အကြမ်းဖက် စစ်အာဏာသိမ်း အဖွဲ့၏ ဒီဇင်ဘာ ၂၃ ရက်နေ့ တွင် ခေါ်ယူသည့် အစည်းအဝေး အား တက်ရောက်လာသူ ငါးဆယ့်ငါးဦး မှ ပြည်သူတို့၏ ခုခံ တွန်းလှန်စစ်ကို ချေမှုန်းရန် အလွယ်တွေး အလွယ် လုပ် လုပ်ငန်းစဉ်များ အဖြစ် ချမှတ် အကောင်အထည် ဖေါ်လာသည့် ဖြစ်စဉ် နှစ်ရပ်ကို ဗွေဆော်ဦး တွေ့မြင့်လာခဲ့ရသည်။

ပထမ ဖြစ်စဉ်မှာ ၎င်းတို့ နှင့် အပစ်အခတ် ရပ်စဲထားသော ရှမ်းပြည်နယ် အတွင်းရှိ တိုင်းရင်းသား လက်နက်ကိုင် အဖွဲ့များအား အမျိုးသား ညီညွတ်ရေး အစိုးရအား ထောက်ခံခြင်း မပြုရန် နှင့် PDF များအား လက်နက်များ မရောင်းချ ဟူသော ကတိခံဝန်ချက်ကို အတင်းအကျပ် လက်မှတ် ရေးထိုးခိုင်းခြင်းပင် ဖြစ်သည်။

နေပြည်တော်တွင် ဇန်နဝါရီ ၅-၇ တွင် ပြုလုပ်ခဲ့သည့် ငြိမ်းချမ်းရေး ဆွေးနွေးပွဲ ဆိုသည်တွင် တက်ရောက်လာသော ဝ တပ်မတော်၊ အမျိုးသား ဒီမိုကရက်တစ် မဟာမိတ် အဖွဲ့ NDAA နှင့် ရှမ်းပြည်နယ် တိုးတက်ရေး ပါတီ (SSPP) တို့အား ခံဝန်ချက် ထိုးခိုင်း ခြင်း ဖြစ်သည်။

အဆိုပါ အဖွဲ့သုံးဖွဲ့လုံးက လက်မှတ်ထိုးရန် ငြင်းဆိုခဲ့ကြသဖြင့် အကြီးအကျယ် ငြင်းခုန် ပြောဆိုခဲ့ပြီး ဆက်၍ ပြောနေပါက ဆွေးနွေးပွဲမှ ထ ထွက်သွားမည်ဟု ပင် ပြောလာရသည်ဟု ဆွေးနွေးပွဲနှင့် နီးစပ်သော သတင်းရပ်ကွက်များက ဧရာဝတီ သတင်းဌာန သို့ ပြောပြခဲ့သည် ဟု သိရသည်။

သုံးရက်ကြာ ဆွေးနွေးပွဲ အပြီးတွင် အပြီးသတ် သဘောတူညီချက် လက်မှတ်ရေးထိုး နိုင်ခဲ့သည်ဟု စစ်ကောင်စီမှ သတင်းထုတ်ပြန်ခဲ့သော်လည်း ယင်းသည် ပြည်သူကို လှည့်ဖျားခြင်း သက်သက်ဟု ဆိုပြီး မိမိတို့ဖက်မှ ထိုသို့ ထောက်ခံခြင်း မပြုရန် တောင်းဆိုချက်ကို သဘောတူခဲ့ခြင်း မရှိဟု ဆွေး‌နွေးပွဲ တက်ရောက်သူ တဦး က ဆိုသည်။

စစ်တပ်သည် လူထု အပေါ် စိတ်ဓါတ်ရေးရာ အရ ထိုးစစ်ဆင် နေမှု၏ တစိတ်တပိုင်းသာ ဖြစ်သည်ဟု လည်း လေ့လာသူများက သုံးသပ်ခဲ့ကြသည်။

နောက်ထပ် ဖြစ်စဉ်တခု မှ မည်သို့မျှ အကြောင်းပြချက် တစုံတရာ မပေးပဲ ဇန်နဝါရီ ၁၇ ရက်နေ့မှစ၍ နိုင်ငံကူး လက်မှတ်များ ထုတ်ပေးခြင်း၊ သက်တမ်းတိုးပေးခြင်းများကို ရပ်ဆိုင်းလိုက်ခြင်းပင် ဖြစ်သည်။

