ပြည်သူ တို့၏ ခုခံ တွန်းလှန်စစ် သည် အရှိန်မြှင့်လာနေသည် နှင့် အမျှ အမေရိကန် ကလည်း ဗြောင်ကျကျ ကူညီလာနေပြီ ဖြစ်သည်။

အမျိုးသား ညီညွတ်ရေး အစိုးရ ၏ ကိုယ်စားလှယ်ရုံး နှင့် နိုင်ငံခြားရေး ဝန်ကြီးဌာန ကိုပင် မြို့တော် ဝါရှင်တန် တွင် ဖွင့်လှစ်ခွင့် ပေးခဲ့ပြီ ဖြစ်သည်၊ ယင်းသည် အသိအမှတ် ပြုသည်ဟု မပြောယုံတမယ် လုပ်ရပ်လည်း ဖြစ်သည်။

မနေ့က ဧရာဝတီ နှင့် အင်တာဗျုး တွင်လည်း ဒဲရက် ရှိုလက်မှ NUG ၏ လုပ်ရပ်များကို အားရ ကျေနပ်မှု ရှိကြောင်း နှင့် မြန်မာ တို့၏ တော်လှန်ရေးသည် မကြာမီ အဆုံးသတ်ဖွယ် ရှိသည်ကိုပင် အရိပ်အမြွက် ပြောဆိုသွားခဲ့ပြီ ဖြစ်သည်။

သို့သော် မင်းအောင်လှိုင်၏ အာဏာသိမ်း အဖွဲ့သည် အမေရိကန်၏ ထိုသို့ ပြုမူလာမှုများကို မည်သို့ တုန့်ပြန်ရမှန်း မသိအောင် အကြံအိုက်နေသည်၊ ပုံမှန် အတိုင်း သတ္တိရှိရှိ တုန့်ပြန်မည် ဆိုက ကန့်ကွက်သည့် အနေဖြင့် အနည်းဆုံး အမေရိကန် သံတမန် အချို့ကို တိုင်းပြည်က နှင်ထုတ်ရမည် ဖြစ်သည်။ ထိုသို့ လုပ်မည် ဆိုကလည်း အမေရိကန်မှ ကြိမ်းသေ ပြန်လည် နှင်ထုတ်မည်သာ ဖြစ်သည်။

လက်ရှိ တွင် မင်းအောင်လှိုင်သည် ကန့်ကွက်စာ သာ ထုတ်တတ်သော ဝဏ္ဏမောင်လွင်အား ဆွေမျိုး ဖြစ်နေ၍ အပေါ်သို့ ကန်တင်ကာ သန်းဆွေ နှင့် အစားထိုးလိုက်ပြီ ဖြစ်သည်၊ သန်းဆွေသည် ယခင် သိန်းစိန် အစိုးရ လက်ထက်တွင် အမေရိကန် သံအမတ်ကြီး အဖြစ် ထမ်းဆောင်ခဲ့သူ ဖြစ်နေသည်ကို ကြည့်၍ အမေရိကန် အစိုးရ အသိုက်အဝန်းကို ပြန်လည် ထိုးဖောက် စည်းရုံးရန် ကြံစည်လာနေခြင်း ဖြစ်နိုင်သည်ဟု သုံးသပ်မှုများ ထွက်ပေါ်လာနေသည်။

စစ်အာဏာသိမ်း အဖွဲ့က အမေရိကန် ၏ လုပ်ရပ်များသည် အမှန်တကယ် ကိုယ်ထိ လက်ရောက် ကူညီ ပေးဖို့ မရှိပဲ သူတို့အား ကြောက်လန့်လာအောင် တဆင့်တိုး ခြိမ်းချောက်ယုံ သက်သက်ဟု ယူဆကောင်း ယူဆနေမည်လည်း ဖြစ်သည်။ သို့သော် ထိုသို့လည်း သေချာပေါက် ယူဆမထားရဲပဲ ဖြစ်နေသည်။

အမျိုးသား ညီညွတ်‌ရေး အစိုးရ အနေနှင့်လည်း ထိုသို့ တွက်ချက်ထားကောင်း ထားမည် ဖြစ်သည်။

မင်းအောင်လှိုင်သည် ရုရှားကိုသာ အားကိုးနေရသော်လည်း ပူတင် အခြေအနေကို နှာစေး ချောင်းဆိုး ဖြစ်နေသလား ဆိုသည်က အစ တဖက်က မျက်ခြေမပြတ် အကဲခတ်နေမည်သာ ဖြစ်သည်။ ယခု ပူတင်သည် may disappear at any moment ဆိုသော သတင်းများ ထွက်ပေါ်နေသည်ကလည်း သူ့အတွက် ရင်မအေးစရာ ဖြစ်နေသည်။ ပူတင် မရှိတော့သည်နှင့် သူ့အတွက် ကား ပြေးပေါက်ပင် ရှိတော့မည် မဟုတ် ဆိုသည်ကိုလည်း ကောင်းစွာ သဘောပေါက်နေသည်။

