သမ္မတသည် အိမ်ဖြူတော်မှ ပျောက်ခြင်းမလှ ပျောက်သွားခဲ့လေပြီ။

တကမ္ဘာလုံး ထိုအဖြစ်ကြောင့် တုန်လှုပ် ချောက်ချားသွားခဲ့ရသည်။

သမ္မတ ပျောက်ဆုံးသွားသည့် အရေးထက် အဆမတန် ဆိုးဝါးလာစေနိုင်သည့် နယူးယောက်ရှိ မက်ဟက်တန် ရပ်ကွက်ကြီး မှသည် ဂျကာတာ မြို့လယ်ခေါင်ရှိ ဈေးကြီး တခု အတွင်း ရှိ လူအများ၏ ဘဝ အထိ ဖြေရှင်း၍ မရနိုင်လောက်အောင် ထိခိုက်ဆုံးရှုံးသွားနိုင်သည့် အဖြစ်ဆိုးကြီး တခု ပေါ်ပေါက်လာရန် တာစူနေပြီ ဆိုသည်အား မည်သူမျှ မရိပ်စားမိခဲ့ကြပေ။

ထိုအဖြစ်အပျက်ကို စာဖတ်သူများ လက်ကမချနိုင်အောင် အမေရိကန် သမ္မတဟောင်း ဘီလ် ကလင်တန် နှင့် လျို့ဝှက်သဲဖို စာရေးဆရာကြီး ဂျိမ်း ပက်တာဆန် တို့က “The President Is Missing” စာအုပ်တွင် ရေးဖွဲ့ ထားခဲ့သည်။

အဆိုပါ စာအုပ်အား တနင်္ဂနွေ ညနေပိုင်း ဖတ်စရာ ကဏ္ဍ တခု အဖြစ် တင်ဆက်သွားပါမည်။

***********************

မေလ ၁၀ ရက်၊ ကြာသပတေးနေ့

အခန်း (၁)

အမေရိကန် ကွန်ဂရက် ၏ အဖွဲ့ဝင် ဆယ့်သုံးဦးပါ အထူး စုံစမ်း စစ်ဆေးရေး ကော်မတီ ၏ ကြားနာမှုက မကြာမီ စတင်တော့မည် ဖြစ်သည်။

ကျွနုပ် ၏ ပါတီ မှ ငါးဦး နှင့် အတိုက်အခံ ဖက်မှ ရှစ်ဦး ပါဝင်သော အဖွဲ့ဝင်များသည် ကျွနူပ်၏ ရှေ့တည့်တည့် စင်မြင့်တွင် နေရာယူထားကြပြီး ဖြစ်သည်။ သူတို့၏ မျက်နှာ အမူအယာ များက သွေးနံ့ကို ရ၍ နှာခေါင်း တရှုံ့ရှုံ့ ဖြစ်နေသော ငါးမန်းကြီးများ နှင့် မည်သို့မျှ ခြားနားမှု မရှိပေ။

မနေ့ညက ကျွနုပ်အား အဆိုပါ ကြားနာပွဲသို့ ကိုယ်တိုင်ကိုယ်ကျ မတက်ရောက်ရန် တောင်းပန် တိုးလျှိုးခဲ့သော အိမ်ဖြူတော် ၀န်ထမ်း အကြီးအကဲ ကာရိုလင်း ဘရော့ ၏ စကားကို ပြန်လည် ကြားယောင်နေမိပြန်သည်။ ကျွနူပ် အနေဖြင့် ထိုသို့ ပြုလုပ်ခြင်းဖြင့် မည်သည့် အကျိုး အမြတ်မှ မရဘဲ ဆုံးရှုံးမှုနှင့်သာ ရင်ဆိုင်ရလိမ့်မည်ဟု သူမက သတိပေးခဲ့သည်။ ထိုမျှသာ မကသေး သူတို့၏ မေးခွန်းများကို ဖြေဆိုလိုက်ရုံနှင့်ပင် ကျွနုပ်၏ သမ္မတ သက်တမ်း နိဂုံးချုပ် သွားနိူင်သည် အထိပင် ပြောဆို ကန့်ကွက်ခဲ့ပြန်သည်။

