ထိုအကြောင်းကို ဂျိုးစက် တိုရီဂီယန် မှ ၎င်း၏ The Party's Interest Come First စာအုပ်တွင် ရေးသားခဲ့ခြင်း ဖြစ်ပြီး၊ အီကောနော်မစ် မဂ္ဂဇင်း မှ ရီဗြူး ရေးသားထားသည်ကို ပြန်လည် တင်ပြသွားပါမည်။

ရှီကျုံးရွှင် သည် အသက် ၇၀ ကျော် အရွယ် ရောက်လာချိန်တွင်တော့ သွား များက ဝါး၍ မရတော့သည်အထိ ဒုက္ခပေးလာခဲ့သည်။ တညနေ မိသားစု ထမင်း ဝိုင်းတွင် ၎င်း တဝက်တပျက် ဝါးပြီးသား ကြက်သွန်ဖြူ အရိုးများကို ပါးစပ်ထဲမှ ဆွဲထုတ်ပြီး သားဖြစ်သူ ဆက်ဝါးဖို့ လှမ်းပေးခဲ့သည်။

ထိုအချိန်က အသက် ၃၀ ကျော် အရွယ် ရောက်နေပြီး တရုတ် ကွန်မြူနစ် ပါတီတွင် ထင်ပေါ်လာနေပြီ ဖြစ်သော ရှီ ကျင့်ဖျင်သည် ငြူစူခြင်း မရှိပဲ လှမ်းယူကာ ဆက်ဝါးပြီး မြိုချပစ်ခဲ့သည်။

ရှီ သည် ထိုသို့ စားကြွင်းစားကျန် များကို စားနေကျလည်း ဖြစ်သည်။ ကလေးဘဝ က ဖခင် ဖြစ်သူ ချိုးပြီးသား ရေ ကို ဆက်ချိုးခဲ့ရပြီး ‌ထိုရေကိုပင် နောက်နေ့မနက် မိသားစု အဝတ်များ လျှော်ဖွတ်ရန် ဆက်သုံးခဲ့ရသည်။

၎င်းသည် မိဘ အပေါ် ရိုသေ ကျိုးနွံရမည်ကို ကောင်းစွာ နားလည်ထားသူလည်း ဖြစ်သည်။ ရှီ ကျုံးရွှင်သည် မိဘကို မလေးမစား ဆက်ဆံသည့် ကလေး မှန်သမျှ အရွယ်ရောက်လာက ကြီးပွားရိုး ထုံးစံ မရှိဟု သားသမီးများကို ဆုံးမသွန်သင်ထားခဲ့သည်။

ရှီသည် တရုတ် နှစ်သစ်ကူး ရောက်တိုင်း မိဘ နှစ်ပါး ရှေ့တွင် ဝပ်တွားကာ ဦးညွှတ် ကန်တော့ စမြဲ ဖြစ်သည်။ ထိုသို့ ကန်‌တော့ရာတွင် ပုံစံမကျက ဖခင် ဖြစ်သူ၏ အရိုက်အနှက်ကို ခံခဲ့ရသည်။

ထိုကဲ့သို့ ရှီ ၏ အကြောင်းများကို အတွင်းကျကျ ရေးသားနိုင်ရန် မစ္စတာ တိုရီဂျီယံသည် တရုတ်၊ အင်္ဂလိပ်၊ ရုရှား ဘာသာ များဖြင့် ရေးသားထားသော တရားဝင် စာရွက်စာတမ်းများ၊ ဒိုင်ယာရီများ၊ အင်တာဗျုးများမှ ကြိုးစားပမ်းစား ရှာဖွေ ခဲ့ရသည်။ ထို့အတွက်လည်း တရုတ် ကွန်မြူနစ် ပါတီတွင် အမြင့်ဆုံး‌ ခေါင်းဆောင် ဖြစ်လာသူ၏ အကြောင်း ထိုးထွင်း သိမြင်နိုင်ခွင့် ရခဲ့သည်။

