မြန်မာ့ စီးပွားရေးသည်ကား အကြမ်းဖက် နူရာဝဲစွဲ ကြသူများစစ်တပ်၏ မျောက်အုန်းသီး ကိုင်မိသလို ဖြစ်နေရသည့် အပြင် ယူကရိန်း အရေးနှင့် ငွေစက္ကူ အတုများ အလျှံပယ် ဝင်ရောက်လာနေသည့် အတွက်ကြောင့် နူရာဝဲစွဲ လဲရာသူခိုးထောင်း ဆိုသလို ဖြစ်လာနေရသည်။ ငွေစက္ကူ အတုများ လိုချင်ပါက မည်သို့ မည်ပုံ ဆက် သွယ်မှာယူနိုင်သည်ကို ပြောင်ပြောင်တင်းတင်းပင် ဘတ်စ်ကားဂိတ်များ၊ အဝေးပြေးကားဂိတ်များ၊ ဆိုရှယ် မီဒီယာများ တွင် ကြော်ငြာလာကြသည်။
လျှပ်စစ်ဓါတ်အားသည် တနေ့လျှင် ၈၇၃ မီဂါဝပ်သာ ထုတ်လုပ်နိုင်တော့သည်။ သို့သော် စစ်ဗိုလ်ချုပ်ကြီးများ နေထိုင် နေသော နေပြည်တော် ခံတပ်ကြီးတွင်တော့ မီးများ ထိန်ထိန်လင်းကာ ရှုမငြီးအောင် ဖြစ်နေသည်ဟု ဧရာဝတီတွင် ဓါတ်ပုံနှင့်တကွ ဖေါ်ပြထားသည်။
ပြည်သူများက ဒီဇယ်ဆီ ဈေးသည် သုံးဆနီးပါး တက်လာနေပြန်သည့် အတွက် ဂျင်နရေတာကို သုံးစွဲရန် အခက်အခဲ တွေ့လာနေရသည်။ LNG ဖြင့် လည်ပတ်နေရသော ဓါတ်အားပေး စက်ရုံများသည်လည်း ဈေးနှုန်း များ မြင့်တက်လာသည့် အတွက် ထုတ်လုပ်မှုကို ရပ်ဆိုင်းလိုက်ရပြန်သည်။ ထို့ကြောင့် တိုင်းပြည်၏ တိုးတက် မှုသည် ရုတ်ခြည်း ဆွဲချခံရသလို ဆယ်နှစ်မျှ နောက်ပြန်ဆုတ်သွားပြီး “ဟေး...မီးလာပြီဟေ့” ဆိုသည့် ဝမ်းသာ အားရ အော်ဟစ်သံများကို ပြန်လည် ကြားလာရပြီ ဆိုသည်ကို စင်္ကာပူရှိ စထရိတ်တိုင်းမ် သတင်းစာတွင် ရေး သားလာခဲ့သည်။
စက်ရုံ အလုပ်ရုံများတွင်လည်း ၎င်းတို့၏ လည်ပတ်နိုင်မည့် အချိန်ဇယားကို လျော့ချလာရပြီး မီးအလာများနိုင်သည့် နေ့များသို့ ရွှေ့ပြောင်း လုပ်ကိုင်နေကြရသည်။ အားလုံးက အခြေအနေများကို “စောင့်ကြည့်” ခလုတ် နှိပ်ထားပြီး အလုပ်ဖြစ်ရုံ လည်ပတ်နေကြရပြီ ဖြစ်သည်။
ထိုသို့သော အနေအထား၌ စစ်ကောင်စီ မျှော်လင့်နေသလို ပြည်ပ ရင်းနှီးမြှုပ်နှံမှု များက ရွှေပြည်တော် မျှော်တိုင်းဝေး အခြေအနေသို့ ဆိုက်ရောက်သွားခဲ့ရလေသည်။
၎င်းတို့ အဖို့မှာ သူများ အကြံပေးသည့်အတိုင်း အမိန့်များသာ ထုတ်တတ်ပြီး မည်သို့မည်ပုံ အကောင်အထည် ဖေါ်ရမည်ကို လမ်းညွှန်နိုင်သူများ မဟုတ်ဟု ဗီအိုအေ တွင် ရေးသားထားသည်။ နိုင်ငံသည် အချိန်ကြာလာ သည်နှင့် အမျှ ပြန်၍ အဖတ်ဆယ် မရနိုင်လောက်အောင် Failed State ကြီး အဖြစ်သို့ ဦးတည်လာနေပြီ ဖြစ်သည်ကို ရိပ်စားမိလာသော ပြည်သူများ အဖို့ စိတ်မချမ်းမသာစွာ လက်ပိုက်ကြည့်နေကြရပေသည်။
ထိုသို့သော အနေအထားတွင် တရုတ် နဂါးကြီးသည် စိတ်ထင်တိုင်း ပျော်မြူး၍ ရမည့် နောက်ဖေး ရေအိုင် ကြီးကို ပိုင်ဆိုင်ရတော့မည် ဆိုကာ ကြိတ်၍ ပျော်ရွှင်နေကြောင်း နှင့် ထိုအရေးကို စစ်ကောင်စီ၏ ရွေးကောက်ပွဲ အပြီးတွင် စိတ်ချရရန် ကူမင်းတွင်ပင် ပြည်ခိုင်ဖြိုး ပါတီ မှ လူငါးဆယ် ခန့်ကို တရုတ်ဘာသာ စကား ၊ သဘော တရားရေးများ၊ အနောက် ဆန့်ကျင်ရေးများ အတွက် ၆ လ သင်တန်း အဖြစ် ခေါ်ယူ ပို့ချနေကြောင်း ဧရာဝတီ သတင်းက ဆိုသည်။
