ဟွန်ဆန် ခရီးစဉ် စပြီ

by Hla Soewai - Jan 07 2022

မြန်မာပြည်သူများ၏ သဘောထားကို လစ်လျူ ရှုကာ စီစဉ်လာသော ဟွန်ဆန်၏ နှစ်ရက်ကြာ ခရီးစဉ်က ယနေ့ စတင်လာဖို့ ရှိနေသည်။ ယင်းနှင့် အတူ စစ်ကောင်စီ၏ ဝါဒ ဖြန့်ချီရေး ယန္တယားကြီး မှာ တဂျုံးဂျုံး ဖြင့် မောင်း နှင်နိုင်ရန် အဆင်သင့် ပြင်ဆင်ထားပြီလည်း ဖြစ်သည်။

 

ဟွန်ဆန်သည် သူနှင့် ဘာသာစကား တူသူ ချင်း ဖြစ်၍ အကြမ်းဖက်မှုများ ရပ်တန့်အောင် ပြောဆို ရနိုင်မည်ဟု ယုံကြည်နေပြီး မိမိ မည်သို့ လုပ်မည်ကို အပြစ်တင် မစောဘဲ စောင့်ကြည့်ပါရန်၊ အခြေအနေကောင်းပါက ခရီးစဉ်ကို တရက်ထပ်တိုးမည်ဟုပင် ပြောဆိုလာခဲ့သည်။ မင်းအောင်လှိုင်က သူ့အပေါ် စည်းကမ်း ချက်များ ပြန်လည် သတ်မှတ်ခံရမည့် အရေးကိုတော့ ထည့်တွက်ထားဟန် မတူပေ။ ဟွန်ဆန် အနေနှင့် အာဆီယံ မူ ငါးချက် တွင် ပါသော အနည်းဆုံး လိုက်လျောပေးနိုင်သည့် အထူး သံတမန် စေလွှတ်ရေးကို ရရှိခဲ့လျှင်ပင် ကံကောင်းလှသည် ဟု ဆိုရမည် ဖြစ်သည်။ သို့သော် အထူး သံတမန်ဆိုသည်ကလည်း သူနှင့် အတူ လိုက်ပါ လာမည့် နိုင်ငံခြားရေး ဝန်ကြီး ပရပ် ဆော့ဟွန်း ပင် ဖြစ်မည်ဟု ယူဆခံထားရပြန်၍ မည်သို့မျှ ထူးခြားမှု ရှိလာမည် မဟုတ်ပေ။

 

ဟွန်ဆန်၏ လုပ်ရပ်သည် အာဆီယံ ဥက္ကဌ ရာထူး ကို အခွင့်ကောင်းယူကာ အဖွဲ့ဝင် နိုင်ငံများနှင့် ပြောဆို တိုင်ပင်ခြင်း မရှိ၊ လုပ်ပိုင်ခွင့် ကို ကျော်လွန်လုပ်ဆောင်လာခဲ့သည်သာမက အာဆီယံ မှ စစ်အာဏာသိမ်း ခေါင်းဆောင် အား အစည်းအဝေးများသို့ တက်ရောက်ခွင့်မပြုဘဲ ဖိအားပေးနိုင်ခဲ့သည်များကို ပြေလျော့ သွားအောင် လုပ်လိုက်သည်နှင့် အတူတူ ဖြစ်နေသည်။

 

အင်ဒိုနီရှား သမ္မတ ဂျိုကိုဝီက အာဆီယံ ၏ မူ ငါးချက်ကို သိသာထင်ရှားစွာ အကောင်အထည် ဖေါ်ခြင်း မျိုး ဖြစ်မလာပါက ယခင်အတိုင်း မည်သည့်အစည်းအဝေး မဆို နိုင်ငံရေး နှင့် မသက်ဆိုင်သူ ကိုသာ တက်ရောက်ခွင့် ပေးမည်ဟု ခရီးစဉ် မစတင်မီ တရက်က ဟွန်ဆန် အား တယ်လီဖုန်းဖြင့် ဆက်သွယ်၍ ထပ်မံ သတိပေး လာခဲ့ ပြန်သည်။

 

ဟွန်ဆန်ကတော့ အာဆီယံ ပဋိညာဉ် လုပ်ငန်းဘောင်ထက် ကျော်လွန်၍ မလုပ်ပါဟု ပြောဆိုခဲ့ပြန်သည်။ ဟွန်ဆန်လို လူမျိုးအား သံသယ အကျိုး ခံစားခွင့် ပေးသည့်အနေဖြင့် ယုံကြည်ရန် ခက်ခဲနေသည်ဟု လေ့လာ သူများက သုံးသပ်ခဲ့ကြပြန်သည်။

