အပိုင်း (၃)

အခန်း (၃၁)

BERLIN: February 1944

“သူတို့ အခေါ် က ပိုးစာသီး စစ်ဆင်ရေး လို့ ဆိုတယ်၊ ခက်တာက အခုထိ အဲ့တာ ဘာလဲဆိုတာ ကျုပ်တို့ဖက်က အစအနတောင် မသိရသေးတာပဲ” ဟု ဗိုလ်ချုပ် ကနယ်ရစ်က ပြောသည်။

သူ့စကားကြောင့် ဘရီးဂိတ်ဖူးယား ဝေါ်လ်တာ ရှလင်းဘတ် နှုတ်ခမ်းတွင် ပြုံးမယောင် ဖြစ်သွားပြီး ချက်ချင်းလို ပျောက်ကွယ်သွားသည်။ ထိုနေ့မနက်တွင်လည်း ထုံးစံအတိုင်း သူတို့ နှစ်ဦး တီယာဂါးတင်းတွင် မြင်းအတူတူ စီး နေကြရင်းက ကနယ်ရစ်က စကားစလာခြင်း ဖြစ်သည်။ ကနယ်ရစ်သည် ယခုအထိ သူသိထားသည့် သတင်း အစုံအလင်ကို ရှလင်းဘတ်အား မပြောရသေးပေ။ သို့သော် ရှလင်းဘတ် မျက်နှာ အမူအရာကို အကဲခတ်လိုက် မိချိန်တွင်တော့ သူ ထိန်ချန်ထားခဲ့မှု အတွက် အပြစ်ရှိသလို မခံစားခဲ့ရတော့ပေ။

သူတို့ ယခုလို မြင်းအတူတူ စီးပြီး တွေ့ဆုံကြခြင်းသည် ပါးစပ်က ထုတ်မပြောသော စည်းကမ်းချက် တခုက ရှိနေခဲ့ပြီးလည်း ဖြစ်သည်။သူတို့ နှစ်ဦးစလုံးက ထိုသို့ တွေ့ဆုံဖြစ်ခဲ့မှု အပေါ် မိမိအကျိုး ရှိရာ ရှိကြောင်း အသုံး ချနိုင်ဖို့ပင် ဖြစ်သည်။ ကနယ်ရစ်အဖို့ သတင်းကို မဝေငှဘဲ ထိန်ချန်ထားရန် ဆုံးဖြတ်ခဲ့ခြင်းသည် ရိုးရှင်းသော ဖေါ်မြူလာကို ကျင့်သုံးနေခြင်းလည်း ဖြစ်သည်။ ထိုသို့ ထုတ်ပြောလိုက်ခြင်းဖြင့် မိမိလုပ်နေသော လုပ်ငန်း အတွက် အကျိုးရှိလာမည်လောကို အရင် စဉ်းစားလေ့ရှိသည်။ လုံးဝ လိမ်ညာ ပြောဆိုပါကလည်း သူ့အပေါ် တမျိုးတမည် ထင်လာနိုင်သည်။ လက်တုန့်ပြန်မှုများ ဖြစ်လာနိုင်ပြီး ယခုလို မြင်းအတူစီးနေရသည့် အနေအထား လည်း ပျက်ပြားသွားနိုင်သည်။

“ပြီးခဲ့တဲ့ ရက်တွေက ဂျာမန်လေတပ်က ထောက်လှန်းရေး ဓါတ်ပုံ တွေ ရိုက်ယူနိုင်ခဲ့တယ်” ဟု ပြောရင်း သူတို့ ထိုင်နေသည့် ကော်ဖီ စားပွဲပေါ်သို့ ပုံကြီးချဲ့ထားသော ဓါတ်ပုံများကို ချပြလိုက်သည်။ “အခုပုံက အင်္ဂလန် တောင် ပိုင်း ဆယ်စီဘေလ် ကို ရိုက်ယူခဲ့တာပဲ၊ ဒီဓါတ်ပုံထဲမှာ တွေ့ရတဲ့ သူတို့ လုပ်နေတဲ့ လုပ်ငန်းတွေ အားလုံး ပိုးစာပင် ပရိုဂျက် နဲ့ ဆက်စပ်နေမယ်လို့ ကျွန်တော်တို့ဖက်က လုံးဝ ယုံကြည်ထားတယ်”၊ ထို့နောက် ကနယ်ရစ်က ငွေရောင် ဖေါင်တိန် ဖြင့် တနေရာကို ထောက်ပြပြီး “ဒီနေရာကိုကြည့် အလွန့် အလွန် ကြီးမားတဲ့ အရာတခုကို ကမန်းကတမ်း ဆောက်နေကြတယ်ဆိုတာ သိသာနေတယ်၊ အဲ့ဒီနေရာမှာ ဘိလပ်မြေတွေ၊ သံမဏိ ယက်မ ကြီးတွေ စုပုံနေတာ တွေ့ရမယ်၊ ဒီဓါတ်ပုံမှာ ဆို ငြမ်းတွေ ဆောက်ထားတာ ထင်ထင်ရှားရှားကြီးကို တွေ့နေ ရတယ်”

