၁၉၇၃, ၇၄ နွေရာသီ ကျောင်းပိတ်၍ အိမ်ပြန်လာစဉ် အတွင်း ခေါင်းလောင်း ဘောင်းဘီ၊ ဘေးသို့ ခွဲထားသည့် ငှက်တောင် ပုံ ဆံပင်ပုံစံ၊ ဖေါင်းကြွ‌ နေသည့် ရင်သား အပေါ် ဘလောက်စ် အင်္ကျီကို ကျပ်နေအောင် ဝတ်ထားသည်၊ ဒေါက်မြင့် ဖိနပ် ကြောင့်လည်း ပုံမှန် အရပ်အမောင်းထက် အနည်းငယ် မြင့်တက် နေသည့် လန် ကို ‌နိုင်ငံခြားသူ နှင့် မခြား တွေ့လာခဲ့ရသည်။

ကလေးထိန်း အမျိုးသမီး ကြီး အဆိုအရ မဒမ်က သမီး ဖြစ်သူ အား ဧည့်ခန်းထဲ တွင် ထိုင်ခိုင်းပြီး မိမိ၏ အပျိုစင် ဘဝကို ထိမ်းသိမ်းထားဖို့ မည်မျှ အရေးကြီးကြောင်း၊ (တရုတ် နှင့် အရှေ့အာရှ အမျိုးသမီးများ လိုက်နာရသည့်) "သုံးမျိုး နာခံ၊ လေးပါး ကျင့်ဝတ်" အကြောင်း လက်ချာ ရိုက်ပြန်၍ ဖတ်ရသူ များ အား အတွေးသစ် အမြင်သစ် ဖြစ်စေသည့် ကာမ ဝတ္ထု တပုဒ်၏ ခေါင်းစဉ်ကိုပင် သတိရမိသည်။

သူမ၏ အပျိုစင်ဘဝ ပျက်စီးလုနီးပါးဖြစ်မှု သို့မဟုတ် ပျက်စီးခဲ့သည်ဟု ယူဆရသော အကြောင်းအရာကို ရည်ညွှန်းပြောဆိုရုံမျှဖြင့်ပင် ကျွန်တော့်စိတ်ကူးယဉ်မှု၏ မီးဖိုအတွက် ထင်းများလုံလောက်စွာ ရရှိစေခဲ့သည်။ ထိုမီးကို သူမနှင့် ညီမဖြစ်သူ တို့ အတူနေထိုင်ရာ အခန်းရှိရာ ခန်းမဆောင်မှ အောက်သို့ ဆင်းသွားသည့် ကျွန်တော့်အခန်း၏ တစ်ကိုယ်တည်း သီးသန့် နေရာတွင် လောင်ကျွမ်းစေခဲ့သည်။

လန် သည် ကျွန်တော်တို့ ကာလီဖိုးနီယား သို့ ရောက်ပြီး နောက်ပိုင်း ဗိုလ်ချုပ်ကြီး နှင့် မဒမ် ဆီသို့ လာ ခဲလှသည်။ သူမ လာ‌လည် ချိန်များတွင်လည်း ကျွန်တော်ကို လာဖို့ မဖိတ်ခဲ့၍ မတွေ့ဖြစ်၊ ထိုအတူ မကြာသေးမီက သူမ ဘွဲ့ယူသည့် အခမ်းအနားသို့ ကျွန်တော်ကို မခေါ်၍ မရောက်ဖြစ်၊ ဗိုလ်ချုပ်ကြီးက လန် အား သားသမီး ကျင့်ဝတ် မသိရကောင်းလားဟု ကျွန်တော်ရှေ့တွင် ညည်းညူ မှသာ သူမ အကြောင်း တစွန်းတစ သိခွင့်ရခဲ့သည်။ ယခုအခါ လန် မှ လာနာ ဖြစ်လာပြီး ဘွဲယူ အခမ်းအနား အပြီးလည်း အိမ်ပြန်မလာတော့ဘဲ သူမ ဖာသာ စ ခွဲနေဖို့ ဆုံးဖြတ်လိုက်သည်။

ကျွန်တော်လည်း လာနာ ဘွဲ့ရပြီး ဘာတွေ လုပ်နေလဲဟု ဗိုလ်ချုပ်ကြီး ထံမှ သိရလို သိရငြား စကား နှိုက်ကြည့်သေးသော်လည်း ဘာစကားမှ ထွက်မလာဘဲ တုံဏှိဘာဝေ နေခဲ့သည်က များသည်။

