ကော်ရိုနာဗိုင်းရပ်စ် ကပ်ရောဂါကြီးသည် ကမ္ဘာတဝှမ်း ရှိ ခေါင်းဆောင်များ၏ ဦးဆောင်နိုင်မှု အရည်အချင်း မည်မျှ ရှိသည် ဆိုသည်အား မျက်ဝါးထင်ထင် မြင်ခွင့်ရအောင် ချပြသည့် ပွဲကြီး ပွဲကောင်း တခု ဖြစ်လာခဲ့ပေပြီ။ အဘယ်ကြောင့်ဆိုသော် ကမ္ဘာခေါင်းဆောင်များ အားလုံးသည် တူညီသော ပြဿနာ တခု တည်းကို ရင်ဆိုင် ဖြေရှင်းလာရသောကြောင့်ပင် ဖြစ်သည်။ ထိုအရေးကို နိုင်ငံတိုင်းရှိ ခေါင်းဆောင် တိုင်းက သူတို့နည်း သူတို့ဟန်ဖြင့် ဖြေရှင်းနေခဲ့ကြသည်။

ဂျာမန် အဓိပတိ အင်ဂျဲလာ မာကယ် သည် သိပ္ပံဓမ္မတရား များကို ပွေ့ဖက်လာခဲ့သည်။ ဘရာဇီး သမ္မတ ဂျယား ဘိုဆိုနာယို က ထိုကပ်ရောဂါကြီးကို နှာစေးခြင်း သက်သက်ဟု ဆိုကာ ပမာမခန့်လုပ်ခဲ့ဘူးသည်။ အမေရိကန် သမ္မတ ဒေါ်နယ် ထရန့် ၏ နေ့စဉ် သတင်းစာ ရှင်းလင်းပွဲ မှာ ဆပ်ကပ်စ် ပွဲကြီး အလား ဖြစ်နေခဲ့သည်။ အိန္ဒိယ ဝန်ကြီးချုပ်သည် သူ၏ နိုင်ငံသား ၁.၃ ဘီလီယံ အား ပိတ်ဆို့ထားခဲ့သည့် တိုင်အောင် အဘယ်ကြောင့် ထိုသို့ လုပ်ရန် လိုအပ်သည်ကို ၎င်းတို့အား တခါဘူးမျှ အကျိုးအကြောင်းနှင့် ရှင်းလင်းပြောဆိုခဲ့ဘူးခြင်း မရှိပေ။

ထိုအထဲတွင် ကမ္ဘာသတင်းစာကြီးများ နှင့် မီဒီယာ များ မှ အထူးတလည် ချီးမွမ်း ခံခဲ့ရသူသည် အသက် ၃၉ နှစ်ရှိ နယူးဇီလန် ဝန်ကြီးချုပ် ဂျာဆင်ဒါ အာဒန်း ဆိုသူ အမျိုးသမီးပင် ဖြစ်သည်။ သို့ဆိုလျှင် မည်သည့် အတွက် သူမအား အခုလို ချီးမွမ်းခန်း ဖွင့်လာခဲ့ကြရသနည်း။

အဓိက ထောက်ပြကြသည့် အချက်များမှာ သူမသည် ကိုယ်ပိုင် လမ်းကြောင်းကို ဖေါက်ထွက်နိုင်ခဲ့သည်။ အကြပ်အတည်းကြီးကို ရင်ဆိုင်နေရသော ပြည်သူများအား မိမိကိုယ် မိမိ ထိန်းကျောင်း ကာကွယ်ရန် စာနာစိတ် ဖြင့် တိုက်တွန်းခဲ့သည်။ သူမ၏ ပြောလိုသည်များမှာ ရှင်းလင်းပြတ်သားပြီး ရှေ့နောက်ညီညွတ်မှု ရှိနေရုံမျှ မက လေးနက်မှု နှင့် စိတ်ချမ်းမြေ့မှုကို ပေးစွမ်းနိုင်ခဲ့သည်။

သူမ၏ ချည်းကပ်မှုသည် လူထု၏ စိတ်ခံစားမှု များ နှင့် တထပ်တည်း ကျလာခဲ့သည်။ သူမသည် လူထုကို သွန်သင်ပြသနေခြင်း မဟုတ်ပဲ ၎င်းတို့နှင့် အတူ ရပ်တည်နေခဲ့သည်။

