ထို ည မှာပင် ကျွန်တော် နှင့် ဘွန် တို့ ဝက်အူလှည့် တချောင်းစီ ယူလာပြီး ထပ်ထွက်ခဲ့ပြန်သည်။ ကျွန်တော်တို့ နှစ်ဦးသား အရက်သမား ဗိုလ်မှုး နေသည့် ရပ်ကွက်ထဲက သူ့ လို ကားဂိုဒေါင်နှင့် အိမ်မျိုးကို မသိမသာ လေ့လာခဲ့သည်။ ထိုနေရာမျိုးက ဘေး အိမ် ပြတင်းပေါက်များမှ လှမ်းကြည့်၍ မမြင်ရ။ ဘွန်သည် ကားတစီး၏ ရှေ့ လိုင်စင် ပလိတ်ကြားကို ဖြုတ်ယူလိုက်သည်မှာ စက္ကန့်သုံးဆယ်ပင် မကြာလိုက်၊ ကျွန်တော်က ကားနောက်က ပလိတ်ပြားကို ဖြုတ်ခဲ့သည်။

ထို့နောက် အိမ်ပြန်ပြီး အိပ်ချင်လာသည် အထိ တီဗီ ထိုင်ကြည့်နေခဲ့ကြသည်။ ဘွန်က ခေါင်းချလိုက်သည် နှင့် ချက်ခြင်းလို အိပ်ပျော်သွားသော်လည်း ကျွန်တော်က အိပ်မပျော်နိုင်၊ တရုတ်တန်း ကို ရောက်ခဲ့သည်ကို ပြန်စဉ်းစားပြီး ကျွန်တော် နှင့် အမူးသမား ဗိုလ်မှုး တို့ နှစ်ယောက် ဟိုးအရင် ချုးလန် တွင် ကြုံခဲ့သည် အဖြစ်ကို အမှတ်ရနေမိသည်။

ထိုစဉ်က ဗီယက်ကောင်း ဟု သံသယရှိသူ တဦးကို ဖမ်းဆီးခဲ့စဉ်က ဖြစ်သည်။ ထို လူသည် ကျွန်တော်တို့ စာရင်းတွင် ယခင်က အောက်‌ဆုံးတွင် ရှိနေခဲ့ရာမှ တဖြေးဖြေး နှင့် ထိပ်သို့ ရောက်လာခဲ့သူ ဖြစ်သည်။ ၎င်းအား ဗီယက်ကောင်း ဖြစ်သည် ဆိုကာ လက်ညိုး ထိုးပြသော လူ တော်‌ ‌တော်များများ ရှိနေ၍ ရှင်းလင်းရန် အချိန် ရောက်လာခဲ့သည်။ ဗိုလ်မှုးက ထိုလူ နှင့် ပတ်သက်၍ သူ့ ပြုစုထားသည့် ဖိုင်တွဲ အထူကြီးကို ထုတ်ပြသည်။

ထိုလူ၏ တရားဝင် အလုပ်အကိုင် အရက်ချက် ရောင်းသူ ဖြစ်သည်။ ပုန်းလျိုးကွယ်လျိုး အလုပ်က တရားမဝင် ‌ကာဆီနို ခန်း ဖွင့်ထား သည်။ ဝါသနာ နေရာတွင် ဗီယက်ကောင်း များ အတွက် အခွန် ကောက်ပေးသူ ဟု ရေးထားသည်။ ရပ်ကွက်ထဲရှိ အဝင်အထွက် လမ်းအားလုံး ကို ပိတ်လိုက်သည်။ နောက်ဖေး လမ်းကြားများ ကိုလည်း ကင်းလှည့်ခိုင်းထားသည်။

ဒုတိယ အဖွဲ့က ရပ်ကွက်ထဲတွင် စစ်မှုထမ်းဖို့ တိမ်းရှောင်‌ နေသူ များကို ဖေါ်ထုတ်သ‌ ယောင် နှင့်သက်သေခံ ကပ်ပြားများကို စစ်ဆေးနေသည်။ ဗိုလ်မှုး၏ လူများက ထိုလူ၏ အရက်ရောင်းသည့် ဆိုင်ထဲသို့ ဝင်လိုက်ကြသည်။ ထွက်လာသော ဇနီးအား တွန်းဖယ်ပစ်ပြီး စတိုခန်းသို့ ဦးတည် သွားကြသည်။ အခန်းတံခါးကို ဖွင့်သော လျို့ဝှက် မောင်းတံကို တွေ့သွားပြီး ဆွဲဖွင့်လိုက်ရာ အထဲတွင် လောင်းကစားသမား များ ဖဲရိုက်‌နေပြီး အမြင်ရိုင်းအောင် ဝတ်ထားသော စားပွဲထိုး မလေးများက ၎င်း ချက်သော အရက် နှင့် စားစရာ သောက်စရာ များ ဖြင့် ဧည့်ခံနေသည်။