ရှီသည် တရုတ်ပြည်၏ မော့်မကြည့်ဝံ့သော ရာသက်ပန် ခေါင်းဆောင်ကြီးဟု ပြော၍ ရသည့်အပြင် ကမ္ဘာပေါ်တွင် အရေးပါဆုံး ခေါင်းဆောင်ဟူ၍ ပင် တင်စား ပြောဆိုခံရသူ ဖြစ်သည်။ ၎င်းသည် ‌ဒေါ်နယ် ထရန့် အိမ်ဖြူတော်မှ ဆင်းပေးရပြီး မား အ လာဂို တွင် အငြိမ်းစား ဘဝ ဖြင့် နေသွားရချိန် တွင်ပင် အာဏာကို ဆက်၍ ဆုပ်ကိုင်သွားမည့် လူလည်း ဖြစ်သည်။

သို့သော် ၎င်းနှင့် ပတ်သက်၍ သတင်းအချက်အလက်များက မဆိုသလောက်သာ ထွက်ပေါ်ခဲ့သည်။ ၎င်း၏ လှုပ်ရှားမှု တိုင်းကို ဝါဒဖြန့် ယန္တရားများက ဘုန်းတော်ဘွဲ့ သီကုံးသလို စီစဉ် ရေးသားခဲ့ကြပြီး ၎င်း၏ အကြောင်း မှတ်တမ်းများတွင် စိတ်ဝင်စားဖွယ် ပါရှိလာသည့် အ‌သေးစိတ် အချက်အလက်များကိုမူ ပေးထားသည့် အခွင့်အာဏာ ကို ဆစ်ဆစ်ထိ မခံလိုသည့် ဖြတ်တောက်ရေး သမားများက ဖယ်ရှားပစ်ခဲ့ကြသည်။

ထို့အတွက် ၎င်းအကြောင်းကို သိနိုင်သည့် နည်းလမ်းဟူ၍ ပါတီ မှတ်တမ်းများကို မွှေနှောက်ရှာဖွေခြင်း၊ အပြင်သို့ ပေါက်ကြားလာသော ပါတီတွင်း မိန့်ခွန်းများ၊ ၎င်း ဖြတ်သန်းခဲ့ရသည့် တရုတ်ပြည် သမိုင်း၏ အရေးပါသော ဖြစ်ရပ်များ နှင့် ၎င်း အပေါ် ဩဇာညောင်းခဲ့သည့် ပုဂ္ဂိုလ်များ အကြောင်း လေ့လာ စီစစ်ခြင်း တို့ဖြင့်သာ သိနိုင်စရာ ရှိသည်။

ထိုအထဲတွင် ရှီဟု ဖြစ်လာရန် ပုံဖေါ်‌‌အပေးနိုင်ခဲ့ဆုံး ပုဂ္ဂိုလ်သည်ကား ၎င်း၏ ဖခင် ရှီ ကျုံး ရွှင် ပင် ဖြစ်သည်။ ဖခင် ဖြစ်သူ၏ ပါတီ နှင့် ဆက်ဆံရေး၊ ကပျက်ယပျက် လုပ်ခံလိုက်ရသည့် ရည်မှန်းချက်များသည် သားဖြစ်သူမှ တရုတ်ပြည် ကို မည်သို့ ဖြစ်အောင် လုပ်ရမည်ဟု သင်ကြားပေးသလို ဖြစ်ခဲ့ရသည်။

ရှီ ကျုံးရွှင်သည် လည်း ၎င်း၏ ခေတ်ပြိုင်မျိုးဆက်ကဲ့သို့ပင် ကြေကွဲစရာ အဖြစ်များ နှင့် ရင်ဆိုင်ခဲ့ရသည်။ ၁၉၁၃ တွင် လယ်သမား မိသားစု မှ ‌မွေးဖွားကြီးပြင်းခဲ့သူ ဖြစ်ပြီး ငယ်ရွယ်စဉ်ကပင် ကွန်မြူနစ် ဝါဒ ကို လေးလေးနက်နက် ယုံကြည်သက်ဝင်ခဲ့သူ တဦး ဖြစ်သည်။ အရွယ်ရောက်လာသည့် အခါ "လုပ်အားကို အရင်းအနှီးပြု၍ လုပ်ကိုင်စားသောက်နေကြရသူများ မတရား ဆက်ဆံခံနေရသည်ကို ကြည့်ပြီး" ၎င်း၏ ယုံကြည်မှု သည် ပို၍ ခိုင်မာလာခဲ့ရသည်။

