အခန်း (၄၄)
HAMPTON SANDS, NORFOLK
ဗီကာရီ နှင့် ဟာရီ တို့ သူ့ကို ရှာဖွေရန် စတင် လုံးပမ်းလာနေချိန်တွင် ဟော့စ် နျူမန်သည် သူ တည်းခိုနေထိုင်ရာ ဒိုရသီ ၏ အိမ် မှ ရွာဖက်သို့ စက်ဘီးကို မှန်မှန် နင်းကာ ထွက်လာနေသည်။ လည်ပင်းကို ပါ ဖုံးထားသည့် ထူထဲသော ဆွယ်တာကြီး အပေါ်မှ မိုးကာ အင်္ကျီ အထူစား ကို ထပ်ဝတ်ကာ ဘောင်းဘီကို ဝဲလင်တန် ဘွတ်ဖိနပ် အရှည်ကြီးထဲ ထည့်ကာ ဝတ်ဆင်ထားခဲ့သည်။
ရာသီဉတုကတော့ သာသာယာယာ ရှိနေသည်။ ဖြူလွှသော တိမ်ဆိုင်တိမ်ခဲများ သည် မြောက်ပြန်လေ အရှိန်ကြောင့် ပြာလဲ့သော ကောင်းကင်ပြင်တွေ လွင့်မျောလျှက် ရှိသည်။ တိမ်ဆိုင်များ၏ အရိပ်သည် မြက်ခင်းပြင်ကျယ်ကြီးများ ပေါ်နှင့် တောင်နံရံများ ပေါ်သို့ ထိုးကျနေပြန်သည်၊ ထိုသို့ ကြည်လင်သော ရာသီဥတု မျိုး မနက်ဖန်ကစ၍ တော်တော်နှင့် ပြန်ရတော့မည် မဟုတ်ပေ။
နိုင်ငံ၏ အရှေ့ဖက် ကမ်းခြေတခုလုံး မနက်ဖန် နေ့လည်ပိုင်းမှစ၍ ရာသီဥတု ဆိုးဝါးလာတော့မည်ဟု မိုးလေဝသ ခန့်မှန်းချက်များ ထုတ်ပြန်ထားခဲ့ပြီး ရက်ပေါင်းများစွာ ကြာမည်ဟုလည်း ပါရှိသည်။ ထို့အတွက် နျုမန်သည် ခြေခင်းလက်ခင်း သာသာယာယာ ရှိတုန်း ရွာဖက်သို့ သွားဦးမည်ဆိုကာ စက်ဘီးနင်း ထွက်လာခဲ့ခြင်း လည်း ဖြစ်သည်။
လေက အနည်းငယ် ထန်လာပြန်၍ စက်ဘီးကို မနည်းထိန်းကာ စီးနေရသည်။ နျူမန်ကို ခေါင်းကို ငုံ့ကာ ခြေနင်းကို အားကုန် ဖိနင်းလိုက်သည်။ ဒိုရသီကတော့ သူ့အား ပြောမရသည့် အတူတူ ရပ်ကြည့်ကျန်ခဲ့သည်ကို မမြင်ဟန်ဆောင်ကာ ဆက်နင်းလာခဲ့သည်၊ သူတယောက်တည်း လွတ်လွတ်လပ်လပ် တွေးတောချင်သည်ကလည်း တကြောင်းအပါအဝင် ဖြစ်သည်။ စက်ဘီး လက်ကိုင် နှင့် ထိမတပ် ကိုယ်ကို ငုံ့ကာ တောင်ကုန်းငယ်တခုကို အားကုန်နင်း၍ တက်လာပြီး တောင်ထိပ် အရောက်တွင် အရှိန် နှင့် ဆင်းချလိုက်သည်။ လမ်းက မနေ့ညပိုင်းက အအေးဒဏ်ကြောင့် ရေခဲတမျှ မာကျောကာ အချို့နေရာများ တွင် အက်ကွဲနေပြန်၍ ကျင်းများ ချိုင့်များလို ဖြစ်နေပြန်၍ ရှေ့ဘီး တာယာ ကွဲထွက်သွားမည်ကိုပင် စိုးရိမ်လာရသည်။