ကျွနုပ်၏ရှေ့တည့်တည့် တွင် ထိုင်နေကြသူများ ၏ အလယ်ရှိ ဖြူဖွေးသော ငွေရောင်ဆံပင် များ နှင့် မစ္စတာ ရုတ်ဒ် ဆိုသူ က လည်ချောင်း ရှင်းသည့် အနေဖြင့် ချောင်း တချက် ဟန့်လိုက်သည်။

နာမည် အပြည့်အစုံကား လက်စ်တာ ရုတ်ဒ် ဖြစ်ပြီး အောက်လွှတ်တော် ဥက္ကဌ ဖြစ်သည်။ ပုံမှန်အားဖြင့် ထိုသို့သော ကြားနာစစ်ဆေးပွဲကို သူ့အနေဖြင့် တက်လေ့တက်ထ မရှိခဲ့ပေ။ ယခုအခါတော့ ကျွနုပ်၏ လုပ်ငန်းများ ကို အနှောက်အယှက်ပေးရန် နှင့် အထူးသဖြင့် ကျွနုပ်အား နိူင်ငံရေး အရအပြင် ပုဂ္ဂိုလ်ရေး အရ ပါ ချေမှုန်းပြစ်နိူင်ရန် တကူးတက ကော်မတီ ကို ဦးဆောင်ခဲ့သူ ဖြစ်သည်။ ထိုကဲ့သို့ နိူင်ငံရေး တွင် ရက်စက် ကြမ်းကြုပ်မှုများမှာ သမ္မာကျမ်းစာ မပေါ်ထွန်းမီကပင် ရှိထားခဲ့ပြီးပြီမဟုတ်ပါလား။ ၎င်းတို့ အဖို့ကား ကျွနုပ်ကို အိမ်ဖြူတော်၏ အပြင်သို့ ကန်ထုတ်နိူင်ရန် မျှ ဖြင့် အားမရသေးဘဲ ထောင်သွင်း အကျဉ်းချကာ သမိုင်း စာမျက်နှာ များပေါ်မှ ဖျောက်ဖျက်ပြစ်နိူင်မှသာ ကျေနပ်နိူင်မည့် သူများလည်း ဖြစ်နေကြပေသည်။ ထိုမျှသာ မကသေး ဖြစ်နိူင်လျှင် မြောက် ကာရိုလိုင်းနား ရှိ ကျွနုပ်၏ နေအိမ်သို့ သွားရောက် မီးတင်ရှို့ကာ ဇနီးဖြစ်သူ၏ အုတ်ဂူပေါ်တွင် တံထွေး ဖြင့် ထွေးရန်ပင် လက်တွန့်ကြမည့်လူများလည်း မဟုတ်ပေ။

ရှေ့တွင် ရှိသော မိုက်ကရိုဖုန်းကို ကိုယ်နှင့် နီးအောင် ဆွဲယူလိုက်သည်။ ကျွနုပ်ဘေးတွင် လက်ထောက်ဆို၍ တဦးတယောက်မျှ မရှိ၊ ရှေ့နေလည်း မရှိ၊ ရှေ့တွင်လည်း ဘာ မှတ်စု စာရွက်စာတမ်း တခုတလေမျှ ချမထားခဲ့ပေ။ ကျွနုပ်အနေဖြင့် ဘာမျှ ဖုံးကွယ်ထားစရာ မရှိ၍ လက်ထောက်များ ရှေ့နေများဖက် လှည့်ကာ တီးတိုး ပြောနေမှုများကို အမေရိကန် ပြည်သူများ အမြင်မခံလိုပေ။ ဒီလိုနေရာမျိုးတွင် မဟုတ်တာ ဘာမှ လုပ်မထားသော ကျွနုပ်အဖို့ ရောက်ကို ရောက်မနေသင့်လှသော်လည်း ယခုတော့ ရောက်နေခဲ့ရပြီ ဖြစ်သည်။ အမေရိကန်ပြည်ထောင်စု၏ သမ္မတကြီးတယောက်အနေနှင့် သူ့ကို စွပ်စွဲသူ လူအုပ်ကြီးအားလည်း ရင်ဆိုင် နေရပြီဖြစ်သည်။