၁၉၂၈ တွင် ကျောင်းသားများ၏ အကြမ်းဖက် ဆန္ဒပြ မှု တွင် ပါဝင်ခဲ့ပြီး ထိုစဉ်က ကွန်မြူနစ် ဆန့်ကျင်ရေး အာဏာပိုင်များ၏ အကျဉ်းချခြင်းကို ခံခဲ့ရသည်။ ရှီကျုံးရွှင် ၏ မိဘများသည် ၎င်း ဆယ်ကျော်သက် အရွယ်ကပင် ကွယ်လွန်သွားခဲ့ကြသည်။ မိမိ အဖမ်းခံခဲ့ရမှု ကြောင့် မိဘများ ဝန်ထုပ်ဝန်ပိုး ဖြစ်ကာ ကွယ်လွန်ခဲ့ရသည်ဟု ယူဆခဲ့သည်။ ညီမ ဖြစ်သူ နှစ်ဦး သည်လည်း အငတ်ဘေး ကြောင့် သေဆုံးသွားခဲ့ပြန်သည်။

ပြည်တွင်း စစ်ကြီး အပြီးတွင် ရှီကျုံးရွှင်သည် အချိန်တို အတွင်းမှာပင် ပါတီတွင်း ရာထူး အဆင့်ဆင့် မြင့်တက်လာခဲ့ပြီး အစိုးရ အဖွဲ့၏ ထိတ်ပိုင်းသို့ တက်လှမ်းလာခဲ့သည်။ ၁၉၆၂ တွင် မော် က အဖျက်သဘော ဆန်သည်ဟု ယူဆခဲ့သော ဝတ္ထုစာအုပ် အား ပုံနှိပ် ဖြန့်ချီရန် အားပေးခဲ့မှု ဖြင့် ပါတီမှ သန့်စင် ခံခဲ့ရသည်။

နောက်ပိုင်း လေးနှစ်အကြာတွင် ယုံမှား သံသယ လွန်ကဲလာသော မော်စီတုံးသည် ယဉ်ကျေးမှု တော်လှန်ရေး ဆိုကာ ဆင်နွှဲလာမှု ကို အကြောင်းပြု၍ ထိန်းမနိုင် သိမ်းမရအောင် သောင်းကျန်းလာသော လက်ပါးစေများကြောင့် လူပေါင်း ငါးသိန်း နှင့် နှစ်သန်းအကြား သေဆုံးခဲ့ရပြီး အများအပြား အိုးအိမ် ပစ္စည်း ဥစ္စာများ ဖျက်ဆီးခံခဲ့ရ၍ အိမ်‌ခြေယာခြေမဲ့ ဖြစ်ကုန်ကြသည်။

ရှီကျုံးရွှင် အားလည်း ပြန်ပေးဆွဲသွားခဲ့ကြပြီး တိုက်ပိတ် ချုပ်နှောင်ကာ နှိပ်စက်ညှင်းပမ်းခံခဲ့ရသည်။ ၎င်းအား ထောက်ခံခဲ့သူ ၂,၀၀၀ ခန့်သည်လည်း အလားတူ ကြမ္မာဆိုး နှင့် ကြုံခဲ့ရပြီး ထိုအထဲမှ ၂၀၀ ခန့်သည် နှိပ်စက်ညှင်းပမ်းခံရ၍ သေဆုံးခြင်း၊ လူစဉ်မမီ အောင် ဒဏ်ရာရခြင်း၊ ရူးသွပ်သွား အထိ ဖြစ်ခဲ့ ခြင်း အစရှိသည်တို့ ကြုံခဲ့ကြရသည်။

