18. BE CALM WHEN THE UNTHINAKABLE ARRIVES

ခေတ်သစ် အာဏာရှင် စနစ်သည် လူများ၏ သေခြင်းတရားကို ကြောက်ရွံ့စိတ်အား အသုံးချပြီး အုပ်ချုပ်ရေး ခိုင်မာအောင် လုပ်ဆောင်ခြင်း ဆိုသည့် terror management မျိုး ဖြစ်သည်။ အကြမ်းဖက်သမား များ တိုက်ခိုက်ခံလာရသည့် အခါတိုင်း အာဏာပိုင်များသည် ထိုဖြစ်ရပ်ကို အခွင့် အရေး တရပ် အဖြစ် အသုံးချကာ အာဏာကို ခိုင်မာ အောင် တည်ဆောက်လာလေ့ ရှိသည်ကို အမြဲ သတိပြုမိနေဖို့လိုသည်။

ရုတ်ခြည်း ဘေးအန္တရာယ် ကျရောက်လာသည့် အခါတိုင်း အုပ်ချုပ်ရေးကို အပြန်အလှန် ထိန်းညှိပေးသည့် စနစ် ချုပ်ငြိမ်းသွားခြင်း၊ အတိုက်အခံ ပါတီများကို ဖျက်သိမ်းပစ်ခြင်း၊ လွတ်လပ်စွာ ထုတ်ဖေါ် ပြောဆိုခွင့်ကို ရပ်ဆိုင်းပစ်ခြင်း၊ မျှတသည့် တရားစီရင်ရေး ဆုံးရှုံးသွားခြင်း အစရှိသည် တို့ လိုအပ်လာသည်။ ယင်းသည် ဟစ်တလာ၏ စာအုပ်ဟောင်းကြီးထဲက လုပ်ထုံးလုပ်နည်းများ ဖြစ်သည်။၎င်းတို့ ဆင်လာသော အကွက်ထဲသို့ အဝင်မခံကြပါနှင့်။

ဟစ်တလာသည် ဒီမိုကရေစီ နည်းလမ်း ဖြင့် အာဏာ ရလာခဲ့သည်မှာ မှန်သော်လည်း ၎င်း၏ အစိုးရ အဖွဲ့အား ကြောက်မက်ဖွယ်ရာ နာဇီ များ ဖြစ်လာအောင် ပံ့ပိုးပေးလိုက်သည်က ရိုက်ခ်ျစတက် ပါလီမန် အဆောက်အဦး မီးဟုန်းဟုန်း တောက်လောက်ခဲ့သည့် ဖြစ်ရပ်ပင် ဖြစ်သည်။ ဤသည်ကား နိုင်ငံကို အကြောက်တရား သွတ်သွင်း ပြီး စီမံ အုပ်ချုပ်သွားနိုင်မည့် ပုံစံ ချိုးပေးလိုက်ခြင်းသာ ဖြစ်သည်။

၁၉၃၃ ဖေဖေါ်ဝါရီ ၂၇ ရက် ည ကိုးနာရီ ခန့်တွင် ဂျာမန် လွှတ်တော် ရိုက်ချ်စတက် တည်ရှိရာ အဆောက်အဦးကြီးသည် မီးစတင် လောင်ကျွမ်းလာခဲ့သည်။ ဘာလင် တွင် ထိုညက မည်သူက ရှို့ခဲ့သနည်း။ ကျွနုပ်တို့ မသိခဲ့ကြ၊ ဤသည်ကလည်း အရေးမပါလှ၊ အရေးပါလာသည်က ထိုသို့ အံ့အားသင့်ဖွယ် ကောင်းလောက်အောင် မီးလောင်ကျွမ်းခဲ့မှု မှ အရေးပေါ် အခြေအနေဆိုသည့် နိုင်ငံရေး ပေါ်ထွက်လာခဲ့ခြင်းပင် ဖြစ်သည်။

