မီမီသည် အရပ်မြင့်မြင့် နှင့် ဖြောင့်တန်း သွယ်လျသော ဆံပင်ရှည်ကြီး နှင့် ဖြစ်သည်၊ သူ၏ လက်သည်း ခြေသည်းများကိုလည်း ပန်းရောင် ဆိုးထားသည်။ ထိပ်ဖျားများသည်လည်း ဂျယ်လီ တုံးများ အလား ပြောင်လက်နေသည်။ သူမ၏ နားလည်ရ ခက်‌ သော ဟွေး ဒေသန္တရ စကား အား လည်ချောင်းသံ ပါသော သူမ၏ အသံကြောင့် နားထောင်ရသည့် ကျွန်‌ တော် အဖို့ သွေးကြောများ ကျုံ့သွားသလို ခံစားရပြီး ခေါင်းထဲတွင် ရီတီတီပင် ဖြစ်လာရသည်။

တီတီကတော့ သွယ်လျှလျှ ခန္ဓာကိုယ် အချိုးအစား ရှိပြီး ဆံထုံးကို ပျားအုံလို ဖြစ်အောင် ခပ်မြင့်မြင့် ထုံးထားခြင်းကြောင့် အရပ် မြင့်သလို ထင်ရသည်။ သူမ၏ အသားရောင်သည် ကြက်ဥခွံလို ဖြူလျော့လျော့ ဖြစ်နေပြီး မျက်တောင်များက နှင်းစက်များ တွဲလွဲခိုနေသည့် အလား တုန်ခါနေသည်။ သူမကို ထွေးပွေ့ကာ မျက်တောင် အချင်းချင်း ပွတ်တိုက်ပြီး ငြင်ငြင်သာသာ နမ်းချင်နေမိသည်။

ဖီဖီသည် သူတို့အထဲတွင် ခေါင်းဆောင် ဖြစ်သည်။ သူမ ခန္ဓာကိုယ် ကောက်ကြောင်းကို ကြည့်ပြီး ကျွန်တော် ငယ်ငယ်က ကြုံတောင့်ကြုံခဲ အမေ အပန်းဖြေ ထွက်မည် ဆိုပြီး ခေါ်သွားသည့် ဖန် သီယက် ရှိ သဲ တောင်ပူစာ များကို သတိရသွားမိသည်။

အမေသည် အသားမဲသည်ထက် မဲသွားမည် စိုး၍ ခေါင်း မှ ခြေမ အထိ တကိုယ်လုံး လုံအောင် အုပ်ထားသော်လည်း ကျွန်တော်က နေရောင်ကြောင့် ချစ်ချစ်တောက် ပူနေသော သဲပြင်ထဲ တူးရင်းဆွရင်း ပျော်မဆုံး မော်မဆုံး ဖြစ်နေခဲ့သည်။

ဆယ်နှစ်သား ကလေးငယ်တဦး၏ နွေးထွေး ပျော်ရွှင် ခဲ့ရသည့် အမှတ်ရစရာ များသည် အနီးအနား တွင် ရှိနေသော ဖီဖီ ထံမှ ရသော အမွှေးနံ့ကြောင့် တဖန် နိုးထလာခဲ့ရသည်။ အဖေ ထံမှ လက်ဆောင်ရသည့် ပျားရည်ရောင်ရှိ ရေမွှေးဗူး သေးသေး လေး ကို အမေ သည် တနှစ်မှ တခါ ထုတ်၍ ဆွတ်သည်ကိုလည်း မြင်ယောင်လာမိသည်။

ထိုသို့သော စိတ်ခံစားမှု များ နှင့် ဖီဖီကို ချစ်ကြိုက်သွားမိသည်။ ကျွန်တော်အတွက်လည်း မထိခိုက်၊ ပုံမှန်အားဖြင့် ဆို တနှစ်လျင် နှစ်ကြိမ်၊ သုံးကြိမ်ခန့် ချစ်ကြိုက်မိဖူးသော်လည်း ယခု အခါ တကြိမ်မျှပင် ချစ်ခြင် ကြိုက်ချင် စိတ် ဖြစ်မလာခဲ့သည်မှာ ကြာမြင့်ခဲ့ပြီ ဖြစ်သည်။

ယခုလို လေယာဉ်နှင့် ခေါ်ထုတ် ခံရဖို့က လူချမ်းသာ များ အတွက်သာ ဖြစ်နေချိန်တွင် သူတို့ သုံးဦးစလုံး ဘယ်ပုံဘယ်နည်း လေတပ်စခန်း ထဲ ရောက်လာသည် ဆိုသည်မှာ ဩဇာအာဏာရှိပြီး အဆက်အသွယ် ရှိသူများ နှင့် ပတ်သက်နေ၍ ဖြစ်မည်။ အထူးသဖြင့် ‌တပ်ကြပ်ကြီး တဦး ကြောင့် ဖြစ်ရမည်။