ရှီကျုံးရွှင် ၏ မိသားစု သည်လည်း သားကောင်ဘဝ ကျ ရောက်ခဲ့ရပြန်သည်။ မိသားစုဝင်များ အား ဖခင် ဖြစ်သူ ကို အတင်းအကျပ် ရှုတ်ချခိုင်းခဲ့ပြီး၊ သမီး တယောက်သည် ကိုယ့်ကိုကိုယ် အဆုံးစီရင်သွားခဲ့သည်။ ရှီကျင့်ဖျင်သည် ထိုစဉ်က ဆယ်ကျော်သက် အလယ်တန်း ကျောင်းသား သာ ရှိသေးသော်လည်း ၎င်းအား အရင်းရှင် လမ်းကြောင်း လျှောက်သူ၊ သစ္စာဖေါက် အဖြစ် တံဆိပ်ခပ် ခံခဲ့ရသည်။ တချိန်တွင် ရှီ အား သံဖြင့်လုပ်ထားသော ဦးထုတ်ရှည်ကြီး ဆောင်းခိုင်းခဲ့ပြီး လူအုပ်ကြီး ရှေ့ လျှောက်ခိုင်းကာ အရှက်ခွဲခဲ့ကြသည်။ လူအုပ်ကြီးက ၎င်းအား တံတွေး ဖြင့် ထွေး၊ လှောင်ပြောင်သရော်ကြပြီး "ရှီကျင့်ဖျင် အလိုမရှိ" ဟူသော ကြွေးကြော်သံများ ဟစ်ကြွေး ခဲ့ကြသည်။ ထိုလူအုပ်ကြီး ထဲတွင် ရှီ ၏ မိခင် လည်း ပါဝင်ခဲ့သည်။

ရှီ အားလည်း အကျဉ်းချထားခဲ့ကြ၍ ဆောင်းတွင်း တွင်ပင် အေးစက်နေသော သံပန်တလင်း ပေါ်တွင် အိပ်ခဲ့ရသည်။ " ကျွန်တော် တကိုယ်လုံးလည်း ဂျပိုးတွေ နဲ့ ပြည့်နေတယ်" ဟု ရှီက ရေးသားခဲ့ဖူးသည်။ ရှီသည် တကြိမ်တွင် ထောင်မှ ထွက်ပြေးပြီး အိမ်သို့ ပြန်ရောက်လာခဲ့သည်။ အမေ ဖြစ်သူထံ ထမင်းတနပ် လောက် ကျွေး ပါဟု တောင်းပန်ခဲ့သော်လည်း မကျွေးသည့် အပြင် သူမ ပါ အဖမ်းခံရမည် စိုး၍ အာဏာပိုင်များထံ အကြောင်းကြားခဲ့သဖြင့် ရှီသည် ငိုယိုပြီး မိုးရွာကြီးထဲ ပြန် ထွက်ပြေးသွားခဲ့ရသည်။

ရှီ၏ ဒုက္ခများက ထိုမျှ နှင့် အဆုံးသတ် မသွားသေး။ အသက် ၁၅ နှစ် အရွယ် တွင် ရှီအား တောရွာတရွာ သို့ ပို့ဆောင်ခဲ့သည်၊ ထိုစဉ်က ၎င်းနှင့် ရွယ်တူ ကလေး သူငယ် သန်းပေါင်းများစွာအားလည်း ထိုသို့ပင် ခေါ်ယူသွားခဲ့ကြသည်။ ၎င်းသည် အရောက်အပေါက် ဝေးလှသော အရပ်ရှိ ဂူကြီးထဲတွင် နေခဲ့ရသည်။ ထိုအရပ်တွင် သမီးမိန်းကလေးများကို လက်ဖွဲ့ အဖြစ် ကိုယ်အလေးချိန် နှင့် ချိန်တွယ် တွက်ချက်ပြီး ထိမ်းမြားပေးကြလေ့ ရှိသည်။ "လောကကြီး အကြောင်း နားမလည်သေးလျင်ပင် နားလည်လာအောင် မဖြစ်မနေ သင်ကြားပေးခဲ့၍ အရွယ် နှင့် မမျှ အောင် ရင့်ကျက်လာခဲ့ရသည်" ဟု ရှီ က ပြန်ပြောပြခဲ့ဖူးပေသည်။