ထိုညက ထွက်ပေါ်လာသော မီးတောက်မီးလျံ များကို ကျေနပ်အားရစွာ စိုက်ကြည့်နေခဲ့သည့် ဟစ်တလာသည် "ဒီမီး က အစ ပဲ ရှိသေးတယ်" ဟု ပြောလာခဲ့သည်။ ထိုမီးကို ရှို့ခဲ့သူသည် နာဇီများ ဟုတ်သည် မဟုတ်သည်က ဟစ်တလာ အတွက် အရေးမကြီး၊ သူ့အတွက် နိုင်ငံရေး အရ အခွင့်အလန်းကြီး တခု ပေါ်ထွက်လာချေပြီဟု ရှုမြင်လာခဲ့သည်။

"အခုအချိန်ကစပြီး ဘယ်သူ့ကိုမှ ချမ်းသာမပေးတော့ဘူး၊ ကျုပ်တို့ သွားမယ့် လမ်းကို အနှောက်အယှက် ပေးလာသူ မှန်သမျှ ဖြိုလှဲပစ်ရမယ်" ဟု ကြုံးဝါးရင်း နောက်တနေ့တွင်ပင် ဂျာမန် နိုင်ငံသား အားလုံး၏ အခြေခံ အခွင့်အရေးအားလုံးကို ရပ်ဆိုင်းလိုက်ပြီ ဆိုသော အမိန့်ကို ထုတ်ပြန်ခဲ့သည်။ မည်သူကို မဆို ရဲအဖွဲ သည် "ကြိုတင် ကာကွယ်သည့် အနေဖြင့် ထိမ်းသိမ်း နိုင်ခွင့်" အပ်နှင်းလိုက်သည်။

ဟစ်တလာမှ မီးတင်ရှို့ခဲ့ခြင်းသည် ဂျာမဏီ၏ ရန်သူများ ဖြစ်သည် ဟူသော အပြော ကြောင့် မတ်လ ၅ ရက်နေ့တွင် ပြုလုပ်သော ပါလီမန် ရွေးကောက်ပွဲတွင် နာဇီ ပါတီသည် ပြတ်ပြတ်သားသား အနိုင်ရရှိသွားခဲ့သည်။

ရဲအဖွဲ့ နှင့် နာဇီ စစ်ရဲများက လက်ဝဲနိုင်ငံရေး ပါတီ များ မှ အဖွဲ့ဝင်များကို သိမ်းကျုံး ဖမ်းဆီးလာကြသည်။ ၎င်းတို့အား ယာယီ ဆောက်လုပ်ထားသော ချွေးတပ်စခန်းများတွင် ချုပ်နှောင်ထားခဲ့သည်။

မတ်လ ၂၃ တွင် ပါလီမန်အသစ် မှ "ပြည်သူ နှင့် နိုင်ငံ‌ တော်၏ ဆင်းရဲဒုက္ခများအား ကုစားရန်" ဆိုကာ ဟစ်တလာအား သူတဦးတည်း သဘောဖြင့် ဥပဒေ အမိန့်အာဏာများ ထုတ်ပြန်နိုင်သည့် "Enabling Act" ဆိုသည့် ဥပဒေကို အတည်ပြုပေးခဲ့သည်။ (မိမိတို့ နိုင်ငံသည်လည်း မင်းအောင်လှိုင်၏ ရွေးကောက်ပွဲ အပြီး ထိုသို့ ဖြစ်မလာနိုင်ဟု မည်သူ ပြောနိုင်ပေမည်နည်း။)

ဤသို့ဖြင့် လေးနှစ်တကြိမ် သက်တမ်းတိုးလာခဲ့၍ ဂျာမဏီသည် နောက်ထပ် ဆယ့်နှစ်နှစ် နီးပါး ဒုတိယ ကမ္ဘာစစ်ကြီး ပြီးဆုံးသွားသည် အထိ အရေးပေါ် အ‌ခြေ အနေ အောက်တွင် နေခဲ့ကြရတော့သည်။

