့်သာ ထောက်ခံနေကြပြီး လက်ကမလှုပ်သည်ကို စိတ်ပျက်နေကြပြီ ဟု ကုလ လူ့အခွင့်အရေး အထူး သံတမန် တွန် အင်ဒရူးက ထုတ်ပြောလာခဲ့သည်။

ပြဿနာ ပို၍ ကြာလာလေ ပို၍ ထိခိုက်လာလေပင် ဖြစ်သည်။ အခြေအနေများ က ဆိုးသည်မှ အဆိုးဆုံး အဆင့်သို့ ရောက်ရှိလာနေပြီဟု တွန် အင်ဒရူးကပင် သတိပေးခဲ့ပြီး ဖြစ်သည်။ အနက်ရှိုင်းဆုံး အနေအထားကို တော့ မြင်တွေ့ မလာရသေးသော်လည်း နိုင်ငံတကာ မှ ဟန်ချက်ညီညီ ပူးပေါင်း ဆောင်ရွက်ကြဖို့ အရေးတကြီး လိုအပ်လာနေပြီ ဖြစ်သည်။

(နောက်ဆုံး ရရှိသော သတင်းအရ အမေရိကန် မြို့တော် ဝါရှင်တန်တွင် အမျိုးသား ညီညွတ်ရေး အစိုးရ ကိုယ်စားလှယ် ရုံး ဖွင့် လှစ် နိုင်ခဲ့ပြီ ဖြစ်သည်ဟု သိရသည်။ ဤသည်က သံတမန်ရေး တွင် ကြီးမားသော ခြေလှမ်းကြီး လှမ်းနိုင်ခဲ့ခြင်းလည်း ဖြစ်ပေသည်။)

ပြည်သူတို့၏ ခုခံတွန်းလှန်စစ် မုချအောင်ရမည်!!!