ထိုင်း နိုင်ငံ တွင် ရောက်ရှိနေသော မလေးရှား ဝန်ကြီးချုပ် အစ္စမေး သည် ထိုင်း ဝန်ကြီးချုပ် နှင့် ဆွေးနွေးအပြီး ယခုလို ပြောကြားလိုက်ခြင်း ဖြစ်သည်။

မြန်မာတို့ ငြိမ်းချမ်းရေး လိုလားပါက မိမိတို့ ပြဿနာကို မိမိတို့သာ ဖြေရှင်းရန် ကျန်တော့ကြောင်း၊ ထို့အတွက် အာဆီယံ၏ မူငါးချက်ကိုသာ ချက်ခြင်းလက်ငင်း အကောင်အထည် ဖေါ်ဖို့ လိုအပ်လာကြောင်း၊ အာဆီယံသည် အခြားနိူင်ငံများ၏ ပြည်တွင်းရေးကို ဝင်ရောက် မစွက်ဖက်ရေး မူဝါဒကျင့်သုံး သည့် အတွက် မြန်မာပြည်သူများ၏ အကျိုး အတွက် မိမိတို့ အချင်းချင်း ချစ်ကြည်စွာ ဖြေရှင်းရမည် ဟု ဆိုသည်။

သို့သော် မလေးရှားဝန်ကြီးချုပ်က ရိုဟင်ဂျာ အရေး သည် ဒေသတွင်း နှင့် နိုင်ငံတကာ ပြဿနာ ဖြစ်သည်ဟု ပြောဆိုသွားပြန်သည်။

မြန်မာပြည်တွင်း တွင်တော့ စစ်အာဏာရှင်များအား ဆန့်ကျင်တွန်းလှန် တိုက်ခိုက်နေမှုများက နှစ်ပေါင်း ၆၀ အတွင်း တခါမျှ မကြုံဖူးအောင် ပြင်းထန်လာလျက် ရှိနေပြီ ဖြစ်သည်။ စစ်ကောင်စီ ဖက်မှ တပ်ရင်းမှုး အဆင့်ရှိသူ ဒုတိယ ဗိုလ်မှုးကြီး တဦး ပြည်သူ့ တော်လှန်ရေး အင်အားစုများထံ ခိုလှုံလာခဲ့ပြီ ဖြစ်သည်။

ယခု အရေးသည် တိုင်းရင်းသား လူမျိုးစု များ နှင့် ဖြစ်ပွားနေသည့် အဆင့်မှ စစ်တပ်အား ပြည်မရှိ ဗမာ တိုင်းရင်းသားများကပါ ဝိုင်းဝန်းတိုက်ခိုက်လာနေပြီ ဖြစ်သည့် တကယ့်ပြည်တွင်းစစ်ကြီး အသွင် ကူးပြောင်းရောက်ရှိနေပြီ ဖြစ်သည်။

တော်လှန်ရေး ကို ဆင်နွှဲနေသော ပြည့်သူ ကာကွယ်ရေး တပ်များအဖို့ တော်လှန်ရေး အောင်မြင်ရန် အချက် နှစ်ချက် အပေါ် အမှီပြုကာ တိုက်ပွဲဝင်နေကြသည်ဟု Asia Times စာစောင်တွင် ရေးသားထားသည်။

ပထမ အချက်သည် မိမိတို့ အချင်းချင်း စည်းလုံးညီညွတ်စွာဖြင့် တပ်ဦး အသွင် ဖွဲ့စည်းထွက်ပေါ်လာရေး၊ ဒုတိယ အနေဖြင့် အနောက်နိုင်ငံများ၊ အထူးသဖြင့် အမေရိကန် မှ စစ်ရေး အကူအညီများ ရရှိရေး တို့ပင် ဖြစ်သည်ဟု ဆိုသည်။

မင်းအောင်လှိုင် ၏ အာဏာသိမ်းမှု အား လိင်စိတ်ပြောင်းလဲ‌သူများပါမကျန် တနိုင်ငံလုံးရှိ လူထုလူတန်းစွာ ပေါင်းစုံက ငြိမ်းချမ်းစွာ ကန့်ကွက် ဆန္ဒပြခဲ့ကြပြီးလည်း ဖြစ်သည်။

