ဂျကာတာ သို့ ရောက်ရှိလာသော တရုတ် နိုင်ငံခြားရေး ဝန်ကြီး ချင်ဂန်း မှ တရုတ်သည် မြန်မာနှင့် ပတ်သကိ၍ အင်ဒိုနီရှား ဆောင်ရွက်ရန် ရှိနေသည့် ငြိမ်းချမ်း‌ရေး လုပ်ငန်းစဉ်များ အား အပြည့်အဝ ထောက်ခံသွားမည်ဟု ပြောကြောင်း ရိုက်တာ သတင်း တွင် ပါရှိလာခဲ့သည်။

အင်ဒိုနီရှား နိုင်ငံခြားရေး ဝန်ကြီး ရက်နို မာဆူဒီ မှ အာဆီယံ ၏ အချက် ငါးချက် ကို ယခုထိ မြန်မာ စစ်ဗိုလ်ချုပ်များ၏ ငြင်းဆန်နေမှု အပေါ် တရုတ် နိုင်ငံခြားရေး ဝန်ကြီး နှင့် ဆွေးနွေးခဲ့သည်ဟု ဆိုသည်။

ဆွေးနွေးပွဲများ ဖြစ်ပေါ်လာရေး အလားအလာ များ ထွက်ပေါ်လာစေရန် တခုတည်းသော ရည်ရွယ်ချက်ဖြင့် အင်ဒိုနီရှား မှ အာဆီယံ ဥက္ကဌ အဖြစ် တာာဝန်ယူ ဆောင်ရွက်မည့် ပဋိပက္ခတွင် ပါဝင် ပတ်သက်နေသူ အားလုံး နှင့် ဆွေးနွေးသွားမည့် လုပ်ငန်းစဉ်များ ကို ယခုလို ထောက်ခံမှု ပေးလာမှု အပေါ် တန်ဖိုးထား ကျေးဇူးတင်ကြောင်း မစ္စက် မာဆူဒီ မှ ပြောခဲ့သည်ဟု သတင်းတွင် ပါရှိသည်။

ဆိုလိုသည်က အာဆီယံ မှ အမျိုးသား ညီညွတ်ရေး အစိုးရ နှင့် တွေ့ဆုံရန် ရှိနေသည်များကို တရုတ်ဖက်မှ ထောက်ခံကြောင်း မီးစိမ်းပြလိုက်ခြင်းလည်း ဖြစ်ပေသည်။ ယခင် ၎င်းတို့၏ လူ ဟွန်ဆန် ကိုပင် ထိုသို့ အခွင့်အရေးမျိုး ပေးခဲ့ခြင်း မရှိပေ။

ချင်ဂန်း သည် တောင်တရုတ် ပင်လယ် နှင့် ထိစပ်နေသည့် နိုင်ငံများ အကြား လိုက်နာဆောင်ရွက်ရမည့် ကျင့်ထုံး code of conduct အတွက် ပြုလုပ်မည့် ဆွေးနွေးပွဲ မတိုင်ခင် စနည်းနာရန် ဂျကာတာ သို့ ရောက်ရှိလာခဲ့ခြင်း ဖြစ်သည်။

တရုတ်သည် အကယ်၍များ မြန်မာ နိုင်ငံတွင် အာဏာသိမ်း အဖွဲ့ ပြုတ်ကျသွားခဲ့လျှင် ပေါ်ပေါက်လာမည့် ပြည်သူ့ အစိုးရထံ လက်တဖက် ကမ်းလာခဲ့ခြင်းလည်း ဖြစ်သည်။ ၎င်းတို့ အဖို့ မြန်မာနိုင်ငံတွင်း အခြေအနေများ အပေါ် လွန်စွာ စိုးရိမ်မကင်း ဖြစ်လျက် ရှိနေသည်၊ တတိုင်းပြည်လုံး လက်နက်ကိုင် ၍ ဖြစ်စေ အသံတိတ် ဖြစ်စေ ဆန့်ကျင်တွန်းလှန်နေမှုများကို အတင်းကာရော လက်နက် အားကိုး ဖြင့် နှိမ်နှင်းနေရသည့် အဖြစ်ကို ကြည့်၍ အာဏာသိမ်း အဖွဲ့ သည် ရှေ့လျောက် တိုင်းပြည်ကို မည်သို့မျှ ဆက်၍ တည်ငြိမ်အောင် အုပ်ချုပ်သွားနိုင်စွမ်း မရှိ တော့သည့် အဖြစ် လည်း ရိပ်စားမိလာနေကြပြီ ဖြစ်သည်။