ယခုတော့ ဘာကြောင့်လည်း ကျွန်တော် သိခဲ့ပြီ ဖြစ်သည်၊ စင်ပေါ်တွင် တွေ့ခဲ့ရသော လာနာ သည် ကျွန်တော် သိခဲ့သည့် လန် မဟုတ်တော့။ တီးဝိုင်း၏ အစီအစဉ် အရ အခြားအမျိုးသမီး အဆိုတော်သည် ရိုးရာဓလေ့၏ နတ်သမီး တပါး အလား၊ အစိမ်းဝါရောင် အော်ဒိုင်း ဝတ်စုံ ကို ဝတ်ဆင်ထားသည်။ သူမ၏ ဆံပင်များမှာ ရှည်လျားဖြောင့်တန်း၍၊ မိတ်ကပ်ကို ဣန္ဒြေရရ လိမ်းခြယ်ထားသည်။ သူမ ရွေးချယ် သီဆို နေသော သီချင်းများမှာ ဝေးကွာနေသော ချစ်သူ စစ်သား များ သို့မဟုတ် ဆုံးရှုံးသွားသော ဆိုင်ဂုံမြို့ကို သတိရတမ်းတနေသည့် အလွမ်းဓါတ်ခံ ရှိသည့် အမျိုးသမီးများအကြောင်းကို ဖော်ပြသော သီချင်းရှည်များ ဖြစ်သည်။

လာနာ၏ သီချင်းများ တွင် ထိုသို့ လွမ်းဆွတ်စရာများ၊ ဆုံးရှုံးခဲ့ရမှု များ ယှက်သန်းမနေ၊ ခေတ်မီစွာ နေတတ်အောင် ဆွဲဆောင်ခံရသူ တဦး အတွက် နောက်ကြောင်းကို လှည့်ကြည့်နေစရာ မလိုပေ။ သူ ဝတ်ထားသည့် အနက်ရောင် မီနီ စကပ်လေးသည် ကျွန်တော် မကြာခဏ ဆိုသလို စိတ်ကူးယဉ် ခဲ့သည့် လျို့ဝှက် အရာ တခု အား လှစ်ဟ ပြလုမတတ် ခြိမ်းခြောက်လာခဲ့သည်။ မီနီစကပ် အထက်တွင် ရွှေဝါရောင် ပိုးသား လည်စီး အင်္ကျီကို ဝတ်ထား၍ သီချင်းကို အသံကုန် ဟစ် အော်ဆိုလိုက်သည့် အခါတိုင်း ခန္ဓာကိုယ် လှုပ်ရှားမှု နှင့် အတူ တလက်လက် တောင်ပနေသည်။ သူမ ပိုင်ပိုင် နိုင်နိုင် သီဆို နေသည့် သီချင်းများသည်လည်း ဇာတိမြေတွင်အမေရိကန် စစ်သားများ၊ အမေရိကန် ယဉ်ကျေး မှု တွင် ရစ်မူးနေသော လူငယ်များ ကို ဆွဲဆောင် လှုပ်ခတ်အောင် ဘလူးစ် နှင့် ရော့ခ် တီးဝိုင်း များ မှ သီဆို တီးမှုတ်ခဲ့သည့် rock-'em, sock-'em သီချင်းများ ဖြစ်သည်။

အစောပိုင်းက "Proud Mary" သီချင်းကို ကြားလိုက်ရသော်လည်း သူ ဆိုနေမှန်း မသိခဲ့၊ ယခု လည်ချောင်းသံ အပြည့် နှင့် Twist and Shout သီချင်း ဆိုနေချိန် သူ့ကို မော့မကြည့်မိအောင် ကိုယ့်ကို ကိုယ်သတိပေး‌ နေရသည်။ ဆိုနေရင်းက အသက် လေးဆယ်အောက် လူများကို ထွက်ကကြဖို့ ဖိတ်ခေါ်နေသည်။ ကဖို့ လွယ်သော ချာ ချာ သီချင်း အပြင် Twist သည်လည်း အတွဲညီအောင် ကစရာ မလို၍ တောင်ပိုင်းသား တို့ အကြိုက်ဆုံး အက တမျိုးလည်း ဖြစ်သည်။ မဒမ် ကိုယ်တိုင်လည်း ထိုအက မျိုးကို ကတတ်ပြီး အပြစ်ကင်းသည့် အက မျိုးလည်း ဖြစ်၍ သားသမီးများကို အကခိုင်း‌လေ့ ရှိသည်။

