ယခုပင် ခေါ်ရင် လိုက်သည့် မိန်းကလေး များ နှင့် အပူအပင် မရှိ စကားစမြည် ပြောနိုင်သည်။ ဒူးအထက် ရောက်အောင် မြင်နေရသော စကပ်တို နံ့နံ့ များ နှင့် သတင်းစာဟောင်းများ ဖြင့် အနုမြူ ခေတ်ဘရာစီယာမျိုး ဖြင့် ပင့်တင်ထားသော သူတို့ ရင်နှစ်မွှာ အကြား စီးကျ နေသော ချွေးစီးကြောင်းများကို တဖြတ်ဖြတ် ခပ်နေသည်။
သူတို့ အမည်များက မီမီ၊ ဖီဖီ၊ တီတီ တို့ ဖြစ်သည်ကိုလည်း သိလိုက်ရသည်။ ထိုကဲ့သို့သော အမည်များက သူတို့ လောက ကြားတွင် ဆန်းလှသည်တော့ မဟုတ်၊ သူတို့ သုံးယောက် စလုံး ကျွန်တော် ရင်ထဲ အပျော်တွေ ကူးစက်သွားအောင် စွမ်းဆောင်နိုင်စွမ်း ရှိသည်ကတော့ အမှန်ပင် ဖြစ်သည်။ သူတို့ အမည်များကလည်း ကျွန်တော်နှင့် စကားပြောရင်း ထွက်လာသည့် အမည်များလည်း ဖြစ်နိုင်သည်၊ သူတို့ အတွက်က ဖောက်သည်များ တယောက်ပြီး တယောက် ပြောင်းသလို နာမည်ကလည်း အမျိုးမျိုး ပေးတတ်ကြစမြဲ ဖြစ်သည်။ ထိုသို့ ဟန်ဆောင်နိုင်ခြင်းသည်လည်း နှစ် နှင့် ချီ၍ တကူးတက လေ့လာ ကြိုးစားထားမှု မှ ပညာသည် ပီသစွာ အလိုအလျောက် တုန့်ပြန်လာမှု လည်း ဖြစ်နိုင်သည်။
ကျွန်တော် အဖို့ ပြည့်တန်ဆာ အဖြစ် အသက်မွေး ဝမ်းကြောင်းနေသူ များကို လေးစားသမှု ရှိထားပြီး ဖြစ်သည်၊ သူတို့၏ မရိုးသားမှုကို ရှေ့နေ ဆိုသူများထက် ပို၍ ပွင့်လင်းစွာ ထုတ်ဖေါ်တတ်၍လည်း ဖြစ်သည်။ ရှေ့နေ များကလည်း သူတို့ကဲ့သို့ပင် နာရီ နှင့် ပိုက်ဆံ တောင်းတတ်ကြသူများ မဟုတ်ပါလား။
ထိုသို့ ငွေကြေး ဖက်ကသာ နှိုင်းယှဉ် ပြောမည်ဆိုလျင် ကျွန်တော် ပြောချင်သည့် အဓိပ္ပါယ်သို့ မရောက်ဘဲ ဖြစ်သွားပေမည်။ ပြည့်တန်ဆာ တဦးအား ချဉ်းကပ်ရမည့် သင့်လျှော်သော နည်းလမ်းကို ပြောရမည် ဆိုက ရုပ်ရှင်သွားကြည့် သူ တဦးလို စိတ်ထား နိုင်ရမည်။ ရုပ်ရှင်ရုံ ထဲ ထိုင်ခုံတွင် ကျောမီ ထိုင်ရင်း ဇာတ်လမ်းဇာတ်ကွက် များ သည် အပြင် တွင် မဖြစ်နိုင်ဟုသော မယုံကြည်မှု ကို ဖျောက်ထား နိုင်မှ ဖြစ်ပေမည်။ လက်မှတ်ဖိုး ပေးပြီး ကြည့်နေရင်းက ပိတ်ကားပေါ်ရှိ လူတသိုက်သည် ဟန်ဆောင် ပန်ဆောင် လုပ်ပြနေသည်ဟု ရှုမြင်ပါက ငွေကုန်သည်သာ အဖတ်တင်ပြီး မိုက်မဲရာ ကျမည်သာ ဖြစ်သည်။ ထို့အတွက် မြင်နေသမျှ ကို တံလျှပ်ကို ရေထင်သည့် ရွှေသမင်လို စိတ်ကို နှစ်ပြီး ယုံနိုင်မှ ဖြစ်ပေမည်။
ဥပမာ ဆိုရက အရွယ်ရောက်ပြီး သူ တဦးသည် နဖူးတွင် ချိုတချောင်း ပေါက်နေသော ဒဏ္ဍာရီ လာ unicorn ကို အပြင်တွင် တကယ် မရှိဟု ဆိုကာ လှောင်ပြောင် တတ်သူ တဦးသည် ရုံထဲ ရောက်လျှင်ထိုထက်ပို၍ မဖြစ်နိုင်သည့် သတ္တဝါ များကို ကြည့်ပြီး မျက်ရည်လည်ရွှဲ နှင့် ဖြစ်နေရပေလိမ့်မည်။
