ထိုသို့ ရှေ့နောက် မညီသော အပြောအဆိုများ အောက်တွင် နစ်မြုပ် မသွားလိုက အပြုံးမပျက် သောက်ယုံသာ ရှိသည်ဟု အရက်သမား ဗိုလ်မှုးက ဝမ်းနည်းပက်လက် ပြောခဲ့ဖူးသည်။ ယခု ထိုဗိုလ်မှုး၏ ခေါင်းပြတ်ကြီးက စားပွဲ၏ အလည်တည့်တည့် တွင် ရောက်နေပြီ ဖြစ်သည်။ ထို့အတွက် ကျွန်တော်လည်း ပြုံးပြီး လည်ချောင်းထဲသို့ ကော့ညက်များ လောင်းထည့် ပေးလိုက်သည်။
အဖော်ဖြစ်သူ မစ္စက် မိုရီ အား ကျွန် တော် တို့၏ အပျော် ကြိုက် သော လူမျိုးများ၏ ထူးခြားသော ဓလေ့ထုံးတမ်း၊ အကျင့်စရိုက်များ၊ ဆံပင်ပုံစံများ၊ ဖက်ရှင်များ အကြောင်း ရှင်းပြရင်း က သူမ အတွက် ရီမီ မာတင် နှင့် ဆိုဒါကို ရောစပ်ပေးလိုက်သည်။ ဘလေဇာ အင်္ကျီပေါ်တွင် ပန်းပွားအလှများ တပ်ထားသည့် အရပ်ပုပု ကိုယ်လုံးကိုယ်ဖန် သေးသေး လူတယောက် ဦးဆောင် သီဆိုနေသည့် တီးဝိုင်းမှ ဆူညံစွာ ထွက်ပေါ်လာနေသော အသံများ ကြားမှ ကျွန်တော် ရှင်းပြနေသည်များကို ကြားအောင် အသံကို မနည်း အော်ပြောနေရသည်။
ထိုပုဂ္ဂိုလ်သည် လူဝီ ၁၄ ဘုရင်၏ ဆံပင်တု ပုံစံမျိုး ထားတတ်သော ဂလမ်ရောခ်ကာ များ ကောက်ထားသည့် ဆံပင်ပုံမျိုး နှင့် ဖြစ်သည်။ ရွှေရောင် ဒေါက်မြင့် ဖိနပ်ကို ဝတ်ထားပြီး ဟန်ပါပါ လျှောက်ကာ သီဆိုနေသည်၊ မိုက်ကရိုဖုန်း ကို လည်း ပွတ်သပ်ပြီး ပါးစပ်နားတေ့ကာ သူ၏ နှုတ်ခမ်းများ နှင့် ကြည့်သူများ မရိုးမရွ ဖြစ်လာအောင် ပွတ်သပ်နေပြန်သည်။ အမျိုးသားကော အမျိုးသမီး ပါ မရှောင် ချစ်ကျွမ်းဝင်တတ်သည်ဟု လက်မှတ်ရထားသော ဘဏ်လုပ်ငန်း သမားများ နှင့် စစ်ဖက်မှ လူများက သူ့ကို အလွန်အမင်း သဘောကျနေကြသည်။ အဆိုတော်၏ တင်းကျပ်လွန်းလှသော ဖဲသား ဘောင်းဘီမှ လိင်ဆွဲဆောင်မှု အသားပေးသည့် တင်ပါးဆုံ လှုပ်ရမ်းသွားသည့် အခါတိုင်း ဝက်ဝက်ကွဲ အောင် အားပေးကြပြန်သည်။