အခန်း၏ ဒေါင့်တနေရာတွင်တော့ ကျွနုပ်၏ ထိတ်တန်း လက်ထောက်သုံးဦး ဖြစ်သော အိမ်ဖြူတော် ၀န်ထမ်း အကြီးအကဲ ကာရိုလင်း ဘရော့၊ ကျွနူပ်၏ မိတ်ဆွေဟောင်းကြီး ဖြစ်သော အိမ်ဖြူတော် အကြံပေး ဒန်နီ အက်ကား နှင့် ဒုတိယ အိမ်ဖြူတော် ၀န်ထမ်း အကြီးအကဲ ဂျင်နီ ဘရစ်မင်း တို့ က စောင့်ကြည့်နေကြသည်။ သူတို့၏ မျက်နှာပြင်ပေါ်တွင် ကျောက်ရုပ်ကြီးအလား မည်သည့် ခံစားချက်မှ မပေါ်အောင် ထိန်းထားနေကြ သော်လည်း အတွင်းတွင်မူ စိုးရိမ်စိတ်များ ဖုံးလွှမ်းနေကြောင်း ကျွနုပ် ရိပ်စား မိပေသည်။ သူတို့အားလုံးသည် ကျွနုပ် ယခုလို ရောက်ရှိလာခဲ့ခြင်းနှင့် ပတ်သက်ပြီး သမ္မတ သက်တမ်း တလျှောက် အကြီးဆုံးသော အမှားကို ကျူးလွန်လိုက်ပြီဟုလည်း တညီတညွတ်တည်း ကောက်ချက်ချထားခဲ့သူများ ဖြစ်သည်။

သူတို့ ၏ယူဆချက် မှန်မမှန်ကို စောင့်ကြည့်ရပေတော့မည်သာ။

“သမ္မတကြီး ခင်ဗျား”

“ပြောပါ ဥက္ကဌ ကြီး” ဟု ကျွနုပ်က ပြန်လည် တုန့်ပြန်လိုက်သည်။ လက်ရှိ အနေအထား တွင် သဘာပတိကြီးဟုသာ ခေါ်သင့်သော်လည်း ကျွနုပ်က တမင်တကာ မခေါ်ဘဲ နေလိုက်ခြင်းပင် ဖြစ်သည်။

“သမ္မတကြီး ဒန်ကမ်း အနေနဲ့ ဘယ်အချိန်က စပြီး အကြမ်းဖက် သမားတွေ ကို အကာအကွယ် ပေးခဲ့တာပါလဲ”

“ကျွန်တော်တို့ အကာအကွယ် မပေးခဲ့ပါဘူး၊ နောက်လည်း ပေးမှာ မဟုတ်ပါဘူး၊ အထူးသဖြင့် ကျွန်တော် သမ္မတအဖြစ် တာဝန်ယူနေစဉ်ကာလ တလျှောက် ဘယ်တော့မှ ဒီလို ဖြစ်လာမှာ မဟုတ်ပါဘူး” ဟု ကျွနူပ်မှ အလျှင်အမြန် ပြန်ဖြေလိုက်ရသည်။

“ခင်ဗျား သေချာရဲ့လား”

