မြန်မာနိုင်ငံ အတွင်း အခြေအနေများ ဆက်လက် ယို့ယွင်းလာနေမှူ များကြောင့် အိမ်ဖြူတော်တွင် ပြုလုပ်နေသည့် အမေရိကန်-အာဆီယံ ထိပ်သီး ဆွေးနွေးပွဲ သည် အဓိက အကြောင်းအရာ အဖြစ် ရောက်ရှိသွားခဲ့ရပြီ ဖြစ်သည်။
ထိုသို့ ပါဝင်ခဲ့ရသည့် နောက်ထပ် အကြောင်းရင်းတခုကလည်း မလေးရှား နိုင်ငံခြားရေး ဝန်ကြီးမှ မြန်မာ စစ်ခေါင်းဆောင်များအား ဝေဖန် ပြောဆိုလာသည့် အပြင် မိမိတို့ အာဆီယံ နိုင်ငံများအနေဖြင့် အမျိုးသား ညီညွတ်ရေး အစိုးရနှင့် ထိတွေ့ဆက်ဆံဖို့ လိုလာပြီဟု ကျယ်ကျယ်လောင်လောင် ပြောဆိုလာနေခြင်းကြောင့်လည်း ဖြစ်သည်။
ထိုအတွက်ကြောင့် အာဆီယံ ဥက္ကဌ အဖြစ် တာဝန်ယူထားသော ဟွန်ဆန် အဖို့ မျက်နှာမလှ ဖြစ်လာနေပြီး မင်းအောင်လှိုင် ၏ လုပ်ရပ်များကို ဆန့်ကျင်ဝေဖန်နေသူများသည် တိုင်းပြည်ကို ဖျက်ဆီးနေကြသူများသာ ဖြစ်သည်ဟု ရှက်ရမ်း ရမ်း ပြောဆိုလာခဲ့သည်။
ဤသည်ကပင် ၎င်း၏ ညဏ်ရည် ညဏ်သွေး အတိမ်အနက် မည်မျှ ရှိကြောင်းကို ထုတ်ဖေါ်ပြသလိုက်ရာ ရောက်သွားသည်၊ နိုင်ငံအား ကလေးကလား အတွေးအခေါ် လောက်နှင့် အုပ်ချုပ်ကာ ပျက်စီးခြင်း ငါးပါး ဆိုက်လာနေသည်ကို ဆန့်ကျင် တွန်းလှန်နေကြသော ပြည်သူ တရပ်လုံးကို စော်ကားလိုက်ခြင်းပင် ဖြစ်သည်။
ထိုအတွက်လည်း ဖိနပ် နှင့် ပေါက်ခံထိခဲ့ခြင်းသည်လည်း အဆန်းတော့ မဟုတ်ပေ။
ဒေါ်ဇင်မာအောင်က အာဆီယံ အထူး သံတမန်ဖြစ်သူ ကမ္ဘောဒီယား နိုင်ငံခြားရေး ဝန်ကြီးနှင့် တွေ့ဆဆုံနိုင်ရန် စာရေးသား တောင်းဆိုခဲ့သော်လည်း အကြောင်းပြန်ကြားခြင်း မရှိသေးဟု RFA နှင့် တွေ့ဆုံမေးမြန်းခန်းတွင် ထည့်သွင်း ပြောဆိုသွားခဲ့သည်။
မည်သို့ပင် ဖြစ်စေ ဘိုင်ဒင် အစိုးရသည် အမျိုးသား ညီညွတ်ရေး အစိုးရနှင့် စတင် ဆက်ဆံလာပြီ ဖြစ်သည်။
NUG ၏ နိုင်ငံခြားရေး ဝန်ကြီး ဒေါ်ဇင်မာအောင် ဦးဆောင်သော မြန်မာ ကိုယ်စားလှယ် အဖွဲ့အား အမေရိကန် လက်ထောက် နိုင်ငံခြားရေး ဝန်ကြီး မစ္စက် ဝင်ဒီ ရှားမင်းနှင့် နိုင်ငံခြားရေး ဝန်ကြီးဌာန အကြံပေး ဒဲရက် ချိုလက်တို့က လက်ခံ တွေ့ဆုံခဲ့သည်။
အစည်းအဝေးတွင် စစ်အာဏာသိမ်း အဖွဲ့၏ ရက်စက် ကြမ်းကြုပ်မှုများကို ကြံ့ကြံ့ခံ တွန်းလှန်နေသော မြန်မာ ပြည်သူများအား အမေရိကန် အစိုးရမှအခိုင်အမာ ထောက်ခံသွားမည် ဖြစ်ကြောင်း ထပ်လောင်း အတည်ပြု ပြောကြားခဲ့ပြီး အာဆီယံ အပါအဝင် အခြား အကျိုးတူ နိုင်ငံများနှင့် ပူးပေါင်းပြီး တရားမျှတပြီး ငြိမ်းချမ်းသော ဖြေရှင်းချက် တခု ထွက်ပေါ်လာအောင် လုပ်ဆောင်သွားမည်ဟုလည်း ဆိုသည်။