လေတိုက်နှုန်း လျော့သွားချိန်တွင်တော့ ရွာကို လှမ်းမြင်နေရပြီ ဖြစ်သည်။ ချောင်းလေးကို ဖြတ်ဆောက်ထားသော တံတားကို ဖြတ်ကာ နင်းလာခဲ့သည်။ တံတား တဖက်အရောက်တွင် စက်ဘီးကို ရပ်လိုက်ပြီး လမ်းဘေးရှိ မြက်ခင်းပေါ် လှဲချကာ သူလည်း ဖင်ထိုင်ချလိုက်သည်။ မျက်နှာကိုလည်း နေလုံးကြီး ထွက်နေသည့်ဖက်သို့ မော့ထားလိုက်သည်။ အေးမြ လတ်ဆတ်သော လေတိုက်နေသော်လည်း ရာသီဥတုသည် နွေးနွေးထွေးထွေး ရှိနေဆဲပင်၊ သူ၏ ဦးခေါင်းထက်တွင် စင်ရော်ငှက် များက အုပ်စုဖွဲ့ကာ တိတ်ဆိတ်စွာ ပျံဝဲနေကြသည်။
နျူမန်သည် မျက်လုံးကို မှိတ်လိုက်ပြန်ပြီး ပင်လယ်ဖက်မှ လွင့်ပျံ့လာသော လှိုင်းပုတ်သံများကို အသာ နားစွင့်နေခဲ့သည်။ ထိုသို့ သာယာလှပသော ရှုခင်းများ ရှိသည့် ရွာကလေးကို သူ ပြန်သွားရသည့် အခါ သတိရနေဦးမည် ဟူသော အတွေးက မဆီမဆိုင် ဝင်လာခဲ့ပြန်သည်။
မျက်လုံး ကို ပြန်ဖွင့်ကြည့်လိုက်သည့်အခါ ဒိုရသီအား တောင်ကုန်းပေါ်တွင် တွေ့လိုက်ရသည်။ ဒိုရသီသည် ခေါင်းပေါ်က ဆောင်းထားသော ကက်ဦးထုတ်ကို ချွတ်ပြီး သူ့အား လက်ဝှေ့ရမ်းပြနေသည်။ နျုမန်က နေလုံးကြီးကို လက်ညိုးထိုးပြရင်း "အေးဆေး ဆေးဆေး လုပ် ရှောင်" ဟု လှမ်းအော်ပြောလိုက်သည်။ ဒိုရသီလည်း စက်ဘီးပေါ် ပြန်တက်ပြီး ကမ်းခြေ ရှိရာဖက်သို့ နင်းသွားသည်။
နျုမန်သည် ဒိုရသီ ထွက်သွားရာ ဖက်သို့ လှမ်းကြည့်နေရင်း ပင်လယ်ပြင် ရှိရာဖက်သို့ မျက်စိက အလိုလို ရောက်သွားခဲ့သည်။ ဒီနေ့ မနက်စောစောပိုင်း ဗိုဂဲလ်ဆီက လက်ခံရရှိခဲ့သော မက်ဆေ့ခ်ျကြောင့် သူ့စိတ်ထဲ အနှောက်အယှက် ဖြစ်နေရသည်။ ခေါင်းထဲက ထုတ်ထားဖို့ ကြိုးစားခဲ့သော်လည်း မရ ဖြစ်နေသည်။
ဟမ်းဘတ် ရှိ ဝိုင်ယာလက်စ် အော်ပရေတာ မှ တဆင့် ပေးပို့သော ကြေးနန်းတွင် နျုမန်မှ လန်ဒန်ရှိ ကက်သရင်း ဘလိတ်အား တန်ပြန် စောင့်ကြည့်ရန်ဟူသော ညွှန်ကြားချက် ပါရှိလာသည်။