သူတို့၏ စိတ်ထဲတွင်လည်း ထိုသို့ နှိမ်နှင်း နိုင်ခဲ့သည် ဆိုစေဦး What’s next? ဟူသော မေးခွန်းများ ထွက်ပေါ်လာနေမည်မှာ မလွဲဧကန်ပင် ဖြစ်သည်။ မင်းအောင်လှိုင် အဖို့က What’s next? ဆိုသည်နှင့် ပတ်သက်၍ အဖြေမရှိ၊ ဤသည်ကို ဆက်၍ မျက်စိမှိတ် ထောက်ခံမှု ပေးသွားမည် ဆိုက အမေရိကန် ရင်ခွင်ထဲ တွန်းပို့ပေးသလို အဖြစ် ရောက်သွားမည်ဟု တွက်ဆလာကြပုံရှိသည်။

ထို့အတွက် အနည်းဆုံး ၎င်းတို့ နှင့် ပလဲနံပ သင့်နိုင်မည့် စစ်ခေါင်းဆောင် များ ပါဝင်မည့် အာဏာခွဲဝေရေး ပုံစံမျိုး ဖြစ်စေချင်လာသည်။

အလားတူပင် အာဆီယံသည် စစ်တပ်နှင့် အာဏာ ခွဲဝေယူသည့် ပုံစံမျိုး သာ ဖန်တီးပေးလိုစိတ် ရှိနေသည်။ အားလုံးက လက်နှစ်ဖက် စလုံး မဟုတ်သည့်တိုင် လက်တဖက် တော့ ကမ်းလာနေပြီ ဖြစ်သည်။

စစ်အာဏာသိမ်း အဖွဲ့ကတော့ ပြည်တွင်း တွင် မည်သည့် လက်မျှ ကမ်းလို့မရအောင် ဖမ်းလို့ မရအောင် နေသည့် လူများကို ဆုများ လိုချင်သည် ဖြစ်စေ၊ မလိုချင်သည် ဖြစ်စေ ပေးကာ၊ အတင်းပင် သူ့တို့ ဘက်သား အဖြစ် ပြောင်းလဲပေးနေပြီ ဖြစ်သည်။

သမ္မတကြီး ဦးထင်ကျော်ကိုပင် ဖခင် ဆရာကြီး မင်းသုဝဏ် အတွက် ပေးသည့်ဆုကို အတင်းပင် အိမ်တိုင်ယာရောက် သွားပေးခဲ့သည်။ ပုံထဲတွင် ဦးထင်ကျော်သည် ကျန်းမာရေး ကောင်းမွန်လျက် ရှိပြီး ဆု တက်မယူနိုင်လောက်သည့် အနေအထား မျိုး လည်း မတွေ့ရပေ။ တီခွန်မြတ်မှ လွဲ၍ အဖမ်းမခံရပဲ အပြင်တွင် ကျန်နေသည့် အခြားသော အမျိုးသား ဒီမိုကရေစီ အဖွဲ့ချုပ် အစိုးရ ဝန်ကြီးများ တဦးတလေမျှ ဆုတက်‌ရောက် လက်ခံရယူခဲ့ခြင်း မရှိဟု သတင်းများက ဆိုသည်။

ရန်ကုန်တိုင်း ဝန်ကြီးချုပ် ဖြိုးမင်းသိန်း အား လည်း မြန်မာငွေ ကျပ်တသိန်း (ဒေါ်လာ ၄၀) ဖြင့် ၎င်း၏ နိုင်ငံရေး အသုဘကို ဖုတ်ကြည်း မီးသင်္ဂြိုလ် ပေးလိုက်ပြီ ဖြစ်သည်။

ပြည်သူတို့၏ ခုခံတွန်းလှန်စစ် မုချအောင်ရမည်!!!