ဟစ်တလာသည် လုပ်ပိုင်ခွင့် အာဏာ အပြည့်အဝ ရလာခဲ့ပြီ ဖြစ်‌၍ မူလက အရေးပါမှု သိပ်မရှိသည့် အကြမ်းဖက်မှုတစ်ခုကို အသုံးချပြီး၊ လူသန်းပေါင်းများစွာကို သတ်ဖြတ်ကာ ကမ္ဘာကြီးကို ပြောင်းလဲစေခဲ့သည့် အကြမ်းဖက် အုပ်ချုပ်ရေးစနစ်တစ်ခုကို ထူထောင်လာခဲ့‌သည်။

ယနေ့ခေတ် အာဏာရှင်များကတော့ လူများ၏ ကြောက်ရွံ့စိတ်ကို အသုံးချပြီး အာဏာတည်မြဲအောင် လုပ်တတ်ကြသူများ ဖြစ်သည်။ ၎င်းတို့က ပိုပြီး တီထွင် ကြံဆ နိုင်သူများ ဖြစ်သည်ဟု ဆိုနိုင်သည်။

အမေရိကန် သမ္မတ လောင်းကို ထောက်ခံခဲ့သည် လက်ရှိ ရုရှား အုပ်ချုပ်သူများကို စဉ်းစားကြည့်ကြပါစို့။ ဗလာဒီမာ ပူတင်သည် ရိုက်ခ်ျတက် လွှတ်တော် အဆောက်အဦးကြီး မီးလောင်သွားခဲ့သည့် ဖြစ်ရပ်မျိုး နှင့် ဆင်သည့် မတော်တဆ မှု မျိုး နှင့် အာဏာ ရလာခဲ့ယုံသာမက ထိုအာဏာကို ဆက်၍ ခိုင်မြဲနေစေ‌ရန် အခက်အခဲ (အစစ်အမှန်‌ ကော၊ အတုအယောင်ကော၊ သံသယ ဖြစ်ဖွယ်) မှန်သမျှ အား အကြမ်းဖက် တိုက်ခိုက်မှု များကို ဆက်တိုက်ဆိုသလို အသုံးချ၍ ဖယ်ရှားခဲ့သည်၊ အိမ်နီးချင်း ဒီမိုကရေစီ နိုင်ငံများကိုလည်း တိုက်ခိုက်ခဲ့သည်။

၁၉၉၉ ဩဂုတ်လ တွင် ဘောရစ် ယဲဆင် ကျန်းမာရေး ချို့တဲ့လာ၍ ပူတင်အား ဝန်ကြီးချုပ် အဖြစ် ခန့်အပ်လိုက်သည့် အခါ ၎င်းဘယ်သူဘယ်ဝါ ဖြစ်သည်ကို မသိကြ၊ စစ်တမ်း ကောက်ချက် များ တွင်လည်း မယ်မယ်ရရ ထွက်မလာခဲ့။

နောက်ပိုင်းလ များ တွင် ရုရှား မြို့ကြီးများရှိ အဆောက်အဦး အတော်များများ ဆက်တိုက်ဆိုသလို ဗုံးခွဲခံခဲ့ရသည်၊ ရုရှား လျို့ဝှက် ရဲ အဖွဲ့၏ လက်ချက် ဖြစ်ပုံရသည်။ အရာရှိ အတော်များများအား ၎င်းတို့၏ လုပ်ဖေါ်ကိုင်ဖက်များက အပြစ်ရှိကြောင်း သက်သေ အထောက်အထား များ တွေ့လာ၍ ဖမ်းဆီးခဲ့ကြသည်၊ နောက်တကြိမ် တွင် ရုရှား လွှတ်တော် ဥက္ကဌ က ‌ဗုံး အမှန်တကယ် မပေါက်ကွဲမီ ရက်အနည်းငယ် အလိုကပင် ဗုံးပေါက်ကွဲကြောင်း ကြေညာခဲ့သည်။

ထိုသို့ ဖြစ်ပျက်လာမှု များ ရှိနေသော်ငြားလည်း ပူတင်သည် ချက်ချင်းညာရှိ မူဆလင်များကို လက်စားချေ စစ်ပွဲဆင်နွှဲမည်ဟု ကြေညာပြီး ကျုးလွန်သည်ဟု ယူဆထားသူ များ ကို "အိမ်သာထဲပါ မကျန် မောင်းထုတ်ပစ်မည်" ဟု ကတိပေးလာခဲ့သည်။