စပိုင်လောက တွင် တန်ပြန် စောင့်ကြည့် ရန် ဆိုသည်မှာ သူ့အနေဖြင့် ကက်သရင်း ဘလိတ် သွားလေရာကို နောက်မှ လိုက်ပြီး သူမအား ရန်သူဖက်မှ နောက်ယောင်ခံ လိုက်နေခြင်း ရှိမရှိ ဆိုသည်ကို သေချာအောင် အတည်ပြု ပေးရန်ပင် ဖြစ်သည်။
ထိုသို့ စေခိုင်းလာခြင်းအပေါ် အမျိုးမျိုး အဓိပ္ပါယ်ဖွင့်၍ ရနေသည်။ ဗိုဂဲလ်သည် ကက်သရင်းထံမှ ရနေသော သတင်းများ အစစ်အမှန် ဟုတ်မဟုတ်ကို သေချာစေရန် အတွက်လည်း ဖြစ်နိုင်သည်၊ နောက်တကြောင်းက သူမအား တဖက်မှ လှည့်စားနေလားဟု သံသယ ရှိလာ၍လည်း ဖြစ်နိုင်သည်။ ထိုသို့ဆိုက သူ့အဖို့ လွန်စွာ အန္တရာယ်များလှသော အနေအထားထဲသို့ တိုးဝင်ရတော့မည် ဖြစ်သည်။
ကက်သရင်း ကိုသာ ရန်သူက စောင့်ကြည့်နေရိုး မှန်က သူမနောက် လိုက်နေသော သူ့အဖို့လည်း MI-5 က လူများ နှင့် ဘေးချင်းယှဉ် လမ်းလျှောက်မိရက်သား ဖြစ်သွားနိုင်သည်။ ထိုလူများသည် သူ့လို တန်ပြန်စောင့်ကြည့်နေသူများကို ဖေါ်ထုတ်နိုင်အောင် လေ့ကျင့်ထားပြီးသူများလည်း ဖြစ်သည်။ သူ့အဖို့ က ထောင်ချောက်ထဲ တိုးဝင်သွားသည်နှင့် အတူတူပင် ဖြစ်ချေတော့မည်။ ဤသည်ကို တွေးမိတိုင်း ဗိုဂဲလ် တ ယောက် ဘာအချိုးချိုးနေတာလဲဟု ဆိုကာ ကျိန်ဆဲနေမိသည်။
အကယ်၍ ကက်သရင်းအား တဖက်မှ နောက်ယောင်ခံ လိုက်ကာ စောင့်ကြည့်နေခဲ့လျှင်တော့ သူ့အနေဖြင့် ရွေးချယ်စရာ နှစ်လမ်းသာ ရှိတော့သည်။ ပထမတလမ်းက အခြေအနေ ပေးသည်နှင့် ဗိုဂဲလ်အား ဝိုင်ယာလက်စ် စက်မှ တဆင့် ဆက်သွယ်ပြီး ကက်သရင်း ဘလိတ်အား အင်္ဂလန်မှ ပြန်ခေါ်ထုတ်ရန် အမိန့်တောင်းခံရမည် ဖြစ်သည်။ ထိုသို့ အမိန့်ခံရန် အချိန်မရပါက သူ့သဘော နှင့် သူ ခေါ်ထုတ်ရတော့မည်။
ဒိုရသီသည် စက်ဘီးဖြင့် တံတားကို ဖြတ်နင်းလာပြီး နျုမန်ဘေးတွင် ရပ်လိုက်သည်။ နေလုံးသည် တိမ်တိုက်ကြီး တခု ဖြတ်သွား၍ ကွယ်ပျောက်သွားပြန်၍ အအေးဓါတ် က ဝင်လာ၍ နျုမန်သည် တကိုယ်လုံး ခိုက်ခိုက်တုံသွားခဲ့သည်။ ထိုင်နေရာမှ မတ်တတ်ထရပ်လိုက်ပြီး ဒိုရသီ နှင့် အတူ နစ်ဦးသား စက်ဘီးကိုယ်စီ တွန်းကာ ရွာဖက်သို့ လျှောက်လာခဲ့ကြသည်။
