မြောက်ကိုရီယား သည် ဗလာဒီမာ ပူတင်၏ ယူကရိန်း စစ်ပွဲ တွင် ကူရန် တပ်သားပေါင်း ၁၂,၀၀၀ ကို စေလွှတ်ခဲ့သည်။ ၎င်းတို့အားလုံးသည် "မုန်တိုင်း တပ်ဖွဲ့" ဟု အမည်ပေးထားသော လက်ရွေးစင် တပ်များ ဖြစ်သည်။ ၁၉၆၈ အတွင်း တောင်ကိုရီယား သမ္မတ အား လုပ်ကြံ သတ်ဖြတ်ရန် ထိုတပ်ဖွဲ့အား အသုံးပြုခဲ့ဖူးသော်လည်း အောင်မြင်မှု မရခဲ့ပေ။
ယူကရိန်း သို့ စေလွှတ်လိုက်သော မြောက်ကိုရီယား တပ်များ အား ရှေ့တန်း စစ်မျက်နှာတွင် နိုဝင်ဘာလ ဆန်း မှစ၍ တွေ့လာရသည်။ ပြီးခဲ့သည့်နှစ်က ယူကရိန်းတပ်များ သိမ်းယူခဲ့သည့် ရုရှား၏ ကပ်စ် ဒေသ အတွင်း ယခုအခါ မြောက်ကိုရီယား တပ်များ နှင့် တိုက်ပွဲများ ပြင်းထန်စွာ ဖြစ်ပွားခဲ့သည်။
ရုရှားသို့ တပ်များ စေလွှတ်ရန် အစီအစဉ် သည် မြောက်ကိုရီယားဖက်မှ စ လာခဲ့ခြင်း ဖြစ်သည်။ တိုက်ပွဲများက ပြင်းထန် ပြီး ကြောက်မက်ဖွယ် ကောင်းလာသည် နှင့် အမျှ ကင်ဂျုံအန်း အတွက် အန္တရာယ် များလာခဲ့သည်။ မြောက်ကိုရီယား တပ်များသည် နောက်ဆုံးပေါ် နည်းပညာ သုံး ဒရုန်းစစ်ပွဲများ၊ ကပ်စ် ဒေသ တဝိုက်ရှိ မြေပြန့် ဒေသများနှင့် အကျွမ်းတဝင် မရှိ၊ ပြင်ဆင်ထားမှု မရှိ သည့် အဖြစ်များ နှင့် ရင်ဆိုင်လာရပြီ ဖြစ်သည်။
ဇန်နဝါရီ ၁၁ ရက် တွင် ယူကရိန်း သမ္မတ ဇယ်လင်စကီး က မြောက်ကိုရီယား စစ်သား နှစ်ဦး ကို သုံ့ပန်း အဖြစ် ဖမ်းဆီးရမိထားပြီဟု ပြောဆိုလာခဲ့သည်။
တောင်ကိုရီယား ထောက်လှန်းရေး အေဂျင်စီများက မြောက်ကိုရီယား တပ်သား ၃၀၀ ခန့် သေဆုံးပြီး ၂,၈၀၀ ခန့် ဒဏ်ရာရရှိနေပြီ ဟု ခန့်မှန်းထားကြသည်။ ထိုသို့ ဆက် ဖြစ်နေပါက မြောက်ကိုရီယား လူ့အဖွဲ့အစည်း အတွင်း ပြင်းထန်စွာ ရိုက်ခတ်လာနိုင်သည်ဟု ဆိုသည်။
ကင်ဂျုံ အန်းသည် ထိုသို့ စွန့်စားရသည့် အတွက် မည်သို့သော အကျိုး အမြတ် ရလာနိုင်သနည်း။
အနောက်တိုင်း၏ ပိတ်ဆို့ဒဏ်ခတ်ထားမှု များ ကြောင့် လိုအပ်နေသော လက်နက်ခဲယမ်း များ၊ လောင်စာဆီ၊ အစားအသောက် နှင့် အခြား အရင်းအမြစ်များ ရုရှား ထံ မှ ရလာဖွယ် ရှိနေသည်။ ထို့ပြင် စစ်သား တဦးစီ အတွက် မြောက်ကိုရီယား အစိုးရသည် လစဉ် ဒေါ်လာ ၂,၀၀၀ ခန့် ရနေသည်ဟု တောင်ကိုရီယား ထောက်လှန်ရေး အေဂျင်စီများ က ဆိုသည်။
မြောက်ကိုရီယား သည် ထိုမျှ လောက်နှင့် တင်းတိမ်နေမည် မဟုတ်ဘဲ ရုရှားထံမှ တိုက်ချင်းပစ် ဒုံးကျည်များ၊ ရေငုပ်သင်္ဘော နှင့် ဂြိုလ်တု နည်းပညာများ ကိုလည်း တောင်းဆိုလာဖို့ ရှိနေသည်။ ထိုသို့ အကူအညီများက စာရွက် စာတမ်းများကို ခရီး ဆောင် အိပ်ထဲ ထည့်ယူ၍ ရနေသဖြင့် မြင်ဖို့ သိဖို့ မလွယ်ကူလှပေ။
