ပြီးခဲ့သည့် ဇန်နဝါရီ ၃ ရက် နေ့ တွင် အမျိုးသား ညီညွတ်ရေး အစိုးရ ဆက်သွယ်ရေး၊ သတင်းအချက်အလက်နဲ့ နည်းပညာဝန်ကြီးဌာန ပြည်ထောင်စုဝန်ကြီး ဦးထင်လင်းအောင် ဦးဆောင်သည့် ကိုယ်စားလှယ် အဖွဲ့ နှင့် အမေရိကန် အရှေ့အာရှ နှင့် ပစိဖိတ် ရေးရာ လက်ထောက် နိုင်ငံခြားရေး ဝန်ကြီး ဒန်နီယယ် ကရိုက်တင်ဘရင့် နှင့် သူ၏ လက်ထောက် ဖြစ်သူ မစ္စက် မယ်လီစာ ဘရောင်း တို့ ဝါရှင်တန် ရှိ NUG ရုံးတွင် ဆွေးနွေးခဲ့ကြသည်ဟု သိရသည်။

အဓိက အားဖြင့် စစ်အာဏာသိမ်း အဖွဲ့အား ဖယ်ရှားရန် အချက် (၃) ချက် ကို ဆွေးနွေးခဲ့ကြကြောင်း နှင့် ထိုအချက်ထဲတွင် နည်းပညာ အသုံးပြုရေး ပါဝင်ပြီး အခြား အချက် နှစ်ချက် ကိုတော့ အချိန်တန်လျှင် အသိပေးသွားမည်ဟု ဝန်ကြီး ဦးထင်လင်းအောင်က ပြောပြခဲ့သည်၊ ဆက်လက်ပြီးလည်း ဆွေးနွေးသွားဖို့ ရှိသည်ဟု ၎င်းက ဆိုသည်။

ကရိုက်တင်ဘရင့်က မြန်မာပြည်ရှိ ဒီမိုကရေစီ လှုပ်ရှားမှု အား ထောက်ခံသွားရန် နှင့် အားလုံးပါဝင်နိုင်မည့် ဒီမိုကရေစီ စနစ် ဖေါ်ဆောင်နိုင်ရန် အကျိုးရှိစွာ ဆွေးနွေးခဲ့ကြသည်ဟုလည်း သူ၏ တွစ်တာ စာမျက်နှာ တွင် ရေးသားထားခဲ့သည်။

ဤသည်ကပင် Burma Act အပိုဒ် နှင့် ပတ်သက်ပြီး အမေရိကန်တို့ဖက်မှ အသေးစိတ် စတင် ပြင်ဆင်လာပြီ ဖြစ်ကြောင်း ဖေါ်ညွှန်းနေခြင်းလည်း ဖြစ်သည်။

လက်ရှိတွင် အမေရိကန် ရေနံ ကုမ္ပဏီ ကြီး ဖြစ်သော ချေဗရွန်သည် ရတနာ သဘာဝ ဓါတ်ငွေ့တွင်းမှ တူးဖေါ် လုပ်ကိုင် နေသည့် ပိုင်ဆိုင်မှု ၄၁.၁ ရာနှုန်း အား ရောင်းချပြီး ထွက်ခွာသွားပြီ ဖြစ်သည်ဟု ကျေညာခဲ့သော်လည်း ထိုကုမ္ပဏီ ကြီးသည် စစ်အာဏာသိမ်း အဖွဲ့ထံ ငွေများ ဆက်လက် စီးဝင်နိုင်ခြင်း ကို အာမခံ နိုင်မည့် လက်လွှဲရောင်းချမှု မျိုးကိုသာ ပြုလုပ်သွားခြင်း ဖြစ်သည်ဟု Justice for Myanmar က ထုတ်ဖေါ်ပြောဆိုလိုက်သည်။