သို့သော် မင်းအောင်လှိုင်၏ လက်ပါးစေတပ်များက လူမဆန်စွာ ရက်ရက်စက်စက် သတ်ဖြတ် ချေမှူန်းခဲ့ကြသည်။ ဒုတိယ ကမ္ဘာစစ်အတွင်း ဖက်ဆစ် ဂျပန်တို့ထက်ပင် အပုံကြီး ဆိုးဝါးလာခဲ့သည်။

ဤသို့ဖြင့် မင်းအောင်လှိုင်သည် တနိုင်ငံလုံးမှ နာမည် မကြားချင်လောက်အောင် ရွံရှာ မုန်းတီးခြင်း ခံခဲ့ရပြီး နာမည် အတိုကောက်စာလုံးကို အခွင့်ကောင်းယူကာ ဆဲဆိုခံနေရသည်ဟု စာစောင်က ဆက်လက်ရေးသားထားသည်။

ယခုအချိန်အထိ ရုရှား၊ တရုတ်၊ အီရန်တို့မှ လက်နက်များ ထောက်ပံ့နေသော်လည်း ပြည်သူ့ တော်လှန်ရေး အင်အားစုများ အဖို့ အနောက်အုပ်စုမှ ပါးစပ်နှင့် ထောက်ခံနေသည့် အဆင့်သာ ရှိသည်၊ ၎င်းတို့က လက်နက်ကိုင် တော်လှန်ရေး ကို အားမပေးလို၊ ငြိမ်းချမ်းစွာ ဖြင့် အသွင်ကူးပြောင်းသွားနိုင်ရေးသာ လိုလားကြသော်လည်း မြန်မာပြည်သူများအဖို့က ထိုသို့ ဖြစ်လာသည့်အထိ မည်သို့မျှ စောင့်ဆိုင်း၍ မရတော့သည့် အခြေအနေမျိုး ဆိုက်လာခဲ့သည်။

လက်နက်များကို အိမ်နီးချင်း နိုင်ငံများမှ တင်သွင်းဖို့လည်း မဖြစ်နိူင်၍ မှောင်ခိုဈေးမှ ဈေးကြီးပေး ဝယ်ယူနေရသော်လည်း အလွယ်တကူ ရနိုင်ဖို့ ခက်ခဲနေပြန်သည်။ PDF အများစုသည် တူမီးများ၊ အဝေးထိန်း မိုင်းများ၊ အရပ်သုံး ဒရုံးများ ဖြင့် စစ်တပ်ကို ရင်ဆိုင်နေရသည်က များသည်၊ ၎င်းတို့၏ အားသာချက်က နယ်မြေ ကျွမ်းကျင်မှု သာ ရှိပေသည်။

သို့သော် စစ်တပ်ကိုအနိုင်တိုက်နိုင်မှ ဖြစ်မည်ဟူသော ခံယူချက်များ က မိုးထိအောင် မြင့်မားနေကြသည်။ ၂၀၂၁ ဖေဖေါ်ဝါရီ ၁ ရက် နေ့ အာရုံမကျင်းမီကပင် ၎င်းတို့၏ အနာဂတ် အစိတ်စိတ် အမွှာမွှာ ပျက်ဆီးသွားခဲ့ပြီး ဖြစ်၍ မိမိတို့ ရရှိခဲ့ပြီးသော လွတ်လပ်ခွင့် နှင့် မျှော်လင့်ချက်များကို မိမိတို့ဖာသာ တိုက်ယူမှ ပြန်လည်ရရှိ နိုင်မည်ကို သိရှိ နားလည်လာကြ၍ လည်း ဖြစ်သည်။

ရုရှား နှင့် အီရန် မှ ထောက်ပံ့နေသော ဒုံးကျည်များ၊ ခေတ်မီ လက်နက်များကြောင့် ပြည်သူများ အသက်လု ပြေးလွှားနေရချိန်တွင် အမေရိကန် နှင့် အနောက်နိုင်ငံများက ဒီမိုကရေစီ တရားများ ဟောကြားနေပြီး စစ်ကောင်စီအား ထုံးစံ အတိုင်း စီးပွားရေး ဒဏ်ခတ်သည့် အဆင့်က တက်မလာကြသေးပေ၊ အနောက်နိုင်ငံများ၏ ကိုယ်ကျိုးသာ ကြည့်တတ်သည့် လောဘစိတ်ကို မှန်ကန်စွာ သုံးသပ် ခန့်မှန်းနိုင်ခဲ့သူများက စစ်ဗိုလ်ချုပ်များပင် ဖြစ်သည်ဟု ဆိုရမလို ဖြစ်‌လာနေသည်။