မြန်မာပြည်သူများ အတွက် ဒေါ်ဇင်မာအောင်၏ သတ္တိ နှင့် အနစ်နာခံမှု ကိုလည်း ကျေးဇူးတင်ကြောင်း ချီးကြူးပြောဆိုသွားခဲ့သည်။ ထို့ပြင် အကူအညီ လိုအပ်နေသော မြန်မာပြည်သူများအား အကူအညီ ပေးနိုင်ရေး အတွက် ဝင်ထွက် ဆောင်ရွက်နိုင်ခွင့်ကိုလည်း ဒေါ်ဇင်မာအောင် နှင့်
မစ္စက် ရှားမင်းတို့ က တောင်းဆိုခဲ့ကြသည်။
အလားတူပင် မစ္စက်ရှားမင်းသည် ကမ္ဘောဒီယား နိုင်ငံခြားရေး ဝန်ကြီးနှင့် ၎င်း၊ ဘရူးနိုင်း နိုင်ငံခြားရေး ဝန်ကြီးနှင့် ၎င်း တွေ့ဆုံ ဆွေး နွေးခဲ့သည်။
ဒေါ်ဇင်မာအောင်သည် မလေးရှား နိုင်ငံခြားရေး ဝန်ကြီး ဆိုင်ဖူဒင် အဗ္ဗဒူလာ နှင့် ယနေ့ စနေနေ့တွင် တွေ့ဆုံရန် ရှိနေသည်။
ယခု အခါ အမေရိကန် အစိုးရ၏ ဧည့်သည်တော် အဖြစ် ဝါရှင်တန်သို့ NUG အဖွဲ့ ဖိတ်ကြားခံခဲ့ရခြင်းကပင် မလျော့သော ဇွဲဖြင့် ၁၅ လ ကြာအောင် ဆန့်ကျင်တွန်းလှန်နေသည့် မြန်မာ ပြည်သူများ အတွက် ကြီးမားသော အောင်ပွဲတရပ် ဖြစ်လာခဲ့ရသည်။
ယင်းနှင့် အတူ စစ်ခေါင်းဆောင်များလည်း မဖိတ်လည်း မတက်ယုံပေါ့ဟု ပေါ့ပေါ့နေလို့ မရဖြစ်လာသည်။ ၎င်းတို့ နိုင်ငံတကာ တွင် တဖြေးဖြေး လူတောတိုး၍ မရတော့ပဲ ရုရှား၊ ဘဲလာရုစ်၊ တရုတ် နှင့် မြောက်ကိုရီယား တို့နှင့်သာ ဆက်ဆံခွင့် ရနေသည် အဖြစ်ကိုလည်း ၎င်းအား ထောက်ခံနေသူများကြားတွင် လယ်ပြင်တွင် ဆင်သွားသလို ထင်းထင်းကြီး ပေါ်လွင်နေပြီ လည်း ဖြစ်သည်။
မင်းအောင်လှိုင် ၏ ဂဠုန် ဆားချက် ငြိမ်းချမ်းရေး ဖိတ်ခေါ်ခဲ့သည်များကို ကမ္ဘောဒီယားမှ လွဲ၍ မည်သူကမျှ ယခုထိ စကားအရာနှင့်ပင် ထည့်သွင်း ပြောဆိုခဲ့ခြင်း မရှိသည်ကို တွေ့ရသည်။
အာဆီယံ နိုင်ငံများထဲတွင် မလေးရှား၊ အင်ဒိုနီရှား နှင့် စင်္ကာပူ နိုင်ငံများက လက်ရှိ စစ်အာဏာသိမ်း အဖွဲ့သည် တိုင်းပြည်ကို အုပ်ချုပ်ပိုင်ခွင့် မရှိကြသူများဟု သဘောထားနေကြပြီး အနာဂတ် မြန်မာ အရေး ကို ဆုံးဖြတ်ရာတွင် မည်သည့် အခန်းကဏ္ဍမှ ပါဝင်နိုင်စရာ မရှိဟု သဘောထားနေကြပြီး ကျန် နိုင်ငံများကမူ ရှဉ့်လဲလျှောက်သာ ပျားလည်းစွဲသာ ပုံစံမျိုး အခြေအနေကြည့် လှုပ်ရှားသွားမည်ဟု လက်ခံထားကြသူများ ဖြစ်နေဆဲပင် ဖြစ်သည်။
အမေရိကန် ပြည်ထောင်စုသည် စစ်အာဏာသိမ်း အဖွဲ့၏ ဒီမိုကရေစီ အား ရိုက်ချိုး ကာ မြန်မာပြည်သူများအား တိုက်ခိုက်နေမှုသည် ဒီမိုကရေစီ စနစ်အား ကမ္ဘာပေါ်ရှိ အာဏာရှင်များမှ ချိုးဖဲ့ ဖျက်ဆီးရန် ပူးပေါင်း ကြံစည်လာမှု၏ တစိတ်တပိုင်း အဖြစ် ရှု့မြင်ရန် အရေးကြီးပြီး ခွင့်ပြုထားမည် ဆိုက ရေရှည်တွင် ကမ္ဘာလုံခြုံရေး၊ စီးပွားရေး နှင့် တည်ငြိမ်ရေး ပျက်ပြားသွားရန် ရှိသည်ဟု လေ့လာသူများက ထောက်ပြလာကြသည်။
