စစ်အာဏာသိမ်း အဖွဲ့သည် အာဏာကို မက်မောနေသည့် စိတ်တခုတည်း ဖြင့် တိုင်းပြည်အား လက်နက်အားကိုး ဖြင့် သိမ်းပိုက်၍ အကြမ်းဖက်မှု များ တိုး၍ ကျုးလွန်လာနေပြီ ဖြစ်သည်။ ပြည်သူများ ဘိုးစင်ဘောင်ဆက် နေထိုင်ခဲ့ကြသည့် အိုးအိမ်ပေါင်း ၅၅,၄၈၄ လုံး ကို မီးတင်ရှို့ ဖျက်ဆီးခဲ့ကြပြီး ဖြစ်သည်ဟု ယနေ့ ထွက်ရှိလာသော Data for Myanmar သုတေသန အသင်းကြီး၏ အစီရင်ခံစာတွင် ပါရှိခဲ့သည်ဟု ဧရာဝတီ သတင်းတွင် ဖေါ်ပြထားသည်။

ထို့အတွက် စစ်အာဏာသိမ်း အဖွဲ့ အဖို့ မည်သို့မျှ လှုပ်၍ မရတော့သည့် ကြိုးနှစ်ချောင်း၏ တင်းကျပ်စွာ ချည်နှောင်ခြင်း ခံနေရပြီ ဖြစ်သည်။

ပထမ ကြိုးကြီးသည်က ပြည်သူတရပ်လုံးက လောဘ မောဟ ဒေါသ အညစ်အကြေးများ ဖြင့် နည်းမျိုးစုံ ကောက်ကျစ်စွာ ပြုမူနေကြသူ များ ဟု သဘောပေါက်လာကြကာ ၎င်းတို့အား တော်လှန်မှ ဖြစ်မည်ဟု တညီတညွတ်တည်း ခံယူလာခြင်း ဖြစ်ပြီး ထိုသို့ တွန်းလှန်နေသည့် တော်လှန်ရေး အင်အားစုများကို နည်းမျိုးစုံဖြင့် ထောက်ခံလာကြခြင်းပင် ဖြစ်သည်။

ဒုတိယ ကြိုးကြီးသည်က တနေ့ထက် တနေ့ နည်းပညာ များ လျှင်မြန်စွာ တိုးတက်လာနေသော ဂလိုဘယ်လိုက်ဇေးရှင်း ခေတ်ကြီး တွင် မည်သို့မျှ မဝင်ဆန့် နိုင်တော့မည့် လူစကား နားမလည် သော အရိုင်းအစိုင်း များ အဖြစ် ရှုမြင်လာကြပြီး တိုင်းပြည်ကို ဆက်၍ အုပ်ချုပ်နေမည့် အရေး ကို လက်မခံ နိုင်ကြတော့ခြင်းပင် ဖြစ်သည်။

၎င်းတို့ အတွက်က What’s next ဆိုသည်ကလည်း မရှိတော့၊ အကြံအောင်လျှင် အဆင်ပြေလောက်ပြီ ဟု သဘောထားကာ လာမည့်ဘေး ပြေးတွေ့ သဘောမျိုး လုပ်နေကြခြင်းသာ ဖြစ်သည်။ မင်းအောင်လှိုင်သည် ဒီထက် တိုး၍ အကြမ်းဖက်ရန် ဝန်မလေးသူ ဖြစ်သော်လည်း ထိုသို့ လုပ်မည်ဆိုက သူ လွန်စွာ မှ ထိတ်လန့် တုန်လှုပ်နေသည့် R2P, No Fly Zone တို့ ဖြစ်လာအောင် ဆွပေးလိုက်သလို ဖြစ်မည့် အရေးကြောင့်သာ ချုပ်တည်းနေရခြင်း ဖြစ်သည်၊ သို့သော် မည်သို့မျှ တောင့်မထားနိုင်တော့ဟု ယူဆလျှင်တော့ ကြိမ်းသေ လုပ်မည့်သူလည်း ဖြစ်သည်၊ ထိုအခါ တွင်တော့ သူ၏ ကျဆုံးခန်း စတင်လာပေတော့မည်သာ ဖြစ်သည်။

စစ်ခေါင်းဆောင်များသည် ၎င်းတို့ကိုယ်နှိုက်က မထင်မရှား မိသားစု များမှ ဆင်းသက်လာခဲ့ကြသူ များ ဖြစ်သော်လည်း တိုင်းပြည် အာဏာကို ဆုပ်ကိုင်လာချိန်တွင်တော့ မင်းမျိုး မင်းနွယ် ရှေးမြန်မာ ဘုရင်များ ဝင်စားသူများ ဖြစ်သည်၊ မဟာဆီ မဟာသွေး အနွယ်ဝင်များ ဖြစ်သည်ဟု အထင် ရောက်ကုန်ကြသည်။