၎င်းတို့ကဲ့သို့ တရားဥပဒေ စိုးမိုးပြီး အေးချမ်းလုံခြုံစွာ နေရသူများ အဖို့က ရွှေပြည်အေး တရား ဟောရသည်မှာ လွယ်ကူလှသော်လည်း တရားလက်လွတ် ထင်တိုင်းကြဲနေသည့် စစ်ကောင်စီ နှင့်၎င်းတို့၏ လက်ပါးစေများ အောက် နေကြရသူများ အဖို့က အသက်တချောင်းကို ရှာကြံ မွေးနေကြရသည်၊ ထိုသို ရွှေပြည်အေးတရား ဟောနေသူများ၏ အဖြစ်က ဆာလောင်မွတ်သိပ်နေသော မြေခွေးအား ၎င်း ပါးစပ်ထဲ ကိုက်ချီထားသော သားကောင်၏ အသက်ကို ချမ်းသာပေးရန် ပြောဆိုနေသည့် အဖြစ်နှင့် အလား သဏ္ဍန်တူနေသည်ဟု Asia Times က ဆက်လက်ရေးသားထားသည်။

ဒီမိုကရေစီ အရေး၊ လွတ်လပ်ခွင့်၊ တရားမျှတမှု တို့ အတွက် တိုက်ပွဲဝင်နေကြသော မြန်မာပြည်သူများအား ဒီမိုကရေစီ နိုင်ငံကြီးများက လက်ပိုက်ကြည့်နေကြသည့်အဖြစ်သည် မြန်မာကဲ့သို့ ဒီမိုကရေစီ လိုလားသော အခြားနိုင်ငံရှိ ပြည်သူများ အတွက် စံနမူနာ ဖြစ်လာနေ၍ အာဏာရှင် စနစ် သက်‌ဆိုးရှည်အောင် မြေတောင် မြှောက်ပေးနေသည်နှင့် မခြား ဖြစ်လာနေရသည်။

မည်သို့ပင် ဆိုစေ မြန်မာတို့၏ တော်လှန်ရေးကာ မလွှဲမသွေ အောင်ပွဲခံကြမည်သာ ဖြစ်သည်၊ မည်သည့် အချိန်ဆိုသည်ကား NUG, PDF နှင့် တိုင်းရင်းသား လက်နက်ကိုင်များ တပေါင်းတစည်းတည်း ဆန့်ကျင်လာနိုင်မှု နှင့် အနောက်နိုင်ငံများ၏ ပံ့ပိုးလာမှု အပေါ်တည်မှီနေပေသည်။

(ထိုသို့ အနောက်နိုင်ငံများ၏ တုံဏှိဘာဝေ နိုင်မှု ဖက်မှ ဆင်ခြေ ပေးလိုသည့် apologists များက ဒလန်၊ ပျုစောထီးများ အပေါ် တိုက်ခိုက်နေခြင်းကို ရှောင်ရှားမှသာ ဖြစ်မည်ဟု ပြောဆိုလာကြပြန်သည်)

လက်ရှိ ဆင်နွှဲနေသော တော်လှန်ရေးကြီးသည် NUG အတွက်လည်း မဟုတ်၊ မည်သည့်နိုင်ငံရေး လှုပ်ရှားမှု မျိုး နှင့်လည်း မဆိုင်၊ လွတ်လပ်သော နိုင်ငံသားများ အဖြစ် လူချင်းတူတူ သူချင်းမျှမျှ နေထိုင်ခွင့် ရရေး အတွက်သာ ဖြစ်သည်ကို သတိမူကြရမည် ဖြစ်သည်ဟု ဆိုသည်။

‌ပြည်သူတို့၏ ခုခံ တွန်းလှန်စစ် မုချအောင်ရမည်!!!

Image credit - Spring Revolution by Thu Ra Kyaw via newnaratif.com