တပ်ကြပ်ကြီး ဆို၍ အဖြူရောင် မရိမ်း ကက်ဦးထုတ်ကို ဖြစ်သလို ဆောင်းထားသည့် ခန္ဓာကိုယ် ထွားထွားကျိုင်းကျိုင်း တယောက်ကို မျက်စိထဲ မြင်လာမိသည်၊ သူသည် သံရုံးကို စောင့်နေသော မရိမ်းတဦး ဖြစ်သည်၊ ဖီဖီက တပ်ကြပ်ကြီး သည် စိတ်နှလုံး ကောင်းသူ ဖြစ်ပြီး သူတို့ကို သဘောကျသူ ဖြစ်၍ မမေ့မလျော့ ခေါ်လာခြင်း ဖြစ်သည်ဟု ပြောပြခဲ့သည်။ ကျန်နှစ်ယောက်ကလည်း ဖီဖီ ပြောသည်အား မှန်သည့် အနေဖြင့် ခေါင်းကို တလစပ် ငြိမ့်ပြကြသည်။

မီမီသည် ပီကေ တခုကို အခွံခွာ‌ နေပြီး ဖီဖီကတော့ သူ့ လက်ဆစ်များကို ချိုးနေသည်။ တပ်ကြပ် သည် သံရုံးက ကားကို‌ မောင်းလာပြီး သူတို့ ရှိရာ တူဒို ကလပ်သို့ ရောက်ချလာခဲ့သည်။ ဘားထဲရှိ လိုက်ချင်သော သူတို့လို မိန်းကလေးများကို ခေါ်တင်ခဲ့သည်။ လေတပ်စခန်းရှိ အစောင့်များကို ပါတီပွဲ အတွက် ခေါ်လာခြင်း ဖြစ်သည်ဟု ပြောပြီး မောင်းဝင်လာခဲ့ခြင်းပင် ဖြစ်သည်။

ပေးထားသော ကတိကို တည်တတ်‌သော အမေရိကန် ပါလား ဟူသော အတွေးကြောင့် ကျွန်တော် နှလုံးသားများပင် နူးညံ့ပျော့ပြောင်းသွားခဲ့ရသည်။ သူတို့သုံးဦးစလုံးက တပ်ကြပ် ဆိုသူ၏ အမည်အား အက် ဟုသာ ခေါ်ကြပြီး နောက်က အမည်ကို ဘယ်လို အသံထွက်ရမှန်း မသိကြ။

သူတို့ ဘာကြောင့် ထွက်ချင်တာလဲဟု မေးကြည့်သည့် အခါ မီမီ က ကွန်မြူနစ် များ ဝင်လာသည့် အခါ သူတို့အား အမေရိကန်များ နှင့် ပူးပေါင်းသူများ ဆိုကာ သေချာပေါက် ထောင်ချပစ်မည်ကို သိနေသောကြောင့် ဟု ပြန်ဖြေသည်။ သူတို့က ဆိုင်းဂုံကို ပြည့်တန်ဆာ မြို့လို့ ခေါ်‌နေ‌တော့ ကျမတို့ကိုလည်း အဲ့လိုပဲ ခေါ်ကြမှာပဲ ဟုတ်တယ် မဟုတ်လား၊ စဉ်းစားကြည့် သိနိုင်တာပဲလေ။

တီတီက ထောင်ထဲ မထည့်ရင်တောင်မှ ကျမ တို့ အခု အလုပ်ကို ဆက်လုပ်လို့ မရတော့ဘူး၊ ကွန်မြူနစ် နိုင်ငံ ဖြစ်လာရင် ဘာမှ ကို ဝယ်တာတို့၊ ရောင်းတာတို့လည်း လုပ်လို့မရတော့ဘူး၊ အမြတ်ရမယ့် ဟာမျိုး ဆို ခွင့်ပြုတော့မှာမှ မဟုတ်တာ။ ကျမ ကတော့ ဒီသရက်သီးကို ကွန်မြူနစ် ဖြစ်ဖြစ်၊ မဖြစ်ဖြစ် အလကားတော့ စားခွင့် မပြုနိုင်ဘူး၊ သူမစကား ကို သဘောကျ၍ ကျန်နှစ်ယောက်က သံသေးသံကြောင်အော်ကာ လက်ခုပ်လက်ဝါး တီးလိုက်ကြသည်။ သူတို့ အားလုံး က ဆိပ်ကမ်း ကပ်၍ တက်ခွင့် ရသော ရုရှား သင်္ဘောသား များလို ခါးအောက်ပိုင်း ပြက်လုံးများကို တစ်တစ်ခွခွ ပြောတတ်ကြသူများ ဖြစ်သည်။ သို့သော် ကုန်ဖလှယ်မှု တန်ဘိုးကိုတော့ ကောင်းစွာ ‌ကြေညက်ထားကြသူများ ဖြစ်နေသည်။

တော်လှန်ရေးကြီး အောင်မြင်သွားသည့် အခါ သူမတို့လို မိန်းကလေးများ ဘယ် အခြေ ဆိုက်ကုန်ကြမည် နည်း။ ဒါနဲ့ ပတ်သက်ပြီး ကျွန်တော်လည်း ခေါင်းထဲ ထည့် မထားမိခဲ့ ဆိုသည်ကိုတော့ ဝန်ခံရမည်သာ ဖြစ်သည်။