မထင်မရှား ဆိပ်ကမ်းများ၊ ညစ်ပတ် နံစော်နေသော အရက်ဆိုင်များ၏ အမှောင်ရိပ်များထဲ တွင်သာ တွေ့နိုင်သော်လည်း သူတို့၏ ရင်ခုံသံများက ရွှေနှလုံးသား မှ ထွက်ပေါ်လာသည်ဟု ဆိုရိုး ရှိခဲ့ဖူးသည်၊ သို့သော် သေချာပေါက် ပြောနိုင်သည်က ပြည့်တန်ဆာ တယောက်တွင် ရွှေနှင့် လုပ်ထားသည့် အရာမျိုး ရှိနေသည် ဆိုလျှင်ပင် သေချာသည်က သူမ၏ နှလုံးသား တော့ မဟုတ်၊ ဤသည်ကို မယုံကြည်သူများက သူတို့၏ စိတ်ရင်းကောင်းဖြင့် ပြောဆိုခဲ့မှု များကို ဂုဏ်ပြုသင့်သည် ဆိုကာ ပြောနေခြင်းမျိုးဟုသာ ဆိုရမည် ဖြစ်သည်။
ယခု သုံးယောက်က ကခြေသည် များဟု ပြော၍ရ ပြီး အလေးအနက် လေ့လာကြည့်ခြင်းမျိုး သို့မဟုတ်က ယခင်က တွေ့ခဲ့ဖူးသည့် နမူနာများ အရရော၊ လက်လှမ်းသင့်ရာ စစ်တမ်းကောက်ခြင်း မျိုး ဖြင့် ဆိုက မြို့တော် နှင့် အနီးတဝိုက်ရှိ ပြည့်တန်ဆာများ၏ ၇၀ သို့မဟုတ် ၈၀ ရာခိုင်နှုန်းထဲ ပါသည်ဟု ပြော၍ မရ၊ ထောင်ပေါင်းများစွာ ရှိသော ပြည့်တန်ဆာများသည် ဆင်းရဲကြပြီး စာပင် မတတ်ကြသည့် ကျေးလက်ဒေသ များမှ ဖြစ်သည်။ ၎င်းတို့ အဖို့က အခြား အသက်မွေး ဝမ်းကျောင်း လုပ်ငန်းများလည်း မရှိကြ၍ အသက် ဆယ့်ကိုးနှစ်သား အမေရိကန် စစ်သား တဦး၏ သားမွှေး အင်္ကျီ တွင် သန်း တကောင်လို တွယ်ကပ်နေရခြင်းမျိုးသာ ဖြစ်သည်။
ထိုစစ်သား၏ ဘောင်းဘီထဲတွင် ဒေါ်လာ အလိပ်လိုက် ထည့်ထားပြီး သူ၏ အရွယ်ရောက်စ ဥနှောက်သည်လည်း အာရှ နိုင်ငံများသို့ ရောက်လာကြသည့် အခြား အနောက်နိုင်ငံသားများလိုပင် အသည်းရောင် အသားဝါ ပိုး ကူးစက်ထားဟန် ရှိသည်။ သို့သော် အမျိုးသမီးများ နှင့် ပတ်သက်လျှင် Clark Kent မဟုတ် တော့ ဘဲ ဆူပါမင်း ဖြစ်နေသည်ကို တအံတဩ ရိပ်စားမိလာပြီး ကျေနပ်နေသည်။
ကျွန်တော် တို့ နိုင်ငံလေးသည် စိုက်ပျိုးရေး ဖြစ်ထွန်းသော်လည်း ဆန်စပါး၊ ရာဘာ၊ ခဲမဖြူ တို့ မည်မည်ရရ စိုက်ပျိုးထုတ်လုပ်နိုင်ခြင်း မရှိဘဲ ပြည့်တန်ဆာ များကိုကား နှစ်စဉ် မွေးထုတ်ပေးလျက် ရှိသည်။ ရော့ခ် သီချင်း ဟူ၍ တခါဖူးမျှ ကြားဖူး နားဝ ပင် မရှိသော မိန်းကလေး များအားလည်း တူဒူး ဘား တွင် "ခေါင်း" လုပ်သူများက ဖင်ပုတ်၊ ရင်ပုတ် နှင့် စင်ပေါ်သို့ အတင်းတွန်းတင်ပြီး ကခိုင်း တတ်ကြသည်။
ကျွန်တော်အဖို့ကတော့ အမေရိကန် မဟာဗျူဟာ စီမံချက် ရေးဆွဲသူများသည် ရည်ရွယ်ချက်ရှိရှိဖြင့် ကျေးရွာများကို ဖျက်ဆီးပြီး ရွာသူ များအား မြို့ပေါ်သို့ ရောက်လာရန် စီမံခဲ့ကြသည်ဟု စွပ်စွဲရတော့မည် ဖြစ်သည်။ ထိုမိန်းကလေးများက အခြား ရွေးစရာ လမ်းလည်း မရှိတော့၍ ၎င်းတို့ ရွာများကို စက်သေနတ် နှင့် ပစ် ဗုံး နှင့် ကြဲ၊ မီးရှို့ ဖျက်ဆီး နေသူ များကို လိင် ပိုင်း ဆိုင်ရာ ဖျော်ဖြေ ပေးနေကြရသည် မဟုတ်ပါလား။