လေကြမ်းများက ရွာသင်္ချိုင်း ရှိ အုတ်ဂူများကို ဖြတ်ကာ တရွှီးရွှီး နှင့် တိုက်ခတ်လာပြန်သည်။ နျူမန်လည်း သူ့အင်္ကျီ ကော်လာကို လည်ပင်းဖုံးအောင် ထောင်လိုက်သည်။
"ကျွန်တော် တခု ပြောမယ် ရှောင်၊ ကျွန်တော် အချိန်မရွေး ဒီကနေ ထွက်ရင် ထွက်သွားရဖို့ ရှိနေတယ်၊ ထွက်ရင်လည်း ကမန်းကတမ်း ဖြစ်ဖို့များတယ်"
ဒိုရသီက သူ့စကားကြောင့် သူဖက် တချက် လှည့်ကြည့်လိုက်ပြီး မျက်နှာ အမူအရာ ဘာမှ အပြောင်းအလဲ မရှိပဲ ရှေ့သို့ ပြန်လှည့်သွားသည်။
"အဲ့ဒီတော့ ခင်ဗျား ပြောတဲ့ စက်လှေ အကြောင်း ကျွန်တော် သိထားမှ ဖြစ်တော့မယ်"
"စစ်ကြီး အစောပိုင်း အချိန်တွေက အေးဂျင့်တယောက် ယောက် ပြန်ပြေးလို့ ရအောင် ဆိုပြီး လင်ကွန်းရှိုင်းယား ကမ်းခြေ နဲ့ ဆယ်မိုင် အကွာလောက်မှာ လာစောင့်နေမယ့် ယူ ဘုတ် ဆီ လာလို့ရမယ့် စက်လှေမျိုး ရှာထားဖို့ ဘာလင်က ညွှန်ကြားထားတယ်၊ သူ့နာမည်က ဂျက် ကင် ကေ့ခ်၊ ဒီလူက ကလီသော့ မြို့မှာ ငါးဖမ်းသင်္ဘော အသေးစား တစီး ပိုင်ထားတယ်၊ ကလီသော့ ဆိုတာ ဟမ်းဘား မြစ်ဝမှာ ရှိတယ်၊ ကျွန်တော် သူ့စက်လှေကို တွေ့ပြီးပြီ၊ အကောင်းကြီးတော့ မဟုတ်ဘူး၊ ပျက်စီးနေတာတွေ နဲနဲတော့ ရှိနေတယ် ဆိုပါစို့၊ အကောင်းကြီး ဆိုရင်လည်း ဘုရင်ရေတပ်က လာသိမ်းသွားတာ ကြာလှပေါ့၊ ဒါပေမယ့် ပြင်တတ်မယ်ဆို ပြင်လို့ရတယ်"
"ကင် ကေ့ခ် ဆိုတဲ့ လူကကော ဘာ တွေ သိထားလဲ"
"သူကတော့ ကျွန်တော်ကို မှောင်ခို လုပ်ငန်း တခုခု နဲ့ ပတ်သက်နေတယ်လို့ ထင်ထားတယ်၊ သူကိုယ်တိုင်လည်း ဥပဒေနဲ့ လွတ်လွတ်ကင်းကင်း ရှိလှတာ မဟုတ်ဘူး၊ ဒါပေမယ့် အပ်ဗဲယား အတွက် တော့ လုပ်ပေးမယ် မထင်ဘူး၊ ကျွန်တော် သူ့ကို ပေါင်တရာ ထုတ်ပေးထားတယ်၊ အချိန်မရွေး နေကော ညကော အဆင်သင့် ဖြစ်နေအောင် ပြင်ထားလို့လည်း မှာထားပြီးပြီ"
"ခင်ဗျား ဒီနေ့ပဲ သူ့ကို ဆက်သွယ်ပြီး သိတ်မကြာခင် အတွင်း လုပ်ငန်းစမယ် လို့ ပြောထားလိုက်တော့"
ဒိုရသီက ခေါင်းငြိမ့်ပြသည်။