သူသည် ဆန့်ကျင်တွန်းလှန်နေမှုများကို ငြင်သာစွာ ကိုင်တွယ်နေပါသည်ဟု အသံထွက်လာသည်၊ ဆိုလိုသည်က အကြမ်းဖက်မှုများ လျော့ချပေးသွားမည်ဟု ဆိုလိုဟန် ရှိနေသည်။

ပြည်တွင်း တွင်လည်း ဟန်ကိုဖို့ ဆိုကာ မင်္ဂလာဆောင်က အစ အခမ်းအနား ပေါင်းစုံ လိုက် တက်နေသည် ကို တွေ့လာရသည်။ ဤသည်ကပင် တိုင်းပြည် ဖရိုဖရဲ ဖြစ်နေသည့် အခုလို အချိန်မျိုးတွင် နိုင်ငံ ခေါင်းဆောင် တယောက် အနေဖြင့် ယားလို့ပင် မကုပ်အားအောင် အလုပ်များနေရမည့်အစား သူ့အဖို့က အချိန်များစွာ ပိုနေသည်၊ တနေ့ တနေ့ ဘယ်သွားရမလဲ စဉ်းစားနေသည့် အကြံတုံး ညဏ်တုံးမှန်း သိသာနေသည်။

ယခုလောက်ဆိုလျှင် ၎င်းအား အထင်တကြီး နှင့် သွားရောက် တိုင်တန်းခဲ့ကြသည့် နိုင်ငံရေး ပါတီများလည်း တိုင်းပြည် ချစ်စိတ် အနည်းငယ်မျှ ရှိနေသည် ဆိုလျှင်ပင် နောင်တ ရနေကြလောက်ပြီ ဖြစ်သည်။

အောက်ခြေ စစ်အရာရှိများသည်လည်း ယူနီဖောင်းကို ကျော့နေအောင် ဝတ်ကာ အိတ်များ ဆွဲပြီး လွှတ်တော်ထဲ ဝင်၊ ထ ဆို ထ ပေးရသည်ကလွဲ၍ ကျန်သည့် အချိန်တွင် လေအေးစက်လေး အောက်တွင် အိပ်ငိုက်ပြီး ဇိမ်ရှိရှိ နေရမည့် အစား တဘို့ထဲ ကြည့်တတ်သော မင်းအောင်လှိုင်ကြောင့် ရှေ့တန်းတွင် အသက်နှင့် ရင်းကာ ပြေးလွှားလှုပ်ရှားနေကြရပြီ ဆိုသည်ကို တွေးမိက မည်သူ မနာကြည်းပဲ နေအံ့ပေမည်နည်း။ အမျိုးသား ဒီမိုကရေစီ အဖွဲ့ချုပ်သည် စစ်တပ်က ဦးဆောင်ပြုလုပ်ပေးခဲ့သည့် ၁၉၉၀ နှင့် ၂၀၁၅ ရွေးကောက်ပွဲများ တွင်လည်း အပြတ်အသတ် အနိုင်ရရှိခဲ့ပြီးသည့် အစဉ်အလာ ရှိပါလျှက် အခု ကျမှ မဲခိုး နိုင်ပါသည်ဟု ပြောနေရသနည်း။ တခါမျှ မနိုင်ဖူး ဆိုကလည်း ရှိစေတော့ အစရှိသဖြင့် အခြေအနေ မဟန်တော့သည် နှင့်အမျှ တွေးမိလာကြပေဦးမည်။

မင်းအောင်လှိုင်သည် ၎င်းတို့ အမျိုးမျိုး အဖုံဖုံ ဖန်တီး ပုံဖျက်နေသည့် ကြားမှ အမျိုးသား ဒီမိုကရေစီ အဖွဲ့ချုပ်သည် သောင်ပြိုကမ်းပြို အနိုင်ရ သွားသည့် အတွက် ၎င်းတို့၏ စာအုပ်အစိမ်းကြီး တဖြေးဖြေး နိဠိ တံ တော့မည်ကို ရိပ်စားလာမိပြီး သူ ရှိနေတုန်း အာဏာသိမ်း မှ ဖြစ်မည်၊ သူ တပ်က ထွက်ရလျှင် မည်သူ လုပ်ရဲသနည်း စိမ်ခေါ်ကာ အားလုံးကို ခြိမ်းချောက်ပြီး သူ့အား ထောက်ခံလာအောင် စည်းရုံးပြီး လုပ်ခဲ့ခြင်းသာ ဖြစ်သည်။ သူ့အပေါ်လည်း အထင်ကြီးထားသည့် စိတ်များ ရှိနေသောကြောင့်လည်း ဖြစ်သည်။ 

