ယူနီဖောင်းများ ဘိုသီဘတ်သီ ဖရိုဖရဲ နှင့် ဖြစ်နေပြီး အခန်းကျဉ်း လေး တခုထဲတွင် စုပြုံ ထိုင်နေကြသော အမှတ် (၅) နယ်ခြားစောင့် တပ်ဖွဲ့ဝင်များ၏ ဗီဒီယို ဖိုင်သည် အွန်လိုင်းပေါ်တွင် ထွက်ပေါ်လာခဲ့ပြီ ဖြစ်သည်။
အံ့ဩစရာ ကောင်းနေသည်က ထိုဗီဒီယိုကို နိုဝင်ဘာ ၈ ရက် နေ့က ရိုက်ကူးခဲ့ခြင်း ဖြစ်သည် သိလိုက်ရသော ကြောင့်ပင် ဖြစ်သည်။
သို့ဆိုက မင်းအောင်လှိုင်၏ စစ်သားများသည် ပြတင်း ပေါက် များ၊ တံခါးများ ပိတ်ထားရပြီး မှောင်မဲလှစွာသော အခန်း ကျဉ်းကျဉ်း လေးထဲတွင် တလ ခန့် ထိုသို့ နေခဲ့ကြရသည် အဖြစ် ကို အထင်အရှား တွေ့မြင်လာခဲ့ရသည်။ ဗီဒီယို တွင် ပါရှိလာသော အပြောများအရ ရှစ်လ ပိုင်း လေးရက်နေ့ကတည်းက ပိတ်မိနေခြင်း ဖြစ်သည်ဟု သိရသည်။ ထို အတော အတွင်း ၎င်းတို့အားလည်း ကယ်ထုတ်ရန် ကြိုးစားသည်များလည်း မရှိဟု ဆိုသည်။ ယခု အခါ အဆောက်အဦးထဲတွင် ပိတ်မိနေကြသူများသာ ကျန်တော့သည်ဟု လည်း ဆိုသည်။
ဗိုလ်ချုပ်မှုး ကြီး မင်းအောင်လှိုင်အား ၎င်းတို့ကို ကယ်ထုတ်ပေးရန်၊ စစ်ကူပေးရန် တစာစာ တောင်းဆိုနေရင်း အသက် ဆုံးရှုံးသွားကြရပြီး နိုင်ငံရေး၊ စစ်ရေး၊ စီးပွားရေး တွင် လွန်စွာ အရေးပါ သော စစ်စခန်းကြီး လက်လွှတ်လိုက်ရသည့် အဖြစ်သည် စစ်တပ်ကို ထောက်ခံနေကြသူများ အဖို့ လွန်စွာ တုန်လှုပ်စရာ၊ ဒေါသထွက် နာကျည်းစရာ ကောင်းလှသော အဖြစ်သနစ်ကြီးပင် ဖြစ်သည်။
တိုက်ရင်း ခိုက်ရင်း ကျဆုံးသွားသည် က တပိုင်း ယခုလို အနေအထား မျိုး နှင့် မိမိတို့ ကံကြမ္မာ မည်သို့ ရှိမည်၊ ကျန်ရစ်ခဲ့သည့် ဇနီး သားမယားအတွက် မည်မျှ စိတ်သောက ရောက်နေရှာမည် နည်း။
မင်းအောင်လှိုင်အား မျက်စိမှိတ် ထောက်ခံပေးနေသူ များ အနေဖြင့် ကိုယ်ချင်းစာ သင့်လှသည်။
ယခုအခါ ၎င်းတို့၏ စစ်ကဲကြီး သူရိန်ထွန်း အား ဖမ်းဆီးရမိခဲ့ခြင်း နှင့် အတူ စစ်သားများ ရာချီ၍ အသက်ဆုံးရှူံးသွားခဲ့ရ၍ ဗီဒီယို ထဲပါ စစ်သားများလည်း ပါဝင်မည်ဟု ယူဆရပေသည်။
ပြူစောထီး ဘက်တော်သား တဦး ဖြစ်သည့် ဇော်ဖုန်းဟိန်း ဆိုသူကလည်း အမိမဲ့ အဖမဲ့ ကျန်ရစ်ရှာမည့် ကလေး များ အတွက် ခင်ဗျား ဘာလုပ်ပေးမှာတုန်း ဟု ဒေါသတကြီး မေးခွန်းထုတ်လာခဲ့သည်။