ထိုသို့ သားအဖ နှစ်ယောက်စလုံး ဒုက္ခသုက္ခများ နှင့် ရင်ဆိုင်ခဲ့ရသော်လည်း အဘယ်‌ ကြောင့် ပါတီ အပေါ် စိတ်မပျက်ခဲ့ကြသနည်းဟု မေးစရာ ဖြစ်လာသည်။ ထိုအဖြေအား ၁၈၆၃ တွင် ရုရှား သတင်းစာဆရာကြီး နီကိုလိုင် ချာနီယက်စကီး ရေးသားသည့် "What is to be done" စာအုပ်တွင် တွေ့ရလိမ့်မည်ဟု စာရေးသူ တိုရီဂီယန်က ဖေါ်ပြထားသည်။

ထိုဝတ္ထုထဲတွင် ဇာတ်ကောင်ဖြစ်သူ ရာခမီးသည် စိတ်ဓါတ်များ မာကျောခိုင်မာလာအောင် သံချွန်များ ထောင်ထားသည့် ကုတင်‌ပေါ်တွင် အိပ်ခဲ့သည်။ ရှီ သည်လည်း အေးစိမ့်နေသော သံပန်းတလင်း၊ ဂျပိုးများ၊ မိုး မုန်တိုင်း များ အကြား ဖြတ်သန်းခဲ့ရဖူးသူ ဖြစ်၍ သူ့ကိုယ်သူ ရာခမီးလို ကြံ့ကြံ့ခံနိုင်ခဲ့သူ ဟု ထင်မြင်လာသည်။

သားအဖ နှစ်ယောက်စလုံးသည် ဘော်ရှီဗစ်၏ နိုင်ငံရေး ယဉ်ကျေးမှု ၏ လောင်းရိပ် အောက်တွင် ခိုလှုံခဲ့ကြသူများ ဖြစ်သည်။ ဒုက္ခသုက္ခများ ခံနိုင်ရည် ရှိခြင်းသည် စိတ်စွမ်းအား ကို ခိုင်မာစေပြီး အရေးတော်ပုံ အတွက် စိတ်ရောကိုယ်ပါ ပေးဆပ်သူ ဖြစ်လာမည် ဆိုသော အိုင်ဒီယာကို ပုံလောင်းပေးခဲ့သည့် သဘောတရားပင် ဖြစ်သည်။

ရှီသည် ဘဝ တလျှောက်လုံး မိသားစု နှင့် ပါတီ အပေါ် ရိုသေ ကျိူးနွံစွာ သစ္စာရှိခဲ့သူ တဦး ဖြစ်သည်။ ထို နှစ်ခုစလုံးက တရားမဲ့စွာ သူ့ အပေါ် တင်းတင်းကျပ်ကျပ် ဆက်ဆံခဲ့သော်လည်း ယိမ်းယိုင် တွေဝေသွားခြင်း မရှိခဲ့။

"ကျွန်တော်သာ အမေရိကား မှာ မွေးခဲ့ရင် အမေရိကန် ကွန်မြူနစ် ပါတီ ဝင်‌ တ‌ယောက် ဖြစ်လာမှာ တော့ မဟုတ်ဘူး၊ အဲ့ဒီအစား ဒီမိုကရက် ဖြစ်ဖြစ်၊ ရီပတ်ဘလီကင် ပါတီ တခုခု ထဲ ဝင်ဖြစ်မှာပဲ" ဟု ကွယ်လွန် သွားသူ ဂျပန် ဝန်ကြီးချုပ် အာဘေး ရှင်ဇို ကို ပြောခဲ့ဖူးသည်။ အာဘေး က သူ့စကားကို ထောက်၍ ရှီသည် ဝါဒရေးရာ ကြောင့် ပါတီကို ဝင်ခဲ့ခြင်း မဟုတ်ဘဲ အာဏာရဖို့ နည်းလမ်းတခု အဖြစ် အသုံးချခဲ့ခြင်း ဖြစ်သည်ဟု မှတ်ချက်ချခဲ့ဖူးသည်။