ယခုလို နှစ် နှစ် ကြာလာသည့် တိုင် အခြေအနေများက စင်ပေါ် ရောက်နေရမည့် အစား ပို၍ပင် ဆိုးလာနေပြီ ဖြစ်သည်။ တပ်မတော် ဆိုသည့် ဂုဏ်သိက္ခာ သည်လည်း တပြားမှ မကျန်အောင် ပျက်စီးသွားခဲ့ရပြီ ဖြစ်သည်။ ကုလ လုံခြုံရေး ကောင်စီကပင် နှစ် ၇၀ အတွင်း ပထမဆုံး အကြိမ် ရှုတ်ချကြောင်း ဆုံးဖြတ်ချက် ဆိုကာ ထွက်ပေါ်လာခဲ့ပြီ ဖြစ်သည်။

မင်းအောင်လှိုင်သည်သာ သူတယောက်တည်း သမ္မတ အဆောင်အယောင်များ နှင့် လူလုံးပြပြီး တောပြော တောင်ပြော ပြောနေရသည်က လွဲ၍ ကျန်စစ်ဗိုလ်ချုပ်များ၏ ဘဝ သည် ဒုံရင်း ဒုံရင်း ပင် မကတော့ပဲ ယခင် ကထက်ပင် ဆိုးနေပြီ ဖြစ်သည်။ ကျိကျိတက် ချမ်းသာနေသော ငွေကြေး များကလည်း ဘဏ်များထဲ ခိုအောင်းထားရသည်မှ အပ ဘယ်နေရာမှ သုံး၍ မရ၊ ဇနီးသားမယား များသည်လည်း အပြင်သို့ လွတ်လွတ်လပ်လပ် မသွားရဲ မလာရဲ ဖြစ်နေရှာသည်။ ၎င်းတို့ အဖို့လည်း မလိုတမျိုး လိုတမျိုး ဆက်ဆံတတ်သော မင်းအောင်လှိုင် ကြောင့် ဘယ်အချိန် ချောင်ထိုး ခံရမည်လဲ ကို တွေးလန့်နေကြရပြန်သည်။ နိုင်ငံတော် အတိုင်ပင်ခံ လက်ထက် တွင် အရက်လေး တမြမြ နှင့် ရှာဖွေထားသမျှ ကို ဇိမ်နဲ့ သုံးဖြုန်း နေနိုင်မည် ဆိုသည်ကိုလည်း မတွေးမိပဲ နေမိကြမည် မဟုတ်။

သူ၏ အနီးကပ် လက်ထောက် ဖြစ်သူ စိုးဝင်း ၏ အာဏာများကို dilute ဖြစ်အောင်၊ အာနိသင် လျော့နည်းသွားအောင် ပြီးခဲ့သည့် ဖေဖေါ်ဝါရီ ၁ ရက် ပြန်လည် ဖွဲ့စည်းမှု တွင် ၎င်း၏ ရာထူး ကို စိုးထွဋ် တို့ နှင့် တတန်းစားတည်း ဖြစ်အောင် လုပ်ပေးလိုက်ပြီ ဖြစ်သည်။

မင်းအောင်လှိုင်သည် စစ်တပ်အတွင်း ကျီးလန့်စာစား နှင့် ဖြစ်နေအောင် အမြဲလို ကြံဖန် စီစဉ်နေခြင်း လည်း ဖြစ်သည်၊ တယောက်သည် တနေရာတွင် အနေကြာပါက မလိုလားအပ်သော အိုင်ဒီယာများ ဝင်လာမည်ဟုလည်း ယူဆနေသောကြောင့် ဖြစ်သည်။

လက်ရှိတွင် စစ်အာဏာသိမ်းခဲ့မှု ကြောင့် တိုင်းရင်းသား များ အချင်းချင်း ယခင်ကထက်ပင် ကျောခြင်းကပ် ရင်ခြင်းကပ် ဖြစ်လာနေသည်ကို တွေ့မြင်နေရ၍ ၎င်းတို့ မအုပ်ချုပ်လျှင် တိုင်းပြည် ပြိုကွဲသွားမည်ဟု တသက်လုံး ဝါဒ ဖြန့် နေမှု များ ကလည်း လေထဲတွင် ပျောက်ကွယ်သွားခဲ့ပြီ ဖြစ်သည်။

မည်သို့ပင် ဆိုစေ ပြည်သူများကတော့ တရား ဥပဒေ စိုးမိုးရေး နှင့် ညီနောင် တိုင်းရင်းသား များ နှင့် အပြန်အလှန် လေးစားမှု ရှိ‌မည့် ဖက်ဒရယ် ဒီမိုကရေစီ ကို မဖြစ်ဖြစ်အောင် အကောင်အထည် ဖေါ်လာကြတော့မည်သာ ဖြစ်သည်။

ပြည်သူတို့၏ ခုခံ တွန်းလှန်စစ် မုချ အောင်ရမည်!!!