သူနှင့် အတူ တွဲကရန် စင်ပေါ်သို့ အမျိုးသားများအား ဖိတ်ခေါ်လိုက်သည့် အခါ ချက်ခြင်း ဆိုသလိုတက်လာသူက ဗိုလ်ချုပ်ကြီးပင် ဖြစ်သည်။ ဆိုင်ဂုံမြို့ကြီး၏ ဖေါက်ပြန် ပျက်စီးမှု များ ဖေါ်ကျုးထားသည့် Black is Black သီချင်းကို အဆိုတော် နှင့် တွဲ၍ ပြုံးပြီး ဟန်ပါပါ လှုပ်ရမ်း သီဆိုနေသည်၊ ပရိသတ်ကလည်း သဘောကျသည်ကို ပြသည့် အနေဖြင့် အော်ဟစ် အားပေးကြပြန်သည်၊ အဆိုတော်ကလည်း Mae West လိုမျိုး သူပုခုံးပေါ် က ကျော်၍ မျက်စိတဖက် မှိတ်ပြလိုက်ပြန်သည်။
ဤသည် က ဗိုလ်ချုပ်ကြီး၏ အခြေခံ စိတ်ဓါတ်များ ကိန်းအောင်းရာ နယ်ပယ်တခုပင် ဖြစ်သည်။ ထိုနယ်ပယ်တွင် သူ့ကို တန်ဖိုးထားသူများ၊ သူကို စိတ်မသက်မသာ ဖြစ်အောင်၊ သဘောမတွေ့အောင် လုပ်ဖို့ထက် ဘယ်လို နေရမည် ဆိုသည်ကို သိနေသည့် အမျိုးသား၊ အမျိုးသမီးများသာ ရှိနေတတ်သည်။ သနားစရာ ကောင်းလှသည့် အရက်သမား ဗိုလ်မှုးကို ကွပ်မျက် ပစ်လိုက်ခြင်း သို့မဟုတ် ဖယ်ရှားချေမှုန်း နိုင်လိုက်ခြင်း ကြောင့် အသက်ပြန်ဝင်လာပုံ ရပြီး သူ၏ ဈာပန အခမ်းအနားတွင်ပင် ဣန္ဒြေ မပျက် ပိုင်နိုင်စွာ မိန့်ခွန်းချွေနိုင်ခဲ့သည်။
ထိုမိန့်ခွန်းထဲတွင် ဗိုလ်မှုးအား ကိုယ်ကျိုးမငဲ့ပဲ ပေးအပ်သည့် တာဝန်များကို မညည်းမညူ ကျိုးနွံစွာ ဆောင်ရွက်တတ်သူ ဟု ချီးမွမ်းသွားပြီး ယခုလို အဓိပ္ပါယ်မဲ့ လုယက် ခံခဲ့ရ၍ အသက်ဆုံးရှုံးသွားခဲ့ရသည်မှာ ကြေကွဲဝမ်းနည်းဖွယ် ကောင်းလှသည်ဟု ထည့်ပြောသွားခဲ့သည်။ ကျွန်တော်၏ ကိုဒက် ကင်မရာ နှင့် အသုဘ အခမ်းအနားကို မှတ်တမ်းယူခဲ့သည်။ အခမ်းအနား အပြီးတွင် ကလော့ဒ်မှ ထောက်ပံ့ထားသည့် လုပ်ငန်းသုံး ရံပုံငွေထဲမှ ငွေအချို့ကို စာအိတ်ဖြင့် ထည့်ပြီး ဗိုလ်မှုး၏ ကျန်ရစ်သူ ဇနီး လက်ထဲသို့ ထည့်ပေးရင်း ခြင်စကာဖြင့် အုပ်ထားသည့် လေးထောင့်ပုံ ခြင်းကြီး ထဲတွင် အိပ်မောကျနေသည့် စပင်းနက်ခ်ျ နှင့် ဘရိုကိုလီ တို့ကို ငုံ့ပြီး ကြည့်လိုက်ပြန်သည်။ ကျွန်တော် အဖို့က မျက်နှာဖုံး ပုဝါနောက်တွင် မျက်ရည်များ တသွင်သွင် စီးကျ နေသည့် ကျန်ရစ်သူ မုဆိုးမ အား အခြေအနေ နှင့် သင့်လျော်သည့် ပြောနေကျ စကားမျိုးကိုသာ တီးတိုး ရေရွတ် ပြောနိုင်ခဲ့သည်။
