ရုရှား ကတော့ ပြတ်သားသည်။ မြန်မာ နှင့် စစ်ရေး ပူးပေါင်းဆောင်ရွက်မှု နက်ရှိုင်းစွာ တိုးမြှင့်သွားမည်ဟု တရားဝင် ထုတ်ဖေါ် ပြောဆိုလာသည်။ ကျန်သည့် စီးပွားရေး၊ လူမှုရေး ကဏ္ဍများအတွက် ဘာမှ ရည်ညွှန်းခြင်း မရှိ၊ စိတ်လည်း ဝင်စားပုံမရ၊ လက်နက်များ ရောင်းချဖို့သာ စိတ်ဝင်စားသည်။ ဤသည်ကို မင်းအောင်လှိုင် လိုလား ပုံမရ၊ သူ ဖြစ်စေချင်သည်မှာ ရုရှား နှင့် နှစ်နိုင်ငံ ကာကွယ်ရေး စာချုပ် Bilateral Defense Agreement ပုံစံ မျိုး ဖြစ်စေချင်သည်။ သို့သော် ဆွေးနွေးဖို့ နေနေသာသာ ရုရှား ကာကွယ်ရေး ဝန်ကြီးကပင် လက်ခံတွေ့ဆုံ ခဲ့ခြင်း မရှိ၊ ရုရှား သံရုံးက ကိုယ်ရေးကိုယ်တာ ခရီးစဉ် အဖြစ် ပြောင်းလဲသုံးစွဲခဲ့ရခြင်း ဖြစ်သည်။

ရုရှားသည် တရုတ်၏ ဩဇာစက်ဝန်း သက်ရောက်ပြီးသား နိုင်ငံကို စိတ်ငြိုငြင် ခံ၍ ဝင်ရောက် ပတ်သက်လို ပုံမရ၊ ၎င်းတို့ ၏ ယူကရိန်း ကျူးကျော် စစ်အပေါ် တရုတ်၏ undiluted support ရေမရောသည့် အမာခံ ထောက်ခံမှုမျိုး ရဖို့ အရေးကြီးနေသည်။ မင်းအောင်လှိုင် လိုချင်သော ကာကွယ်ရေး စာချုပ်မျိုးက ရေရှည် မျှော်ထား၍ ရမည့် အရေးမဟုတ်၊ အကြောင်းမသင့်က နေ့လား ညလား ပတ်သက်ရမည့် အရေး ဖြစ်နေ မှန်းလည်း သိထားသည်။

ထို့အပြင် မင်းအောင်လှိုင်သည် ရုရှား ထံမှ လက်နက်များ အကြွေး ရောင်းချပေးမည့် ကတိကဝတ်မျိုးလည်း ရခဲ့ပုံ မပေါ်၊ ထို့အတွက် ရုရှားတွင် ရှိနေစဉ်အတွင်း နိုင်ငံခြားငွေ ကန့်သတ်မှု တားမြစ်ချက် အမျိုးမျိုး ဆက်တိုက် ထွက်ပေါ်လာခဲ့ရခြင်းလည်း ဖြစ်သည်။ မနေ့ကပင် နိုင်ငံခြားသား ပိုင်ဆိုင်မှု ၃၅ ရာနှုန်း ရှိသော မြန်မာ ကုမ္ပဏီပိုင် လက်ကျန်ငွေများကို မြန်မာကျပ်ငွေ နှင့် မဖြစ်မနေ လဲလှယ်ရမည်ဟု အေးဓမြ တိုက်သည့် အမိန့် ထွက်လာခဲ့ပြီ ဖြစ်သည်။