ရုရှား နိုင်ငံသည် စုစည်းလာပြီး ပူတင်၏ လူကြိုက်များ မှု သည် မိုးထိ မြင့်တက်သွားခဲ့သည်။ နောက်လ အတွင်း ပြုလုပ်သည့် သမ္မတ ရွေးကောက်ပွဲ တွင် ပူတင်သည် အနိုင်ရရှိသွားခဲ့သည်။

၂၀၀၂ ခုနှစ် မော်စကို ပြဇာတ်ရုံကြီး အား အကြမ်းဖက် သမား တို့ တိုက်ခိုက်လာမှု ကို နှိမ်နှင်း ခဲ့စဉ် အတွင်း ရုရှား နိုင်ငံသား အများအပြားသည် လုံခြုံရေး တပ်ဖွဲ့ ဝင်များ၏ လက်ချက်ဖြင့် သေဆုံးခဲ့ကြရသည်။ ပူတင်သည် ထိုသို့ ဖြစ်လာသော အခြေအနေများကို အခွင့် ကောင်း ယူပြီး ပုဂ္ဂလိက ရုပ်မြင်သံကြား ဌာနများကို ထိန်းချုပ် လိုက် သည်။

၂၀၀၄ တွင် ဘက်စလန် ရှိ စာသင်ကျောင်း တကျောင်းအား အကြမ်းဖက်သမားများက သိမ်းပိုက်လိုက်ချိန်တွင် ပူတင်သည် လူထု ရွေးကောက်တင်မြှောက်ထားသည့် ‌ဒေသ အုပ်ချုပ်ရေး မှုး ရာထူးကို ဖျက်သိမ်းပစ်ခဲ့သည်။

ဤနည်း ဖြင့် ပူတင်သည် ပုဂ္ဂလိက ပိုင် ရုပ်မြင်သံကြား ဌာနများ၊ ရွေးကောက်ခံ ဒေသအုပ်ချုပ်ရေး မှုး များ ကို ဖယ်ရှားပစ်လိုက်ခြင်း ဖြင့် အာဏာ ၏ အထွပ်အထိပ်သို့ တက်လှမ်းလာခဲ့သည်။ ထိုသို့ လုပ်နိုင်ရန်လည်း အစစ်အမှန်ကော၊ အတုအယောင်ကော၊ သံသယ ဖြစ်ဖွယ် ကောင်းသော အကြမ်းဖက် လုပ်ရပ်များ က ပံ့ပိုးပေးခဲ့ခြင်း ပင် ဖြစ်သည်။

ပူတင်သည် ၂၀၁၂ တွင် သမ္မတ ပြန်ဖြစ်လာခဲ့ပြီး နောက် လူများအား အကြောက်တရား ဖြင့် စီမံ အုပ်ချုပ်မှုကို နိုင်ငံခြားရေး မူဝါဒ ထဲ သွတ်သွင်းလာခဲ့သည်။ ၂၀၁၄'တွင် ယူကရိန်းအား ကျုးကျော်ခဲ့ပြီး နောက်တွင် ရုရှား စစ်တပ်အား အကြမ်းဖက် တပ်ဖွဲ့များ အဖြစ် အသွင်ပြောင်းပေးခဲ့သည်။ စစ်ယူနီဖောင်းများ မှ အမှတ်တံဆိပ်များ အားလုံးကို ဖယ်ရှားပစ်လိုက်သည်။ ၎င်းတို့ ကျုးလွန်ခဲ့သည့် အကြမ်းဖက်မှု များ အတွက် တာဝန်မရှိ ဟု ငြင်းဆို နိုင်ရန် အတွက် ဖြစ်သည်။