ထိုလုပ်ရပ်သည် NUG အား ရံပုံငွေ များ စီးဝင်နေမှု ကို ရပ်တန့်သွားရန် လုပ်လာခြင်းပင် ဖြစ်သည်ဟု အလုပ်သမား အခွင့်အရေး လှုပ်ရှားနေသူများက ထောက်ပြခဲ့ကြသည်။

လူများ ပြည်ပသို့ ထွက်လုပ်ခွင့် ရနေသမျှ ထိုသို့ ရံပုံငွေများ ထည့်ဝင်လှုဒန်းနေကြဦးမည် ဖြစ်သည်၊ ပြည်ပတွင် လုပ်ခမရနိုင်တော့က ထိုသို့ လုပ်နိုင်တော့မည် မဟုတ်ဟု အလွယ်ကလေး တွေးပြီး လုပ်လာကြခြင်းပင် ဖြစ်သည်။

ရွှေ့ပြောင်းအလုပ်သမား အများစုသည် မြန်မာ သံရုံးနှင့် ဆက်သွယ် လိုစိတ် မရှိကြ၍ နိုင်ငံကူး လက်မှတ် သက်တမ်း တိုးခြင်းပင် မလုပ်တော့ပဲ တရားမဝင် ဆက်လက်နေထိုင်သွားရန် ရွေးချယ်လာခဲ့ကြသည်ဟု အလုပ်သမား အခွင့်အရေး လှုပ်ရှားသူများက ဆိုသည်။

ပြည်ပတွင် အလုပ်သွားလုပ်ရန် အကြောင်းပြချက် ဖြင့် နိုင်ငံတွင်းမှ ထွက်ခွာရန် ကြံနေကြသည့် ၎င်းတို့အား ဆန့်ကျင်နေသူများ ကိုလည်း ဦးတည် လုပ်ဆောင်ခြင်းမျိုးလည်း ဖြစ်သည်ဟု လေ့လာသူများက သုံးသပ်ခဲ့ကြသည်။

အများစုသည် ထိုင်း၊ မလေးရှား၊ ကိုရီယား နှင့် ဂျပန် နိုင်ငံများသို့ ထွက်ခွာရန် ကြိုးစားနေကြသည်။ မည်သို့ပင် ဆိုစေ ထိုကဲ့သို့သော လုပ်ရပ်သည် နိုင်ငံသား တဦး၏ အခွင့်အရေး ကို ပြောင်ပြောင်တင်းတင်း ရိုက်ချိုးလိုက်ခြင်းပင် ဖြစ်သည်။

လူ့အသက်တချောင်းကိုပင် ဖက်ရွက်‌လောက် တန်ဖိုး မထားကြသူများအဖို့ ထိုသို့ ပြုလုပ်ရန် ရှည်ရှည်ဝေးဝေး စဉ်းစားကြမည် မဟုတ်သည်ကား မြေကြီးလက်ခတ် မလွဲပင်။

မြန်မာ နိုင်ငံသားများ ကတော့ နယ်စပ်ကို ဖြတ်ကျော်၍ တရားမဝင် ထွက်ခွာကြရန် ရွေးချယ်လာကြမည်သာ ဖြစ်သည်။

နိုင်ငံတကာ ရွှေ့ပြောင်း ဝင်ရောက်မှုများ ဆိုင်ရာ အဖွဲ့ကြီးမှ ၂၀၂၂ ခုနှစ် အတွက် အစီရင်ခံစာ ထုတ်ပြန်ချက်တွင် မြန်မာ နိုင်ငံသားများသည် ပြည်တွင်း ပဋိပက္ခများ၊ စီးပွားရေး အစရှိသည့် အကြောင်း အမျိုးမျိုး ကြောင့် လစဉ်လို ၄၀,၀၀၀ ခန့် နိုင်ငံတွင်းမှ ထွက်ခွာနေကြသည်ဟု ပါရှိလာခဲ့သည်။