ချေဗရွန်သည် တကယ်တမ်းတွင် တိုတယ် ရေနံ ကုမ္ပဏီ မှ ၂၀၂၂ အတွင်း ထွက်ခွာခဲ့ခြင်းကြောင့် တိုး၍ ပိုင်ဆိုင်လာသည့် အစုရှယ်ယာများ ကို ကနေဒါ ရှိ MTI Energy သို့ ရောင်းချသွားခြင်းသာ ဖြစ်သည်။

တဖက်တွင်လည်း တော်လှန်ရေး ကို ပြည်တွင်းအား ဖြင့် ဆင်နွှဲသွားနိုင်ရန် မျက်ခြေမပြတ် လုံးပမ်းနေသော အမျိုးသား ညီညွတ်ရေး အစိုးရ၏ ယာယီ သမ္မတ ကြီး ဒူးဝါး လရှီလ မှ ရှမ်းပြည်တိုးတက်ရေး ပါတီ (ရှမ်းမြောက်) နှင့် မွန်ပြည်သစ် ပါတီ တို့မှ ဖက်ဒရယ် ပြည်ထောင်စု တည်ဆောက်ရေး တွင် လက်တွဲလာမည် ဆိုသည်ကို ကြိုဆိုကြောင်း ထုတ်ဖေါ် ပြောဆိုခဲ့သည်။ ၎င်းတို့သည် စစ်အာဏာသိမ်း အဖွဲ့ နှင့် ငြိမ်းချမ်းရေး လက်မှတ် ထိုးထားသော်လည်း စစ်တပ်မှ အတုအယောင် ဆွေးနွေးမှု များသာ ပြုလုပ်ခဲ့ပြီး ၂၀၀၈ ဖွဲ့စည်းပုံ ကို တင်းတင်းကျပ်ကျပ် စွဲကိုင်နေဆဲ ဖြစ်၍ စိတ်ပျက်လာနေကြပြီ ဖြစ်သည်။  

အာဏာသိမ်း တပ် နှင့် ငြိမ်ူချမ်းရေး ရယူထားသော EAO ခုနှစ်ဖွဲ့တွင် အဆိုပါ နှစ်ဖွဲ့သည် အင်အား အတောင့်တင်းဆုံး လည်း ဖြစ်သည်။

ယခုအခါ NUG နှင့် အပြည့်အဝ ပူးပေါင်း ဆောင်ရွက်နေသော EAO တပ်ဖွဲ့များ၏ အင်အားသည် ၄၀,၀၀၀ ခန့် ရှိနေပြီဟု လည်း သိရသည်။

စစ်ရေး ပူးပေါင်း ဆောင်ရွက်မှု ဖက်တွင် အားရဖွယ် ကောင်းသော်လည်း ယခုထိ တိုင်းရင်းသား လူနည်းစုများ အတွက် ကျေနပ်ဖွယ် ရာ တန်းတူညီမျှ မှု နှင့် ကိုယ်ပိုင် ဆုံးဖြတ်ပိုင်ခွင့် များ ပါရှိမည့် ကြားဖြတ် ဖွဲ့စည်းပုံ ကို ရေးဆွဲ နိုင်ခြင်း မရှိသေး၍ နိုင်ငံရေး ပူးပေါင်းမှု တွင် အားနည်းနေဆဲ ဖြစ်ကြောင်း ကေအင်ယူ ပြောခွင့်ရ ပဒို မန်းရှာက ဧရာဝတီကို ပြောပြခဲ့သည်။

ယခုအခါ အာဏာသိမ်း အဖွဲ့သည် နေစဉ် လိုလို ပြည်သူ့ကာကွယ်ရေး တပ်ဖွဲ့များ နှင့် တိုင်းရင်းသား လက်နက်ကိုင် တပ်များ၏ တိုက်ခိုက်ခြင်းကို ခံနေကြရပြီ ဖြစ်သည်။

ချင်းပြည်နယ် အတွင်း စစ်အုပ်ချုပ်ရေး ကျေညာထားသည့် ထန်တလန် မြို့ မ ရဲစခန်းအား တော်လှန်ရေး တပ်ဖွဲ့ များက အောင်မြင်စွာ စီးနင်း တိုက်ခိုက်နိုင်ခဲ့ပြီး ဒရုန်းဖျက် လက်နက်များ အပါအဝင် လက်နက်မျိုးစုံ အလက် ၄၀ ကို သိမ်းဆည်း ရမိလိုက်သည်ဟု သတင်းများက ဆိုသည်။