ထိုအရေးကို မည်သူကမျှ ပြင်ဆင်ရန် ပစ္စည်းကိရိယာ တစုံတရာ စနစ်တကျ ကြိုတင် စုဆောင်း ပြင်ဆင်ထားခြင်း မရှိပဲ အာဆီယံ အပေါ်သာ ခေါင်းတည်ထားနေသည်ကလည်း မဖြစ်သင့်ဟု ဆိုသည်။ ထို့အတွက် လက်ရှိ အစည်းအဝေး မှ အတူတကွ ဖြေရှင်းရန် နည်းလမ်းများ ရှာဖွေသင့်သည်ဟုလည်း ဆိုသည်။
နိုင်ငံ ၏ အနာဂတ်ကို ဆုံးဖြတ်ပေးရာတွင် တိုင်းရင်းသား လူမျိုးစု များသည် လွန်စွာ အရေးပါသော အခန်းကဏ္ဍမှ ပါဝင်နေသည် ဆိုသည်အား ပြည်သူများက လက်ခံထားကြပြီ ဖြစ်၍ နိုင်ငံတကာကလည်း ရှေ့လျောက် မြန်မာ ပြဿနာကို ဖြေရှင်းရာတွင် တိုင်းရင်းသား လက်နက်ကိုင် အဖွဲ့များအား နေရာပေးဖို့ လိုအပ်လာပြီ ဆိုသည့် အချက်ကို တစထက် တစ သဘောပေါက် လာကြပြီ လည်း ဖြစ်ပေသည်။
လောလောဆယ် သတင်းများအရ အာဆီယံသည် ခွေးရူးကို သင်းကွပ် ရုံ မျှနှင့် လုံလောက်သည် ဆိုကာ ချမှတ်ထားသော အချက် ငါးချက် နှင့် တိုင်ပတ်နေဆဲ ဖြစ်ပြီး ဘိုင်ဒင်ထံမှလည်း ဦးဆောင်ဦးရွက် ပြုမည့် အလားအလာ မတွေ့ရသေးပေ။
အာဆီယံ အဖွဲ့ဝင် နိုင်ငံ ခေါင်းဆောင်များက မိမိတို့ နိုင်ငံ အသီးသီး ၏ စီးပွားရေး တိုးတက် နိုင်စရာ အခွင့်အလမ်းများကို အမေရိကန် သမ္မတ နှင့် တဦးချင်းစီ တွေ့ဆုံ၍ အကြိတ်အနယ် ဆွေးနွေးနေချိန်တွင်တော့ တက်ခွင့် ပိတ်ပင်ခြင်း ခံထားရသည့် မင်းအောင်လှိုင် ဘာလုပ်နေသလဲ သိချင်မိ၍ ၎င်းတို့ပိုင် သတင်းစာများကို တစေ့တစောင်း လေ့လာကြည့်မိရာ စကစ အစည်းအဝေး ၄/၂၀၂၂ တွင် အနူတော လူချော လုပ်ကာ စကားရပ်ပြောနေသည်ကို တွေ့လိုက်ရသည်။
သူပြောသည့် စကားများထဲတွင် အနော်ရထာ၊ ဘုရင့်နောင်နှင့် အလောင်းမင်းတရားကြီး လက်ထက်တွင် မိမိတို့ နိုင်ငံ နယ်နမိတ်သည် ယခုထက် များစွာ ကျယ်ဝန်းကြောင်း၊ နယ်ချဲ့လက်အောက် ကျရောက်ခဲ့၍သာ ပြန်လည် ဆုံးရှုံးခဲ့သည်ဟု ပြောလာသည်၊ ဆိုလိုသည်က ယိုးဒယား၊ မဏိပူရ၊ အာသံ၊ စစ်တကောင်းတို့သည် မြန်မာပိုင်နယ်မြေများဟု ပြောလိုက်ခြင်းပင် ဖြစ်သည်။
ထိုအစည်းအဝေးတွင်ပင် NCA လက်မှတ်ထိုးထားသူ များထဲက အဖွဲ့ ၇ ဖွဲ့နှင့် လက်မှတ်ရေးထိုးထားခြင်း မရှိသည့် အဖွဲ့ ၃ ဖွဲ့လာရောက်ရန် ရှိကြောင်း၊ အချို့ အဖွဲ့များသည် PDF များကြောင့် လာရောက်နိုင်ခြင်း မရှိဟု ပြောနေပြန်သည်။
သနားဖို့ပင် ကောင်းနေရသည်။
ပြည်သူတို့၏ တရားသော ခုခံစစ် မုချအောင်ရမည်!!!