၎င်းတို့၏ အုပ်ချုပ်ရေး မအောင်မြင်ကြောင်း တခုပြီး တခု သက်သေပြလာနေသည့် လုပ်ရပ်များသာ ဖြစ်ပေတော့သည်။

လက်ရှိတွင်လည်း အာဏာသိမ်း ခေါင်းဆောင်သည် တချက်ခုတ် နှစ်ချက်ပြတ် ဆိုသလို NUG နှင့် PDF များအား နိုင်ငံတကာ မှ အကြမ်းဖက် အဖွဲ့အစည်း များ အဖြစ် ထင်မြင်လာအောင် ပုံဖျက်ရန် ကြိုးပမ်းချက် တရပ် အနေနှင့် သန်းကောင်စာရင်း ကောက်ယူခြင်း ကို ဝန်ထမ်းများအား အတင်းအကျပ် စေခိုင်းလျှက် ရှိနေသည်။ တိုက်ပွဲများ ပြင်းထန်စွာ ဖြစ်ပွားလျက် ရှိသော စစ်ကိုင်း နှင့် မကွေး ဒေသကြီးများတွင်ပင် ကောက်ယူခိုင်းနေသည်။

အမေရိကန် နိုင်ငံခြားရေး ဝန်ကြီး၏ အထူး အကြံပေး ဒဲရက် ရှိုလေ ကပင် အာဏာသိမ်း အဖွဲ့သည် ယခုလို အနေအထား တွင် မည်သို့မည်ပုံ ဆက်၍ လုပ်သွားမည် ဆိုသည်က မိမိအနေဖြင့် မတွေးတတ်အောင် ရှိနေသည်ဟု ပြီးခဲ့သည့် အပတ်အတွင်း က ထုတ်ဖေါ် ပြောဆိုခဲ့ပြီး ဖြစ်သည်။

ယနေ့ ထွက်ပေါ်လာသော အေပီ သတင်းအရ ဇန်နဝါရီ ၉ ရက်နေ့မှ စတင်ခဲ့သော လူဦးရေ စစ်တမ်း ကောက်ယူမှု တွင် လူ ၁၃ ဦး သေဆုံးခဲ့ပြီး အစိုးရဝန်ထမ်း ၄ ဦး အား ဖမ်းဆီး ခေါ်ဆောင်သွားခြင်း ခံရသည်ဟု စစ်အာဏာသိမ်း အဖွဲ့မှ အချိန်နှင့် တပြေးညီ သတင်း ထုတ်ပြန်လာမှု ကို ကိုးကား ဖေါ်ပြခဲ့သည်။

NUG ပြောခွင့်ရ ဦးနေဘုန်းလတ် မှ စစ်ကောင်စီ၏ ရွေးကောက်ပွဲ သည် လူထု နှင့် နိုင်ငံတကာ ကို လိမ်ညာ လှည့်ဖျားရန် သက်သက်ဖြင့် ပြုလုပ်ရန် ကြိုးပမ်းမှု အဖြစ် ဖေါ်ပြထားပြီး ၎င်းတို့ နှင့် ပူးပေါင်း ဆောင်ရွက်သူများအား အကြမ်းဖက်မှု တိုက်ဖျက်ရေး ဥပဒေ ဖြင့် အရေးယူသွားမည် ဖြစ်၍ ပူးပေါင်းခြင်း မပြုရန် အေပီ သတင်းဌာနသို့ ပေးပို့သော မက်ဆေ့ချ်တွင် ဖေါ်ပြထားသည်။

ပြည်သူ တော်လှန်ရေး အင်အားစုများသည် အထက်စီးမှ မောက်မာ အနိုင်ကျင့် နေကြခြင်း မဟုတ်ပဲ စစ်အာဏာရှင်များ ကို နည်းပေါင်းစုံဖြင့် ခုခံ တွန်းလှန်နေကြခြင်း ဆိုသည်ကို နိုင်ငံတကာ စာနာ နားလည်ထားကြပြီး ဖြစ်၍ စစ်ခေါင်းဆောင်၏ အကြံသည် အောင်မြင်မည်တော့ မဟုတ်ပေ။

ပြည်သူတို့၏ ခုခံတွန်းလှန်စစ် မုချ အောင်ရမည်!!!

Credit to the Cartoonist