အခန်း (၈)

 ငါတို့က နေ့ကို ပိုင်သည်၊ ချာလီကတော့ ညကို ပိုင်သည်။ ဘယ်တော့မှာ မမေ့ပါနဲ့၊ ထိုစကားများကိုရွှေရောင် ဆံပင် ပိုင်ရှင် အသက် နှစ်ဆယ့်တနှစ်ရှိ ဆာဂျင် ဂျေး ဘယ်လာမီ သည် ပူပြင်း ခြောက်သွေ့လှသည့် အချိန် ဗီယက်နမ် သို့ တာဝန်ကျ၍ ရောက်လာသည့် ပထမဆုံးနေ့ တွင် သူ၏ တပ်မှုး ကက်ပတိန် ဝီလ် ရှေးမပ်စ် ဆီမှ ကြားလိုက်ရခြင်း ဖြစ်သည်။ ရှေးမပ်စ်သည် နော်မန်ဒီ ကမ်းခြေတွင် တိုက်ဖေါ်တိုက်ဖက်များ၏ သွေးဖြင့် ရေ နှစ် ခံခဲ့သူ ဖြစ်သည်။ ထိုမျှမကသေး ကိုရီယား တွင် တရုတ်တို့၏ လူလှိုင်းလုံးတက် စစ်ဆင်ရေး တွင်လည်း အသက်ရှင်ကျန် ခဲ့သူ ဖြစ်သည်။ 

ထို့နောက်တွင် ဂျက် ဒင်နီယယ် အရက် ကို အဖေါ်ပြု၍ ယခု ရာထူးအထိ တက်လှမ်းလာခဲ့သူ ဖြစ်သည်။ သူ၏ Bronx နယ်သား စရိုက်၊ သားရေ လက်အိပ်နှင့်ပင် မဆန့်အောင် ကြီးမားလှသော အဖုအထစ် များ ထနေသည့် လက်ဆစ်များကြောင့် ဒီထက်ပို၍ လည်း ရာထူး ထပ်တက်နိုင်စရာ မရှိတော့ ဆိုသည်ကိုလည်း သိထားပြီး ဖြစ်သည်။

ယခုအခါ နိုင်ငံရေး စစ်ပွဲ ကို တိုက်ခိုက်နေရခြင်း ဖြစ်ကြောင်း ကျူးဘား ဆေးပြင်းလိပ်မှ ထွက်လာ‌ သော မီးခိုး‌ ငွေ့များ ကြားမှ သူ၏ တပည့်လက်သား ဖြစ်သူကိုလည်း အသိပေးလိုက်ပြန်သည်။ သို့သော် ကျွန်တော် သိထားသည်က လူသတ်နေသော စစ်ပွဲသာ ဖြစ်သည်။

သူ၏ တာဝန်သည် လာအို နယ်စပ် နှင့် ကပ်နေသော သဘာဝ အလှများ နှင့် သာယာလှပသည့် ရွာလေး တရွာရှိ ဗီယက်နမ် တိုင်းရင်းသား လူမျိုးစု နွယ်ဝင် မွန်တာဂနာဒ် များကို ကယ်တယ်ရန် ဖြစ်သည်။ သူတို့ အား ခြိမ်းခြောက်နေသည်က ဗီယက်ကောင်းများ ဖြစ်သည်၊ ဗီယက်ကောင်းဆို၍ ‌တွေ့နေကျ ဗီယက်ကောင်းများလို မဟုတ်၊ ၎င်းတို့ အထဲ အဆိုးတကာ အဆိုးဆုံး ဟု ပြော၍ ရသည့် ကင်းကွန်း ဆိုသူ ပင် ဖြစ်သည်။ ကင်းကွန်းသည် သူ့နိုင်ငံ အတွက် အသက်ပေးမည့်လူလည်း ဖြစ်သည်။ အမေရိကန် အများစု ပြောနေသည့် အသက်ပေးမည် ဆိုသည်ထက် ပို၍ ပြင်းထန်သူ ဖြစ်သည်။ ထိုထက်ပို၍ အရေးကြီးသည်က ကင်းကွန်းသည် သူ့ နိုင်ငံ အတွက် သတ်ရဖြတ်ရဖို့ ဝန်မလေး၊ လူဖြူ၏ သွေး လောက် အခြားဘယ်အရာမှ ကင်းကွန်း၏ လျှာပေါ်တွင် အရသာ ရှိမလာခဲ့။