ယူကရိန်း အရှေ့တောင်ဖက်ခြမ်းရှိ ဒွန်ဘားစ် ဒေသအား တိုက်ခိုက်လာသည့် ကမ်ပိန်းတွင် ချီချင် လက်နက်ကိုင်များကို အသုံးချလာခဲ့သည်။ မူဆလင်ဒေသများတွင် အ‌ခြေစိုက်ထားသော ရုရှားတပ်များကိုလည်း စေလွှတ်ခဲ့သည်။ ရုရှားသည် ၂၀၁၄ တွင် ပြုလုပ်သည့် ယူကရိန်း၏ သမ္မတ ရွေးကောက်ပွဲအားလည်း ဆိုက်ဘာမှ တဆင့် နှောက်ယှက်ရန် ကြိုးစားခဲ့‌သော်လည်း အောင်မြင်မှု မရခဲ့ပေ။

၂၀၁၅ ဧပြီလထဲတွင် ရုရှား ဟက်ကာ များက ISIS အယောင်ဆောင်ကာ ပြင်သစ် ရုပ်မြင်သံကြား ဌာနတခု၏ ထုတ်လွှင့်မှု ကို အုပ်စီးသွားနိုင်ခဲ့သည်။ ထို့နောက်တွင်တော့ ပြင်သစ် တနိုင်ငံလုံးကို အကြောက်တရားများ ဖုံးလွှမ်းစေမည့် ထုတ်လွှင့်မှု များ ပြုလုပ်လာခဲ့သည်။

ရုရှားတို့က ဆိုက်ဘာခါလီဖိတ် (ဆိုက်ဘာ အစ္စလမ် နိုင်ငံ‌ တော်) ဆိုကာ အယောင်ဆောင် ခဲ့ကြသည်။ သို့မှသာ ပြင်သစ် တို့ ယခင်ကထက် ပို၍ တုန်လှုပ်ခြောက်ခြားလာကြမည်လည်း ဖြစ်သည်။ ထိုသို့ လုပ်ရသည့် ရည်ရွယ်ချက်မှာ ပြင်သစ် မဲဆန္ဒရှင်များအား လက်ယာစွန်း ပါတီ ဖြစ်သော အမျိုးသား တပ်ဦးကို မဲပေးလာကြရန် အတွက် ဖြစ်သည်။ ထိုပါတီအား ရုရှားတို့က ဘဏ္ဍာရေး အရ အထောက်အပံ့ ပေးနေခဲ့သည်။

၂၀၁၅ နိုဝင်ဘာလ တွင် ပဲရစ်တွင် ဖြစ်ပွားခဲ့သော အကြမ်းဖက် တိုက်ခိုက်မှု တွင် လူပေါင်း ၁၃၀ သေဆုံးပြီး ၃၆၈ ဦး ဒဏ်ရာရသွားခဲ့သည်။ ထိုဖြစ်ရပ် အပေါ် ကရင်မလင် နှင့် နီးစပ်သော တွေးခေါ် မျှော်မြင်ရေး အဖွဲ့ ၏ တည်ထောင်သူမှ ဝမ်းသာ အားရ ဖြင့် ဥရောပအား ဖက်ဆစ်ဝါဒ နှင့် ရုရှားဖက် ရောက်လာအောင် တွန်းအားပေးမှု အဖြစ် ပြောဆိုခဲ့သည်။ အနောက်ဥရောပတွင် ဖြစ်ပွားလာသော အစစ်အမှန် သို့မဟုတ် အတုအယောင် အကြမ်းဖက် တိုက်ခိုက်မှု မှန်သမျှ သည် ရုရှားတို့ အကျိုးရှိရာ ရှိကြောင်း ဖြစ်လာခဲ့သည်။

၂၀၁၆ အစောပိုင်းတွင် ရုရှားတို့သည် ဂျာမဏီတွင် အကြောက်တရားများ ဖြစ်ပေါ်လာရန် အတုအယောင်တခု ဖန်တီးလာကြသည်။ ဆီရီယား တွင် အရပ်သားများကို ဗုံးကြဲတိုက်ခိုက်ပြီး မူဆလင် ဒုက္ခသည်များအား ဥရောပ ဖက် မောင်းထုတ်ခဲ့ကြပြီးနောက် မူဆလင်များသည် ကလေးငယ်များကို အဓမ္မ ပြုကျင့်ကြသူများ ဖြစ်သည်ဟူသော မိသားစု ဒရာမ တခု ခင်းကျင်းလာကြသည်။ ဂျာမဏီတွင်လည်း ဒီမိုကရေစီ စနစ် ပြိုလဲသွားရန် နှင့် လက်ယာ အစွန်းရောက် ပါတီများ အင်အားကောင်းလာရန် ရည်ရွယ် လုပ်ဆောင်ခဲ့ခြင်း ဖြစ်သည်။