၎င်းတို့ ကျန်စစ်သား ဟု အရူးပမာ အော်ဟစ်ခဲ့သူများ ရှိသလို၊ ဗုဒ္ဓရုပ်ပွားတော်ကိုပင် ၎င်းတို့၏ မျက်နှာ နှင့် တူညီလုနီးပါး ဖြစ်အောင် ထုလုပ်ရဲသူများ ဖြစ်လာသည်၊ မြို့တော်ကိုပင် နေပြည်တော် ဟု အမည်ပေးကာ ရှေးမြန်မာ မင်း တို့၏ ဗိသုကာ လက်ရာများ အတိုင်း တည်ဆောက်ခဲ့ကြသည်။ ဘုရားတည် သည့် အလုပ်ကိုလည်း မြန်မာမင်းတို့၏ ရိုးရာ အတိုင်း မလုပ်မဖြစ် လုပ်ရမည် ဟု ယူဆခဲ့ကြသည်။

ထိုသို့ ယူဆနေကြခြင်း သည် တကယ်တမ်း မှန်ကန်နေသည်ကို ၂၀၀၈ ခုနှစ် နာဂစ် မုန်တိုင်းကြီး အတွင်းကပင် တအံ့တဩ သိရှိလာခဲ့ကြသည်ဟု ဒင်းနစ် စမစ် ၏ Civilized Rebels စာအုပ်တွင် ယခုလို ဖေါ်ပြခဲ့သည်။

ထိုမတိုင်မီက ဖြစ်ပွားခဲ့သော သံဃာတော်များ ဦးဆောင်ခဲ့သည့် ရွှေဝါရောင် တော်လှန်ရေး ကြီး ကို အင်အားသုံး၍ ရက်စက်စွာ ဖြိုခွင်းခဲ့မှု များကို တကမ္ဘာလုံး ထိတ်လန့် တုန်လှုပ်သွားခဲ့ကြသော်လည်း စစ်တပ် အဖို့ က ဒါမျိုးပဲ လုပ်တတ်သည့် အသိညဏ် သာ ရှိသူများ အဖြစ် အတိုင်းအတာ တခု အထိ လက်ခံ ခဲ့ကြသည်။

သို့သော် သူတို့ လုံးဝ တအံ့တဩ ဖြစ်သွားခဲ့ရသည်က လူပေါင်း ၁၈၀,၀၀၀ အထိ သေဆုံးသွားခဲ့ရသည့် နာဂစ် မုန်တိုင်းကြီး တိုက်ခိုက်ခံခဲ့ရစဉ်တွင် နိုင်ငံတကာ မှ အကူအညီများ ပေးနိုင်ရန် အဆင်သင့် စောင့်ဆိုင်းနေခဲ့ကြသော်လည်း ၎င်းတို့ကိုယ်တိုင်ကလည်း ထိထိရောက်ရောက် မလုပ်နိုင်သည့် အပြင် ထိုသို့ အကူ အညီ ပေးလာမှု များကို သုံးပတ် ကြာသည့် အထိ ပိတ်ဆို့ထားခဲ့မှု ပင် ဖြစ်သည်။

ဤသည်ကလည်း တိုင်းပြည်ကို အလုံးစုံ ထိန်းချုပ်ထားနိုင်မှု ကို တပြားသားမျှပင် အပွန်းအပဲ့ မခံ နိုင်ပဲ အကူအညီ ပေးလာသူများကို တိုင်းပြည်ကို ကျုးကျော်ပြီး ၎င်းတို့ အား ဖြုတ်ချ ရန် ရမယ် ရှာနေသည်ဟု သံသယ ပွားနေကြ၍ သာ ဖြစ်မည်ဟု မှန်းဆခဲ့ကြသည်။

သို့သော်၂၀၀၈ ဖွဲ့စည်းပုံ အတွက် လူထု ဆန္ဒခံယူပွဲကိုမူ မုန်တိုင်းဝင်ရောက်ပြီး ရှစ်ရက် အကြာတွင် ပြုလုပ်ခဲ့ကြသည်။