ထိုအမေးကြောင့် ကျွနုပ်၏ မျက်နှာ တခုလုံး ထူပူသွားသလို ခံစားလိုက်ရသည်။ တမိနစ်ပင် မပြည့်သေး ရုတ်ဒ် က ကျွနုပ်အပေါ် ဖိစီးလာနေပြီ ဖြစ်သည်။

“ဥက္ကဌ ကြီး ခင်ဗျာ ကျွန်တော် အလေးအနက် ပြောခြင်းသာ ဖြစ်ပါတယ်။ ဒီအတွက် အခုကတည်းက ရှင်းရှင်းလင်းလင်း ဖြစ်အောင် ထပ်ပြောပါရစေ ကျွန်တော်တို့ အနေနဲ့ အကြမ်းဖက်သမားတွေ ကို ကာကွယ်တာမျိုး မလုပ်ခဲ့ပါဘူး”

သူက ဘာမှ ဆက်မပြောပဲ ခဏရပ်လိုက်ပြီး “ကောင်းပြီ သမ္မတကြီး၊ ကျွန်တော်တို့ စကားလုံး တွေကို ရွေး ပြောနေသလို ဖြစ်နေပြီ ထင်တယ်၊ ဒီတော့ တဲ့တဲ့ပဲ ပြောမယ် Sons of Jihad (SOJ) လို့ ခေါ်တဲ့ ဂျီဟတ် သားတော်များ အဖွဲ့ကို ခင်ဗျား အနေနဲ့ အကြမ်းဖက် အဖွဲ့အစည်း တခုလို့ ယူဆထားပါသလား၊

“သိတ် ကို သတ်မှတ်တာပေါ့ဗျာ”

“ဒီအဖွဲ့အစည်းက ရုရှား ရဲ့ အထောက်အပံ့ကို ရနေတယ် ဆိုတာ ဟုတ်ပါသလား”

ကျွနုပ်က ခေါင်းငြိမ့်ပြလိုက်ရင်း “ရုရှား တွေ အနေနဲ့က SOJ နဲ့ အခြား အကြမ်းဖက်အဖွဲ့တွေကို အခါ အားလျော်စွာ အထောက်အပံ့ပေးနေပါတယ်”

“ဂျီဟတ် သားတော်များ အဖွဲ့က ကမ္ဘာ တိုက်ကြီး သုံးတိုက်မှာ အကြမ်းဖက် လုပ်ရပ်တွေ ကျူးလွန်ခဲ့ကြတယ် ဆိုတာရော မှန်ပါသလား”

“တိကျတဲ့ အတိုချုန်း တင်ပြမှုပါပဲ”

“ဒါဆိုရင် လူထောင်ပေါင်းများစွာ သေဆုံးခဲ့ရတဲ့ လုပ်ရပ်အတွက် တာဝန်ရှိတဲ့လူတွေပေါ့”

“ဟုတ်ပါတယ်”

“ဒီထဲမှာ အမေရိကန် လူမျိုးတွေကော ပါတယ်ပေါ့”

“ပါ ပါတယ်”

“ဘရပ်ဆဲလ် မှာ ဘဲလ်ဝု အမ်းစ် ဟိုတယ် ပေါက်ကွဲမှုကြောင့် လူ ၅၇ ယောက် သေဆုံးသွားတဲ့ အထဲမှာ ကယ်လီဖိုနီယား ပြည်နယ် လွှတ်တော်အမတ်တယောက် ပါသွားခဲ့တယ်၊ ဂျော်ဂျီယာ သမ္မတ နိူင်ငံက လေကြောင်း ထိန်းချုပ်ရေး စနစ်ရဲ့ ကွန်ပျူတာ အချက်အလက်တွေကို ထိုးဖေါက်ပြီး လေယာဉ် သုံးစင်းကို ပျက်ကျအောင် လုပ်ခဲ့လို့ အဲ့ဒီအထဲမှာ အမေရိကန် ဆိုင်ရာ ဂျော်ဂျီယာ သံအမတ်ကြီး ပါသွားခဲ့တယ်”