“ချီးကျူးပါတယ် ဗိုလ်ချုပ် ကနယ်ရစ်၊ နောက် ဘာများ ထပ်သိထားတာ ရှိသေးလဲ” ဟု ဟစ်တလာက မေးလိုက်သည်။

“ထပ်သိထားတာကတော့ အဲ့ဒီနေရာတွေမှာ ထိတ်ထိတ်ကြဲ ဗြိတိသျှ နဲ့ အမေရိကန် အင်ဂျင်နီယာတွေ လုပ်နေ ကြတယ် ဆိုတာပဲ၊ ပြီးတော့ ဒီပရိုဂျက်မှာ ဗိုလ်ချုပ်ကြီး အိုင်စင်ဟောင်ဝါ တယောက် ထဲထဲဝင်ဝင် ပတ်သက်နေ တယ်၊ ကံဆိုးချင်တော့ ကျွန်တော်တို့ဖက်က ပဟေဠိ အဖြေညှိနိုင်ဖို့ အရေးကြီးတဲ့ အစိတ်အပိုင်း တခု ပျောက် ဆုံးနေတာပဲ၊ အဲ့တာ ဘာလဲ ဆိုတော့ သူတို့ အခုလုပ်နေတဲ့ ကွန်ကရိ တုံးကြီးတွေ၊ တိုင်ကြီးတွေက ဘာအတွက် လဲ ဆိုတာ မသိဘူး ဖြစ်နေတယ်” ဟု ပြောရင်း ကနယ်ရစ်က ပြောလက်စ စကားကို ခဏရပ်လိုက်ပြီးမှ “အဲ့ဒီ အစိတ်အပိုင်းကို ဖေါ်ထုတ်နိုင်ပြီ ဆိုရင် မဟာမိတ်တပ်တွေ ဝင်တိုက်မယ့် အစီအစဉ်တွေကို ကျွန်တော်တို့ဖက်က ကောင်းကောင်း အဖြေထုတ်နိုင်ပြီ”

ဟစ်တလာသည် ကနယ်ရစ် ၏ ရှင်းလင်းတင်ပြချက်များ ကို အတော်ကြီး အားရကျေနပ်သွားပုံ ရှိသည်။ “ကျုပ်အနေနဲ့ နောက်ထပ် မေးခွန်းတခု မေးစရာ ကျန်သေးတယ် ဟား ဗိုလ်ချုပ်၊ အဲ့တာကတော့ ဒီသတင်းတွေ ဘယ်ကလာလဲ ဆိုတာပဲ”

ကနယ်ရစ်က ဟစ်တလာ အမေးကို ချက်ခြင်း ပြန်မဖြေသဖြင့် ဟင်းမလား မျက်နှာ တွန့်ကနဲ ဖြစ်သွားသည်။ “ဗိုလ်ချုပ် ကနယ်ရစ် ခင်ဗျား အခု ပြောတဲ့ စကားတွေ ဒီအခန်းအပြင်ဖက် ရောက်သွားနိုင်တယ်လို့ တွက် မထားဘူး မဟုတ်လား”

“သေချာပေါက် တွက်မထားပါဘူး ဟား ရိုက်ချ် ဖူးဟား၊ အခု လန်ဒန်မှာ ရှိနေတဲ့ ကျွန်တော်တို့ အေးဂျင့်တွေ ထဲက တယောက်ဟာ ပိုးစာပင် အဖွဲ့ထဲ မှာ ပါနေတဲ့ အထက်တန်း အရာရှိကြီး တဦးဆီက တိုက်ရိုက် ရလာခဲ့ တာပါ၊ ဒီလို ပေါက်ကြားသွားတာကိုလည်း အဲ့ဒီ ပုဂ္ဂိုလ် ရိပ်စားမိတာမျိုး မရှိသေးပါဘူး၊ ဘရီးဂိတ်ဖူးဟား ရှလင်းဘတ်ခ် ရဲ့ ထောက်လှန်းရေး သတင်းတွေ အရဆိုရင် လန်ဒန်မှာ ကျွန်တော်တို့ အေးဂျင်တွေ လှုပ်ရှားနေ တာကို ဗြိတိသျှ ထောက်လှန်းရေးက သိနေပေမယ့် ဘယ်သူဘယ်ဝါ ဆိုတာ မသိနိုင်ဘူး ဖြစ်နေပါတယ်”