မုန်တိုင်းသင့်ခံ လူထု ကို မူ ကာလကြာမြင့်စွာ ပေယျာလကန် ပြုထားရန် ဝန်မလေးသည့် ထိုပုဂ္ဂိုလ်များ၏ အပြုအမူ အပေါ် ပြင်ပမှ စိုးရိမ်ထိတ်လန့် စိတ်များ နှင့် နားမလည်နိုင် မှင်သက်မိနေကြသည်။

လူသား တို့ အပေါ် ကျရောက်နေသည့် ကြမ္မာဆိုး အပေါ် မည်သို့မျှ ပင် သဘောမထားပဲ ရွံရှာဖွယ်ကောင်းသည့် အလုပ်မျိုး ကို ကျုးလွန်နေကြသူ များ သည် မည်ကဲ့သို့သော အစိုးရမျိုးပေနည်းဟု မေးခွန်းထုတ်လာခဲ့ကြသည်။

မြန်မာ အရေး ကို နှစ်ပေါင်းများစွာ တစိုက်မတ်မတ် သတင်းယူခဲ့ပြီး မြန်မာ စကားကိုလည်း ကျွမ်းကျင်စွာ ပြောတတ်သည့် အမေရိကန် သတင်းစာဆရာ အမျိုးသမီး အီမား လာကင် အဖို့ ထိုသို့ ဥပက္ခာ ပြုနိုင်ကြသည့် စိတ်ဓါတ် ကို မည်သို့မျှ နားမလည် နိုင် ဖြစ်ခဲ့ရသည်။

ထို့အတွက် နီးစပ်ရာ လိုက်လံ မေးမြန်းခဲ့ရာ မြန်မာ သတင်းစာ ဆရာ တဦး၏ အဖြေ သည် သူမ အဖို့ နားမလည် နိုင် ဖြစ်ခဲ့ရမှု များ အတွက် လယ်ပြင်တွင် ဆင်သွားသလို ရှင်းလင်းသွားခဲ့ရသည်။

ထိုသတင်းစာ ဆရာက စစ်အစိုးရ၏ တုန့်ပြန်မှု များသည် ရှေးမြန်မာ မင်းအဆက်ဆက်က ကြွင်းကျန်ရစ်ခဲ့သည့် လွန်စွာ ရှေးကျ သည့် အတွေးအခေါ်များမှ ဆင်းသက်လာခြင်း ဖြစ်သည်ဟု ၎င်းက ပြောပြခဲ့သည်။

"ဆိုလိုတာကတော့ ကျွန်တော်တို့ ဗိုလ်ချုပ်မှုးကြီးက မင်းတရားကြီးပေါ့၊ တိုင်းသူပြည်သားတွေက သူရဲ့ ကျေးတော်မျိုး၊ ကျွန်တော်မျိုး ‌တွေ ပေါ့ဗျာ၊ ဒီလို လူတွေ သေကြေ ဒုက္ခ‌ တွေ ရောက်တာ သူ့အနေနဲ့ အရေးတယူ လုပ်နေစရာ မလိုဖူး ဆိုတဲ့ သဘောပဲ" ထိုအကြောင်းရင်းများကို အီမာ လာကင် မှ သူမ၏ စာအုပ် ဖြစ်သော “No Bad News for the King: The True Story of Cyclone Nargis and Its Aftermath in Burma တွင် အသေးစိတ် ဖေါ်ပြထားခဲ့သည်။

ထိုသို့သော မြန်မာ စစ်ဗိုလ်ချုပ်များ နှင့် အဆက်အနွယ်များ၏ လုပ်ရပ်သည် နောက်ပိုင်းတွင် မည်သို့ပင် ပျားရည်နှင့် ဝမ်းချ ဟန်ဆောင်ခဲ့ကြစေကာမူ သမိုင်းတွင် ဖျက်မရတော့သည့် အမည်းစက်ကြီး ထင်ကျန်ရစ်ခဲ့ပြီ ဖြစ်သည်။

ယခုလည်း ထိုသို့ အတွေးအခေါ် နှင့် စိတ်ဓါတ်ရှိသူ များ သည် တိုင်းပြည်ကို သွန်လိုသွန် မှောက်လိုမှောက် လုပ်ခွင့် ရနေပြီ ဖြစ်၍ အီမား လာကင် မှ သူမ ၏ နောက်ထပ် စာအုပ် ဖြစ်သော “Everything is Broken” တွင် ခန့်မှန်းထားခဲ့သလို ကွက်တိ ဖြစ်ပေါ်လာခဲ့ရပြီ ဖြစ်သည်။

ပြည်သူတို့၏ ခုခံ တွန်းလှန်စစ် မုချ အောင်ရမည်!!!