ရွာနား ပတ်ဝန်းကျင် ရှိ တောနက်ကြီးထဲတွင် တိုက်ရည်ခိုက်ရည် နှင့် ပြည့်ဝနေသည့် ပြောက်ကျားများစွာ ကို စုရုံးထားပြီးလည်း ဖြစ်သည်။ သူတို့အားလုံးသည် ဗီယက်နမ် ကုန်းမြင့်ဒေသတွင် ပြင်သစ် တို့၏ သွေး ကို သောက်ခဲ့ကြပြီးသူများလည်း ဖြစ်သည်။ ယခုအခါ ရွာထဲသို့ အဖျက်သမားများ၊ ကျောရိုး များ လွှတ်ထားပြီး လည်း ဖြစ်သည်၊ ထိုလူများ၏ အပြုံး မျက်နှာဖုံးများနောက်တွင် ကောက်ကျစ်သော စိတ်ထားများ နှင့် ဖြစ်သည်။

လောလောဆယ် ၎င်းတို့နှင့် ရင်ဆိုင်နေကြရသူများက ကျေးရွာရှိ လယ်သမားများ၊ ဆယ်ကျော်သက်များ နှင့် ဖွဲ့စည်းထားသော ပြည်သူ့စစ်များဖြစ်သည်။ သို့သော် ဖြစ်ကတတ်ဆန်း ဖွဲ့စည်းထားသည့် အဆင့်မျိုး သာ ရှိသည်။ သို့သော် ၎င်းတို့အား တိုက်ပွဲဝင် အသင့်အနေအထား ရှိနေရန် အမေရိကန် စစ်တပ်၏ အထူးတပ်ဖွဲ့ A-Team ရှိ သံပုရာခွံ ဦးထုပ်စိမ်း ဆောင်း Green Berets တဒါဇင် ခန့်က ‌လေ့ကျင့်ပေးထားခဲ့သည်။ 

ညဉ့်သန်းကောင် တွင် ကင်းမျှော်စင်တွင် တာဝန်ကျနေသည့် ဆာဂျင် ဘယ်လာမီက ဒီလောက်ဆို သူ့အနေနှင့် တော်လောက်ပြီဟု တွေးနေမိသည်။ ဟားဗတ် တက္ကသိုလ်မှ တဝက်တပျက် နှင့် ကျောင်းထွက်ပြီး ဖခင်ဖြစ်သူ မီလျံနာ သူဌေးကြီး နှင့် သိုးမွှေး အင်္ကျီ ထူ ကြီး အမြဲဝတ်ထားသည့် မိခင်တို့ရှိသည့် စိန့် လူးဝစ် ရှိ အိမ်မှ လွတ်ရာကျွတ်ရာ ထွက်လာခဲ့သူ ဖြစ်သည်။ "ဒီလောက်ဆို တော်ပါပြီ။ ဒီလောက် အံ့မခန်း လှပတဲ့ တောနက်ကြီးနဲ့၊ ဒီလို နှိမ့်ချရိုးသားတဲ့ လူ‌ တွေ ရှိတဲ့ ဒီနေရာဟာ ကျွန်တော်၊ ဂျေး ဘဲလ်လာမီ၊ ရဲ့ ပထမဆုံးနဲ့ နောက်ဆုံးဖြစ်ချင်မှ ဖြစ်မယ့် ရပ်တည်မှုကို ပြုလုပ်မယ့် နေရာပါပဲ။"

ဤသည်ကား ကျွန်တော်ထံသို့ စာတိုက်က တဆင့် ပို့ပေးလိုက်သည့် The Hamlet ဇာတ်ကား၏ ဇတ်ညွန်း အပေါ် အဓိပ္ပါယ် ဖွင့်ဆို သုံးသပ်ချက် တခုသာ ဖြစ်သည်။ ပေးပိုလာသူက ဒါရိုက်တာ ဖြစ်သူ၏ ကိုယ်ရေးလက်ထောက် ဖြစ်ပြီး ထူထဲလှသော စာအိတ်ကြီးပေါ်တွင် လှပသော လက်ရေးစောင်းဖြင့် ကျွန်တော်နာမည်ကို ရေးထားသည်၊ သို့သော် နာမည် စာလုံးပေါင်းက မှားနေပြန်သည်။ ဤသည်က ရှေ့လျောက် ဖြစ်လာမည့် ပြဿနာ၏ အငွေ့အသက် တခုမျှသာ ဖြစ်ပေသည်။