“အဲ့တာ အမှန်ပဲ” ဟု ရှလင်းဘတ်ခ် က ဝင်ပြောလိုက်သည်။ “ကျွန်တော့် လူတွေရဲ့ အပြောအရ ဒီကိစ္စ နဲ့ ပတ် သက်ပြီး MI5 အတော်ကို ကျဉ်းထဲ ကျပ်ထဲ ရောက်နေပြီ လို့ သိရပါတယ်”

“ကောင်းပါလေ့ဗျာ၊ အခုလို အပ်ဗဲယား နဲ့ အက်စ်ဒီ အဖွဲ့တွေ တဦးနဲ့ တဦး ရန်စောင်မနေဘဲ အတူ တွဲလုပ်နေတာ သိရတော့ စိတ်အေးသွားမိတယ်၊ ဒီအတိုင်းဆို နောက်ထပ် ရလဒ်ကောင်းတွေ ထွက်ပေါ်လာမယ့် လက္ခဏာတွေ ပဲ၊ ကဲ...ဘရီးဂိတ်ဖူးဟား ကနေ ခင်ဗျား ပျောက်ဆုံးနေတဲ့ ပဟေဠိ အစိတ်အပိုင်း ကို ရှာနိုင်အောင် ကူညီပေး ကောင်း ပေးနိုင်ပါလိမ့်မယ်”

ရှလင်းဘတ်ခ် က ပြုံးလိုက်ပြီး “ကျွန်တော်လည်း ဒီအတိုင်းပဲ အတိအကျ တွေးထားပြီးသားပါ”

                                                **************************

အခန်း (၃၂)

LONDON

ကက်သရင်း ဘလိတ်သည် အောက်သိုးသိုး အနံ့ထွက်နေသော ပေါင်မုန့်ချပ်ကို ဖဲ့ကာ ထရာဖါဂါ ရင်ပြင်ရှိ ခို များကို ပစ်ကြွေးနေသည်။ ဒီလိုနေရာမျိုးတွင် အချိန်းအချက် လုပ်ရန် စီစဉ်ခဲ့ခြင်းသည်က မိုက်မဲလှသည် ဟု လည်း တွေးနေမိပြန်သည်။ သို့သော် ဗိုဂဲလ်သည် ဗြိတိသျှ အုပ်ချုပ်ရေး အာဏာစက် ရှိရာ နှင့် မနီးမဝေးတွင် သူ၏ အေးဂျင့်များ လှုပ်ရှားနိုင်သည်ကို ကြိတ်၍ သဘောကျနေသူ ဖြစ်မှန်းလည်း သိထားခဲ့သည်။

သူမသည် ရင်ပြင်သို့ စိန့်ဂျိမ်း ပန်းခြံကို ဖြတ်ကာ ပေါမောလ် လမ်းအတိုင်း လျှောက်လာခဲ့ပြီးနောက် တောင်ဖက် အပိုင်းမှ ဝင်ရောက်လာခဲ့သည်။ နျူမန်သည် စိန့် မာတင် နှင့် ဆိုဟို ရှိရာ မြောက်ဖက်မှ ရောက်လာရမည် ဖြစ် သည်။ ကက်သရင်းသည် ထုံးစံအတိုင်း တမိနစ် နှစ်မိနစ်ခန့် စော၍ ရောက်နေသည်။ ဤသည်ကလည်း နျူမန် နောက်သို့ တစုံတယောက် နောက်ယောင်ခံ လိုက်လာခြင်း ရှိမရှိ ကို အရင်ဦးစွာ ဆန်းစစ်လို၍ ဖြစ်သည်။

ရင်ပြင်တဝိုက်သည် မနက်ခင်းက ရွာထားသော မိုးရေများ နှင့် ပြောင်လက်နေသည်။ မြစ်ဖက်မှ လာသော အေး စိမ့်သည့် လေသည် သဲအိတ်များကို ဖြတ်ကာ တရွှီးရွှီး နှင့် တိုက်ခတ်နေသည်။ အနီးဆုံး ဗုံးခိုရာ နေရာကို ညွှန် ပြသည့် ဆိုင်းဘုတ် ထူထားသော တိုင်သည် လေဒဏ်ကြောင့် ယိမ်းထိုးနေပြီး ဘယ်အရပ်ကို ညွှန်ပြရမှန်း မသိ အောင် ဇဝေဇဝါ ဖြစ်နေပုံမျိုး တွေ့နေရသည်။