၁၉၇၀ ကျော် နှစ်များ အကုန် ပိုင်း တိန့်ရှောင်ဖိန် လက်ထက်တွင် ရှီကျုံးရွှင်သည် ပြန်လည် ပြင်ဆင်ခြင်း ခံခဲ့ရပြီး ကွမ်တုံ ပြည်နယ် တာဝန်ခံ အဖြစ် ခန့်အပ်ခံခဲ့ရသည်။‌ ဒေသ စီးပွားရေးကို လွတ်လပ်စွာ ကျင့်သုံးရေး မူဝါဒ ကို စတင် အကောင်အထည် ဖေါ်ခဲ့သည်။

ရှီသည် ၂၀၁၂ တွင် ကွန်မြူနစ် ပါတီ၏ အမြင့်ဆုံး ရာထူး ဖြစ်သော အထွေထွေ အတွင်းရေးမှုး ဖြစ်လာပြီး နောက်တွင် ဖခင်ကဲ့သို့ စီးပွားရေး ပြုပြင် ပြောင်းလဲသူ တဦး ဖြစ်လာလိမ့်မည်ဟု မျှော်လင့်ခဲ့ကြသည်။ ရှီ အား လစ်ဘရယ် ပုံစံ တမျိုးမျိုး ဖြစ်လာလိမ့်မည်ဟု ‌ယူဆခဲ့မှု များ မှားယွင်းသွားခဲ့သည်။ ၎င်းသည် တိုင်းပြည်အား လွတ်လပ် ပွင့်လင်းသော နိုင်ငံ အဖြစ် ဖန်တီးဖို့ စိတ်မဝင်စားခဲ့။

ထိုအစား တရုတ်ပြည် ၏ မြင့်မြတ်သော ဂုဏ်ကျက်သရေကို ပြန်လည် ဖေါ်ဆောင်နိုင်ရေး အတွက် ပါတီ အနေနှင့် မည်သည့် နည်းလမ်းကို မဆို သုံးသင့်သည်ဟု ယူဆခဲ့သည်။

၎င်း အပေါ် ဆက်ဆံခဲ့သည် မတရားမှု များကြောင့် တရားလက်လွတ် အာဏာ ကျင့်သုံးမှု သည် မလိုလားအပ် ဟု ခံယူ နိုင်ခဲ့ခြင်း မရှိဘဲ မော်စီတုန်း လက်ထက်ကလို မရမ်းပတာ ဖြစ်အောင် မလုပ်ဘဲ သူ့လို ဉာဏ်ပညာ ရှိသူ တယောက်က စနစ်တကျ ကိုင်တွယ် တတ်လျှင် ရပြီဟု ယူဆခဲ့သည်။

နောက်ပိုင်း ဆယ်စုနှစ် တစု အတွင်းမှာပင် ရှီ သည် မော်ပြီးနောက် အာဏာအရှိဆုံး ပုဂ္ဂိုလ် ဖြစ်လာခဲ့သည်။ ပြည်တွင်း ပြည်ပရှိ သဘောထား ကွဲလွဲသူများ ကို ရက်ရက်စက်စက် နှိပ်ကွပ်ခဲ့သည်။

နိုင်ငံရေး သဘောတရား ညီညွတ်နေစေရန် "ရှီကျင့်ဖျင်၏ အတွေးအခေါ်များ" ဆိုသည်ကို အတင်းအကျပ် လေ့လာသင်ယူ ခိုင်းခဲ့သည်။ ၎င်းကိုယ်၎င်းလည်း တရုတ် ယဉ်ကျေးမှု ကို ကာကွယ် စောင့်ရှောက်သူ တဦး အဖြစ် အမြဲလို ပုံဖော် ပြောဆိုခဲ့သည်။ "ကျွန်တော်တို့ ဘိုးဘေး ဘီဘင်တွင် ချန်ထားခဲ့တာတွေကို လွှင့်ပစ်ခဲ့သူ မှန်သမျှ သစ္စာဖေါက် တွေချည်းပဲ" ဟု တိုင်ဝမ် သမ္မတဟောင်း မာယင်ကျိုး ကို ပြောခဲ့ဖူးသည်။