အလားတူ ငဖဲ မြို့နယ် နှင့် သရက် မြို့နယ် များ ရှိ စစ်လက်နက် ပစ္စည်း ထုတ်လုပ်သည့် ယမ်းမှုန့် စက်ရုံအား ပြည်သူ့တော်လှန်ရေး တပ်ဖွဲ့များက ၁၀၇ မမ ဒုံးပစ်လောင်ချာ နှင့် အာပီဂျီ များ သုံး၍ တိုက်ခိုက်ခဲ့ကြရာ ပစ်မှတ်ကို တိုက်ရိုက် ထိမှန်သွားခဲ့သည်ဟု ကျေညာချက် ထုတ်ပြန်လာခဲ့သည်။

အသုံးပြုခဲ့သော လက်နက်များ အတွက် ကုန်ကျစရိတ်သည် ကျပ်ငွေ သိန်း ၂၅၀ ခန့် ရှိသည်ဟု ဆိုသည်။

မကြာသေးမီက မြန်မာအရေး တွင် တက်ကြွစွာ ပါဝင်ခဲ့သည့် မလေးရှား နိုင်ငံခြားရေး ဝန်ကြီးဟောင်း ဆိုက်ဖူဒင် အဗ္ဗဒူလာ နှင့် RFA တွေ့ဆုံ မေးမြန်းခန်း တွင် မြန်မာပြည်သူတို့၏ ကြံ့ကြံခံ ခုခံတွန်းလှန်နေမှုကို မချီးကြူးပဲ မနေနိုင်ကြောင်း နှင့် ၎င်းတို့၏ တော်လှန်ရေး သည် မှောင်မိုက်နေသော ဥမင် လှိုဏ်ခေါင်း တခု အတွင်း အလင်းရောင်လေး မြင်လာရပြီ ဖြစ်၍ အာဆီယံ အနေဖြင့် အသင့်ပြင်ထားဖို့ လိုကြောင်း ပြောဆိုသွားခဲ့သည်။

လက်ရှိ မလေးရှား ဝန်ကြီးချုပ် အန်ဝါ အီဘရာဟင်သည်လည်း သူ၏ ပထမဆုံး အကြိမ် ထိုင်းဝန်ကြီးချုပ် ပရာရွတ် ချန် အို ချာ နှင့် တွေ့ဆုံရာတွင် အာဏာသိမ်းမှုကြောင့် ဒုက္ခပင်လယ်ဝေနေရသော မြန်မာပြည် တည်ငြိမ်မှု ရရှိရေး အတွက် ယခုထက် ပို၍ ကြီးမားသော အခန်းကဏ္ဍမှ ပါဝင်ပေးရန် တောင်းဆိုသွားခဲ့သည်။ ထိုင်းအစိုးရသည် စစ်အာဏာသိမ်း အဖွဲ့ နှင့် ပုံမှန် ဆက်ဆံရေး များ ပြုလုပ်နေ၍ နိုင်ငံတကာ၏ ဝေဖန် ပစ်တင်မှု များ ခံနေရချိန်လည်း ဖြစ်သည်။

စစ်အာဏာသိမ်း အဖွဲ့ နှင့် မည်သို့သော အကြောင်းနှင့် ဖြစ်စေ ဆက်ဆံလိုသူ မှန်သမျှ သည် အလကား တော့ မရပဲ ၎င်းတို့ တိုင်းပြည်၏ ဂုဏ်သိက္ခာ ကိုတော့ အရင်းအနှီး အဖြစ် အရင်ဦးဆုံး ပေးဆပ်ရစမြဲပင် ဖြစ်သည်။

ပြည်သူတို့၏ ခုခံစစ် မုချအောင်ရမည်!!!