တံခါးမှ ပြေးဝင်လာသော ရဲများကို တွေ့လိုက်၍ အားလုံး နောက်တွင်ရှိသည့် တံခါးပေါက်သို့ ဝရုန်းသုံးကား နှင့် ထပြေး ကြ‌ တော့သည်။ ထို တံခါးပေါက်ဝ တွင် နောက်ထပ် လက်နက် အပြည့်အစုံ နှင့် ရဲများက အသင့်စောင့်‌နေကြပြီး ဖြစ်သည်။

ထုံးစံအတိုင်း စူးစူးဝါးဝါး အော်ဟစ်သံများ နှင့် ပွက်လော ရိုက်‌နေပြီး ရဲများ၏ နံပတ်တုတ် နှင့် ရိုက်သံ၊ လက်ထိပ်ခပ်သံများလည်း ရောပြွမ်းပြီး ဆူညံနေသည်။ နောက်ဆုံး ကျွန်တော် နှင့် အမူးသမား ဗိုလ်မှုး၊ ကျွန်တော်တို့ ဖမ်းလိုသည့် လူသာ ကျန်တော့သည်။ ထိုလူ့ကို တွေ့လိုက်ရ၍ ကျွန်တော် အံ့အားသင့်သွားမိသည်။ ကျွန်တော်တို့ ဝင်ဖမ်းမိ အကြောင်း မန်း ကို ကြိုတင် သတင်းပေးထားပြီး ဖြစ်၍ အခုလို အခွန်ကောက်သူ ရှိနေ‌ သေးသည့် အတွက်ကြောင့် ဖြစ်သည်။

"ဗီယက်ကောင်း ဟုတ်လား၊ အဓိပ္ပါယ်မရှိ၊ ကျွန်တော်က စီးပွားရေး သမား တယောက်ပါ" ဟု လက်တရမ်းရမ်း ဖြင့် အော်ဟစ် ပြောဆိုနေသည်။

အတော်လေး ဟန်ကျနေတဲ့ စီးပွားရေးသမား ဖြစ်ရမယ်ဟု ကာဆီနို ပိုက်ဆံများနှင့် ပြည့်နေသော အမှိုက် အိပ်ကို မေးငေါ့ပြရင်း ဗိုလ်မှုးက ပြောလိုက်သည်။

ဒီအတွက်ပဲ ခင်ဗျားတို့ ဖမ်းလို့ရမယ် ဟု ထိုလူက ပြောပြန်သည်။ သူ၏ ပါးပေါ်တွင်လည်း ဂေါ်လီ လုံးခန့်ရှိ မှဲ့ကြီး တလုံး ရှိသည်။ ပိုက်ဆံတွေ အကုန်သာ ယူသွား၊ ခင်ဗျားတို့ အတွက်ပဲ၊ ကျွန်တော်က ရဲတွေ အတွက် ပျော်ပျော်ကြီး ရံပုံငွေ ထည့်ဝင်ချင်တဲ့ သူ ပါ။

ထိုစကားကြောင့် ဗိုလ်မှုးသည် ဒေါသ ထွက်သွားပြီး လက်ထဲရှိ လက်ကိုင်တုတ် နှင့် ထိုလူ၏ ဗိုက်ကို ဆောင့်ထိုးလိုက်သည်။ ဒီ‌ ငွေတွေက မင်း အစိုးရ ကို ဒဏ်ကြေးပေးဖို့ နဲ့ မဆောင်ဘဲ ထားတဲ့ အခွန်တွေ ပေးဖို့၊ ငါတို့ အတွက် မဟုတ်ဘူး၊ ဟုတ်တယ် မဟုတ်လား ကက်ပတိန်။

ကျွန်တော်ကလည်း အတည်ပေါက် နှင့် ဟုတ်တယ်ဟု ပြောလိုက်ရသည်။

ဒါပေမယ့် နောက် ပေးရမယ့် အခွန်တွေ အတွက်ကတော့ တမျိုးပေါ့ကွာ၊ ဟုတ်တယ် မဟုတ်လား ကက်ပတိန်။

မှန်တယ် ဟု ပြန်ပြောရင်း အခွန်ကောက်သမား အတွက် ကျွန်တော်လည်း ဘာမှ မတတ်နိုင်တော့၊ ထိုလူလည်း စစ်ကြောရေး စခန်းတွင် ခန္ဓာကိုယ် တခုလုံး ဖူးယောင် ညိုမဲ ကုန်သည်အထိ တပတ်လောက် ရိုက်နှက် ခံလိုက်ရသည်။ နောက်ဆုံးကျမှ ကျွန်တော့် လူများက ဒီလူသည် ဗီယက်ကောင်း မဟုတ်မှန်း သဘောပေါက်သွားကြသည်။