အမေရိကန် အနေနှင့် အင်ဒို-ပစိဖိတ် မဟာဗျူဟာ အတွက် လွန်စွာ အရေးပါသည်ဟု ယူဆထားသော မြန်မာ ပြည်သည် ယခင် ဆိုဗီယက် လက်အောက်ခံ ဝါဆော အုပ်စုဝင် နိုင်ငံများကဲ့သို့ တရုတ်လက်အောက်ခံ လုံးလုံး လျားလျား ဖြစ်သွားမည့် အရေးအပေါ် မည်သို့ တုန့်ပြန်လာမည် ဆိုသည်ကား စောင့်ကြည့်ရတော့မည် ဖြစ် သည်။ အမေရိကန်သည် ယခင်က ၎င်းတို့၏ တွက်ချက်မှု အမှားများကြောင့် ဒီမိုကရက်တစ် သမ္မတ ဂျင်မီ ကာတာ လက်ထက်တွင် တခါက အရှေ့အလယ်ပိုင်း၏ အမေရိကန် ပုလိပ်သားကြီးဟု ခေါ်ဝေါ်ခံခဲ့ရသည့် အီရန်အား ခိုမေနီ၏ လက်ထဲ ထိုးအပ်ခဲ့ရသည့် သင်ခန်းစာကို ယူသင့်သည်။
လက်ရှိတွင် တရုတ်သည် အနောက်အုပ်စုနှင့် ဆက်သွယ်၍ မည်မျှပင် စီးပွား တိုးတက်လာသော်ငြားလည်း ရှီကျင့်ဖျင် နှင့် ကွန်မြူနစ် အမာခံများသည် အရင်းရှင် စနစ် ပြိုလဲပြီး အမေရိကန် ဦးဆောင်သည့် လစ်ဘရယ် စနစ်ကြီးကို အပြီးအပိုင် မြေမြုပ်သင်္ဂြိုလ်နိုင်ရန် အတွက် ပူတင်ကို လက်ကိုင်တုတ်ကြီး အဖြစ် ရှုမြင်လာနေသည်။ အနောက် အုပ်စုသည် ကိုယ်ကျိုးစီးပွားသာ အဓိက ထားကြသူများ ဖြစ်သဖြင့် စစ်ပွဲရေရှည်လာသည်နှင့်အမျှ လက်ရှိ စည်းလုံးညီညွတ်နေမှုသည် ပြိုကွဲလာတော့မည်ဟု မျှော်လင့်နေသည်။
မြန်မာ အရေးတွင်လည်း ချင့်ချင့်ချိန်ချိန် လုပ်နေခြင်းထက် ၎င်းတို့၏ အန္တိမ ရည်မှန်းချက် ဖြစ်သည့် လစ်ဘရယ် ဝါဒ ပြိုလဲရေး အတွက် အလားတူပင် မင်းအောင်လှိုင်ကို လက်ကိုင်တုတ်သဖွယ် ရှုမြင်ပြီး လောင်းကြေးထပ် နေသည်။ မြန်မာပြည် နှင့် ပတ်သက်၍ ၎င်းတို့ အကျိုးစီးပွားသည် အဆိုပါ အန္တိမ ရည်မှန်း ချက်နှင့် နှိုင်းစာလျှင် ဒုတိယ နေရာသို့ ပို့ဆောင်လိုက်ကြပြီ ဖြစ်သည်။
အမျိုးသား ဒီမိုကရေစီ အဖွဲ့ချုပ် အစိုးရအား အနောက်ဖက်သို့ အလွန်အမင်း ယိမ်း မသွားရန် တရုတ်မှ လိုက် လိုက်လျောလျော ဆက်ဆံခဲ့ရခြင်း ဖြစ်သည်။ မြန်မာတို့၏ တော်လှန်နေမှုသည် အနောက်အုပ်စုမှ ဝင်မကူ ပါလျှင် အနိုင်ရရန် မလွယ် ဆိုသည့်ဖက်မှ ရှီကျင့်ဖျင်သည် လောင်းကြေး ထပ်ထားပြီး ဖြစ်သည်။ ထို့အတွက် ရှီကျင့်ဖျင်သည် စီးပွားရေး မလုပ်ရလည်း ရှိပါစေ၊ မြန်မာပြည်တွင် သူ ရွံရှာ မုန်းတီးနေသည့် လစ်ဘရယ်ဝါဒ ထွန်းကားလာမည့် အရေး ကို မည်သို့မျှ အကူအညီပေးမည်မဟုတ်၊ မင်းအောင်လှိုင်သာ အနိုင်ရသွားပါက လိုက်လျောနေစရာပင် မလို၊ အားကိုးစရာ မရှိ ဖြစ်နေသော မင်းအောင်လှိုင် နှင့် အဖွဲ့ မှာသူထံ သို့အခစား ဝင်လာမည် ဖြစ်သဖြင့် ပလ္လင်ပေါ်က ထိုင်စောင့်နေရုံ ဟု ယူဆထားကြပြီး ဖြစ်သည်။
ပြည်သူတို့၏ ခုခံတွန်းလှန်စစ် မုချအောင်ရမည်!!!
