ပြည်သူတို့၏ ခုခံ တွန်းလှန်စစ်သည် သုံးနှစ် အတွင်းသို့ ချည်းကပ်လာနေချိန်တွင် အရှိန်ရလာနေပြီ ဖြစ်ပြီး အပြီးသတ် နိုင်ဖို့ လူထု ၏ ထောက်ခံမှု ပို၍ပင် လိုအပ်လာနေပြီ ဖြစ်သည်။

ထိုအစား အချို့သည် ခေတ်ပျက်ကြီးတွင် ပုံမှန်နေသွားနိုင်ရန် ကြိုးစားလာနေသည့် အရှုံးပေး ဝါဒီများ အဖြစ် ၎င်းတို့ကိုယ် ၎င်းတို့ သတိမထားမိပဲ ကူးပြောင်းလာနေသည်ကို တွေ့ရသည်။

အာဏာသိမ်း အဖွဲ့၏ ဝါဒဖြန့် ပျော်ပွဲရွှင်ပွဲများတွင် ပါဝင်လာကြခြင်း၊ မိမိတို့ ဖာသာ ပွဲလမ်းများ လုပ်လာကြခြင်း တို့သည် စစ်ကောင်စီ၏ အကြမ်းဖက် လုပ်ရပ်များကို မည်သို့မျှ မပြောင်းလဲစေပဲ ပို၍ပင် ရဲတင်းလာအောင် ပံ့ပိုးပေးသလို ဖြစ်နေသည်ကို သတိချပ်သင့် ပေသည်။

ဆိုလိုသည်က စိတ်ထဲတွင် အကြမ်းဖက် စစ်တပ်၏ လုပ်ရပ်များကို မနှစ်မြို့ကြသော်လည်း တဖက်တွင် ထိုသို့သော အနေအထားများကြားတွင် ပုံမှန်နေသွားနိုင်အောင် ကြိုးစား‌ကြရင်းဖြင့် ၎င်းတို့ မနှစ်မြို့သော လုပ်ရပ်များ ပို၍ ကျုးလွန်အောင် ဖန်တီးပေးသည့် သဘော သက်ရောက်နေပေသည်။

သုံးနှစ်ကြာ မကျင်းပနိုင်ခဲ့သော အင်းလေး ဖေါင်တော်ဦး ဘုရားပွဲတော်ကို ယခုအခါ ပြန်လည် ကျင်းပနိုင်ပြီ ဖြစ်၍ ပြည်သူတရပ်လုံး ပျော်ရွှင်စွာ လှေပြိုင်ပွဲ ဆင်နွှဲလာကြပြီဟု အာဏာသိမ်း အဖွဲ့၏ ဝါဒဖြန့် သတင်းသည် နိုင်ငံတကာ သတင်းစာမျက်နှာများ တွင် စိုးရိမ်စရာ ကောင်းလောက်အောင် ပါရှိလာကြသည်။

ယခုအခါ နိုင်ငံတကာ အရေးအခင်းများ ရှုပ်ထွေးလာနေချိန်တွင် မြန်မာ အရေးသည် ပို၍ပင် လျစ်လျူ ရှု ခံနေရပြီး နိုင်ငံတကာကလည်း အကူအညီ မပေးနိုင်မည့် အတူတူ အကြမ်းဖက် စစ်တပ် ကို ၎င်းတို့ ဆက်ဆံ၍ ရသည့် အတိုင်းအတာအထိ ရောက်လာစေရန် အကြမ်းဖက်နေမှုများ လျော့ချရန်ပင် ပြောဆို တိုက်တွန်းလာကြပြီ ဖြစ်သည်။

ကုလသမဂ္ဂသည်ပင် ဖြစ်ရပ် တခုချင်းစီ ကို ပြစ်တင် ရှုတ်ချနေသော်လည်း ၎င်းတို့၏ လက်အောက်ခံ အဖွဲ့အစည်းများဖြစ်သော OCHA, FAO, UNICEF, နှင့် IOM တို့က သဘောတူညီချက် နားလည်မှု စာချွန်လွှာများ လက်မှတ်ရေးထိုးကြပြီး ခန့်အပ်လွှာများပင် လူထု အပေါ် အကြမ်းဖက် နေသည့် စစ်ကောင်စီသို့ ပေးအပ်ခဲ့ကြပြီး ဖြစ်သည်။

UNICEF ဆိုက စစ်ကောင်စီနှင့် ဒေါ်လာ သုံးသန် တန် သဘောတူ စာချုပ်ကို လက်မှတ်ရေးထိုးခဲ့သည် ဟု သတင်းပေါက်ကြားလာမှုကို ASIA TIMES တွင် ရေးသားထားသည်။ ၎င်းတို့ပေးသည့် ငွေများကို အာဏာသိမ်း အဖွဲ့က တာဝန်သိသိဖြင့် လူထု အကျိုးအတွက် သုံးစွဲပါမည်ဟု တစက်ကလေးမျှပင် ယုံကြည်ရလောက်သည့် အထောက်အထားများ မရှိပဲနှင့် ပေးအပ်ခဲ့ကြခြင်း ဖြစ်သည်ဟု ဆိုသည်။