ထိုသို့ သဘောပေါက်လာရခြင်းမှာလည်း ထိုလူ၏ ဇနီးသည် ဗိုလ်မှုးအား လဒ်ထိုးရန် ငွေထုတ်ပိုက်၍ ရောက်လာခြင်းကြောင့် ဖြစ်သည်။ ဗိုလ်မှူးက လူမှားသွားတယ် ထင်တာပဲ ဟု ဆိုကာ ကျွန်တော် အတွက် ဝေစုကို စာအိပ်တအိတ်ထဲ ထည့်ကာ ပေးလာသည်။ ငွေက ကျွန်တော့် တနှစ်စာ လစာ နှင့် ညီမျှသည်။ တနှစ်စာဟုသာ ပြောရသော်လည်း ထိုလစာဖြင့် တနှစ်နေ၍ မလောက်၊ သူ ပေးလာသည့် ငွေကို ငြင်းလိုက်မည် ဆိုက ကျွန်တော့် အပေါ် သံသယ ဖြစ်လာမည်စိုး၍ ယူထားလိုက်ရသည်။

ကျွန်တော်လည်း ထိုငွေဖြင့် ဆင်းရဲ မှုဒဏ်ကြောင့် ဒုက္ခရောက်နေသော ငယ်ငယ်ချောချော ကောင်မ‌ လေး များထံ သွား၍ အလှုဒါန ပြုချင်စိတ်ပင် ပေါက်လာသည်။ ကျွန်‌ တော်လည်း အဖေ လုပ်ခဲ့တာထက် ပြောခဲ့သည့် စကားများကော ဟိုချီမင်း ၏ စကားများကိုပါ အမှတ်ရနေမိသည်။

ယေရှု နှင့် အန်ကယ် ဟို တို့ နှစ်ယောက်စလုံးက ငွေသည် လူကို ဖောက်ပြန် ပျက်စီးစေသည်ဟု ရှင်းလင်းစွာ ပြောဆိုထားခဲ့ပြီး ဖြစ်သည်။ ဘုရားကျောင်းကန်များကို မလေးမစားလုပ်ခဲ့ကြသည့် ငွေချေးငှားသူများ၊ နိုင်ငံကို ကိုလိုနီပြုကာ ခေါင်းပုံဖြတ်နေသည့် အရင်းရှင်များ၊ ထိုအထဲတွင် ဂျုးဒတ်စ် က ယေရှုကို သစ္စာဖောက်ဖို့ ယူထားသည့် ငွေစ သုံးဆယ် အကြောင်းလည်း ထည့်မပြောပဲ နေ၍ မဖြစ်ပြန်။

ကျွန်တော်လည်း ဗိုလ်မှုး၏ မကောင်းမှု မှ ရလာသည့် ငွေများကို တော်လှန်ရေး အတွက် လှုဒန်းလိုက်သည်။ မန်းနှင့် ‌တွေ့‌နေကျ ဘုရားရှိခိုးကျောင်း တိုက်ကြီးတွင် သူ့လက်ထဲ ထည့်ပေးခဲ့သည်။

မန်းက ငါတို့ဘာကို တိုက်ခိုက်‌ ‌နေရလဲ ဆိုတာ မြင်လား၊

ဘုရားကျောင်းထဲတွင် သန့်ရှင်းသော မာရီ၊ ဘုရားသခင်၏မယ်တော်၊ အပြစ်သားဖြစ်တဲ့ တပည့်တော် တို့အတွက် ဆုတောင်းပေးတော်မူပါ ဟု အထက်တန်းစား အဘွားအို မိန်းမကြီးများကခပ်တိုးတိုးရွတ်ဆိုနေကြသည်။

ဒါကြောင့်ပဲ ငါတို့ အနိုင်ရမှာ ဟု ပြောလိုက်ပြန်သည်။ ငါတို့ ရန်သူတွေဟာ အကျင့် စာရိတ္တ ဖောက်ပြန်နေကြတဲ့ လူတွေချည်းပဲ။ ငါတို့က သူတို့လို မဟုတ်ဘူး၊ 

ထိုအကြောင်းများ ရေးပြနေရခြင်းသည် အရက်သမား ဗိုလ်မှုးလည်း ကလော့ဒ် ခန့်မှန်းသလို မကောင်း မှု နှင့် ကင်းသည့် လူမဟုတ်၊ ငွေ ညှစ်တာထက် အပုံကြီး ဆိုးဝါးသည့် အမှုများကို ကျူးလွန် ကောင်း ကျုးလွန် နိုင်သည်။ ကျူးလွန်ခဲ့သည် ဆိုစေဦး၊ လက်ရှိ ဖြစ်နေသည့် အနေအထားများ အရ ဆိုလျှင် သူ့အား သာမန် အဆင့်ထက် ကျော်လွန်နေပြီဟု ပြော၍ မရ၊ သူသည် သာမန် အဆင့်မျှသာ ရှိသေးသည်။