မင်းအောင်လှိုင်သည် တာတာစတန် ကိုယ်ပိုင် အုပ်ချုပ်ရေး ရ ဒေသ သို့ ထုံးစံအတိုင်း ဝင်ရောက်ခဲ့ပြန်သည်။ ထိုဒေသ ရှိ “သမ္မတ” က လှိုက်လှိုက်လှဲလှဲ ကြိုဆို နှုတ်ဆက်ခဲ့သည်။ သူ့ ဒေသ သည် ကောင်းသည် ဆိုးသည် ဖြစ်စေ မင်းအောင်လှိုင်ကြောင့် နိုင်ငံတကာ သတင်းစာမျက်နှာများ တွင် ပါလာပြီး လူသိများလာဦးမည်၊ တာတာစတန်သည် ရုရှား မှ ခွဲထွက်လိုသည့် သဘော ရှိနေ၍ မင်းအောင်လှိုင် နှင့် မတွေ့မီ တရက် အလို တွင် ရုစတန် မင်နစ်ကာနောဗ် အား ရုရှား သမ္မတ ပူတင်မှ သူ၏ တရားဝင် ပေးစာ တခုတွင် ရာထူး အမည် မတပ်ဘဲ ပေးပို့လာသည်။ 

လွန်ခဲ့သည့်နှစ်က ရုရှား၏ ကိုယ်ပိုင် အုပ်ချုပ်ခွင့်ရ ဒေသများရှိ အကြီးအကဲများ အား “သမ္မတ” ဟု ခေါ်ဝေါ်သုံးစွဲ ခြင်းကို ပိတ်ပင်သည့် အမိန့် ထုတ်ပြန်ခဲ့ပြီးလည်း ဖြစ်သည်။ ဤသည်ကလည်း တခါက တာတာ များသည် ၎င်းတို့ ဒေသအား သီးခြား လွတ်လပ်သော နိုင်ငံ အဖြစ် အသိအမှတ်ပြုရန် တောင်းဆိုခဲ့ခြင်းကြောင့် ဖြစ်သည်။ ထိုသို့ အနေအထားများ ရုရှား နှင့် တာတာ တို့အကြား ရှိနေသော်လည်း ၎င်းတို့၏ ခေါင်းဆောင်အား အနည်းဆုံး သမ္မတ တယောက်မှ ခရီးဦးကြိုပြုသည့် ပုံစံမျိုး ဝါဒ ဖြန့်နိုင်ရန် စိတ်စောနေသော မြန်မာရှိ စစ်ကောင်စီ သတင်း စာများက မူ လူဦးရေ လေးသန်းသာ ရှိသော အဆိုပါဒေသ မှ အကြီးအကဲအား “သမ္မတ” အဖြစ် မသိချင်ယောင် ဆောင်ကာ သုံးစွဲ ခေါ်ဝေါ် ဝါဒဖြန့်ခဲ့ကြသည်။

တာတာစတန် “သမ္မတ” ရုစတန် မင်နစ်ကာနောဗ် သည် သူ၏ ရုံးခန်းထဲတွင် မင်းအောင်လှိုင်အား လက်ခံ တွေ့ဆုံခဲ့ပုံ ကို သတင်းထုတ်ပြန်လာခဲ့သည်။ ထိုဓါတ်ပုံသည် မင်းအောင်လှိုင် မျှော်လင့်သလို ပုံစံမျိုး မဟုတ်ဘဲ လ္ဘက်ရည်ဆိုင်သာသာ ဖြစ်နေသည်။ ရုစတန်လာစဉ် သူ လက်ခံ တွေ့ဆုံ ခဲ့ပုံမျိုး နှင့် အကွာကြီး ကွာခြားနေ ပေသည်။ (ပုံတွင်ရှု)

နောက်ပိုင်း တွင် မင်းအောင်လှိုင်အား ညစာစားပွဲ၊ ရိုးရာ ကပွဲများ နှင့် တည့်ခင်းဧည့်ခံ ခဲ့သည်ဟု သိရသည်။ မင်းအောင်လှိုင်၏ မျက်နှာပေးသည် တိရစ္ဆာန် ရုံထဲ ရောက်နေသည့် ကလေးသူငယ်တဦး အလား ဖြစ်နေ သည်ဟု ဧရာဝတီ သတင်းဌာနက မှတ်ချက်ချထားသည်။