ကျွန်တော်လည်း ကသည့် နေရာ နှင့် ကပ်နေသော အထုး ဧည့်သည်တော် များ အဖြစ် ချ‌ ပေး ထားသောဗိုလ်ချုပ်ကြီး တို့ လင်မယား ထိုင်နေသည့် စားပွဲကို လှမ်းကြည့်လိုက်ရာ နှစ်ယောက်စလုံး ထိုင်ရာက မထသည်ကို တွေ့လိုက်ရသည်။ မျက်နှာများကလည်း မန်းကျည်းသီး အပုပ် တလုံးကို စုပ်မိကြသည့် အလား ရှုံ့မဲ့နေကြသည်။ မည်သူကမှလည်း သူမလို တွန့်လိမ် ကောက်ကွေး မနေကြသည်မှာ အဆန်းတော့ မဟုတ်။

သူမ၏ တင်ပါးဆုံများ လှုပ်ရမ်းသွားသည့် အခါတိုင်း တဖက်သာ လှည့်လို့ရသည့် ဂီယာ သွား အလား ကခုန်နေသည့် အမျိုးသားများ၏ ဦးခေါင်းများသည် ရှေ့သို့ ရွေ့သွားလိုက် နောက်သိူ့ လှည့်လာလိုက် နှင့် ဖြစ်နေသည်။ မစ္စက် မိုရီသာ ကျွန်တော် နှင့် အတူ က မနေဘူး ‌ဆိုက ကျွန်တော်လည်း ဝင် က ကောင်း ကနေမိမည်သာ ဖြစ်သည်။ လန်နာ သည် မြင်နေကျ ပုံစံမျိုး မဟုတ်ဘဲ မိန်းမ ပိုဆန်လာသည်။ ဆံပင်ကို လည်း ကောက်ကြောင်း ဖေါ်ထားပြီး လီလီ ပန်းတပွင့် ပန်ထားသည်။ ဒူးခေါင်း အထက်အထိ ရှိသည့် နိုင်လွန် ပိုးသား ဂါဝန်ကိုလည်း ဝတ်ထားသည်။

သူမ၏ အသွင်အပြင် နှင့် ပတ်သက်ပြီး တစ်ကြိမ်မက ချီးကျူးစကား ပြောဖူးပါသည်။ ထို Twist ကကွက် ကနေစဉ် သူမ၏ ဒူးခေါင်းများကို မြင်လိုက်ရသောအခါ သူမ၏ အက အတွက်လည်း ချီးကျူးလိုက်ပါသည်။ သီချင်းပြီးသောအခါ "ဒီလို ကတာ ကြာလှပြီ" ဟု သူမက ပြောသည်။ "ကျွန်တော်လည်း မကဖြစ်တာ ကြာပါပြီ ဟု ပြောပြီး သူမ ပါးကို နမ်းလိုက်သည်။ "ဆိုဖီယာ" ဟု သူမက ပြောလိုက်သည်။

ကျွန်တော် ဘာမှ ပြန်မပြောရသေးခင် ကလပ် ဂေဘယ် ပုံနှင့် လူက စင်ပေါ်တက်လာပြီး ကျွန်တော်တို့ နိုင်ငံတွင် ၁၉၆၂ မှ ၆၄ အထိ သံပုရာခွံ ဦးထုတ် အစိမ်း ဆောင်းပြီး အမေရိကန် စစ်တပ်၏ အထူး တပ်ဖွဲ့ဝင် အဖြစ် အမှုထမ်းခဲ့သော ကွန်ဂရက် အမတ် တဦး နှင့် မိတ်ဆက်‌ပေးပါရ‌ စေ ဟု ပြောလာသည်။

ထိုကွန်ဂရက် အမတ်သည် ကယ်လီဖိုနီယား တောင်ပိုင်း တွင် တက်သစ်စ နိုင်ငံရေး သမားတဦး အဖြစ် ထင်ရှားလာသူ ဖြစ်သည်။ သူ၏ အိမ်ထောင်ရေး ကြောင့်လည်း အော်ရိမ်း စီရင်စု တွင် အကျိုးရှိရာ ရှိကြောင်း ဖြစ်စေခဲ့သည်။ သူ့တွင်လည်း (Napalm Ned), (Knock-’em-Dead Ned), (Nuke-’em-All Ned) စသည့် နာမည် ပြောင်များ ဖြစ်သည်။ ထိုနာမည် များကိုလည်း လူတဦး၏ စိတ်ခံစားမှု နှင့် နိုင်ငံရေးပထဝီဝင် အကျပ်အတည်းအပေါ် မူတည်၍ သုံးနှုန်းကြသော်လည်း၊ ထိုနာမည်ပြောင်များ အား အပုပ်ချရန် ရည်ရွယ်ခြင်းထက် ချစ်ခင်မှုဖြင့် ခေါ်ဝေါ်ခြင်းသာ ဖြစ်သည်။