ယခုအခါ ရုရှားသည် ယခင်က စိတ်ကူး မရှိသော နည်းပညာ များကို လွှဲပြောင်းပေးရန် လိုလားလာသည်ဟု အနောက်တိုင်း အစိုးရ များက သုံးသပ်နေကြသည်။ ရုရှားသည် ၎င်းတို့အား စစ်မြေပြင်တွင် အကူအညီ ပေးလာသည့် အတွက် မြောက်ကိုရီယား အား နောက်ဆုံး ပေါ် အာကာသ နှင့် ဂြိုလ်တု နည်းပညာများ လွှဲပြောင်းပေးရန် ကြံစည်နေသည်ဟု ယုံကြည်ရကြောင်း အမေရိကန် နိုင်ငံခြားရေး ဝန်ကြီး အန်တိုနီ ဘလင်ကင်က ပြီးခဲ့သည့် တောင်ကိုရီယား ခရီးစဉ် အတွင်း ထုတ်ဖေါ် ပြောဆိုသွားခဲ့သည်။
မြောက်ကိုရီယားသည် ၎င်းတို့၏ လက်နက်ခဲယမ်း များ နှင့် ဒုံးကျည်များ အနောက်တိုင်း လေကြောင်း ကာကွယ်ရေး စနစ် နှင့် အသုံး တည့် မတည့်ကို တကယ့် စစ်မြေပြင် တွင် စမ်းသပ်နိုင်ခွင့် ရလာခဲ့သည်။ မြောက်ကိုရီယား တပ်သားများသည် ရခဲလှသည့် စစ်မြေပြင် အတွေ့အကြုံ များ ရရှိသွားခဲ့သည့်အပြင် ရုရှားတို့၏ နောက်ဆုံးပေါ် လက်နက်များ ထုတ်သုံးပြီး စစ်ပွဲ ဆင်နွဲနေသည်ကို မျက်မြင် ကိုယ်တွေ့ ကြုံခဲ့ကြရပြန်သည်။ အဓိက အားဖြင့် ဒရုန်း နှင့် အီလက်ထရောနစ် စစ်ဆင်ရေး သင်ခန်းစာများ ရသွားခဲ့ခြင်းပင် ဖြစ်သည်။
နိုဝင်ဘာလ အတွင်း က ကင်ဂျုံ အန်းသည် စက်ရုံအထိ ကွင်းဆင်းပြီး ဒရုန်းများ သရုပ်ပြသည်ကို လေ့လာခဲ့သည်။ ကာမီကာဇေ ဒရုန်း အမြောက်အမြား ထုတ်လုပ်ရန် ညွှန်ကြားသွားခဲ့သည်။
ရုရှားတို့က မြောက်ကိုရီယား တပ်များအား ခေတ်မီ လက်နက်များ အသုံးပြုသည့် စစ်ဆင်ရေးများ တွင် ပါဝင်ခွင့် မပေးဘဲ အသေခံ တိုက်ရမည့် နေရာများ တွင်သာ အသုံးချရန် ကန့်သတ်ထားသည်ဟု ယူဆရသည်။ မြောက်ကိုရီယား တပ်သား အတော်များများ ပြည်တော်ပြန်ခွင့် ကြုံကြရတော့မည် မဟုတ်သည်က သေချာနေသည်ဟု ဝါရှင်တန်ရှိ စတင်ဆန် စင်တာမှ ဂျင်နီ တောင်း က ဆိုသည်။ အသက်ရှင်ကျန်ခဲ့သူများသည်လည်း မြောက်ကိုရီယား အာဏာပိုင်များ သင်ယူစေချင်သည်များ ရလာကြမည် မဟုတ်ပေ။
၎င်းတို့ မြင်တွေ့နိုင်သည်များက ရုရှားနှင့် ယူကရိန်း တို့ မည်မျှ ချမ်းသာကြွယ်ဝစွာ နေထိုင်နိုင်ပုံများသာ ဖြစ်ပေမည်။၊ ပြန်လာသူများသည် တန်ဖိုးရှိသော အတွေ့အကြုံများအပြင် ၎င်းတို့ အစိုးရ အတွက် အန္တရာယ် များလှသည့် အတွေးအခေါ်များ ကပ်ညိလာကြမည်သာ ဖြစ်သည်။
ကင်ဂျုံအန်းကတော့ ထိုသို့ အန္တရာယ်များထက် ရလာမည့် ဆုလဒ်များက ပို၍ အရေးပါသည်ဟု တွက်ဆထားခဲ့ပြီး ဖြစ်သည်။ ထိုဆုလဒ်သည်ကား ရုရှား နှင့် ရေရှည် တွင် မဟာဗျူဟာ မြောက် ပါတနာအဖြစ် ရပ်တည်သွားနိုင်မည့် အရေးပင် ဖြစ်သည်။
ပူတင်၏ စစ်ရေး ရည်မှန်းချက်များ အထမြောက်ဖို့ ၎င်းတို့၏ စစ်သားများကို အသေခံ ခိုင်းခဲ့သည်မှာလည်း ထိုသို့ ဖြစ်လာရန် ကတိဝန်ခံချက် တောင်းရန်ပင် ဖြစ်သည်။
ရုရှား တို့ အဖို့ မြောက်ကိုရီယား အပေါ် တင်ရှိသွားသော သွေးကြေး ပေးဆပ်ရတော့မည် ဖြစ်သည်။
(၂၀၂၅ ဇန်နဝါရီ ၁၅ ရက်နေ့ထုတ် အီကောနော်မစ် မဂ္ဂဇင်း ပါ "What North Korea gains by sending troops to fight for Russia" ဆောင်းပါးမှ ကောက်နှုတ်တင်ပြသည်။