ကက်သရင်းသည် စိန့်မာတင် ပလေ့စ် ရှိရာ မြောက်ဖက်သို့ လှမ်းမျှော်ကြည့်လိုက်ပြန်သည်။ နျူမန် ရင်ပြင်ထဲသို့ လှမ်းဝင်လာသည်ကို တွေ့လိုက်ရသည်။ သူ လာနေသည်ကို ကက်သရင်းသည် အသေအချာ စောင့်ကြည့်နေခဲ့ သည်။ သူ့နောက်တွင် လူအုပ်ကြီး ကပ်ပါလာသည် ကို တွေ့ရသည်။ အချို့က စိန့်မာတင်လမ်း အတိုင်းဆက် လျှောက်သွားပြီး အချို့က နျူမန်လိုပင် ရင်ပြင်ရှိရာသို့ ဦးတည် လျှောက်လာကြသည်။

ထို့အတွက်လည်း သူ့နောက်က နောက်ယောင်ခံ လိုက်လာသူ ရှိမရှိ ခန့်မှန်းရ ခက်နေသည်။ သူမသည် လက်ထဲမှ ပေါင်မုန့်များကို ဖြန့်ကြဲပြစ်လိုက်ပြီး ထရပ်လိုက်၍ အနီးရှိ ခိုများ အလန့်တကြား ဖြစ်ကာ ထပျံကုန်ကြသည်။

ကက်သရင်းသည် နျူမန် ရှိရာသို့ ဦးတည် လျှောက်လာခဲ့သည်။ ဒီတကြိမ်တွင်တော့ သူမ လက်ထဲက ဖလင်လိပ် ကို နျူမန် လက်ထဲ ထည့်ဖို့ စိုးရိမ်နေမိသည်။ ဂျော်ဒန်သည် မနေ့ညက သူမ တခါမျှ မမြင်ဖူးသည့် မှတ်စုစာအုပ် နောက်တခု ယူလာခဲ့ပြီး မီးခံသေတ္တာထဲ သော့ခတ် သိမ်းခဲ့သည်။ ဒီနေ့မနက် ဂရိုဗီနာ စကွဲယားရှိ ရုံးသို့ ထွက် သွားပြီးနောက်တွင် သူမလည်း အိမ်ရှိရာသို့ နောက်တခေါက် ပြန်လာခဲ့သည်။

ဂျော်ဒန် အိမ်သို့ လာရောက် ရှင်းလင်းပေးနေသော အမျိုးသမီး ပြန်သွားသည့်အခါတွင်တော့ ကက်သရင်းသည် သော့တူ ဖြင့် အိမ်ထဲသို့ လှစ်ကနဲ ဝင်လိုက်ပြီး စာအုပ် တအုပ်လုံးကို ဓါတ်ပုံ ရိုက်ယူခဲ့သည်။

နျူမန်သည် သူမနှင့် ပေအနည်းငယ် အကွာသို့ ရောက်လာပြီ ဖြစ်သည်။ ကက်သရင်းသည် ဖလင်လိပ်ကို စာ အိတ်ထဲ ထည့်ထားပြီး အသင့်ပြင်ထားခဲ့၍ စာအိတ်ကို ပိုက်ဆံအိတ်ထဲ က ထုတ်ယူလိုက်ပြီး နျူမန် လက်ထဲသို့ အဆင်သင့် ထည့်ပေးနိုင်ရန် အသင့်ပြင်ထားလိုက်သည်။ ပြီးသည်နှင့် ဣန္ဒြေ မပျက် ဆက်လျှောက်သွားမည်ဟု တွေးထားပြီး ဖြစ်သည်။

သို့သော် နျူမန်သည် သူမရှေ့တည့်တည့်တွင် ရပ်လိုက်ပြီး စာအိတ်ကို ဆွဲယူကာ သူမအား စာရွက်ပိုင်းတခု လှမ်းပေးလိုက်သည်။

“ကျွန်တော်တို့ မိတ်ဆွေကြီး ဆီက စာ” ဟု ပြောရင်း လူအုပ်ကြားထဲ တိုးဝင်ပျောက်ကွယ်သွားတော့သည်။

                                                ****************************