တရုတ် အတွက် သာ မင်းအောင်လှိုင်သည် အသုံးဝင် နေသော်လည်း ၎င်းအား ထောက်ခံသူများ ကတော့ လွန်စွာ စိတ်ပျက်လာနေပြီ ဖြစ်သည်။
မင်းအောင်လှိုင်သည် ကြက်ခြံ၊ ဝက်ခြံ များ လိုက်ကြည့်၊ ပွဲလမ်း သဘင်များ တက်ရင်း အချိန်ကုန် နေစဉ် တွင် အာရက္ခ တပ်တော်သည် ရခိုင် တပြည်လုံး၏ ၈၀ ရာနှုန်း ကျော် ကို သိမ်းပိုက်ထားပြီး ဖြစ်သည်။ ကျန်ရှိနေဆဲ ဖြစ်သော စစ်တွေ၊ ကျောက်ဖြူ မြို့များ တွင် စစ်တပ်သည် ဝိုင်းပိတ်ခံထားရသည့် အနေအထား နှင့် ရုန်းကန်နေကြရသည်။ အမ်း ရှိ အနောက်ပိုင်းတိုင်း စစ်ဌာနချုပ် သည်လည်း နေ့လား ညလား ဖြစ်နေပေပြီ။
ချင်းတော်လှန်ရေး တပ်ဖွဲ့များကလည်း ဖလမ်းမြို့ကို သိမ်းယူ နိုင်ရန် အပြင်းအထန် ထိုးစစ် ဆင်လျက် ရှိသည်။
မင်းအောင်လှိုင်သည် ထိုအရေးများသည် ၎င်းနှင့် လားလားမှ မဆိုင်သည့် အလား ပြင်ဦးလွင် ရုက္ခဗေဒ ဥယာဉ် နှစ် တရာ ပြည့် ပန်းပြပွဲ သို့ သွားရန် ပြင်ဆင်နေပြီဟု သိရသည်။
လက်ရှိ နယ်ခြားစောင့် အမှတ် (၅) တပ်၏ အဖြစ်ဆိုး ကြောင့် မင်းအောင်လှိုင် နှင့် အပေါင်းအပါများအဖို့ အပြောင်းအလဲများကို မဖြစ်မနေ လုပ်ရတော့မည် ဖြစ်၍ စောင့်ကြည့်ရမည်ဟု စစ်တပ် အရာရှိ ဟောင်းများ နှင့် ဖွဲ့စည်းထားသည့် မဟာဗျူဟာ လေ့လာရေး သေနင်္ဂဗျူဟာ အင်စတီကျု မှ ထောက်ပြခဲ့သည်။
နိုင်ငံရေး လေ့လာ သုံးသပ်သူ ဦးသန်းစိုးနိုင် က စစ်တပ် ထောက်ခံသူများ ဖက်က ထိုသို့ စိုးရိမ်တကြီး လေသံများ ထွက်လာလေ၊ မင်းအောင်လှိုင်၏ နောက်ဆုံး ရက်များ နီးလာလေ ပင် ဖြစ်သည်ဟု ဆိုသည်။ မောင်းတော ရှိ နခခ (၅) ၏ အဖြစ်အပျက် များကို ကြည့်ပြီး မင်းအောင်လှိုင်လို လူမျိုးကို ရှေ့လျောက် ဆက်ထောက်ခံ သွားသင့်လား မသွားသင့်လား ဆိုသည်ကို စဉ်းစားရတော့မည် ဖြစ်သည်ဟု ထောက်ပြသွားခဲ့သည်။
ယခုအချိန် အထိ မောင်းတော ကို လက်လွှတ်လိုက်ရမှု အပေါ် စစ်ကောင်စီ ဖက်က တခွန်းတပါဒ မျှ ထုတ်ပြန်ခြင်း မရှိသေးပေ။
ပြည်သူတို့၏ ခုခံ တွန်းလှန်စစ် မုချ အောင်ရမည်။
(RFA ၏ "In viral video, besieged Myanmar troops bemoan lack of support from junta chief" ဆောင်းပါးအား ကိုးကား တင်ပြသည်)