ကျွန်တော် အိမ်ပြန်ရောက်၍ ရေခဲသေတ္တာဆီ လျှောက်လာခိုက် ဘွန်က "အခြေအနေ ဘယ်လိုလဲ" ဟု မေးလာသည်၊ ဘယ်လို ရှိတယ်လို့ မင်းထင်လို့လဲ ဟု ကျွန် တော်က ပြန်ပြောလိုက်သည်။ ကျွန်တော်၏ အသိစိတ်အပြင် ခန္ဓာကိုယ် တွင်းရှိ အလွဲသုံးစား အလုပ်ခံရဆုံးသည် အသည်းပင် ဖြစ်သည်။
မင်္ဂလာပွဲ များ ကြောင့် ထိုသို့ အလွဲသုံးစား လုပ်ခံရမှုများ များသည်ထက် များလာခဲ့ရသည်။ ပျော်ရွှင်ပြီး အပြစ်ကင်းသော သတို့သား၊ သတို့သမီးများ ကို မြင်ရလေ ပို၍ ဆိုးလေ ဖြစ်လာသည်။ အိမ်ထောင်ပြုမှု ဆိုသည်က တဦးနှင့်တဦး စိတ်ချင်းကင်းကွာသွားမှု၊ ဖေါက်ပြန်မှု၊ ဆင်းရဲ ဒုက္ခ နှင့် ကွာရှင်းပြတ်စဲမှု တို့ဆီ ဦးတည်သွားနိုင်သလို ချစ်ခင်ကြင်နာမှု၊ သစ္စာစောင့်သိမှု၊ သားသမီး များ၊ ရောင့်ရဲတင်းတိမ်နိုင်မှု တို့ ဆီသို့လည်း ဦးတည် နိုင်ပေသည်။
ကျွန်တော်သည် အိမ်ထောင်ပြုဖို့ စိတ်ကူး မရှိသူ ဖြစ်သော်လည်း မင်္ဂလာပွဲ များက ကျွန်တော်၏ ကိုယ်ပိုင် ဆုံးဖြတ်ချက် မပါဘဲ ငြင်းပယ်ခံခဲ့ရသည်များကို အမှတ်ရစေခဲ့သည်။ ထို့ကြောင့် ကျွန် တော် သည် မင်္ဂလာပွဲတိုင်းကို ရုပ်ရှင်ကားဟောင်းများမှ လူကြမ်း တစ်ယောက်ကဲ့သို့ ရယ်မောမှုများနှင့် လှောင်ပြောင်ဝေဖန်မှုအချို့ကို ရောနှော၍ စတင်ခဲ့သော်လည်း၊ မင်္ဂလာပွဲတစ်ခုစီကိုမူ သီချင်းဆိုမှု သုံးပုံတစ်ပုံ၊ စိတ်ခံစားမှု သုံးပုံတစ်ပုံနှင့် ဝမ်းနည်းပူဆွေးမှု သုံးပုံတစ်ပုံ ပါသော ရေ ရောထားသည့် ကော့တေးတစ်ခွက်ကဲ့သို့ အဆုံးသတ်ခဲ့ရသည် ချည်းပင် ဖြစ်သည်။
မင်္ဂလာ ကိတ်မုန့် ခွဲပြီးသည် နှင့် ကျွန်တော်လည်း မစ္စက် မိုရီ ကို ခေါ်ပြီး ကသည့် နေရာသို့ ထွက်လာခဲ့သည်။ စင်မြင့် အနီး ရောက်မှ ကျွန်တော်တို့၏ အဆိုတော်ကြီး နှင့် အတူ မိုက်ကရိုဖုန်း တယောက်တလှည့်စီ ကိုင်ပြီး ဖျော်ဖြေနေသော အမျိုးသမီး အဆိုတော် နှစ်ဦး ထဲမှ တဦးကို ကျွန်တော် မှတ်မိသွားခဲ့သည်။ သူသည် ဗိုလ်ချုပ်ကြီး၏ အကြီးဆုံး သမီး ဖြစ်ပြီး တိုင်းပြည် ပြိုလဲ မတတ် ဖြစ်နေချိန်တွင် ဆန်ဖရန်စစ္စကို ဘေး ဧရိယာ တွင် အပူအပင် ကင်းစွာ ကျောင်းလာတက်နေသူ ဖြစ်သည်။