မည်သို့ပင် ဖြစ်စေ နိုင်ငံတွင်းတွင် မရှိမဖြစ် လိုအပ်သော စားကုန်များ၊ ဆေးဝါးများ တင်သွင်းမှုကို ပိတ်ပင် နေသည့် အချိန်တွင် မြန်မာပြည်နှင့် မိုင်ပေါင်း လေးထောင် ခန့် ကွာဝေးပြီး ဗုဒ္ဓဘာသာ မြန်မာ လူမျိုး ဟူ၍ ထောင်ဂဏန်းလောက်ပင် ရှိသော နိုင်ငံ တွင် ဒေါ်လာ သိန်းချီ အကုန်အကျ ခံကာ စေတီ သွား တည်သည့် ဆုံးဖြတ်ချက် ကို အားလုံးက အံ့အားတသင့် ဖြစ်ကြမည်ကား အမှန်ပင် ဖြစ်သည်။ ၎င်း၏ ဆရာအရင်း ဖြစ်သော သီတဂူ၏ ဖေ့စ်ဘုတ် စာမျက်နှာတွင် ဦးအောင်ကိုဝင်း (ကမ္ဘောဇ) မှ ‘မ’ တည်သည်ဟု တော့ ဖေါ်ပြထားခဲ့သည်။

ခေါင်းဆောင်ကြီးသည် မည်မျှပင် ကြိုးစားစေကာမူ အရေးမပါသော နိုင်ငံလေးများက သံအမတ် ခန့်အပ်လွှာ ပေးအပ်သည်ကို လက်ခံခြင်းမျိုးက လွဲ၍ နိုင်ငံတကာတွင် လုံးဝ အသိအမှတ်ပြု မခံရ၊ ရပ်တည်ခွင့် မရ၊ အာဏာသိမ်းပြီး ၁၆ လ အတွင်း တံခါးဖွင့်ပေးသည့် နိုင်ငံဟူ၍ ရုရှား တနိုင်ငံတည်း ဖြစ်နေသည့် အရေးကိုတော့ စစ်တပ်အသိုက်အဝန်း အတွင်း ငြင်းလို့မရအောင် ထင်ရှားလာနေသည်။

မင်းအောင်လှိုင် သည် ထိုကဲ့သို့သော ခရီးစဉ်မျိုးအား “ကိုယ်ရေးကိုယ်တာ” ဟု ခေါင်းစဉ်တပ် နှစ်ပေါက် တပေါက် ရိုက်ကာ တရုတ်ပြည်သို့ ပင် သွားခွင့် ရ အောင် လုပ်၍ မရ ဖြစ်နေဆဲ ဆိုသည်ကိုလည်း မရိပ်စားမိဘဲ နေကြမည် မဟုတ်။

ထို့အတွက် စစ်ခေါင်းဆောင်များ၊ အရာရှိ အရာခံ အကြပ်တပ်သားများ အနေဖြင့် မိမိတို့ ရပ်တည်ရာ ကို ရွေးချယ်ကြဖို့ အချိန်တန်နေပြီ ဖြစ်သည်။ မိမိတို့ ၏ ခေါင်းဆောင်သည် တိုင်းပြည်နှင့် လူမျိုး တိုးတက်ရာ တိုးတက်ကြောင်း ဦးဆောင်နိုင်မှုဟု ယုံကြည်နေခြင်းသည် အသိညဏ် အမျှော်အမြင် ခေါင်းပါးရား ကျမနေပေဖူးလော၊ ထိုသို့ မဟုတ်ပါက ၎င်း တို့ အဖို့ နိုင်ငံတော် သစ္စာဖေါက်မှုကြီး ဖြင့် ရင်ဆိုင်ကြရဖို့သာ ရှိပေတော့သည်။ မင်းအောင်လှိုင် အနေနှင့် တော့ ပြေးဖို့ မလိုမချင်း လက်အောက်ငယ်သားများ၏ အသက်များ သုံး၍ နေ့စဉ် လက်လီ ဝယ်ယူ ရပ်တည်သွားမည့်လူမျိုးသာ ဖြစ်သည်။

ပြည်သူတို့၏ တရားသောစစ် မုချအောင်ရမည်!!!