သူမ၏ ထူးခြားသော တီထွင် ဖန်တီးလာမှုတခုက ဖေ့စ်ဘုတ်မှတဆင့် လူထု နှင့် တိုက်ရိုက် ထိတွေ့ စကားပြောခွင့် ရအောင် ပြုလုပ်လာခဲ့ခြင်းပင် ဖြစ်သည်။ ထိုသို့ ဖေ့စ်ဘုတ်မှတဆင့် ပြောဆိုမှုများသည် အလွတ်သဘော မျိုး ဆောင်ရုံမျှမက အသိအမြင်များ ပေးနိုင်ခဲ့သည်။ လူထု၏ ယုံကြည် ကိုးစားမှု ကို အမြင့်မားဆုံး ရရှိလာခဲ့သည် ဆိုသော အကြောင်းများပင် ဖြစ်သည်ဟု အမေရိကန်ရှိ တတ်သိပညာရှင်များ အကြား ဩဇာတက္ကိမ ရှိသော the Atlantic Journal က ရေးသားလာခဲ့သည်။

သို့ဆိုက ကျွန်တော်တို့၏ နိုင်ငံတော် အတိုင်ပင်ခံ နှင့် မည်သို့များ ကွာခြားနေပေသနည်း။ သူမထက်ပင် များစွာ သာလွန်နေပြီ မဟုတ်ပါလား။

ထိုသို့သော မဟာဗျူဟာကို အတိုင်ပင်ခံသည် ပွဲစပြီ ဆိုကတည်းက မဆုပ်မနစ် လုပ်လာခဲ့သည်မှာ ယခုထိပင် ဖြစ်သည်။ ပြည်ပ မှ ပြန်လည် ဝင်ရောက်လာသူများ မည်မျှပင် များပြားစေကာမူ ၎င်းတို့ အား ခွဲခြားထားရှိရန် စီမံ ခန့်ခွဲထားပြီး ဖြစ်နေသည်။ ကရင်ပြည်နယ်အတွင်း လူ ၆,၅၀၀ ခန့် နှင့် မွန်ပြည်နယ်အတွင်း ၈,၅၀၀ ခန့် ထားရှိနိုင်မည့် ကွာရန်တင်း စင်တာများ ကြိုတင် စီမံထားခဲ့ပြီး ဖြစ်သည်။

ယခုပင် ကျွမ်းကျင်သူများက ကော်ရိုနာဗိုင်းရပ်စ်အား တနေ့လျှင် မည်ရွေ့မည်မျှ စမ်းသပ်နိုင်သည် ဟု ပြောဆိုနေခြင်းသည်ကား ဟိတ်ဟန် ထုတ် ကြွားဝါနေကြခြင်းမျိုး ဖြစ်နေပြီး ထိတွေ့သူ နှင့် ပတ်သက်ခဲ့သူများကို ခြေရာခံ ပြီး ခွဲခြားထားရှိနိုင်ခြင်းသည်သာ အထိရောက်ဆုံး လုပ်ရပ်ဖြစ်သည်ဟု ဝန်ခံလာခဲ့ကြပြီ ဖြစ်သည်။

CERP ဟု အမည်ပေးထားသည့် COVID-19 Economic Relief Plan ဖြစ်သော ရေတို ကူညီထောက်ပံ့သွားရေး အစီအမံများကလည်း အချိန်မီ ထွက်ပေါ်လာခဲ့ရပါသည်။ ထိုအတွက် တပတ်အတွင်းမှာပင် အမေရိကန် ဒေါ်လာ သန်း ရာချီသည့် အကူအညီတွေ ပေးဖို့ မိတ်ဖက် အဖွဲ့အစည်းတွေရဲ့ အတည်ပြုချက် ရယူနိုင်ခဲ့ပြီဟု ဦးဆောင် ရေးဆွဲခဲ့သူ ဒုဝန်ကြီး ဦးဆက်အောင်က ပြောခဲ့ပြီ ဖြစ်သည်။

အကယ်တမ်းတွင် အတိုင်ပင်ခံသည် world-class အဆင့်ရှိ ခေါင်းဆောင်တဦး ဖြစ်သော်လည်း နိုင်ငံက ဆင်းရဲ၍ နေရာမပေးလို ကြခြင်းသာ ဖြစ်သည်။ သို့သော် သူတို့ နယူးဇီလန် ဝန်ကြီးချုပ်ကို ခေါင်းစဉ်တပ် ပေးသလို most effective leader on the planet ပင် ဖြစ်သည်ကို နိုင်ငံသူ နိုင်ငံသားများ က တညီတညွတ်တည်း ပင် ဆုံးဖြတ်လိုက်ကြပြီ ဖြစ်သည်။