လာနာ အား အလယ်တန်းကျောင်းသူ ဘဝ နှင့် နွေရာသီ ကျောင်းပိတ် အိမ်ပြန်ချိန်များတွင် တွေ့ဖူးမြင်ဖူးထားသော်လည်း ယခုအခါ တော်တော်နှင့် မမှတ်မိနိုင်လောက်အောင် ပြောင်းလဲသွားခဲ့သည်။ ထိုအချိန်များက သူ့အမည် အား လန် ဟု သာ သိထားခဲ့သည်။ သူမသည် ကျောင်းသူ လေးများ ကဲ့သို့ အဖြူရောင် အော်ဒိုင်း ဝတ်စုံလို ခပ်ရိုးရိုးပင် ဝတ်ဆင်တတ်သည်၊ ထိုဝတ်စုံ မျိုးသည် လည်ပင်း အထက်ပိုင်း နှင့် လက်ကောက်ဝတ် အောက်ပိုင်းမှ လွဲ၍ ခန္ဓာကိုယ် အရည်ပြားကို တလက်မ မျှပင် လှစ်ဟ ပြခဲ့ခြင်း မရှိသော်လည်း အရွယ်ရောက်စ မိန်းမပျို တဦး၏ ခန္ဓာကိုယ် ကောက်ကြောင်းများကို ထင်ရှားပေါ်လွင် စေခဲ့သည်။ ထို့အတွက်လည်း အနောက်တိုင်း စာရေးဆရာများကို မလိုလားအပ်သည့် စိတ်ကူးယဉ် မှု များ နှင့် စိတ်အာရုံကို ဖမ်းစားထားနိုင်ခဲ့သည်။
ဤသည်ကို ကြည့်၍ စာရေးဆရာများက ကျွန်တော်တို့ နိုင်ငံ တခုလုံး အတွက် သွယ်ဝိုက် ပြဆိုနေသော ပုံပမာ တခု အလား ယူဆခဲ့ကြပုံရသည်။ ထိုပုံပမာ ဆိုသည်ကား ပစ်တိုင်းထောင်သဖွယ် ရွေ့လျားတတ်ပြီး ဆိတ်ဆိတ်နေကာ မည်သည့် အရာကို မဆို အရိပ်အမြွက်သာ ပြဆိုတတ်သည်။ ထိုသို့ ရိုးသားသည့် ဝတ်စုံကပင် ခန္ဓာကိုယ်ပုံစံကို အကာအကွယ် ယူပြီး ထုတ်ပြနေ သယောင် ဖြစ်လာ၍ မြင်ရသူ အတွက် ဆန်းကြယ်လှသော မြူဆွယ်မှု မျိုးဖြင့် ကာမေသတ္တိ ပြင်းထန်စေသည့် ရင်သပ်ရှု မောဖွယ် ကောင်းလှသော ပြကွင်းပြကွက် မျိုး ပင် ဖြစ်လာခဲ့ရသည်။
ကျွန်ုပ်တို့နိုင်ငံ၏ ဘဝဖြစ်စဉ်ကို လေ့လာသူ မည်သည့် ခရီးသွား စာရေးဆရာ၊ သတင်းစာဆရာ သို့မဟုတ် သာမန် လေ့လာသူ အမျိုးသား တဦးတ လေ ကမျှ လေထဲတွင် လွင့် နေသလို ကျောင်းတက်ကျောင်းပြန် စက်ဘီးစီးသွားသော အဖြူရောင် အော်ဒိုင်း ဝတ်ထားသည့် မိန်းကလေးငယ်များအကြောင်းကို မရေးဘဲ မနေနိုင်ခဲ့ကြချေ။ ထိုမိန်းကလေးများသည် အနောက်တိုင်းသားတိုင်း စုဆောင်းသိမ်းဆည်းထားလိုသည့် စိတ်ကူးယဉ် လိပ်ပြာများပင် ဖြစ်သည်။