 

အမျိုးသား ညီညွတ်ရေး အစိုးရ အဖွဲ့၏ အာဆီယံ ဆိုင်ရာ အထူး သံတမန် ဦးဘိုလှတင့်က ဟွန်ဆန်၏ အဆင် ခြင်မဲ့ လုပ်ရပ်အား တားမြစ်ပေးရန် အာဆီယံ နိုင်ငံများသို့ ပန်ကြားခဲ့သည်။ နေပြည်တော်ရှိ ကမ္ဘောဒီယား သံရုံး အနီးတွင် ဒီဇင်ဘာ ၃၁ ရက်နေ့က သတိပေးသည့် သဘောဖြင့် ဗုံး နှစ်လုံး ဖေါက်ခွဲသည်ကို တွေ့ခဲ့ရသည်။

 

လူ့အခွင့်အရေး ဆိုင်ရာ အာဆီယံ ပါလီမန် အမတ်များ ဆိုင်ရာ အဖွဲ့မှ ဟွန်ဆန်၏ သံခင်း တမန်ခင်းအား ကောင်းဘွိုင် ဒစ်ပလိုမေစီ ဟု ကင်ပွန်းတပ်ခဲ့ကြသည်။

 

စစ်ကောင်စီသည် ဖြတ်လေးဖြတ် စနစ်ကို ကျင့်သုံးပြီး PDF များအား စားနပ်ရိက္ခာများ အထောက်အပံ့ ပေးနေ သည့် ရွာများကို မီးရှို့ဖျက်ဆီး မှုများ ဆက်တိုက် ကျူးလွန်လျှက် ရှိနေဆဲပင် ဖြစ်သည်။ ထိုသို့ လက်နက်ကြီး များ နှင့် ပစ်ခတ် ပြီး နောက် ရွာများထဲသို့ ဝင်ရောက်ကာ တွေ့သမျှ ကို လုယက် ယူငင်ကြပြီး မီးတင်ရှို့သွားခဲ့ ကြခြင်း လည်း ဖြစ်သည်။

 

လက်ရှိ အနေအထားတွင် စစ်ကောင်စီသည် တကမ္ဘာလုံး၏ ဝိုင်းပယ်ခြင်း ခံနေရပြီး လွတ်လပ်ရေး နေ့အတွက် ဂုဏ်ပြုသဝဏ်လွှာကိုပင် ပေးပို့ရန် လိုလိုလားလား မရှိကြပေ။ မင်းအောင်လှိုင် ထံသို့ နိုင်ငံ အကြီးအကဲများထဲမှ ဆို၍ ရုရှားသမ္မတ၊ ကမ္ဘောဒီယား ဘုရင် နှင့် ဘဲလာရုစ် သမ္မတ တို့ထံမှ သာ လက်ခံရရှိခဲ့သည်ဟု ဧရာဝတီ သတင်းတွင် ဖေါ်ပြထားသည်။ စစ်ကောင်စီ သတင်းစာများကမူ ထို ပုဂ္ဂိုလ် သုံးဦး၏ သဝဏ်လွှာများကို ကြွား ဝါသည့် အနေဖြင့် တခမ်းတနား ပုံနှိပ်ဖေါ်ပြခဲ့ကြသည်။ သို့သော် မြန်မာ နှင့် သံတမန် ဆက်ဆံရေး ရှိသည့် နိုင်ငံပေါင်း ၁၂၄ နိုင်ငံရှိသည့် အနက် သုံးနိုင်ငံထံမှသာ သဝဏ်လွှာ ရရှိခဲ့သည့် အဖြစ်က ရှက်တတ်မည်ဆိုလျှင် လဲသေ ဖို့ပင် ကောင်းလှသည်။ ဝဏ္ဏမောင်လွင် ထံသို့ ဆာဘီယား နှင့် မြောက်ကိုရီယား နိုင်ငံခြားရေး ဝန်ကြီးတို့ ပေးပို့သော သဝဏ်လွှာ ကို ယခုအခါ ထည့်သွင်း မရေးသားပါက တရားမျှတမှု ရှိမည် မဟုတ်ပေ။ ကမ္ဘောဒီယားကို ဖယ်ထားမည် ဆိုလျှင် ရုရှား၊ ဆာဘီယား၊ ဘဲလာရုစ်၊ မြောက်ကိုရီယား တို့က လက်နက်များ ရောင်းချနေသော ဖေါက်သည် နိုင်ငံများ ဖြစ်နေကြပြန်သည်။