ထိုမတိုင်မီ စက်တင်ဘာလ အတွင်းက ဂျာမန် အစိုးရ မှ ဆီရီယား ဒုက္ခသည် တသန်း လက်ခံသွားမည်ဟု ကြေငြာခဲ့သည်။ ရုရှားသည်လည်း ချက်ခြင်း ‌ဆိုသလို အရပ်သားများကို ပစ်မှတ်ထား၍ ဗုံးကြဲ တိုက်ခိုက် လာတော့သည်။ ဒုက္ခသည်များ ဖန်တီးပေးပြီး နောက် ရုရှားသည် ဇာတ်ကြောင်း ခင်းပြလာခြင်း ဖြစ်သည်။

၂၀၁၆ ဇန်နဝါရီ လ အတွင်း ရုရှားမီဒီယာများက ဂျာမဏီ တွင် နေထိုင်သော ရုရှား နွယ်ဖွား မိန်းကလေးသည် ခေတ္တခဏ ပျောက်ဆုံးသွားခဲ့ရာ ရွှေ့ပြောင်း ဝင်ရောက်လာသူ မူဆလင်များ၏ ဝိုင်းဝန်း အဓမ္မပြုကျင့်ခြင်း ခံခဲ့ရသည်ဟု သတင်း ထုတ်လွှင့် ဖြန့်ချီလာခဲ့သည်။

သံသယ ဖြစ်မှု များ နှင့် အတူ ပျာပျာသလဲ ဖြစ်လာသော လက်ယာ အဖွဲအစည်း များက အစိုးရ ဆန့်ကျင်ရေး ဆန္ဒပြပွဲများ ဆော်ဩ လုပ်ဆောင်လာခဲ့သည်။ ‌ဒေသခံ ရဲ အဖွဲ့က ထိုသို့သော အဓမ္မ ပြုကျင့်ခံရမှု မျိုး မရှိ ခဲ့ပါဟု လူထု ကို အသိပေးလာခဲ့သော်လည်း ရုရှား မီဒီယာများက သတင်းကို ဖုန်းကွယ်ထားသည်ဆိုကာ စွပ်စွဲလာကြသည်။ ထိုအထဲတွင် ရုရှား သံတမန်များလည်း ပါဝင်လာခဲ့သည်။

၂၀၁၆ နောက်ပိုင်းတွင်တော့ အမေရိကန် ပြည်ထောင်စုသည်လည်း "ဒုက္ခသည် ဆိုသူများ၏ ကျုးကျော်ခြင်း ခံရပြီ" ဆိုပြီး ဖန်တီးလာသော အကျပ်အတည်း များ နှင့် ကြုံလာရသည့် နိုင်ငံဖြစ်လာခဲ့သည်။ မိမိတို့ ပြည်နယ်များ ကို ကျန်းမာရေး စောင့်ရှောက်ပေးမည့် အစီအစဉ်များ မှ လွတ်မြောက်လိုသူများ အတွက် အခွင့်အရေး တရပ် ဖြစ်လာခဲ့သည်။ အာဖရိကနွယ်ဖွား အမေရိကန်လူမျိုး အနည်းငယ်၏ ဆင်ခြေဖုံးရပ်ကွက်များ တွင် အကြမ်းဖက်မှုများ လုပ်ခဲ့သည်ကို ၎င်းတို့၏ အကြမ်းဖက်မှု လှိုင်းလုံးကြီး ရိုက်ခတ် ခံခဲ့ရသည် ဆိုကာ လူများ၏ စိတ်ထဲတွင် ထင်ယောင်ထင်မှားဖြစ်အောင် ပုံဖော်ခဲ့ကြသည်။