"ကျွန် တော်က ဘယ်လိုပဲ ဖြစ်ဖြစ် သွားမယ့် လူဆိုတော့ ခင်ဗျားနဲ့ မေရီ တို့ကိုလည်း ကျွန်တော်နဲ့ တပါတည်း လိုက်ခဲ့စေချင်တယ်၊ တကယ်တမ်းကျ ကျွန်တော် အနေနဲ့ အဲလို ကမ်းလှမ်းတာမျိုး လုပ်ခွင်ုတော့ မရှိဘူး"
ဒိုရသီ က သူ့စကားကြောင့် ခွက်ထိုးခွက်လှန် ရယ်လိုက်ရင်းက "ဘာလင် ရောက်ရင် ကျွန်တော်က ဘယ်လိုများ လုပ်ကိုင် စားသောက်ရမှာတဲ့တုန်း"
"ဘာမှ လုပ်စရာ မရှိဘူး ဆိုရင် တောင် ခင်ဗျား ဆက်ပြီး အသက် ရှင်နေမယ်၊ ခင်ဗျား သိထားရမှာက ကျွန်တော်တို့ဖက်က ခြေရာလက်ရာတွေ အများကြီး ကျန်ခဲ့ပြီးပြီ၊ ဗြိတိသျှတွေ က ငတုံးငအတွေလည်း မဟုတ်တော့ ခင်ဗျားကို ကြိမ်းသေ ခြေရာခံမိကြမှာပဲ၊ အဲ့ကျရင် ခင်ဗျားကို ကြိုးစင် တန်းပို့လိုက်ကြတော့မယ်"
"ကျွန်တော့ဖက်က ဒါတွေ အားလုံး စဉ်းစားထားပြီးသားပါ၊ လူကောင်းတွေ အတော်များများလည်း ကျွန် တော်တို့ အိုင်ယာလန် အရေးတော်ပုံကြီး အတွက် အသက်ပေးခဲ့ကြပြီးပြီ၊ ကျွန်တော်အကိုလည်း ဒီအတိုင်းပဲ၊ ကျွန်တော် ကျလည်း ဒီအတွက် ကြောက်နေစရာ မလိုပါ ဘူးလေ"
"ဒီလိုမျိုးက နားထောင်လို့ ကောင်းပေမယ့် အရူးမထချင်စမ်းပါနဲ့၊ ခင်ဗျားတို့ အားလုံး ရှုံးမယ့်မြင်းကို လောင်းခဲ့ကြတာလို့ ကျွန်တော်ရဲရဲကြီး ပြောရဲတယ်။ အခု ခင်ဗျား သေရမှာက တော်လှန်ရေးကြီး အတွက် မဟုတ်ဘူး၊ ရန်သူတွေ ဖြစ်တဲ့ နာဇီ ဂျာမဏီအတွက် သူလျိုလုပ်မှု နဲ့ သေရမှာ၊ ဟစ်တလာ နဲ့ သူ့လူတွေက ခင်ဗျားတို့ အိုင်ယာလန် ကိစ္စကို နဲနဲလေးမှ အရေးစိုက်မယ့် လူမျိုးတွေလည်း မဟုတ်ဘူး၊ သူတို့ကို ကူညီလို့ ခင်ဗျားတို့ အိုင်ယာလန် မြောက်ပိုင်း တခုလုံးလည်း အင်္ဂလိပ် လက်အောက်က လွတ်မြောက်လာမှာလည်း မဟုတ်ဘူး၊ အခု မဟုတ်သေးဘူး၊ နောင်လည်း လွတ်မှာ မဟုတ်ဘူး၊ ခင်ဗျား ကျွန်တော်ပြောတာ နားလည်တယ် မဟုတ်လား"
ဒိုရသီ က ဘာမှတော့ ပြန်မပြော။
"နောက်ပြီး ခင်ဗျားကိုယ် ခင်ဗျား ထပ်မေးရမယ့် မေးခွန်းတခု ရှိသေးတယ်၊ ခင်ဗျား အနေနဲ့ ခင်ဗျား အသက်ကို စတေးဖို့ ဝန်မလေးဖူးပဲထား၊ မေရီအတွက်ကော မစဉ်းစားတော့ဘူးလား"
"ခင်ဗျား ဘာကို ဆိုလိုတာလဲ"