“မှန်ပါတယ်၊ ဒီဖြစ်ရပ်တွေ နှစ်ခုစလုံးက ကျွန်တော် သမ္မတ အဖြစ် တာဝန်မယူခင်မှာ ဖြစ်ပျက်ခဲ့တာတွေချည်း ဖြစ်ပါတယ်၊ ဒီလုပ်ရပ်တွေ နှစ်ခုစလုံးကို ဂျီဟတ် သားတော်များ အဖွဲ့က သူတို့မှာ တာဝန်ရှိကြောင်း ပြောဆိုခဲ့ကြပြီး ဖြစ်ပါတယ်”

“အိုကေ ဒါဆိုလည်း ခင်ဗျား တာဝန်ယူပြီးနောက် ပိုင်း အကြောင်းတွေပဲ ပြောကြစို့ရယ်၊ ပြီးခဲ့တဲ့ လအနည်းငယ်က ဂျီဟတ် သားတော်များ အဖွဲ့က အစ္စရေး စစ်တပ်ရဲ့ကွန်ပျူတာ စနစ်ကို ထိုးဖေါက်နိူင်ခဲ့ပြီး အစ္စရေး ရဲ့ လျို့ဝှက် စစ်ဆင်ရေး တွေနဲ့ တပ်ရွှေ့ပြောင်းမှုတွေကို လူသိရှင်ကြား ထုတ်ပြန်နိူင်ခဲ့တယ် ဆိုတာ အမှန်ပဲလား”

“အမှန်ပါပဲ”

“ပြီးတော့ မြောက်အမေရိက ဘက်ခြမ်း ကျွန်တော်တို့နဲ့ ကပ်နေတဲ့ နေရာ တခုမှာ ပြီးခဲ့တဲ့ အပတ် မေလ ၄ ရက်နေ့ သောကြာနေ့မှာ အဖြစ်အပျက် တခု ဖြစ်ပွားခဲ့သေးတယ်၊ တိုရန်တို မြေအောက်ရထားလမ်း ထိန်းချုပ်ရေး ကွန်ပျူတာ စနစ်ကို ထိုးဖေါက်ပြီး ရထားတွေ လမ်းလွဲအောင် လုပ်ခဲ့လို့ လူ ၁၇ ယောက် အသက် ဆုံးရှုံးသွားပြီး ဒါဇင်ပေါင်းများစွာ ဒဏ်ရာရခဲ့တဲ့အပြင် လူပေါင်းထောင်ချီပြီး အမှောင်ထဲမှာ ပိတ်မိနေကြတယ်၊ ဒါကလည်း ဂျီဟတ် သားတော်များ လက်ချက်ပဲ မဟုတ်လား၊ သေသွားတဲ့ လူတွေထဲမှာ အမေရိကန် နိူင်ငံသား လေးယောက် ပါသွားခဲ့တယ် ဆိုတာကော ဟုတ်လား”

“ဒါလည်း အမှန်ပါပဲ၊ ဒီလုပ်ရပ်ကို SOJ က သူတို့ ကျူးလွန်တယ်လို့ မပြောကြပေမဲ့ သူတို့လက်ချက်ပဲလို့ ကျွန်တော်တို့က ယုံကြည်ထားပြီး ဖြစ်ပါတယ်”

သူက ခေါင်းငြိမ့်ပြပြီး သူ့ရှေ့ရှိ စာရွက်များကို တချက် ကြည့်လိုက်ပြန်သည်။ “ဂျီဟတ် သားတော်များ အဖွဲ့ရဲ့ ခေါင်းဆောင်အမည်က ဆူလီမန် ဆင်ဒိုရပ် ဆိုတာ ကော မှန်ပါလား သမ္မတကြီး ခင်ဗျား”

ဇာတ်လမ်းက အခုမှ စလာပြီ ဆိုတာ သူ သိလိုက်သည်။