ပြဿနာ တစုံတရာ မပေါ်ဘဲ တရားမျှတစွာ ကျင်းပခဲ့သည့် ရွေးကောက်ပွဲ ရလဒ်များ အပေါ် မယုံကြည်ဟု ဆိုကာ အကြောင်းပြစရာ တခု အဖြစ် လိမ်ညာသည့် သတင်းအမှားများ၊ စွပ်စွဲမှု များ ပြုလုပ်ရန် အသုံးချခဲ့ကြသည်။

ဤသည်တို့က အတွင်းရန်သူ များ၏ နာဇီဝါဒ အစပျိုးလာသည့် ယုံတမ်းစကား များ အသုံးချကာနောက်ကြော ဓါးနှင့် ထိုးခြင်း ခံလိုက်ရသည့် သစ္စာဖေါက်မှု ကြီးပင် ဖြစ်သည်။

အကြမ်းဖက်လိုသည့် အာဏာရှင်များ အတွက် မူ ရိုက်ခ်ျစတက် မီးရှို့ခံခဲ့ရမှု အား တခဏတာ တုန်လှုပ်စရာ ဖြစ်သော်လည်း တသက်တာ ရိုးကျိူး သွားအောင် လုပ်နိုင်သည်ဟု သင်ခန်းစာ ယူခဲ့ကြသည်။ ကျွနုပ်တို့ ရယူရမည့် သင်ခန်းစာကား မိမိတို့ စိတ်တွင် အလိုအလျောက် ပေါ်လာတတ်သော ကြောက်စိတ် နှင့် ထိခိုက် ဝမ်းနည်းမှု များ ဖြင့် ကျွနုပ်တို့ ၏ အင်စတီကျူးရှင်း များ ပျက်စီးသွားသည် အထိ မဖြစ်စေသင့်။

သတ္တိရှိခြင်းသည် မကြောက်ခြင်း၊ ဝမ်းနည်းစိတ် မရှိခြင်း ဟု မဆိုလို၊ အာဏာရှင်တို့ မှ မိမိတို့၏ သဘာဝ ကြောက်ရွံ့စိတ်ကို နှိုးဆွအောင် တိုက်ခိုက် စီမံဖန်တီးလာမှု ကို ချက်ခြင်းလို သိရှိပြီး အခက်ခဲဆုံး အချိန် ရောက်နေစဉ်တွင်ပင် တွန်းလှန် နိုင်ခြင်းကိုသတ္တိဟု ခေါ်ဆိုခြင်း ဖြစ်သည်။

ဂျိမ်း မက်ဒီဆန်မှ အာဏာရှင် တိုင်းသည် ၎င်းတို့ အတွက် "လွန်စွာ အခြေအနေ ပေးလာသည့် အရေးပေါ် " ဆိုသည်မှ ထွက်ပေါ်လာတတ်စမြဲ ဟု အကျိုးသင့် အကြောင်းသင့် ဖေါ်ပြခဲ့သည်။ ရိုင်းစတက်ခ်ျ မီးလောင်ခံရပြီးနောက်တွင် ဟန်နာ အာရန့်ဒ် က "ကျမ ဟာ ဘေးလူ တယောက်အနေနဲ့ ရပ်ကြည့်နေလို့ မဖြစ်တော့ဘူးလို့ ယူဆလာတယ်" ဟု ပြောလာခဲ့သည်။

အာဏာသိမ်း ဖို့ တကြိမ် ကြိုးပမ်းမှု ရှိလာခဲ့လျင် မအောင်မြင်ခဲ့လည်း အောင်မြင်ဖို့ အတွက် လေ့ကျင်စရာ ဖြစ်လာခဲ့စမြဲ ဖြစ်သည်။ နောက်တကြိမ်တွင် အရေးပေါ် အခြေအနေက ပိုပြီး ကောင်းသွား နိုင်သည်၊ ကျွနုပ်တို့ အနေဖြင့် မထင်မှတ်စရာ ဟု ဆိုကာ အံ့အားသင့်နေ၍ မဖြစ်ပေ။