ထိုသဘောထားသည် ရှီ၏ တိုင်ဝမ် ပေါ်လစီ တွင် သိသာစွာ တွေ့လာရပြီး ဖခင်၏ လွှမ်းမိုးမှု ရှိလာခဲ့သည်။ ရှီ ကျုံးချွန်းသည် ၎င်း၏ နိုင်ငံရေး သက်တမ်း ကုန်ဆုံးကာနီး တွင် တိုင်ဝမ် ပြန်လည် ပေါင်းစည်းရေး တာဝန် ပေးအပ်ခံခဲ့ရသည်။ သို့သော်လည်း ၎င်း၏ ရည်မှန်းချက် များ မပြည့်ဝမီ ၂၀၀၂ တွင် ကွယ်လွန်သွားခဲ့ရသည်။

သား ဖြစ်သူက ဖခင်၏ ဆန္ဒကို ဖြည့်ဆည်းရန် စိတ်အား ထက်သန်လျက် ရှိသည်။ "ဘိုးဘေး ဘီဘင်တွေ ထားခဲ့တဲ့ နယ်မြေ ကို လျော့ပါး ခံလို မဖြစ်" ဟု ၂၀၁၂ တွင် ပြောခဲ့ဖူးသည်၊ တိုင်ဝမ်ကို တိုက်ယူမည်လား သို့မဟုတ် ပိတ်ဆို့သည့် နည်းကို သုံးမည်လား ဟူသည်က မသဲကွဲ သေးပေ။

သဲသဲကွဲကွဲ ရှိလာသည်က မိသားစု ဆင်းရဲ ဒုက္ခ ရောက်ခဲ့ရခြင်းသည် ရှီကျင့်ဖျင်အား နိုင်ငံရေး အပေါ် အဆိုးမြင် ဝါဒ ကို ရိုက်သွင်းပေးလိုက်ခြင်းပင် ဖြစ်သည်။

"အာဏာနဲ့ အလှမ်းဝေး ပြီး ရှားရှားပါးပါးသာ ကြုံတွေ့ရတဲ့သူတွေအတွက်တော့ ဒီအရာတွေကို အမြဲတမ်း အတော်လေး လျှို့ဝှက်ဆန်းကြယ်ပြီး ဆန်းသစ်နေတာပဲ မြင်ကြတယ်” ဟု ရှီကျင့်ဖျင်က တစ်ချိန်က ပြောခဲ့ဖူးပါသည်။ 

“ဒါပေမဲ့ ကျွန်တော် မြင်ခဲ့တာကတော့ အပေါ်ယံထက်ကို ပိုပါတယ်။ အာဏာ၊ ပန်းတွေ၊ ဂုဏ်ကျက်သရေနဲ့ လက်ခုပ်သံတွေကိုပဲ မြင်ခဲ့တာ မဟုတ်ဘူး။ နွားတင်းကုပ်တွေ [ယဉ်ကျေးမှု တော်လှန်ရေးကာလအတွင်း လူတွေကို ပိတ်လှောင်ထားတဲ့နေရာ] နဲ့ လောကဓံရဲ့ မတည်မြဲမှုကိုပါ မြင်ခဲ့ရတယ်” ဟု ၎င်းက ပြောကြားခဲ့သည်။ 

ရှီကျင့်ဖျင်၏ ဘဝအစောပိုင်းနှစ်များက သူ့ကို ရှင်းရှင်းလင်းလင်း မြင်တတ်သူ၊ ကောက်ကျစ်စဉ်းလဲသူ၊ ခိုင်မာပြီး အာဏာဆန်သူဖြစ်လာစေခဲ့သည်။ 

၎င်း၏ဖခင်ထံမှ သင်ယူခဲ့သော ကမ္ဘာ့အမြင်သည် တရုတ်လူမျိုး ၁.၄ ဘီလီယံအပေါ်သာမက လူသားမျိုးနွယ်တစ်ရပ်လုံးအပေါ်ပါ သက်ရောက်မှုရှိလာမည်ဖြစ်သည်။

(၂၀၂၅ မေလ ၂၉ ရက်နေ့ထုတ် အီကောနော်မစ် မဂ္ဂဇင်း ပါ How an agonising relationship with his dad shaped Xi Jinping ဆောင်းပါးကို ပြန်ဆိုသည်။)