စစ်ဘေးရှောင်များအား အန္တရာယ်များကြားမှ ထိထိရောက်ရောက် အကူအညီ ပေးနေသည့် လူမှု ဝန်ထမ်း အဖွဲ့အစည်းများထံသို့ တပြားတချပ်ပင် ရောက်မလာခဲ့ပေ။ ထို့အတွက် အရပ်ဖက် အဖွဲ့အစည်း ပေါင်း ၄၄၀ မှ စုပေါင်းလက်မှတ်ရေးထိုးပြီး ကုလ အထွေထွေ ညီလာခံသို့ စာ ပေးပို့လာခဲ့ကြခြင်းလည်း ဖြစ်သည်။

ကုလသမဂ္ဂသည်လည်း ပြဿနာ ရှိနေသည်။ အမေရိကန်သည် လုံခြုံရေး‌ ကောင်စီ တွင် အစ္စရေး နှင့် ပတ်သက်သော အဆိုမှန်သမျှကို ဒိုင်ခံပယ်ချပေးခဲ့သည်မှာ ကာလကြာမြင့်နေ၍ တရုတ်ဖက်ကလည်း အမေရိကန် ၏ အဆို မှန်သမျှ ပယ်ချပစ်နေသည်မှာလည်း အဆန်းတော့မဟုတ်ပေ၊ မြန်မာနှင့် ပတ်သက်လျှင် ဗြိတိန်က ဦးဆောင် တင်သွင်းပေးနေရသည့် အနေအထားတွင် ရှိသည်။

တော်လှန်ရေး အဖွဲ့များကမူ လူထု စိတ်အားတက်ကြွလာစေနိုင်သည့် spectacular success အံ့မခန်း အောင်မြင်မှု များ အနည်းငယ်မျှသာ ဖေါ်ဆောင်နိုင်သေးသော်လည်း စိတ်ဓါတ် ခွန်အားဖက်တွင်မူ ယခုထိ လုံးဝ ယိမ်းယိုင်သွား ခဲ့ကြခြင်း မရှိပေ။

ပြည်သူများဖက်ကလည်း ပေါ့ပေါ့ဆဆ နှင့် စိတ်အလို မလိုက်ကြပဲ အာဏာသိမ်း အဖွဲ သဘောကျစေမည့် လုပ်ရပ်မျိုးကို ရှောင်ကျဉ်သင့် လှပေသည်။ ထိုလုပ်ရပ်မျိုးသည် လူငယ် ဂျင်ဇီးများကို စိတ်ဓါတ်ကျဆင်းသွားစေနိုင်သည်။

မကူညီ နိုင်လျှင်ပင် ထိုသို့ အဖြစ်မရောက်အောင် ဆင်ခြင်သင့်ပေသည်။

စစ်အာဏာသိမ်း အဖွဲ့သည် စစ်ရေး တွင်သာမက တိုင်းပြည်စီးပွားရေးကို မည်သို့မျှ ဦးမော့အောင် လုပ်နိုင်စွမ်း မရှိတော့ပေ။ ကူးသန်းရောင်းဝယ်ရေး ဝန်ကြီး ဟု ခန့်အပ်ထားသူ ထွန်းအုန်းမှ နိုင်ငံ၏ ကုန်သွယ်ရေး လိုငွေပြမှု သည် ယခင်နှစ်များ အတွင်း ဒေါ်လာ ၆၆ သန်းသာ ရှိခဲ့ရာမှ ယခု အခါ ၆ လ အတွင်း ဒေါ်လာ တစ်ဘီလီယံ အထိ ရောက်ရှိလာပြီဟု ပြောလာခဲ့သည်။ အာဏာသိမ်း အဖွဲ့သည် ၂၀၂၂-၂၃ ဘဏ္ဍာရေး နှစ် အတွက် ကုန်သွယ်ရေးတွင် ဒေါ်လာ ၁.၅ ဘီလီယံ ပိုငွေပြရန် ရည်မှန်းထားသည့် ကြားမှ ယခုလို ဖြစ်လာရခြင်းကပင် မည်သို့မျှ စွမ်းဆောင်နိုင်ခြင်း မရှိတော့သည်ကို ပြဆိုနေခြင်းပင် ဖြစ်သည်။

ထိုသို့ ဖြစ်ရခြင်းမှာ ဆန်၊ စားကွဲ၊ ပဲ၊ နှမ်း၊ ရော်ဘာ နှင့် အထည်အလိပ်များ ပြည်ပမှ အဝယ်မလိုက်တော့သည့် အပြင် ရှုတ်‌ ထွေးလာသော ငွေလွှဲနှုန်း နှင့် မှောင်ခို‌ ဈေးကွက်များကြောင်ဟု အပြစ်ပုံချလာခဲ့သည်။

စစ်တပ်သည် ၎င်းတို့ နှစ်ပေါင်း ၆၀ ကျော် အပတ်တကုတ် နှင့် အခိုင်အမာ တည်ဆောက်ပြီး လူထု အား ထားရာနေစေရာသွား ဘဝ မျိုး ဖြင့် စေစား လာခဲ့ရာမှ အခု အခါ ကျားကုတ်ကျားခဲ ဘက်ပေါင်းစုံမှ ခုခံနေရသည့် အဖြစ်ရောက်ရှိနေပေပြီ။ ဒီတကြိမ်မှ မိမိတို့ ရုန်းမထွက်နိုင်လျှင် ရှေ့လျောက် မင်းအောင်လှိုင်-ကြူကြူလှ မိသားစု လက်အောက်တွင် ပို၍ ဆိုးသည့် ဘဝမျိုးဖြင့်သာ အသက်ဆက်ကြရပေတော့မည်။

ပြည်သူတို့၏ ခုခံတွန်းလှန်စစ် မုချအောင်ရမည်!!!