 

ပြည်သူတို့၏ အမြင်တွင် မည်သို့မျှ အစဉ်အလာ မရှိခဲ့ဘဲ ဗိုလ်သန်းရွှေက မြှောက်စား၍သာ နေရာရလာခဲ့သူ တဦးက လောဘဇောတက်ပြီး မတန်မရာ သမ္မတ ဖြစ်ချင်လွန်း အားကြီးနေသူ မင်းအောင်လှိုင် အဖို့မှာ မြစ်ထဲမျောလာသော ခွေးသေကောင် ပုပ်ကြီးအလား အားလုံးက နှာခေါင်းရှုံ့ ဖယ်ကျဉ် ထားခြင်း ခံနေရသည်။ ၎င်း၏ သမ္မတ ဘဝက စစ်တပ်၊ ကြံ့ဖွတ် နှင့် ၎င်းတို့ကို မျက်စိမှိတ် ထောက်ခံနေကြသူများ ထက် ကျော်လွန်၍ ဩဇာ သက်ရောက်ခြင်းလည်း ရှိမည် မဟုတ်ပေ။

 

ထိုသို့ ထောက်ခံနေသူများ လျော့ကျမသွားအောင် ကြိုးပမ်းနေရသည့် လုပ်ရပ်အဖြစ် ကြည့်မြင်တိုင်တွင် ဆန္ဒပြ လူငယ်များအား ကား ဖြင့် အသေတိုက်သတ်ခဲ့သည့် ခလရ ၈၂ မှ ဗိုလ်မှူးကြီး နိုင်ဘိုဘို ကို ရဲရင့်စွန့်စား သူရဲ ကောင်း ပီသစွာ စွမ်းဆောင်နိုင်ခဲ့မှု အတွက် လွတ်လပ်ရေးနေ့တွင် မင်းအောင်လှိုင် ကိုယ်တိုင် ဂုဏ်ပြု ဆု ချီးမြှင့်ခဲ့သည်။

 

မင်းအောင်လှိုင် အဖွဲ့မှ စုစုပေါင်း လူ ရှစ်ထောင်ခန့် ဖမ်းဆီးထားသည့် အထဲတွင် ၎င်း တို့ အလိုရှိသူကို ရှာ မတွေ့ ၍ မိသားစု ဝင်များကို ဓါးစာခံ အဖြစ် ချုပ်နှောင်ထားသူ အများ အပြား ရှိသည့်အနက် NUG မှ ထုတ်လွှင့် သည့် တီဗီ အစီအစဉ် မှ ပြည်သူ့အသံ ကဏ္ဍကို ထုတ်လွှင့်သူ ကိုအောင်နေမျိုး၏ အသက် ၇၀ ကျော် မိဘနှစ်ပါးလည်း ပါဝင်ခဲ့သည်။

 

မင်းအောင်လှိုင်သည် အိန္ဒိယ နိုင်ငံ ဟိုက်ဒရာ ရာဘတ် မြို့မှ နှလုံး ခွဲစိတ် အထူးကု သမားတော်ကြီး နှစ်ဦး ပါ အဖွဲ့ကို ပင့်ဖိတ်၍ ၎င်း၏ ကိုးလ သား အရွယ် မြေးဖြစ်သူ အား ခွဲစိတ်ကုသမှု ခံယူခဲ့သည် ဆိုသော သတင်းကို ဇန်နဝါရီ ၆ ရက်နေ့ထုတ် အိန္ဒိယ တူဒေး သတင်းစာတွင် ဓါတ်ပုံ နှင့် တကွ ဖေါ်ပြလာခဲ့သည်။

 

ဤသည်ကို ကြည့်၍ ကိုဗစ် တတိယ လှိုင်း အတွင်း အောက်စီဂျင် အလုံအလောက် မရရှာ၍ သေဆုံးခဲ့ရသူများ၏ ဆွေမျိုးသားချင်း များ စိတ်တွင်တော့ တနည်းတဖုံ စိတ်ထိခိုက်စရာ ဖြစ်လာတော့မည်ကား သံသယ ဖြစ်စရာ လိုမည် မထင်ပေ။

 

တော်လှန်ရေးကြီး မုချအောင်ရမည်!!!


Quote of The Day

There comes a time when one must take a position that is neither safe, nor politic, nor popular, but he must take it because conscience tell him it is right.


Martin Luther King Jr

Subscribe