ဒေသခံများကို ပြည့်တန်ဆာ များ ဖြစ် အောင် ဖန်တီးပေးရခြင်းသည် နိုင်ငံ တနိုင်ငံ ကို သိမ်းပိုက်ထားသည့် စစ်သားများ အတွက် အလုပ်အကျွေး ပြုရန်သာ ဖြစ်သည်သု ကျွန်တော် သတိထားမိနေသည်။ အမေရိကန် စမောဗီးလ် ရှိ ဇနီးများ၊ အမ ညီမ များ၊ သမီးရည်စားများ၊ မိခင်များ၊ တရားဟော ဆရာများ၊ နိုင်ငံရေး သမားများ သည် ထိုသို့ ဘေးထွက် အနိဌာရုံ များကို လွတ်မြောက်ရေး အတွက် ကာကွယ်ဖို့ ဆိုကာ မသိချင်ယောင် ဆောင် လျစ်လျူ ရှုပြီး ကြွေ ဖယောင်း များ အလား ဖြူ ဖွေး လှပ နေသော သွားများ ပေါ်အောင် ပြုံးရင်း ကြိုဆိုခဲ့ကြသည်။ ရောဂါရလာပါကလည်း ကုသပေးဖို့ အမေရိကန်၏ ကောင်းခြင်း များစွာထဲက တခုအပါအဝင် ဖြစ်သည့် ပင်နီစလင် က အဆင်သင့် ရှိနေပြီး ဖြစ်သည်။
ယခု ကျွန်တော်တွေ့လာရသော ကောင်မလေး သုံးယောက် သည်ကား နောက်ထပ် ကောင်းခြင်းများထဲက ဆိုးဆိုးဝါးဝါး ဟု ဆိုရမည့် တခု ထုတ်ပြလာသည်။ သူတို့သည် ကျွန်တော် နှင့် ဘွန် ကိုသာမက အိပ် နေရာ မှ နိုးလာပုံရ သောသစ်ကြားသီး ရောင် နှုတ်ခမ်းမွှေး နှင့် အမေရိကန် အိမ်ထောင်သည် အမျိုးသား ကို ပါ မကျန် အရှက်ကင်းမဲ့စွာ ကလူကျီဆယ် လာကြသည်။ နှစ်ယောင်စလုံးကလည်း အနီးရှိ ၎င်းတို့ ဇနီးများက အသံတိတ်နေသည်ကို သတိထားမိကြပုံ ရပြီး အတတ်နိုင်ဆုံး အင်းမလှုပ် အဲမလှူပ် နှင့် ငြိမ်ကုပ်ကာ မျက်နှာ မသာမယာ ဖြစ်နေကြသည်။
ကျွန်တော် အဖို့ကား စိတ်လွတ် ကိုယ်လွတ် ပျော်ပျော်ကြီး သူတို့နှင့် ဟေးလားဝါးလား လုပ်နိုင်ခဲ့သည်။ တချိန်တည်း မှာပင် သူတို့တွင် ကျွန် တော် နှလုံးသား ကိုသာ မက အထူးသဖြင့် ကျွန်တော် ဘဏ်ငွေစာရင်း ကိုပါ ထိခိုက်သွားအောင် လုပ်နိုင်စွမ်း ရှိသည့် နောက်ခံဇာတ် ကြောင်း များ ကိုယ်စီ ရှိနေကြသည်ကို ပါ သတိထား နေရသည်။
ကျွန်တော် တွင်ကော သူတို့လို နောက်ခံ ဇာတ်ကြောင်း များ ရှိမနေဘူးလား။ ဇာတ်သမား များကတော့ ကပြ အသုံးတော််ခံရင်း သူတို့တွင်ရှိ ကြေကွဲစရာများကို တစိတ်တပိုင်း မေ့ပျောက်အောင် လုပ်နိုင်သည့် စရိုက် လက္ခဏာ များ ရှိတတ်သည်ကို ကျွန်တော် ကောင်းစွာ ယဉ်ပါးခဲ့ပြီး ဖြစ်သည်။
အခုလို အခြေအနေမျိုး တွင် သူတို့ နှင့် ဟေးလားဝါးလား လုပ်ပြီး အားလုံး စိတ်ထဲ တကယ်တမ်း ပျော်လာသည်အထိ ဟန်ဆောင် နိုင်ခွင့် ပေးခြင်းသည် သာ အကောင်းဆုံး ဖြစ်သည်။ ပြီးတော့ သူတို့ကို ကြည့်နေရခြင်းသည်ပင် အပန်းဖြေစရာ တခုလို ဖြစ်နေသည်။