တကယ်တော့ လန် သည် ယောက်ျားလေးလို နေထိုင်တတ်သူ ဖြစ်သည်။ မနက် ကျောင်းသွားခါနီးတိုင်း မဒမ် နှင့် ကလေးထိန်း အမျိုးသမီးက အော်ဒိုင်း ဝတ်စုံကို အတင်းအကျပ် ဝတ်ခိုင်းခဲ့ရစမြဲ ဖြစ်သည်။ လန် သည် အမေရိကန် တွင် ကျွန်တော်လို ပညာသင်ဆု ရလာသည့် အခါတွင်တော့ အဆုံးစွန်ထိ ပုန်ကန်လာခဲ့တော့သည်။
သူမအား ဘာကလေ ရှိ ကယ်လီဖိုးနီးယား တက္ကသိုလ်ကြီး မှ ပညာသင်ဆု ပေးအပ်ခဲ့ရာမှ စတင်ခဲ့ခြင်း ဖြစ်သည်။ သို့သော် ဗိုလ်ချုပ်ကြီး နှင့် မဒမ် တို့ နှစ်ဦးစလုံးက ကယ်လီဖိုးနီးယား တက္ကသိုလ်သည် အစွန်းရောက် ပရော်ဖက်ဆာများ၊ တော်လှန်ရေး သမား ကျောင်းသားများက မသိနားမလည် သူများကို ဖျားယောင်း သိမ်းသွင်းနေသည့် ကွန်မြူနစ် တို့ စုဝေး ရာ နယ်မြေဟု ယူဆထားကြသည်။ သူမအား မိန်းကလေး ကောလိပ်သို့သာ ပို့ချင်ကြသည်၊ ထိုသို့သော ကျောင်းမျိုးကား မိန်းကလေးချင်း ချစ်ကြကြိုက်ကြသည်က လွဲ၍ အခြား အန္တရာယ် မရှိ၊ လန် က ထိုသို့သော ကျောင်းမျိုးကို မလျှောက်ဘဲ ဘာကလေ ပဲ တက်မည်ဟု မရမက ပြောလာသည်။ မိဘများက တားမြစ်လာသည့် အခါတွင်တော့ ကိုယ့်ကိုကိုယ် သေကြောင်းကြံမည်ဟု ခြိမ်းခြောက်တော့သည်။
ဗိုလ်ချုပ်ကြီးကော၊ မဒမ်က ပါ သူမ ခြိမ်းခြောက်မှု ကို ပေါ့ပေါ့တန်တန် သဘောထားခဲ့ရာမှ လန်သည် အိပ်ဆေးများ လက်တဆုပ်စာ သောက်သည်အထိ ဖြစ်လာခဲ့သည်၊ ကံအားလျှော်စွာ သူ၏ လက်ကလေးများက သေးလွန်း၍သာ သေကံမရောက် သက်မပျောက် ခဲ့၊ ကျန်းမာလာသည့် အခါတွင်တော့ ဗိုလ်ချုပ်ကြီးလည်း အလျော့ပေးလိုက်ရတော့သည်။ သို့သော် မဒမ်က တင်းခံနေသည်။တရက်တွင် လန်သည် ဆိုင်ဂုံ မြစ်ထဲသို့ ခုန်ချပြန်သည်။ ထိုစဉ်က မြစ်ဆိပ်တွင် လူသွားလူလာများ နှင့် ပြည့်သိပ်နေချိန် ဖြစ်၍ မြစ်ထဲတွင် အော်ဒိုင်း ဝတ်စုံ နှင့် မျောနေသော လန်ကို လူနှစ်ယောက်က ဆင်း ကယ်ခဲ့ရသည်။
နောက်ဆုံး မဒမ်လည်း အလျော့ပေးလိုက်ရ၍ လန်သည် ၁၉၇၂ ဆောင်းဦးပေါက်တွင် အနုပညာ သမိုင်း ဘာသာရပ် ဖြင့် ဘာကလေ တွင် တက်ရောက် သင်ကြားရန် ထွက်ခွာလာခဲ့သည်။ မိဘများက ထိုဘာသာ ရပ်သည် အမျိုးသမီးတဦး၏ စိတ်နေ သဘော သဘာဝ ကို မြှင့်တင်ပေးပြီး လက်ထပ်ထိမ်းမြားဖို့ သင့်လျှော်အောင် ပြုပြင်ပေးလိမ့်မည်ဟု ယူဆခဲ့ကြသည်။