ဒုတိယ ကား လက်ထောက်ဖြစ်သူ ဗိုင်အိုလက် ဆိုသည့် အမျိူးသမီးသည် ကျွန်တော် လိပ်စာကို ဖုန်းဖြင့် လှမ်းမေးစဉ်က တကြိမ်၊ ဒါရိုက်တာ နှင့် သူ၏ ဟော်လီဝုဒ် တောင်ကုန်းထက် ရှိ အိမ်တွင် တွေ့နိုင်ဖို့ အချိန်းအချက် လုပ် စဉ် က တကြိမ်၊ ဟဲလို ဖြစ်ဖြစ် ဂွတ်ဘိုင် ဖြစ်ဖြစ် တခုတလေမျှ ထည့်သွင်း ပြောသွားတာမျိုး မကြားခဲ့ရခြင်းပင် ဖြစ်သည်။

ဗိုင်အိုလက်၏ နားလည်ရ ခက်သော ပြောပုံဆိုပုံကို ကျွန်တော်ရောက်လာ၍ တံခါးလာဖွင့်ပေးသည့် အခါတွင်လည်း ဆက်၍ သတိထားမိပြန်သည်။ အခုလို ဆိုက်ဆိုက်မြိုက်မြိုက် ရောက်လာနိုင်တာ ဝမ်းသာပါတယ်၊ ရှင့် အကြောင်း အတော်များများ ကြားထားတယ်၊ The Hamlet နဲ့ ပတ်သက်ပြီး ရှင် ရေးထားတာတွေလည်း ကျမ ကြိုက်တယ်၊ သူမ စကားထဲတွင် pronouns, punctuation တို့ တခုမှ မပါ၊ ကျွန်တော်လို လူမျိုးအား သဒ္ဒါ ကျကျ ပြောနေ၍ အပို ဟု ယူဆထားပုံရသည်။ ကျွန်တော်နှင့် မျက်နှာချင်းဆိုင် စကားပြောဖို့ပင် မကြိုးစားဘဲ အထက်စီးက ဆက်ဆံသည့် ပုံဖြင့် ခေါင်းကို ငုံ့ပြီး အိမ်ထဲ ဝင်ရန် အချက်ပြလိုက်သည်။

 ထိုကဲ့သို့ ရုတ်တရက် ပြုမူလိုက်မှုသည် သူမ၏ ပင်ကိုယ်စရိုက်‌ များထဲမှ တခု ဖြစ်မည်။ လေးထောင့်ပုံ ဆံပင်ပုံစံ မှသည် ဆေးဆိုးထားခြင်း မရှိဘဲ တုံးတိတိ ညှပ်ထားသော လက်သည်းများ ကို ကြည့်ခြင်းဖြင့် ခပ်ဆိုးဆိုး ဗျူရိုကရက် တယောက် ဖြစ်လာအောင် ရည်မှန်းထားပုံရသည်။ သို့သော် ဖြစ်ချင်တော့၊ ကျွန်တော်ကိုယ်တိုင်လည်း သေဆုံးသွားသည့် အရက်မူးသမား ဗိုလ်မှုး ကြောင့်သာမက၊ မင်္ဂလာပွဲ ဧည့်ခံပွဲတွင် သူ၏ ခေါင်းပြတ်ကြီး ရုတ်တရက် ပေါ်လာသည်ကို မြင်ခဲ့ရသောကြောင့် ကိုယ်ကျင့်တရားပိုင်းဆိုင်ရာ ရှုပ်ထွေးမှု များ ရှိနေနိုင်သည်။

ထိုည နှင့် ပတ်သက်ပြီး ကြွင်းကျန်နေဆဲ ဖြစ်သော စိတ်ခံစားမှု များသည် ငြိမ်သက်နေသော ရေပြင်ထဲသို့ အာဆင်းနစ် တစက်ကျသွားသလို ပင်၊ အရသာ က ဘာမျှ ပြောင်းလဲမသွားသော်လည်း အရာရာတိုင်း က ညစ်ညမ်းသွားခဲ့ရပြီ ဖြစ်သည်။